1. Aha do na masa tu si Lasarus? Jala aha do na dihirim si Marta? (Ida gombar di mula ni parsiajaran.)

MARUJUNG ngolu ma ito ni si Marta, i ma si Lasarus. Alani i, marhabot ni roha do ibana. Aleale ni Jesus do si Marta. Marjanji do Jesus tu ibana tingki didok, ”Na hehe ma ibotom!” Tarapul do roha ni si Marta alani i, alai ndang boi pintor salpu lungun ni rohana i. Pos do roha ni si Marta tu Jesus. Didok ma, ”Huboto do, na hehe do ibana di haheheon i, na di ari parpudi.” (Joh. 11:20-24) Pos do rohana, masa do haheheon di ari na naeng ro. Alai, dipahehe Jesus do si Lasarus di na sadari i.

2. Boasa boi pos rohanta songon si Marta?

² Ndang na laho dipahehe halak na tahaholongi i saonari. Alai, boi do tatiru pos ni roha ni si Marta? Ra, adong do keluarganta naung marujung ngolu, songon natuatuanta, ompunta, manang ianakhonta. Masihol do hita laho mangkaol nasida, mangkatai jala rap mengkel dohot nasida. Pos ma rohanta boi do hita pajumpang dohot nasida. Songon si Marta, boi ma tadok, ’Huboto do na laho  hehe halak na huhaholongi i.’ Alani i, denggan do molo tapingkiri angka na boi paposhon rohanta tu ari haheheon.

3, 4. Angka ise do na hea dipahehe Jesus, jala songon dia do i boi patoguhon haporseaon ni si Marta?

³ Di jonok ni Jerusalem do si Marta maringanan. Alani i, ra ndang diida ibana tingki dipahehe Jesus anak ni sahalak ina na mabalu, di jonok ni kota Nain di Galilea. Alai ra, dibege ibana do barita taringot i. Asing ni i, hea do ra dibege ibana muse barita taringot Jesus pahehehon boru ni si Jairus. Diboto sude halak na di jabu i do ”naung mate” boruna i. Alai, ditarik Jesus ma tanganna jala didok ma, ”Hehe ma ho, butet!” Jala pintor hehe do ibana. (Luk. 7:11-17; 8:41, 42, 49-55) Tangkas do diboto si Marta dohot si Maria, margogo do Jesus laho pamalumhon na marsahit. Didok roha ni nasida, aut sugari disi Jesus ndang mate si Lasarus. Alai dung mate si Lasarus, hirim do roha ni si Marta na laho hehe si Lasarus? Parohahon ma, didok si Marta do na laho hehe si Lasarus di ari na naeng ro, ”di ari parpudi”. Boasa songon i pos ni rohana? Jala boasa boi pos rohanta na laho hehe halak na tahaholongi i di ari na naeng ro?

⁴ Godang do na boi paposhon rohanta tu haheheon. Saonari taulas ma taringot i. Di parsiajaran on adong do ra parsiajaran na baru sian hata ni Debata na tadapot. On boi paposhon rohanta na laho mulak mangolu halak na tahaholongi.

5. Boasa pos roha ni si Marta na laho dipahehe si Lasarus?

⁵ Parohahon ma, ndang didok si Marta, ’Anggiat ma hehe ibotongki.’ Alai didok ibana do, ’Huboto do na laho hehe ibotongki.’ Boasa songon i pos ni rohana? Ala nunga diboto ibana haheheon na masa di tingki naung salpu. Ra, tingki dakdanak nunga diparsiajari ibana di jabuna manang di inganan parpunguan nasida. Alai, saonari taparsiajari ma tolu hatorangan taringot haheheon na disurat di Bibel.

6. Tanda halongangan aha do na hea dibege si Marta?

⁶ Haheheon na parjolo sahali, i ma di tingki ni si Elia. Dilehon Jahowa do gogo tu si Elia laho mambahen halongangan. Parohahon ma na masa di dompak ni utara Israel di Penisia di huta Sarpat. Disi, adong ma sahalak ina na mabalu dohot sada ianakhonna. Pogos do nasida. Alai, burju do ibana manamue si Elia. Alani i, dibahen Jahowa ma asa ndang marnasuda sipanganon sian hudon ni nasida. Gabe boi ma nasida tongtong mangolu. (1 Raj. 17:8-16) Alai ndang piga leleng marsahit ma anakna i, laos mate. Huhut ditiop si Elia anakna i, martangiang ma ibana tu Jahowa. Ninna ma, ”Ale Jahowa, Debatangku, ua paulak ma hosa ni dakdanak on tu bagasan ibana.” Ditangihon Jahowa do tangiang ni si Elia jala mulak mangolu ma dakdanak i. On ma haheheon na parjolo sahali disurat di Bibel. (Jaha 1 Rajaraja 17:17-24.) Pasti diboto si Marta do carita on.

7, 8. (a) Songon dia do si Elisa mangapuli sahalak ina na tilahaon? Aha do na pinatudu ni halongangan na binahen ni si Elisa?

 ⁷ Haheheon na paduahon na disurat di Bibel, i ma di masa ni si Elisa. Di huta Sunem, adong ma sahalak Israel, i ma borua na so boi marianakhon. Ala burju ibana manamue si Elisa, dibahen Jahowa ma ibana boi marianakhon nang pe nunga matua tungganedolina. Alai ndang piga leleng, mate ma anakna i. Mansai lungun ma rohana. Alani lungun ni rohana, laho ma ibana manjumpangi si Elisa tu Dolok Karmel, 30 kilometer sian jabuna. Disuru si Elisa ma pangurupina, i ma si Gehasi laho pahehehon anakna i. Alai ndang boi. Dung i, ro ma borua i tu jabu ni si Elisa.​—2 Raj. 4:8-31.

⁸ Alani i, laho ma si Elisa dohot borua i naeng pahehehon anakna i. Martangiang ma si Elisa tu Jahowa, jala dipahehe ma dakdanak i. Tingki diida borua i naung hehe anakna i, las situtu ma rohana! (Jaha 2 Rajaraja 4:32-37.) Ra, diingot ibana do tangiang ni si Hanna. Ndang boi si Hanna marianakhon. Alai dibahen Jahowa do ibana boi marianakhon. Gabe adong ma anakna, i ma si Samuel. Alani i, didok ibana, Jahowa do na ’patuathon tu banua toru dohot pahehehon muse’. (1 Sam. 2:6) Haheheon na masa di huta Sunem, patuduhon margogo do Jahowa pahehehon halak naung mate.

9. Paboa ma taringot haheheon na patoluhon na disurat di Bibel.

⁹ Dung mate si Elisa, masa ma tanda halongangan na asing. Dung 50 taon si Elisa gabe panurirang, ’tubu ma sahitna, laos i do mamboan ibana’. Dung leleng, gabe holan holiholina ma na tading. Sada tingki, adong ma halak Israel na laho mananom halak naung mate. Alai, diida nasida ma ro musu sian Moab. Pintor ditimpalhon nasida ma halak na mate i tu bagasan kuburan ni si Elisa. Bibel mandok, ”Dung sahat halak na mate tu bagasan jala dolos tu bangke ni si Elisa, mulak mangolu ma ibana.” (2 Raj. 13:14, 20, 21) Hatorangan on paposhon roha ni si Marta, tolap do Debata pahehehon halak naung mate. Jala on paposhon rohanta tu huaso ni Debata na sun hinagogo jala na so ra suda.

10. Aha do na diulahon si Petrus tu borua naung mate?

¹⁰ Disurathon do di buku Junani Kristen taringot haheheon na dibahen angka naposo ni Debata. Nunga taulas taringot haheheon na dibahen Jesus di jonok ni huta Nain dohot di jabu ni si Jairus. Ndang piga leleng sian i, marhite si Petrus, dipahehe ma si Dorkas, na digoari si Tabita. Masuk ma si Petrus tu kamar inganan ni si Tabita,  jala martangiang ma ibana. Dung i, didok ma, ”O Tabita, hehe ma ho!” Pintor hehe ma si Tabita, jala ”dipajongjong ma ibana” di jolo ni angka halak Kristen na adong disi. Alani i, torop ma halak di huta i ”gabe porsea di Tuhan i”. Dipaboa angka sisean na baru i ma barita na uli on tu angka halak, i ma taringot Jesus dohot Jahowa na margogo pahehehon halak naung mate.​—Ul. 9:36-42.

11. Aha do na didok si Lukas taringot si Eutikus, jala aha do pangkorhon ni na masa i tu angka halak disi?

¹¹ Adong do na mangida haheheon na asing. Di Troas di dompak utara ni Turki, marpungu ma si Paulus dohot angka dongan. Marjamita ma ibana sahat tu tonga borngin. Adong ma sada dolidoli na margoar si Eutikus manangihon jamita ni si Paulus. Hundul ma ibana di jandela. Alai ala mondohondok, madabu ma ibana sian lante tolu di inganan i. Ra, si Lukas do na parjolo sahali mandapothon ibana. Ala sahalak dokter do si Lukas, tangkas do diboto ibana nunga mate dolidoli i. Dohot do si Paulus mandapothon si Eutikus tu toru. Dihaol si Paulus ma ibana. Dung i, didok ma, ”Mangolu do ibana.” Gabe longang ma roha ni angka halak disi. Ala diida nasida naung mulak mangolu dolidoli i, ’mansai las ma rohanasida’.​—Ul. 20:7-12, Bibel siganup ari.

12, 13. Dung taulas taringot haheheon, sungkunsungkun aha do na ro tu pingkiranta?

¹² Haheheon naung taulas on boi paposhon rohanta songon na dihilala si Marta. Boi do pos rohanta tu Debata. Boi do dipahehe Ibana angka halak naung mate ala Silehon hangoluan do Ibana. Tanda halongangan on masa di tingki mangolu dope naposo ni Debata songon si Elia, Jesus, manang si Petrus. Alai, songon dia do molo sasahalak mate di tingki ndang adong be  masa tanda halongangan? Boi do naposo ni Debata mangkirim na laho dipahehe nasida di ari na naeng ro? Pos do roha ni si Marta tingki didok, ”Huboto do, na hehe do ibana di haheheon i, na di ari parpudi.” Boi do tatiru pos ni rohana i? Boasa boi songon i pos ni rohana tu haheheon? Jala boasa on paposhon rohanta?

¹³ Pigapiga hatorangan na disurat di Bibel patuduhon, porsea do naposo ni Debata na laho masa haheheon di ari na naeng ro. Saonari, taulas ma pigapiga sian i.

14. Aha do na boi taparsiajari sian si Abraham taringot haheheon?

¹⁴ Rimangi ma pangidoan ni Jahowa tu si Abraham. Nunga leleng si Abraham paimahon asa adong anakna. Alai didok Jahowa ma tu ibana, ”Buat ma anakmu na sasada i, haholongan ni roham, si Isak i, jala togihon ibana tu tano Moria, jala pelehon ibana disi bahen pelean situtungon tu sada dolok, sipaboaonku tu ho.” (1 Mus. 22:2) Songon dia do pangkilalaan ni si Abraham mambege i? Nunga marjanji Jahowa tu ibana, marhite pinomparna do pasupasuonNa sude bangso. (1 Mus. 13:14-16; 18:18; Rom 4:17, 18) Jala, didok do muse ”marhitehite si Isak” do pasupasu i. (1 Mus. 21:12) Alai, songon dia do i saut molo dipelehon do si Isak? Ditogutogu tondi parbadia do si Paulus manurat taringot pos ni roha ni si Abraham, tolap do Debata pahehehon si Isak. (Jaha Heber 11:17-19.) Alai, ndang dipaboa di Bibel, na hirim roha ni si Abraham laho paheheon ni Debata si Isak di sadari i manang di bagasan minggu i. Ndang diboto ibana andigan si Isak laho dipahehe. Alai pos do rohana na laho paheheon ni Jahowa do si Isak, anakna i.

15. Aha do na hinirim ni si Job?

¹⁵ Asing ni i, pos do roha ni si Job, na  laho masa haheheon di ari na naeng ro. Diboto ibana do, molo ditaba sada hau, boi do i tubu sandiri muse. Alai ndang songon i molo jolma. (Job 14:7-12; 19:25-27) Ndang boi jolma na mate pahehehon dirina sandiri. (2 Sam. 12:23; Ps. 89:49) Alai molo Debata, tolap do Ibana pangoluhon halak na mate. Pos do roha ni si Job na ingoton ni Jahowa do ibana. (Jaha Job 14:13-15.) Ndang diboto si Job andigan masa ari haheheon i. Alai, pos do rohana diingot Debata do ibana jala dipahehe di ari na naeng ro.

16. Aha do na dipaboa surusuruan na mambahen si Daniel gabe togu?

¹⁶ Ingot ma muse naposo ni Debata, si Daniel. Marsihohot do ibana tu Jahowa saleleng ngoluna. Jala, tongtong do diurupi Jahowa ibana. Dijou surusuruan ni Debata do ibana ”jolma hasudungan ni roha”. Didok do tu ibana, ”dame ma di ho” jala ”pos ma roham”.​—Dan. 9:22, 23; 10:11, 18, 19.

17, 18. Aha do janji ni Jahowa tu si Daniel?

¹⁷ Tingki naeng marumur 100 taon jala naeng marujung ngolu, ra dipingkiri ibana ma taringot na laho masa tu ibana. Tontu, hirim do roha ni si Daniel na laho dipahehe muse ibana. Sian dia do i taboto? Molo tajaha panutup ni buku Daniel marjanji do Debata tu ibana, didok do, ”Laho ma ho, marroha pangkirimon di ujung, jala maradian ma ho.” (Dan. 12:13) Diboto si Daniel, na maradian do halak na mate. Jala ndang adong be ”sibahenon, sipingkiran, parbinotoan dohot habisuhon di inganan ni na mate”, i ma inganan sitopotonna i. (Pjm. 9:10, Bibel siganup ari) Alai, ndang sahat disi ujungna. Dilehon Jahowa do tu ibana pangkirimon na sun denggan di ari na naeng ro.

¹⁸ Didok surusuruan do tu ibana, ’Hehe ma ho muse manjalo [upam] di ujung ni angka ari!’ Ndang diboto si Daniel andigan i masa. Na diboto ibana laho mate nama ibana jala maradian. Alai tingki dibege ibana janji na mandok, ”Asa hehe ho muse manjalo [upam],” diboto ibana ma, laho hehe do ibana di ari na naeng ro. Alai, leleng nai dope i masa. Songon na didok, ”di ujung ni angka ari!”

19, 20. (a) Aha do haitan ni angka naung taulas nangkin, tu pos ni roha ni si Marta? (b) Aha do na laho taulas di parsiajaran na mangihut?

¹⁹ Godang do na mambahen si Marta marpos ni roha laho hehe ibotona ”di haheheon i, na di ari parpudi”. Boi do pos rohanta tu janji ni Jahowa tu si Daniel, songon pos ni roha ni si Marta tu haheheon.

²⁰ Nunga taparsiajari taringot ari haheheon di tingki naung salpu. On patuduhon, boi do angka naung mate mulak mangolu muse. Asing ni i, taida do songon dia naposo ni Debata na marsihohot paimahon ari haheheon. Alai dung dijanjihon haheheon i, leleng nai dope i masa? Adong do bukti na patuduhon i? On boi mangurupi hita asa paimahon haheheon i. Andigan do masa i? On ma na laho taulas di parsiajaran na mangihut.