ANDORANG so masa i, lomo rohangku mamboto hasintongan. Dijalo omakku do sijahaon na marojahan sian Bibel, jala las rohangku manjaha i, tarlumobi mangida gombarna. Ndang lomo roha ni bapakku molo dipaboa omak tu ahu na diparsiajari ibana sian Bibel. Ala lomo rohangku mamboto i, sai husungkun do omakku. Alani i, molo ndang di jabu bapak, marsiajar Bibel do ahu dohot omak. Ujungna, gabe Sitindangi Ni Jahowa ma ahu. Tingki marumur sampulu taon, tardidi ma ahu di Blackpool, Inggris, taon 1943.

Dung i, rap marbarita na uli ma ahu dohot omakku. Tingki i, mamangke fonograf do hami marbarita. Balga jala borat do i, boratna hirahira opat satonga kilogram. Bayangkon ma, dakdanak dope ahu nunga mamboan i!

Tingki marumur 14 taon, lomo rohangku merintis. Didok omakku, ingkon jolo  huhatai do taringot on tu donganta na manguluhon angka dongan (saonari tadok pengawas wilayah). Didok donganta i, ingkon karejo do ahu asa boi merintis. Huulahon ma i. Dung dua taon, husungkun ma muse pengawas wilayah na asing taringot merintis. Didok ibana, ”Merintis ma ho!”

Bulan April 1949, digadis hami ma barangnami jala pinda tu Middleton, jonok ni Manchester. Disi ma ahu mulai merintis. Dung opat bulan, hupillit ma sada donganta baoa gabe donganku merintis. Didok kantor cabang, pinda ma nian hami tu huria na baru di Irlam. Omakku merintis dohot sahalak donganta borua di huria na asing.

Tingki i, marumur 17 taon dope ahu, alai martanggung jawab do ahu dohot donganki manguluhon parpunguan. Alana, saotik do baoa na mandapot hak na sumurung di huria i. Dung i pinda ma ahu tu Huria Buxton, ala saotik do penyiar disi jala porlu diurupi. On mambahen ahu rade manjalo tugas na baru.

Taon 1951, huisi ma formulir asa boi dohot tu Singkola Alkitab Gilead Menara Pengawal. Bulan Desember 1952, dijou ma ahu asa dohot tu dinas militer. Hupangido ma tu pamarenta asa unang dohot ahu tu dinas militer, ala ahu rohaniwan sepenuh waktu. Alai, ndang dioloi nasida pangidoanki jala dipenjara ma ahu saleleng onom bulan. Tingki di penjara, hujalo ma gokkon tu Singkola Gilead kelas ke-22. Bulan Juli 1953 dung kaluar sian penjara, markapal na margoar Georgic ma ahu laho tu New York.

Dung sahat disi, ro ma ahu tu Kebaktian Masyarakat Dunia Baru taon 1953. Dung i, laho ma ahu markareta api tu South Lansing, New York, inganan ni singkola i. Ala baru kaluar sian penjara, otik do hepengku. Tingki turun sian kareta api, marbus do ahu tu South Lansing. Alai ingkon  hupinjam ma hepeng sian halak na asing asa adong ongkoshu.

Di Singkola Gilead, dijalo hami do pangajarion na mangurupi hami pahombarhon diri tu sude halak. (1 Kor. 9:22) Si Paul Bruun, si Raymond Leach, dohot ahu ditugashon tu Filipina, alai ingkon dipaima hami do pigapiga bulan asa mandapot visa. Dung i, laho ma hami markapal tu Rotterdam, di Belanda. Markapal ma muse hami manaripari Laut Tengah, Terusan Suez, dohot Samudra Hindia laho tu Malaysia dung i tu Hong Kong. Dung 47 ari di laut, sahat ma hami di Manila tanggal 19 November 1954.

Disi, ingkon dipahombar hami ma dirinami tu hasomalan, inganan, dohot bahasa na baru. Mulana, ditugashon ma hami na tolu tu sada huria di Quezon City. Godang halak na marbahasa Inggris disi. Dung onom bulan, otik do hata di bahasa Tagalog na diantusi hami. Tugasnami na mangihut ma na paubahon i.

Bulan Mei 1955, dung mulak marbarita, Donganta si Leach dohot ahu mandapot surat na paboahon na ditugashon hami gabe pengawas wilayah. Tingki i, 22 taon dope umurhu, alai tugas on mangurupi ahu marsiajar cara na baru laho pahombarhon diri tu sude halak.

Umpamana, dung gabe pengawas wilayah, hupasahat do jamitangku na parjolo di jolo ni toko di sada huta. Tingki i di Filipina, somalna jamita tu loloan dipasahat di inganan na ribur! Tingki ro ahu tu pigapiga huria di inganan i, hupasahat do jamita di pasar, di jolo ni balai kota, di lapangan basket, di taman, jala jotjot di dalan. Sada tingki di San Pablo City, ndang boi hupasahat jamita di pasar ala doras udan. Hupangido ma tu angka donganta baoa na martanggung jawab di huria asa hupasahat jamitangki di Bale Harajaon. Dung i,  disungkun nasida ma ahu atik na boi do on dilaporhon gabe parpunguan tu loloan, alana on ndang dibahen di inganan na ribur!

Di jabu ni dongan sahaporseaon do ahu tading. Nang pe sederhana jabu i, alai ias do. Somalna, ahu modom di tilam na tipis di lantai na sian hau. Ala inganan paridiannami boi diida halak, marsiajar ma ahu maridi mamangke basahan. Molo laho tu sada pulo, marbus do ahu jala sipata markapal. Saleleng di penugasanki, ndang hea adong mobilhu sandiri.

Nang pe ndang hea ahu kursus bahasa, huparsiajari do bahasa Tagalog. Huulahon on marhite manangihon angka dongan tingki marbarita dohot di parpunguan. Lomo do rohanasida mangurupi ahu marsiajar, jala mandok mauliate do ahu ala sabar jala jujur nasida paboahon na porlu hupadenggan.

Ingkon huihuthon do tudutudu ala mandapot tugas na baru. Taon 1956, tingki ro donganta si Nathan Knorr, dibahen hami ma kebaktian nasional. Ahu ma na ditugashon mangkatai tu media berita. Ndang hea dope huulahon on, alai diurupi angka donganta do ahu. Ndang sampe sataon, dibahen hami ma muse kebaktian nasional, jala ahu gabe pengawas kebaktian i. Donganta si Frederick Franz ro sian kantor pusat, jala godang na huparsiajari sian ibana. Tingki pasahathon jamita tu loloan, dipangke ibana do barong Tagalog,  pangkean ni halak Filipina. Gabe las ma roha ni angka donganta disi, jala on mangajari ahu marsitutu pahombarhon diri tu na asing.

Ingkon huihuthon do muse godang tudutudu tingki ahu gabe pengawas distrik. Di tingki i, dipatudu hami ma film Kebahagiaan dari Masyarakat Dunia Baru. Ala jotjot hami patuduhon i di inganan na ribur, sipata olo do ro serangga manggugai hami. Sinar sian proyektor i do na mambahen serangga i ro, jala olo do masuk serangga i tu proyektor i. Loja do paiashon i! Ndang mura mangatur acara on, alai las do roha mangida halak na ro jala marsiajar taringot organisasi ni Jahowa.

Di pigapiga inganan, dipaksa imam Katolik do pamarenta asa unang diloas hami kebaktian. Molo adong jamita dipasahat di jonok ni gareja ni nasida, dipalu nasida ma giringgiring asa unang adong na boi manangihon jamita i. Nang pe songon i, tongtong do angka halak marsiajar Bibel, jala saonari godang do halak di inganan i manomba Jahowa.

Taon 1959, ditugashon ma ahu karejo di kantor cabang. Godang do parsiajaran na hudapot tingki karejo disi. Dung i, disuru ma ahu laho tu negeri na asing, gabe pengawas zona. Sada tingki, pajumpang ma ahu dohot si Janet Dumond, sahalak misionaris di Thailand. Jotjot ma hami masitongosan surat, dung i marhasohotan ma hami. Saleleng 51 taon, las do rohanami rap manomba Jahowa.

Las do rohangku pajumpang tu angka naposo ni Jahowa di 33 negeri. Mandok mauliate do ahu ala tugas on mangurupi ahu marsiajar songon dia maradophon  halak sian hasomalan na asing! Gabe tangkas ma huboto, dihaholongi Jahowa do sude jolma.​—Ul. 10:34, 35.

Las do rohangku dohot si Janet rap marbarita dohot angka dongan di Filipina, jala tongtong do hami karejo di kantor cabang di Quezon City. Saonari, adong hirahira 200.000 penyiar disi, ndang songon tingki parjolo ahu tusi 60 taon naung salpu, holan 20.000 do penyiar disi. Saleleng on, ingkon rade do ahu mangihuthon tudutudu hombar tu na pinangido ni Jahowa. Umpamana, ala adong penyesuaian na baru dibahen organisasi, ingkon marsitutu do hami mangihuthon i.

Diulahon hami do sian nasa gogonami mangihuthon tudutudu sian Jahowa, jala on ma na mambahen martua ngolunami. Marsitutu do hami pahombarhon diri asa boi denggan mangurupi angka dongan. Tangkas ma, saleleng dipangido Jahowa hami mangulahon ulaon on, marsitutu do hami pahombarhon diri tu sude jolma.