KISAH HIDUP
Manadingkon Saluhutna Laho Mangihuthon Jesus
Tingki marumur 16 taon ahu, didok bapakku ma, ”Molo laho ho marbarita, unang be mulak. Molo mulak ho, ingkon huponggol patmi.” Alani i, laho ma ahu sian jabu. On ma parjolo sahali ahu manadingkon saluhut laho mangihuthon Jesus.
BOASA mansai muruk bapakku? Hupaboa ma aha na masa. Ahu tubu 29 Juli 1929, magodang di sada huta di provinsi Bulacan di Filipina, jala na pogos do hami. Tingki poso ahu, ro ma tentara ni Jepang tu Filipina jala masa ma porang. Alai ala pinjil hutanami, ndang pola mangkorhon porang i tu hami. Ndang adong radionami, tv, manang koran, holan sian halak do dibege hami taringot porang i.
Pitu ma hami na marhahamaranggi, jala tingki marumur ualu taon diboan ompungku ma ahu asa tading dohot nasida. Nang pe Katolik hami, lomo do roha ni ompungku mangulas jala manjalo sijahaon taringot agama na dilehon donganna. Huingot ma hea dipatudu ompungku tu ahu buku Protection, Safety, dohot Uncovered di bahasa Tagalog, * na dienet sian Bibel. Lomo do rohangku manjaha Bibel, tarlumobi opat Injil. On mangonjar rohangku laho maniru Jesus.—Joh. 10:27.
MARSIAJAR LAHO MANGIHUTHON JESUS
Taon 1945, laho ma tentara ni Jepang sian Filipina. Di tingki i, dijou bapakku ma ahu asa mulak muse. Jala ompungku pe dijujui do ahu asa mulak, ujungna mulak ma ahu.
Di bulan Desember 1945, marbarita ma Sitindangi ni Jahowa sian kota Angat tu hutanami. Sahalak Sitindangi naung matua ro tu jabunami jala dipatorang ma aha na didok Bibel taringot ”angka tingki parpudi”. (2 Tim. 3:1-5) Ditogihon ibana ma hami asa dohot marsiajar Bibel di sada huta na jonok tu hutanami. Lomo rohangku dohot, alai natuatuangku ndang olo. Adong ma hirahira 20 halak na ro tusi, jala pigapiga nasida manungkun taringot Bibel.
Ndang huantusi aha na diulas tingki i, alani i naeng mulak ma ahu. Alai tingki diendehon nasida sada ende Harajaon, mansai lomo rohangku tu
ende i. Alani i ndang saut ahu mulak. Dung sae marende dohot martangiang, ditogihon ma hami sude asa ro tu parpunguan di ari Minggu na dibahen di Angat.Parpunguan i dibahen di jabu ni keluarga ni si Cruz, jala pigapiga sian hami mardalan pat do hirahira ualu kilometer asa sahat tusi. Adong hirahira 50 halak na marpungu, jala longang do rohangku, ala boi angka dakdanak mangalehon alus tingki adong sungkunsungkun na maol taringot isi ni Bibel. Dung pigapiga hali ahu dohot marpungu, si Damian Santos sahalak perintis naung matua jala pensiunan walikota, manogihon ahu asa marborngin di jabuna. Saborngin i, godang ma diulas hami taringot Bibel.
Di tingki i, boi do pintor tardidi sasahalak molo nunga diboto taringot ajaran dasar sian Bibel. Ala nunga jotjot marpungu, adong ma na manungkun hami, ”Olo do hamu tardidi?” Hualusi ma, ”Olo do ahu”. Ala lomo do rohangku mangihuthon Kristus. (Kol. 3:24) Tanggal 15 Februari 1946, dua halak ma hami na tardidi di sunge na jonok disi.
Huboto do, molo nunga tardidi gabe halak Kristen, ingkon tongtong do marbarita songon Jesus. Didokkon bapakku, paposohu dope ahu laho marbarita jala ndang ingkon gabe parbarita nang pe naung tardidi. Hupaboa ma tu bapakku lomo roha ni Debata asa tapaboa barita na uli taringot HarajaonNa. (Mat. 24:14) Hudok ma muse, nunga marjanji ahu tu Debata. On ma alana umbahen diancam bapakku ahu songon na hucaritahon nangkin. Marsitutu do ibana mangorai ahu asa unang marbarita. On ma parjolo sahali ahu manadingkon saluhut laho manomba Jahowa.
Ditogihon keluarga ni si Cruz ma ahu asa tading raphon nasida di Angat. Dijujui nasida do ahu dohot boru ni nasida siampudan, i ma si Nora, asa merintis. Dung i, merintis ma hami na dua mulai 1 November 1947. Si Nora merintis di kota na asing, alai ahu tongtong do di Angat.
MANADINGKON NA ASING MUSE
Dung merintis ahu saleleng dua taon, si Earl Stewart, sahalak donganta na ro sian Betel pasahathon jamita tu lobi sian 500 halak, di sada inganan di kota Angat. Marbahasa Inggris do ibana marjamita, jala hupasahat ma tu bahasa Tagalog. On ma parjolo sahali ahu manerjemahon jamita. Alai, boasa boi huulahon i? Nang pe holan pitu taon ahu singkola, alai jotjot do gurungku marbahasa Inggris. Jala jotjot do huparsiajari publikasinta di bahasa Inggris, alana holan saotik do
publikasinta na marbahasa Tagalog. On ma na mangurupi ahu mangantusi bahasa Inggris jala boi manerjemahon jamita.Didok donganta si Stewart ma tu huria na disi, angka misionaris naeng laho tu Kebaktian Pertambahan Teokrasi di New York, Amerika Serikat. Alani i, dipangido kantor cabang ma, asa sahalak manang dua perintis mangurupi di Betel. Ahu ma sada na digokkon. Sahali nai, hutadingkon ma muse saluhut laho karejo tu Betel.
Sahat ma ahu di Betel 19 Juni 1950. Hirahira sahektar ma bidang ni Betel i, jala nunga leleng. Di humaliangna, adong angka hau na mansai balga. Adong 12 donganta baoa na so marhasohotan dope na karejo di Betel on. Ganup manogot, ahu mangurupi di dapur. Alai mulai jam sia sahat tu botari, manggosok ma ahu di laundry. Nang pe naung mulak angka misionaris i sian kebaktian, tongtong dope ahu di Betel. Huulahon do sude ulaon na dilehon tu ahu. Umpamana, mambungkus majalah laho dikirim, dung i mangirim tu halak na marlangganan, jala gabe penerima tamu.
MANADINGKON FILIPINA LAHO TU SINGKOLA GILEAD
Taon 1952, pitu halak hami sian Filipina digokkon tu Singkola Gilead kelas ke 20. Las situtu rohangku! Dung sahat di Amerika, godang ma pengalamannami na baru. Mansai imbar do parngoluan dison sian di hutanami.
Dohot angka donganku tingki Singkola Gilead
Umpamana, diparsiajari hami ma songon dia mamangke angka barang na so hea diida hami. Cuacana pe mansai imbar do! Sada tingki, di na dungo ahu manogot, huida ma marbontar sude di luar. On ma parjolo sahali ahu mangida salju. Mansai uli do i, alai mansai ngali ma huhilala!
Las situtu rohangku ala mandapot pelatihan di Singkola Gilead on, nang pe godang angka na baru na ingkon huparsiajari. Denggan do hami diajari angka instruktur. Diparsiajari hami ma songon dia cara mangariset dohot marsiajar. Singkola Gilead on, mangurupi ahu asa lam patoguhon paralealeonku tu Jahowa.
Dung sae singkola, ditugashon ma ahu satongkin tu Bronx, di kota New York gabe perintis istimewa. Bulan Juli 1953, dohot ma ahu tu Kebaktian Masyarakat Dunia Baru, na dibahen di Bronx. Dung sae kebaktian, ditugashon ma ahu muse mulak tu Filipina.
MANADINGKON PARNGOLUAN DI KOTA
Ditugashon ma ahu gabe pengawas wilayah. Ulaon on mambahen ahu maniru Jesus, na laho tu kota dohot tu hutahuta laho mangurupi naposo ni Jahowa. (1 Ptr. 2:21) Ditugashon ma ahu tu Luzon tengah, pulo na umbalga di Filipina. Dohot ma i propinsi Bulacan, Nueva Ecija, Tarlac, dohot Zambales. Laho manjumpangi pigapiga kota, ingkon hubolus do dolok Sierra Madre. Ndang adong bus manang kareta api na laho tu inganan on. Alani i, hupangido ma tu supir truk, asa boi ahu dohot jala hundul di ginjang ni hau na di truk i. Jotjot do dipaloas nasida ahu dohot, alai sasintongna susa do huhilala.
Godang do huria na metmet disi jala baru dope. Alani i mandok mauliate do angka dongan disi, ala huurupi nasida, songon dia mambahen asa denggan parpunguan dohot marbarita.
Dung i, ditugashon ma ahu muse tu sude inganan di Bicol. Di inganan on, godang do huta na pinjil jala ndang hea dope parbarita ro tusi. Marbarita ma angka perintis istimewa tu inganan i. Di sada jabu, dihali do lubang di tano laho gabe wc, jala dipeakkon ma dua hau di ginjangna laho sidegedegeon. Tingki hudege hau i, madabu ma hau i tu lubang i jala dohot ma ahu madabu tu bagasan. Gabe leleng ma ahu maridi, dung i sarapan ma ahu!
Tingki ditugashon ahu di inganan on, taringot ma ahu tu si Nora, donganku na rap merintis. Di tingki i, gabe perintis istimewa do ibana di kota Dumaguete, jala laho ma ahu manjumpangi ibana. Dungkon i, marsitongosan surat ma hami jala marhasohotan ma hami taon 1956. Dung marhasohotan, ditugashon ma hami tu sada huria di pulo Rapu Rapu. Ingkon manganangkoki dolok jala mardalan pat do tu inganan on, alai las do rohanami ala boi mangurupi angka dongan di inganan on nang pe dao.
DIGOKKON MUSE KAREJO DI BETEL
Dung opat taon hami ditugashon di inganan i, dijou ma hami muse tu kantor cabang. Karejo ma hami disi mulai Januari 1960. Saleleng di Betel, godang ma na huparsiajari sian angka dongan na martanggungjawab na balga di organisasi ni Jahowa. Si Nora pe las do rohana nang pe margantiganti tugasna di Betel.
Manerjemahon jamita tu bahasa Cebuano tingki kebaktian
Sada pasupasu do ala boi mangida lam godang halak na manomba Jahowa di Filipina. Tingki parjolo sahali ahu ro tu Betel, hirahira holan 10.000 dope penyiar di negara on. Alai saonari, nunga lobi sian 200.000 penyiar di Filipina jala marratus angka donganta na karejo di Betel.
Dung salpu pigapiga taon, porlu do muse dipabalga Betel dison. Didok Punguan na Mangaradoti Organisasi ma asa dilului hami inganan laho pabalgahon kantor cabang. Laho ma ahu dohot pengawas percetakan sian jabu tu jabu, laho manungkun angka halak na tading di humaliang ni Betel i, atik boha adong na olo manggadis tano ni nasida. Alai ndang adong na olo, jala sahalak mandok, ”Halak Cina ndang manggadis. Manuhor do.”
Manerjemahon jamita ni donganta si Albert Schroeder
Alai di sada tingki, muba ma na masa. Sahalak na tading disi naeng pinda tu Amerika Serikat, jala dipangido ma tu hami asa dituhor hami tanona. Na asing pe, gabe olo ma manggadis tanona, dijujui ma muse halak na asing mangulahon songon i. Jala dituhor hami do muse tano ni halak na mandok, ”Halak Cina ndang manggadis”. Ndang sadia leleng, gabe tolu hali lompit ma bidang ni tano di kantor cabang. Porsea do ahu, sude on sangkap ni Jahowa.
Tingki taon 1950, ahu do na umposo na karejo di Betel. Alai saonari, ahu dohot tungganeborungku ma na umtua. Ndang husolsoli ala mangihuthon Jesus, ndang soal aha pe na masa. Nang pe diusir natuatuangku ahu sian jabu, alai dilehon Jahowa do di ahu keluarga, i ma angka na mangkaholongi Ibana. Pos situtu do rohangku na lehonon ni Jahowa do sude na tahaporluhon, ndang soal aha pe tugas na dilehon tu hita. Mandok mauliate do hami tu Jahowa di sude pasupasuNa, jala dijujui hami do na asing asa manguji Jahowa.—Mal. 3:10.
Najolo, ditogihon Jesus do si Mateus Lepi sahalak sijalo pajak, asa mangihuthon ibana. Aha do na diulahon si Mateus? ”Ditadingkon saluhutna mangihuthon [Jesus].” (Luk. 5:27, 28) Dilehon do tu ahu tingki laho mangihuthon Jesus, jala hujujui do muse na asing mangulahon songon i, asa mangkilala gok pasupasu.
Marlas ni roha ala tongtong marhobas di Filipina
^ par. 6 Na dipabinsar Sitindangi Ni Jahowa, alai saonari ndang dicetak be.