1, 2. (a) Aha do partalian ni holong dohot haporseaon? (b) Sungkunsungkun aha do na laho taulas?

MARJANJI do Jahowa laho mamasumasu naposoNa na marsihohot. On patuduhon holong ni Jahowa tu hita, jala tahaholongi Ibana ”ala Ibana jumolo mangkaholongi hita”. (1 Joh. 4:19) Molo lam togu holongta tu Jahowa, haporseaonta pe lam togu ma jala pos rohanta na lehonon ni Jahowa do upa tu angka na hinaholonganNa.​—Jaha Heber 11:6.

² Jahowa do silehon upa! Ringkot do on laho patuduhon ise Ibana jala aha na diulahon Ibana. Alani i, molo pos rohanta na lehonon ni Jahowa upa tu halak na marsitutu mangalului Ibana, on patuduhon hita marhaporseaon situtu. Boasa songon i? Alana, ”haporseaon i, pos ni roha do i di angka sihirimon”. (Heb. 11:1) Haporseaon lapatanna, marpos ni roha na pasupasuon ni Debata do angka na marsihohot. Alai, songon dia do pangkirimon i  marlaba tu hita? Songon dia do Jahowa mangalehon upa tu naposoNa najolo dohot saonari? Taulas ma.

3. Janji aha do na disurat di Maleaki 3:10?

³ Marjanji do Jahowa laho mangalehon upa tu naposoNa na marsihohot. Lomo do rohaNa asa talehon na dumenggan tu Ibana jala porsea na pasupasuonNa do hita. Didok Jahowa, ”Uji hamu ma Ahu, gabe idaonmuna ma bungkaonKu angka janjela ni langit i jala usehononKu ma tu hamu mansai godang pasupasu.” (Mal. 3:10, Bibel siganup ari) Tapatudu ma hamauliateonta tingki mangulahon parenta on laho manguji Jahowa.

4. Boasa boi hita porsea tu hata ni Jesus di Mateus 6:33?

⁴ Marjanji do Jesus tu siseanna, molo dijumolohon nasida Harajaon ni Debata, diurupi Debata ma nasida. (Jaha Mateus 6:33.) Didok Jesus pe i, ala diboto ibana sai saut do janji ni Debata. (Jes. 55:11) Alani i boi pos rohanta, molo marhaporseaon tu Jahowa, diingot Ibana ma janjiNa, ”Sandok na so tadingkononku do ho; sandok na so pasombuonku do ho!” (Heb. 13:5) Janji ni Jahowa mangurupi hita porsea tu hata ni Jesus di Mateus 6:33.

5. Boasa alus ni Jesus tu si Petrus patoguhon hita sude?

⁵ Sada tingki, disungkun si Petrus ma Jesus, ”Saluhut do hutadingkon  hami mangihuthon Ho. Aha ma balos ni i tu hami?” (Mat. 19:27) Ndang muruk Jesus ala disungkun si Petrus songon i. Alai didok Jesus tu siseanna, dilehon do upa tu nasida molo marsitutu. Rap mamarenta ma annon angka apostel dohot angka na miniahan raphon Jesus di surgo. Alai, didok Jesus saonari pe adong do upa, ”Ganup na manadingkon hahaanggina, ibotona, amana, inana, anakkonna, haumana manang jabuna pe ala ni Goarhu, manjalo ma i marlompitlompit, angkup ni i teanonna hangoluan na saleleng ni lelengna i.” (Mat. 19:29) Saonari pe, sude sisean ni Jesus mandapot ama, ina, hahaanggi, dohot ianakhon di huria jala ummarga do i sian aha naung talehon tu Harajaon ni Debata.

6. Boasa marjanji Jahowa mangalehon upa tu naposoNa?

⁶ Asing ni mangkilala pasupasu na palashon roha saonari, hita pe maimaima do tu pasupasu di ari na naeng ro. (1 Tim. 4:8) Marjanji do Jahowa laho mangalehon upa tu naposoNa, jala on mangurupi hita martahan tingki susa. Molo pos rohanta tu Jahowa ”silehon upa tu angka na manjalahi Ibana”, boi ma hita tongtong marsihohot.​—Heb. 11:6.

7. Boasa pangkirimonta songon sao?

⁷ Tingki marjamita Jesus di Dolok, didok ibana, ”Las ma rohamuna jala marolopolop, ai godang do umpamuna di banua ginjang i, ai songon i do dipaburuburu angka panurirang na jumolo sian hamu.” (Mat. 5:12) Pigapiga naposo ni Debata mandapot upa tu surgo. Angka na asing manjalo upa laho mangolu salelengna di tano on. On mambahen hita marlas ni roha. (Ps. 37:11; Luk. 18:30) Alai, pangkirimonta boi ”songon sao [jangkar] di tondinta . . . na hot jala na togu”. (Heb. 6:17-20) Songon sao na manjaga kapal asa hot tingki adong habahaba, pangkirimonta na togu pe mangurupi hita asa unang marsak. On mangurupi hita asa togu di tingki susa.

8. Songon dia do pangkirimonta mambahen hita unang sai holsoan?

⁸ Pangkirimonta mangurupi hita asa unang sai holsoan. Songon miak na hushus na mambahen lambok kulitta, janji ni Debata mambahen hita asa unang holsoan. Las do rohanta mamboto na disarihon Jahowa do hita molo tapasahat holso ni rohanta tu Ibana. (Ps. 55:23) Pos ma rohanta, ”tarpatupa Ibana do andul lumobi sian na tapangido manang tapingkiri”. (Eps. 3:20) Urupan ni Jahowa do hita ”lumobi sian na tapangido”!

9. Boasa pos rohanta laho mandapot pasupasu sian Jahowa?

 ⁹ Asa boi mandapot upa, ingkon porsea do hita tu Jahowa jala unduk tu parentaNa. Didok si Musa tu bangso Israel, ”Buas do pasupasuon ni Jahowa ho di tano silehonon ni Jahowa, Debatam tu ho soluhonmu bahen partalianmu. Asal ditangihon ho situtu soara ni Jahowa, Debatam, huhut mangaringkoti mangulahon sandok tona on, angka na hutonahon tu ho sadarion. Ai pasupasuon ni Jahowa, Debatam do ho.” (5 Mus. 15:4-6) Pos do rohamu na pasupasuon ni Jahowa hamu molo tongtong marsihohot? Adong do alana na mambahen pos rohamuna.

10, 11. Songon dia do Jahowa mangalehon upa tu si Josep?

¹⁰ Bibel disurat laho mangurupi hita. Di Bibel, dipaboa do songon dia Debata mangalehon upa tu naposoNa di tingki naung salpu. (Rom 15:4) Si Josep ma sada sitiruon di hita. Mulana, digadis hahana do ibana gabe hatoban. Dung i, tungganeboru ni si Potipar mandok na so tutu taringot ibana jala dipenjara ma ibana di Mesir. Tingki di penjara si Josep, gabe dao do ibana sian Jahowa? Ndang! Bibel mandok, ”Didongani Jahowa do si Josep i, jala asi rohana mida ibana,” jala ”didongani Jahowa ibana, jala ditumpak manjadi na niulana i”. (1 Mus. 39:21, 23) Nang pe manaon hasusaan, sabar do si Josep paimahon pangurupion sian Jahowa.

¹¹ Dung si Firaun paluahon si Josep sian penjara, si Josep ma halak na umsangap dungkon si Firaun di Mesir. (1 Mus. 41:1, 37-43) Dung adong dua ianakhon ni si Josep, ”dibahen si Josep ma goar ni buhabajuna i: Si Manasse, ai lupa do ahu, dibahen Debata di sude pardangolanki, ro di bagas ni damang i sudena, ninna. Dibahen goar ni na paduahon i: Si Epraim: Ai gabe do ahu ditumpak Debata di tano pardangolanki, ninna”. (1 Mus. 41:51, 52) Dilehon Jahowa do upa ala marsihohot si Josep, jala boi ma ibana paluahon halak Israel dohot halak Mesir sian haleon. Jala diboto si Josep, Jahowa do na mangalehon upa jala mamasumasu ibana.​—1 Mus. 45:5-9.

12. Songon dia do Jesus tongtong marsihohot tingki diuji?

¹² Tongtong do Jesus Kristus unduk tu Debata nang pe godang sitaononna, jala dilehon Jahowa do upa tu ibana. Aha do na mangurupi Jesus tongtong marsihohot? Bibel mandok, ”Jesus, na manaonhon [haporsuhon] i, singkat ni las ni roha, tohapna i hian, so dietong i hailaon.” (Heb. 12:2) Marlas ni roha do Jesus ala boi pabadiahon goar ni Debata. Jala dilehon Jahowa do upa tu Jesus dohot godang hak  na sumurung. Bibel paboahon, Jesus ”gabe hundul di siamun ni habangsa ni Debata!” Didok muse, ”Dipatimbo Debata Ibana jala dibasabasahon tu Ibana Goar na sumurung asa nasa goar.”​—Plp. 2:9.

13, 14. Songon dia do pangkilalaan ni Jahowa taringot na taulahon tu Ibana?

¹³ Pos rohanta na diargai Jahowa do sude na taulahon laho manomba Ibana. Diboto Jahowa do, sipata ndang pos rohanta tu dirinta sandiri. Disarihon do hita tingki holsoan taringot parkarejoan manang taringot keluarga. Jala diantusi Ibana do, tingki marsahit manang marsitaonon hita, ndang boi be godang na taulahon di ulaon parbaritaon. Nang pe adong sitaononta, pos ma rohanta diargai Jahowa do molo tongtong hita marsihohot.​—Jaha Heber 6:10, 11.

¹⁴ Ingot ma muse, Jahowa do ”sitangihon tangiang”. Pos ma rohanta, tingki martangiang hita tangihononNa do hita. (Ps. 65:3) ”Ama Parasiroha situtu jala Debata, Sipangapul na sumurung” mangalehon sude na tahaporluhon asa tongtong solhot tu Ibana. Sipata, olo do Ibana mangurupi hita marhite dongan sahaporseaon. (2 Kor. 1:3) Las do roha ni Jahowa molo burju hita tu na asing. ”Na pasali Jahowa do manang ise na mardenggan basa tu na pogos, jala Ibana mamaloshon denggan basana i tu ibana.” (Poda 19:17; Mat. 6:3, 4) Songon na pasali Jahowa do hita molo burju hita jala taurupi angka dongan sahaporseaonta. Marjanji do Ibana mangalehon upa molo tapatudu haburjuon.

15. Aha do upa na dipaima hamu? (Ida gombar di mula ni parsiajaran.)

¹⁵ Halak Kristen na miniahan marpangkirimon laho mandapot ”tumpal [mahkota] hatigoran”, upa sian Jesus. (2 Tim. 4:7, 8) Alai, ndang na gabe so mararga hamu di Debata nang pe asing pangkirimonmuna. Marjuta birubiru na asing maimaima tu upa di ari na naeng ro, i ma hangoluan salelengna di tano on. Disi, ”dapotan angka las ni roha” ma nasida.​—Joh. 10:16; Ps. 37:11, Bibel siganup ari.

16. Hata pangapulion na songon dia do na tadapot sian 1 Johannes 3:19, 20?

¹⁶ Sipata, olo do didok rohanta ndang godang na boi taulahon di ulaon partondion, manang olo do marsak hita mamingkirhon pangkilalaan ni Jahowa taringot ulaonta. Olo do ra didok rohanta, ndang tama hita manjalo upa. Alai, unang ma lupa hita ”umbalga do Debata sian rohanta jala diboto saluhutna”. (Jaha 1 Johannes 3:19, 20.) Molo tasomba Jahowa alani haporseaon dohot holongta tu Ibana, pos ma rohanta lehononNa do upa tu hita, nang pe didok rohanta ndang mararga na taulahon.​—Mrk. 12:41-44.

17. Aha do upa na tadapot saonari?

¹⁷ Nang pe hita mangolu di tingki parpudi pamarentaon ni Sibolis, sai dipasupasu Jahowa do naposoNa.  Lomo do roha ni Debata asa tadapot godang parbinotoan dohot hadameon ala nunga gabe bagian sian dongan sahaporseaon di liat portibi on. (Jes. 54:13) Songon na dijanjihon Jesus, dilehon Jahowa do upa tu hita saonari, i ma angka dongan sahaporseaon di liat portibi on na mangkaholongi hita. (Mrk. 10:29, 30) Jala, angka na marsitutu mangalului Debata mandapot upa, i ma hadameon dohot las ni roha.​—Plp. 4:4-7.

18, 19. Songon dia do pangkilalaan ni naposo ni Jahowa taringot upa na dijalo nasida?

¹⁸ Sude naposo ni Jahowa di liat portibi on nunga mandapot upa sian Ibana. Umpamana, si Bianca sian Jerman mandok, ”Ndang boi dope sian saluhut rohangku mandok mauliate tu Jahowa ala diurupi ahu tingki marsak, jala didongani ahu ganup ari. Portibi on nunga sursar. Alai ala jonok ahu tu Jahowa, ndang mabiar be ahu. Tingki hupillit laho palashon rohaNa, mansai godang do pasupasu na dilehon tu ahu.”

¹⁹ Pingkirhon ma muse si Paula di Kanada na marumur 70 taon. Ibana hona spina bifida, i ma kelainan tulang punggung. Didok ibana, nang pe maol ibana bergerak, tongtong do diulahon ibana ulaon di partondion. Didok ibana muse, ”Marbarita na uli do ahu marhite telepon dohot kesaksian tidak resmi. Asa boi tongtong togu, husurat do pigapiga ayat dohot hatorangan sian publikasinta asa boi jotjot hujaha. Hudok ma i ’Catatan na Patoguhon Ahu’. Molo taingot janji ni Jahowa, ndang jotjot be hita marmetmet ni roha. Rade do Jahowa mangurupi hita, ndang soal songon dia situasinta.” Ra, imbar do situasimuna sian si Bianca manang si Paula. Alai, boi do dipingkirhon hamu songon dia cara ni Jahowa mangalehon upa tu hamu dohot tu na asing. Mansai denggan do molo mamingkirhon songon dia Jahowa mangalehon upa tu hamu saonari dohot di ari na naeng ro!

20. Aha do na tapaima molo tongtong hita marsihohot manomba Jahowa?

²⁰ Unang lupa, molo martangiang hamu, ”balga do upa ni i”. Pos ma rohamu, molo ”tarula hamu lomo ni roha ni Debata”, boi ma ”dapot bagabaga i”. (Heb. 10:35, 36) Alani i, tongtong ma tapatogu haporseaonta jala marhiras ni roha ma hita manomba Jahowa. Pos ma rohanta, lehonon ni Jahowa do upa tu hita!​—Jaha Kolosse 3:23, 24.