Ganup halak Kristen naung marhasohotan, ingkon mambahen keputusan taringot on, asa tongtong ias panggora ni roha ni nasida. Alani i, ingkon diboto nasida do songon dia sasintongna cara kerja ni KB spiral (IUD), jala aha na didok Bibel taringot on.

Didok Jahowa do tu si Adam dohot si Hawa, tu si Noak dohot keluargana, ”Marpinompari ma hamu.” (1 Mus. 1:28; 9:1) Ndang didok Bibel ingkon ihuthonon ni halak Kristen parenta on. Alani i, halak naung marhasohotan, boi do mamillit marianakhon manang na ndang. Molo ndang olo nasida marianakhon, boi do dipillit nasida KB aha na laho dipangke. Aha do na ingkon dipingkirhon nasida?

Ingkon dipingkirhon halak Kristen do prinsip ni Bibel taringot on. Alani i, ndang olo nasida manggugurhon molo ndang lomo rohana marianakhon. Manggugurhon, dos do i mambunu posoposo na sasintongna ingkon tubu. Manggugurhon, maralo do tu Bibel taringot mangargai hangoluan. (2 Mus. 20:13; 21:22, 23; Ps. 139:16; Jer. 1:5) Songon dia do taringot KB spiral?

Dipatorang do taringot on di The Watchtower 15 Mei 1979 (halaman 30-31). Di tingki i, godangan KB spiral na dipangke dibahen sian bahan plastik. Alat on dipamasuk tu bagasan rahim asa unang saut hamil. Artikel i patorangkon, ndang tangkas diboto songon dia sasintongna cara kerja ni KB spiral i. Godang ilmuwan mandok, molo KB spiral i mangambati sperma (sian baoa) asa unang mardomu dohot sel telur (sian borua). Molo ndang mardomu sel telur dohot sperma, ndang adong hangoluan.

Alai, adong pigapiga bukti na patuduhon, sipata adong do sel telur nunga mardomu dohot sperma. Sel telur naung mardomu, lam magodang ma i di bagasan saluran Fallopi (hamil di luar rahim), manang boi gabe masuk tu rahim. Alai molo dung masuk sel i tu rahim, diambat KB spiral i ma asa unang longkot di dinding rahim, ujungna gabe hancur ma sel i. On, dos do songon na manggugurhon. Didok artikel i ma, ”Ingkon manat do halak Kristen mamingkirhon boi manang na ndang mamangke KB spiral, molo dipahombar tu isi ni Bibel taringot mangargai hangoluan.”​—Ps. 36:10.

Alai mulai taon 1979, tingki dipabinsar publikasi i, nunga lam maju parbinotoan taringot medis dohot ilmu pengetahuan.

Adong saonari dua jenis KB spiral na baru. Na parjolo, dibahen sian tembaga jala nunga dipangke on di Amerika Serikat taon 1988. Na asing, KB susuk na marisi hormon, jala nunga digadis on mulai 2001. Aha do na porlu taboto taringot tu dua jenis KB spiral on?

Tembaga: Songon naung dipaboa, KB spiral mambahen asa unang boi masuk sperma tu sel telur marhite rahim. KB spiral na sian tembaga on, marisi racun na boi mambunu sperma asa unang saut hamil. * Jala, KB spiral manguba lapisan na di bagasan rahim.

Hormon (KB susuk na ditanom di tangan): Jenis KB spiral na asing, i ma na marisi hormon dos songon pil KB. Labana dos songon spiral najolo, alai KB spiral on,  pakaluarhon hormon di rahim. Di pigapiga borua, on mambahen sel telur ni nasida maol kaluar. Molo ndang adong sel telur na kaluar, ndang adong na boi mardomu dohot sperma. KB spiral on, mambahen dinding rahim lam tipis. * Jala lam godang ma lendir di mulut rahim (serviks), na mambahen sperma ndang boi masuk sian vagina tu rahim.

Songon naung dipaboa, jenis KB na dua on mambahen muba dinding ni rahim. Alani i, molo sel telur ni sahalak borua kaluar jala mardomu dohot sperma, dung i sahat tu rahim, sel on ndang boi be longkot di dinding ni rahim. Ujungna, sel i ndang saut gabe posoposo. Alai didok angka ilmuwan, ndang pola jotjot masa sisongon on jala boi do masa on tu sasahalak na manginum pil KB.

Alani i, ndang boi dipastihon molo KB spiral na sian tembaga dohot hormon, gabe mangambati sel telur mardomu dohot sperma. Alai, songon naung diulas, penelitian patuduhon molo jenis ni KB spiral na dua on, boi do mangambati asa unang pajumpang sel telur dohot sperma. Ujungna, ndang saut hamil.

Halak Kristen naung marhasohotan na naeng mamangke KB on, porlu do manungkun tu dokter, KB spiral aha do na adong di inganan ni nasida, aha do labana dohot pangkorhonna tu tungganeboruna. Ndang boi halak na asing, manang dokter na mambahen keputusan di nasida. (Rom 14:12; Gal. 6:4, 5) Ingkon nasida na dua do na manontuhon. Jala, ingkon dibahen nasida do keputusan na mambahen las roha ni Debata jala ndang maralo tu panggora ni roha ni nasida.​—Bandingkon 1 Tim. 1:18, 19; 2 Tim. 1:3.