1, 2. Songon dia do Rom 5:12 mangurupi hita?

ROM 5:12 mandok, ”Bongot dosa i tu portibi on marhite sian sada halak jala marhitehite dosa i ro hamatean, songon i sahat hamatean i tu saluhut jolma, ala sude nasida mardosa.” On ma sada ayat na tangkas taboto jala jotjot tapangke mangurupi halak marsiajar Bibel.

² Jotjot do ayat on dipangke di buku Apa yang Sebenarnya Alkitab Ajarkan? dohot buku Aha do na Diajarhon Bibel tu Hita? Tingki taparsiajari pasal 3, 5, dohot 6 rap dohot ianakhonta manang dohot na asing, jotjot do tajaha Rom 5:12. Tapangke do ayat on mangurupi nasida mangantusi boasa ndang paradeiso be tano on, boasa tahaporluhon tobusan, jala boasa mate jolma. Alai, ayat on mangurupi hita mandok mauliate tu Jahowa ala boi hita maraleale tu Ibana. On mangurupi hita palashon roha ni Jahowa jala mangkirim tu janjiNa.

3. Aha do na ingkon taingot taringot ngolunta?

 ³ Sude hita nunga mardosa. Jotjot do taulahon na sala ganup ari. Alai, marasi ni roha do Jahowa. Diboto Ibana do ndang tipak hita, jala rade do Ibana manalpuhon hasalaanta. (Ps. 103:13, 14) Dijujui Jesus do asa tapangido hasesaan ni dosa sian Debata. (Luk. 11:2-4) Molo naung disalpuhon Jahowa hasalaanta, unang be tapaingotingot i. Taulas ma songon dia Jahowa manalpuhon hasalaanta.

4, 5. (a) Aha do na boi mangurupi hita mangantusi Rom 5:12? (b) Aha do lapatan ni asi ni roha na so tama tajalo?

⁴ Buku Rom, tarlumobi bindu 6, mangurupi hita mangantusi songon dia Jahowa manesa dosanta. Di bindu 3, taboto do sude hita nunga mardosa. Dipatorang si Paulus muse, ”Gabe dipintori do nasida dalan basabasa binahen ni asi ni rohana hinorhon ni panobusion na di bagasan Kristus Jesus.” (Rom 3:23, 24) Hata Junani na diterjemahon ’asi ni roha’, lapatanna patuduhon haburjuon tu sasahalak sian ias ni roha, jala ndang tahirim asa dibalos na tabahen i.

⁵ Sahalak sarjana mandok, hata Junani asi ni roha jotjot patuduhon aha na diulahon Debata dohot Kristus laho paluahon jolma sian dosa dohot hamatean. I do alana, Terjemahan Dunia Baru bahasa Inggris manerjemahon on gabe ”asi ni roha na so tama tajalo”. Taida ma aha naung dilehon Debata tu hita, songon dia asi ni rohaNa marlaba tu hita, jala mangalehon pangkirimon.

6. Ise do na mandapot laba sian asi ni roha ni Debata, jala songon dia?

⁶ Ala mardosa si Adam, mangkorhon ma i tu sude jolma, na mambahen nasida gabe mardosa jala mate. I do alana Bibel mandok, ”Hamatean manggomgomi, binahen ni na sada ala ni pangalaosionna.” Alai, dipatudu Jahowa do asi ni rohaNa jala dilehon dalan laho paluahon sude jolma marhite ”Jesus Kristus na sada i”. (Rom 5:12, 15, 17) ”Marhite sian pangoloion ni na Sada i gabe torop dipintori.” Boi ma nasida mandapot ”hangoluan na salelenglelengna marhite sian Jesus Kristus”.​—Rom 5:19, 21.

7. Boasa tobusan na dilehon Debata patuduhon haburjuon dohot asi ni rohaNa?

⁷ Pingkirhon ma: Sasintongna, ndang ingkon lehonon ni Jahowa AnakNa bahen tobusan di hita. Alai, dipatudu do asi ni roha marhite paradehon dalan na paluahon hita sian dosa dohot hamatean. Ndang tama  hita manjalo asi ni roha ni Debata dohot Jesus. Mandok mauliate ma hita ala disesa dosanta jala boi mangolu salelengna! Tapatudu ma hamauliateonta marhite parniulaonta ganup ari.

8. Pamingkirion na songon dia do na ingkon tapasiding?

⁸ Taboto, rade do Jahowa manesa dosanta, nang pe i dosa na balga. Alai, unang tabahen asi ni roha ni Jahowa gabe sidalianta laho mangulahon na sala, jala ninna rohanta, ’Disalpuhon Jahowa do i.’ Di abad na parjolo, tingki mangolu dope angka apostel, adong do halak Kristen na marpingkiran sisongon i. (Jaha Judas 4.) Saonari, ingkon manat ma hita asa unang songon i pamingkirionta.

9, 10. Songon dia do si Paulus dohot na asing malua sian dosa dohot hamatean?

⁹ Didok si Paulus tu halak Kristen asa unang didok rohanasida na sesaon ni Debata do dosana molo tongtong mangulahon dosa. Didok si Paulus, ingkon pasidingon ni nasida do pamingkirion sisongon i, ala nasida nunga ”mate di dosa”. (Jaha Rom 6:1, 2.) Aha do lapatan ni on?

¹⁰ Marhite tobusan, disesa Jahowa do dosa ni si Paulus dohot halak Kristen di abad na parjolo. Dimiahi Jahowa nasida marhite tondi parbadia asa gabe anakNa. Molo tongtong marsihohot, mangolu ma nasida di surgo jala mamarenta raphon Jesus. Alai, boasa nasida didok ”naung mate di dosa”, hape mangolu dope nasida di tano on? Dibahen si Paulus do Jesus gabe tudosan. Didok ibana, dung mate Jesus, dipahehe ma ibana gabe tondi na so boi mate. I do alana, ”ndang dirajai hamatean i be Ibana”. Suang songon i ma, halak Kristen na miniahan pe songon naung mate. Gabe muba ma parngoluon ni nasida, ala ndang dirajai giotgiot na sala be nasida. Marsitutu do nasida mangulahon na dumenggan laho palashon roha ni Jahowa. Nang pe nasida ”songon naung mate di dosa i, alai mangolu di Debata di bagasan Kristus Jesus”.​—Rom 6:9, 11.

11. Songon dia do halak Kristen saonari gabe songon ”naung mate di dosa”?

¹¹ Songon dia do molo hita? Songon dia do hita nunga ”mate di dosa”? Ra, najolo godang do taulahon na sala jala ndang taboto songon dia pangkilalaan ni Jahowa mangida i. Hita pe gabe songon ”pangoloi di hahodaron” jala gabe ”hatoban ni dosa”. (Rom 6:19, 20) Alai dung marsiajar Bibel, taboto ma na dihalomohon Debata, marhamubaon, mangalehon diri tu Jahowa jala tardidi. Lomo do rohanta mangoloi Jahowa jala palashon rohaNa. Nunga ”malua hamu sian dosa” jala gabe ”tunduk do hamu mangoloi hatigoran i”.​—Rom 6:17, 18.

12. Aha do na boi tapillit?

¹² Didok si Paulus, ”Unang ma dosa  i mangarajai di bagasan dagingmuna na olo mate i, mangoloi hisapna!” (Rom 6:12) Boi do hita mamillit, laho mangihuthon giotgiot ni daging manang manundalhon i. Sungkun ma dirimu: ’Hupaloas do sangkapsangkap na sala tubu di rohangku na mambahen ahu mangulahon na sala? Hatop do i hupasiding?’ Molo tahamauliatehon asi ni roha ni Debata, taulahon ma na palashon rohaNa.

13. Boasa pos rohanta na boi do hita mangulahon na denggan?

¹³ Di abad na parjolo, pigapiga halak di Korint mangulahon parmainanon, homoseksual, manangko, manomba ganaganaan, jala gabe parmabuk. Alai, dung mananda jala mangkaholongi Jahowa, marhamubaon ma nasida. Maila do nasida tu na hea diulahon nasida. (Rom 6:21; 1 Kor. 6:9-11) Halak Kristen di Rom pe porlu do marhamubaon. Didok si Paulus tu nasida, ”Unang ma pasahat hamu angka ruasmuna tu dosa i, bahen sinjata ni hajahaton; tu Debata ma tahe pasahat hamu dirimuna songon angka naung pinangolu sian na mate; songon i nang ruasmuna, tu Debata ma i, bahen sinjata ni hatigoran!” (Rom 6:13) Pos do roha ni si Paulus, boi nasida mangulahon na denggan jala tongtong mandapot laba sian asi ni roha ni Debata.

14, 15. Aha do na ingkon tasungkun tu dirinta?

¹⁴ Suang songon i ma saonari. Adong do donganta na songon halak di Korint. Alai dung mananda Jahowa, marhamubaon ma nasida. Songon naung ”diburi” ma nasida. Asa boi palashon roha ni Jahowa, ingkon marhamubaon do hita. Saonari ma tingkina patuduhon hamauliateon ala asi ni roha ni Debata. Marsitutu ma hita mangalo giotgiot na sala, jala talehon ma dirinta manomba Jahowa.

¹⁵ Tapasiding ma ulaon na parohon dosa, songon na diulahon halak di Korint. Ndang boi sai taulahon dosa huhut mangkirim dipatudu Jahowa asi ni rohaNa laho manalpuhon hasalaanta. Alai, songon dia do molo taulahon dosa na didok pigapiga halak ndang pola sala? Marsitutu do hita mangulahon na dumenggan asa unduk tu Jahowa di sude ulaonta?​—Rom 6:14, 17.

16. Sian dia do taboto molo hita ingkon pasidingkon dosa na so disurat di 1 Korint 6:9-11?

¹⁶ Pingkirhon ma na didok si Paulus, ”Pardaging do anggo ahu jala targadis tu gomgoman ni dosa. Ai ndang hutolopi na hubahen i; ai na huhagigihon, i do huula, ndada na huhalomohon i.” (Rom 7:14, 15) Nang pe ndang diulahon ibana na disurat di  1 Korint 6:9-11, alai diangkui si Paulus do mardosa dope ibana. Lomo rohana palashon roha ni Jahowa, alani i marsitutu do ibana asa unang mangulahon na sala. (Jaha Rom 7:21-23.) Tatiru ma si Paulus, jala taoloi ma Jahowa.

17. Boasa lomo rohanta asa tongtong jujur?

¹⁷ Umpamana, molo naeng manomba Jahowa, ingkon jujur do hita. (Jaha Poda 14:5; Epesus 4:25.) Unang ma tatiru Sibolis, ”ama ni gapgap”. Taingot ma si Ananias dohot tungganeboruna na mate ala margabus. Alani i, unang ma margabus hita. (Joh. 8:44; Ul. 5:1-11) Hajujuron, lapatanna ndang holan pasidingkon hata gabus. Molo tutu do tahamauliatehon asi ni roha ni Debata, ingkon jujur do hita di sude ulaonta.

18, 19. Aha do lapatan ni jujur?

¹⁸ Boi do sasahalak ndang jujur nang pe ndang mangkatahon gabus. Umpamana, didok Jahowa tu halak Israel, ”Ndang jadi hamu manangko, jala ndang jadi hamu margabus, jala ndang jadi hamu masipaotootoan.” Boasa ingkon diulahon on? Didok  Jahowa, ”Ingkon badia hamu, ai na badia do Ahu, Jahowa, Debatamuna i!” (3 Mus. 19:2, 11) Nang pe ndang tahatahon gabus, alai molo tabahen halak mangkaporseai na so sintong, na margabus do hita disi.

¹⁹ Umpamana, sahalak baoa mandok tu bos dohot dongan sakarejona asa tibu ibana mulak karejo laho marubat. Alai, tibu ibana mulak asa boi do hatop laho mardalani. Na didok ibana ”marubat”, sasintongna holan manuhor ubat di apotek manang mambuat hasil tes darah. Jujur do ibana disi manang margabus? Dibahen baoa on do halak porsea tu na so tutu. Sipata, olo do sasahalak mangkatahon na so tutu asa parohon laba tu dirina manang asa unang diuhum. Alai taoloi ma na didok Jahowa, ”Ndang jadi hamu margabus.” Tongtong ma hita badia jala taulahon ma na sintong.​—Rom 6:19.

20, 21. Molo tahamauliatehon asi ni roha ni Debata, aha do na ingkon tapasiding?

²⁰ Tutu, ingkon tapasiding do parmainanon, parmabukon, dohot angka dosa na asing. Alai asing ni i, ingkon tapasiding do na so dihalomohon Jahowa. Umpamana, ndang holan pasidingkon parmainanon, alai ingkon tapasiding do hiburan na rorang. Ndang holan pasidingkon parmabukon, alai unang ma minum sampe naeng mabuk. Ra maol do pasidingkon on, alai boi do hita pasidingkon i.

²¹ Taulahon ma songon na didok si Paulus, ”Unang ma dosa i mangarajai di bagasan dagingmuna na olo mate i, mangoloi hisapna!” (Rom 6:12; 7:18-20) Ndang boi tapasiding sude dosa. Alai molo marsitutu hita pasidingkon i, on patuduhon na tahamauliatehon do asi ni roha ni Debata dohot Kristus.

22. Aha do pasupasu na tadapot molo tapatudu hamauliateon ala asi ni roha ni Jahowa?

²² Nunga disalpuhon Jahowa dosanta, jala ndang dipaingotingot be i. Mandok mauliate ma hita di asi ni rohaNa! Alani i, marsitutu ma hita pasidingkon angka na roa, nang pe na asing mandok ndang pola sala mangulahon i. Aha do pasupasu na tadapot? Didok si Paulus, ”Dung malua hamu sian dosa i, dung gabe pangoloi di Debata hamu, adong do parbuemuna tu habadiaon; jala hangoluan na salelenglelengna do hapateanna.”​—Rom 6:22.