1-2. Boasa susa dihilala Jesus?

ANDORANG SO mate Jesus, susa do dihilala ibana. Alana diboto Jesus do na laho disiksa ibana jala pamateon ni angka musuna. Alai ndang ala na naeng mate umbahen na marsak ibana. Holong do rohana tu Jahowa jala lomo rohana mambahen las roha ni Jahowa. Alana, na pabadiahon goar ni Jahowa do ibana molo setia. Holong do muse roha ni Jesus tu jolma. Diboto ibana do, molo setia ibana, boi ma angka jolma marpangkirimon laho mangolu salelengna.

² Nang pe godang sitaonon na diadopi Jesus, alai tongtong do dame dihilala ibana. Didok ibana tu angka apostelna, “Hulehon do hadameonki tu hamu.” (Joh. 14:27) Dihilala Jesus do ‘hadameon ni Debata’, ala solhot parale-aleonna dohot Jahowa. Hadameon i mangurupi Jesus asa unang marsak.​—Plp. 4:6, 7.

3. Aha do na laho taulas di parsiajaran on?

³ Tontu ndang songon Jesus sitaonon na taadopi. Alai godang do hasusaan na taadopi ala mangihuthon ibana. (Mat. 16:24, 25; Joh. 15:20) Sipata, olo do susa tahilala. Alani i, songon dia ma carana asa unang sai marsak hita jala tongtong dame? Laho taulas ma adong tolu na diulahon Jesus saleleng di tano on ibana jala songon dia hita boi maniru ibana tingki mangadopi hasusaan.

4. Hombar tu 1 Tessalonik 5:17, paboa ma contoh na patuduhon na jotjot do Jesus martangiang andorang so mate ibana.

⁴ Jaha 1 Tessalonik 5:17. Andorang so mate Jesus  jotjot do ibana martangiang. Umpamana, tingki dipatandahon Jesus ari parningotan tu hamamatena, ditangiangkon ibana do roti dohot anggur na diparade tingki i. (1 Kor. 11:23-25) Dung sae Jesus dohot angka siseanna mangarayahon Paska, martangiang do nasida. (Joh. 17:1-26) Dung sahat nasida di Dolok Jetun di borngin i, marulak-ulak do Jesus martangiang. (Mat. 26:36-39, 42, 44) Tingki naeng mate pe Jesus di hau partinaonan, martangiang do ibana. (Luk. 23:46) Martangiang do Jesus tu Jahowa taringot sude na masa di ari parpudi andorang so mate ibana.

5. Boasa ndang boi martahan angka sisean ni Jesus?

⁵ Boi do Jesus martahan mangadopi angka sitaonon ala mangasahon Jahowa marhite tangiang. Alai tingki i, ndang tongtong martangiang angka siseanna. Ujungna, ndang boi nasida martahan tingki adong sitaonon. (Mat. 26:40, 41, 43, 45, 56) Tingki mangadopi sitaonon, hita pe boi do tongtong setia molo maniru Jesus jala “sai martangiang”. Alai aha do na boi tatangiangkon?

6. Songon dia haporseaon boi mangurupi hita asa tongtong dame?

⁶ Tingki martangiang tu Jahowa, boi do tadok “tambai ma haporseaonnami”. (Luk. 17:5; Joh. 14:1) Ingkon togu do haporseaonta, alana sai diela-ela Sibolis do angka na mangihuthon Jesus. (Luk. 22:31) Alai, songon dia do haporseaon boi mangurupi hita asa tongtong dame nang pe adong sitaonon? Molo nunga taulahon sian nasa gogonta laho  mangadopi sitaonon, haporseaon mambahen pos rohanta na laho urupan ni Jahowa do hita. Ala porsea hita tu Ibana, gabe dame ma pingkiran dohot rohanta.​—1 Ptr. 5:6, 7.

7. Sian pengalaman ni si Robert, aha do na boi diparsiajari hamu?

⁷ Tangiang boi do mangurupi hita asa dame roha dohot pingkiranta nang pe mangadopi angka hasusaan. Parrohahon ma pengalaman ni sahalak sintua na margoar si Robert naung marumur lobi 80 taon. Didok ibana, “Poda na disurat di Pilippi 4:6, 7 mangurupi ahu mangadopi angka hasusaan di ngolungku. Susa do ahu di parhepengon jala sanga do ndang sintua be ahu.” Aha do na mangurupi si Robert asa tongtong dame? Didok ibana, “Tingki marsak, pintor martangiang do ahu. Huboto do, molo jotjot martangiang, gabe lam dame do huhilala.”

8. Songon na didok di Johannes 8:29, aha do na mambahen tongtong dame roha dohot pingkiran ni Jesus?

⁸ Jaha Johannes 8:29. Nang pe mangadopi godang sitaonon, boi do tongtong dame roha dohot pingkiran ni Jesus. Tingki susa pe, tongtong do unduk Jesus tu Amana. Ala holong rohana tu Amana, tongtong do diharingkothon ibana panombaon tu Jahowa di ngoluna. Andorang so tu tano on Jesus, nunga gabe “pande” ibana di lambung ni Debata. (Poda 8:30) Tingki di tano  on pe, tongtong do Jesus marbarita paboahon goar ni Jahowa. (Mat. 6:9; Joh. 5:17) Tontu angka ulaon on mambahen las roha ni Jesus.​—Joh. 4:34-36.

9. Molo talehon gumodang tingki laho marbarita, songon dia do i mangurupi asa tongtong dame roha dohot pingkiranta?

⁹ Tatiru ma Jesus marhite unduk tu Jahowa jala ‘sai marsitutu ma mangulahon godang ulaon ni Tuhan i’. (1 Kor. 15:58) Molo talehon gumodang tingki di ulaon marbarita, gabe ndang sai tapingkiri be hasusaanta. (Ul. 18:5) Umpamana, jotjot do hita pajumpang dohot halak na lobi susa sian hita. Tingki marsiajar nasida mangkaholongi Jahowa jala mangulahon na diparsiajari, gabe lam denggan ma ngolu ni nasida jala marlas ni roha. Tingki mangida i, gabe lam pos do rohanta na disarihon Jahowa do hita. Jala on boi mangurupi asa tongtong dame roha dohot pingkiranta. Sahalak donganta borua na marmetmet ni roha jala marsak mandok, “Tingki hulehon godang tingkingku laho marbarita, gabe dame jala lam las do rohangku. Jala gabe lam solhot do huhilala tu Jahowa tingki laho ahu marbarita.”

10. Sian pengalaman ni si Brenda, aha do na boi taparsiajari?

¹⁰ Rimangi ma muse pengalaman ni donganta na margoar si Brenda. Ibana dohot boruna marsahit na posi. Alani i, gabe gale ma dagingna jala ingkon markursi roda. Sipata, marbarita do ibana sian jabu tu jabu. Alai umjotjot do ibana marbarita marhite surat. Didok ibana, “Huboto do ndang na laho malum be sahithon di tingki saonari on, alai tongtong do las rohangku laho marbarita. Ndang sai hupingkiri be sahithon. Gariada, hupingkiri do songon dia mangurupi angka halak tingki marbarita. On mambahen ahu tongtong mangingot pangkirimon di ari na naeng ro.”

11-13. (a) Songon dia angka apostelna dohot na asing tongtong mangurupi Jesus? (b) Sian na diulahon angka donganna i, aha do labana di Jesus?

¹¹ Godang do hasusaan na diadopi Jesus. Alai tongtong do rap angka apostelna dohot ibana. Nasida songon na dipaboa di buku poda na mandok, “Adong do dongan na umburju sian hahaanggi.” (Poda 18:24, Bibel siganup ari) Arga do di Jesus angka dongan sisongon i. Tingki di tano on, ndang adong adek ni Jesus na manomba Jahowa. (Joh. 7:3-5) Gariada, didok nasida do Jesus i na rintik. (Mrk. 3:21) Alai di borngin andorang so mate, didok Jesus do tu angka apostelna, “Hamu do na sai tongtong rap dohot ahu tingki tarunjun ahu.”​—Luk. 22:28.

¹² Hea do angka apostel ni Jesus mangulahon na sala. Nang pe songon i, ndang hasalaan ni nasida i na sai diingot Jesus. Alana diida Jesus porsea do nasida tu ibana. (Mat. 26:40; Mrk. 10:13, 14; Joh. 6:66-69) Di borngin na parpudi andorang so diuhum mate, didok Jesus do tu angka apostelna na setia i, “Dohononku ma hamu donganku, ai nunga hupaboa tu hamu sude naung hubege sian Damang i.” (Joh. 15:15) Tongtong do dipatogu angka donganna i roha ni Jesus. Angka na diulahon nasida tingki rap marbarita dohot Jesus, mambahen las situtu rohana.​—Luk. 10:17, 21.

¹³ Asing ni angka apostel, adong do muse baoa dohot borua dongan ni Jesus na mangurupi ibana tingki marbarita  manang di tingki na asing. Adong do na manogihon ibana tu jabu ni nasida dohot paradehon sipanganon. (Luk. 10:38-42; Joh. 12:1, 2) Na asing, rap laho dohot Jesus jala rade mangalehon na adong di nasida. (Luk. 8:3) Ala burju Jesus, dapotna ma angka dongan na burju. Dibahen Jesus do na denggan tu angka donganna i jala ndang dipangido ibana lobi sian na boi diulahon nasida. Nang pe sempurna Jesus, alai diargai ibana do na dibahen angka donganna na so sempurna. Tontu angka donganna i mambahen tongtong dame roha dohot pingkiran ni Jesus.

14-15. Songon dia do asa boi tadapot dongan na burju, jala songon dia nasida boi mangurupi hita?

¹⁴ Dongan na burju mangurupi hita asa tongtong setia tu Jahowa. Asa tadapot dongan na burju, ingkon gabe dongan na burju do hita. (Mat. 7:12) Umpamana, didok di Bibel asa taparrohahon angka dongan na porlu diurupi. (Eps. 4:28) Adong do diida hamu dongan di huria na porlu diurupi? Molo adong angka dongan naung matua manang na marsahit, boi do diurupi hamu nasida laho manuhor angka na porlu di nasida? Boi do hamu mangalehon sipanganon tu angka dongan na susa di parhepengon? Manang olo do hamu mangurupi angka donganta na so mamboto carana mamangke jw.org^® manang JW Library^®? Molo ringgas hita mangurupi na asing, gabe tamba do las ni rohanta.​—Ul. 20:35.

 ¹⁵ Dongan na burju, rade do mangurupi hita tingki susa. Jala mangurupi hita asa tongtong dame roha dohot pingkiranta. Dongan na burju, sabar do manangihon tingki tapaboa na di bagasan rohanta. Songon si Elihu na sabar manangihon arsak ni roha ni si Job. (Job 32:4) Ndang boi tapangido nasida na mambahen keputusan di hita. Alai, tangihon ma poda sian Bibel na dipaboa nasida. (Poda 15:22) Serep do roha ni Raja Daud tingki diurupi angka donganna ibana. Hita pe, olo ma diurupi tingki adong dongan na rade laho mangurupi. (2 Sam. 17:27-29) Tutu, silehon-lehon sian Jahowa do angka dongan sisongon i.​—Jak. 1:17.

16. Hombar tu Pilippi 4:6, 7, aha do na boi mangurupi hita asa mandapot hadameon? Patorang ma.

¹⁶ Jaha Pilippi 4:6, 7. Didok Jahowa, holan “marhite Kristus Jesus” do boi tadapot hadameon. Boasa? Alana, molo porsea hita jala taboto aha na diulahon Jesus, on boi mambahen dame roha dohot pingkiranta. Umpamana, marhite tobusan ni Jesus boi do disesa sude dosanta. (1 Joh. 2:12) Tarapul do rohanta ala mamboto i! Saonari, nunga gabe Raja Jesus di Harajaon ni Debata. Laho padengganonna do portibi naung disegai Sibolis on. (Jes. 65:17; 1 Joh. 3:8; Pgk. 21:3, 4) Pangkirimon na mansai denggan do on! Dilehon Jesus do tugas tu hita laho marbarita. Taboto, ndang mura mangulahon on. Alai marjanji do Jesus sai urupanna do hita sahat tu ujung ni hasiangan on. (Mat. 28:19, 20) On mambahen hita gabe barani! Pos ni roha, pangkirimon, dohot habaranion mambahen tongtong dame roha dohot pingkiranta.

17. (a) Songon dia carana asa boi hita tongtong dame? (b) Songon na disurat di Johannes 16:33, aha do na boi tatiru sian Jesus?

¹⁷ Songon dia carana asa tongtong dame nang pe mangadopi hasusaan? Tiru ma Jesus. Na parjolo, tongtong ma martangiang aha pe na masa. Na paduahon, unduk ma tu Jahowa jala ringgas ma marbarita, nang pe sipata maol mangulahon i. Na patoluhon, unang ma maila mangido asa diurupi angka dongan. Hasilna, hadameon ni Debata boi manjaga roha dohot pingkiranta. Songon Jesus, boi ma taadopi angka hasusaan i.​—Jaha Johannes 16:33.