1, 2. Aha do na mambahen natuatua holsoan tingki ianakhon ni nasida laho tardidi?

SAONARI, marribu halak rade manomba Jahowa jala tardidi. Angka na poso do godangan sian nasida, naung mamboto hasintongan sian na metmet, jala mamillit laho marhobas tu Jahowa. (Ps. 1:1-3) Molo hamu natuatua naung gabe Sitindangi, tontu tarpaima do hamu asa tardidi ianakhonmu.​—Bandingkon 3 Johannes 4.

² Alai, olo do ra holsoan hamu. Alana, adong do pigapiga na poso naung tardidi na gabe gale paralealeonna tu Jahowa. Adong muse do na manadingkon Jahowa. Ra, i do na dihabiari hamu masa tu ianakhonmuna. Biar rohamuna molo nasida ndang mangkaholongi Jahowa be. Ra, boi do gabe sarupa ianakhonmuna tu halak Kristen di Epesus tingki abad na parjolo. Didok Jesus tu nasida, ”Naung tinadingkonmu holong ni roham na di mulana i!”  (Pgk. 2:4) Songon dia cara mangurupi ianakhonmu patoguhon holongna tu Jahowa, huhut mangida nasida mandapot ”haluaon”? (1 Ptr. 2:2) Taulas ma sitiruon sian si Timoteus.

3. (a) Songon dia do si Timoteus gabe halak Kristen, jala aha do na diulahon ibana dungkon i? (b) Paboa ma tolu naung diulahon si Timoteus.

³ Taon 47 M ma parjolo sahali apostel Paulus ro tu Listra. Ra, remaja dope si Timoteus jala baru marsiajar taringot ajaran ni Jesus. Dua taon dungkon marsiajar jala mananda buku na badia, dohot ma si Timoteus mandongani si Paulus. Hirahira 16 taon dungkon i, didok si Paulus ma tu si Timoteus, ”Sai mian ma di bagasan angka na ginuruhon jala naung hinaporseaanmi, ai diboto ho do na mangajarhonsa tu ho. Huhut ala diboto ho, sian sietehetehonmi dope, surat na badia i, na margogo pabisukkon ho, asa taruli di haluaon marhitehite haporseaon di Kristus Jesus.” (2 Tim. 3:14, 15) Parrohahon ma, didok si Paulus do si Timoteus i nunga (1) mananda buku na badia, (2) marpos ni roha jala porsea tu na diparsiajari, jala (3) marbisuk laho mandapot haluaon ala porsea tu Jesus Kristus.

4. Aha do na boi pangkeonmu laho mangajari ianakhonmuna? (Ida gombar di mula ni parsiajaran.)

⁴ Tontu, lomo do rohamu asa diantusi ianakhonmu sude isi ni Bibel. Nang pe gelleng dope, boi do diantusi dakdanak taringot angka halak dohot angka na masa na disurat di Bibel. Diparade organisasi ni Jahowa do godang buku, brosur, dohot video na boi dipangke natuatua laho mangurupi ianakhonna. Na dia do na adong di bahasamuna? Porlu do ianakhonmu mangantusi isi ni Bibel asa boi togu paralealeonna tu Jahowa.

5. (a) Aha do lapatan ni marpos ni roha jala porsea? (b) Sian dia do taboto na marpos ni roha jala porsea si Timoteus tu Jesus?

⁵ Denggan do molo nunga diajari hamu ianakhonmuna taringot sasahalak dohot angka na masa na disurat di Bibel. Alai, ndang sae holan i. Ingot ma, ingkon marpos ni roha do si Timoteus asa boi porsea. Hata Junani na diterjemahon ”marpos ni roha” di ayat on, lapatanna ”dipapos rohana ala adong angka bukti”. Tangkas do diantusi si Timoteus Angka Buku Heber ’sian sietehetehonna dope’. Jala pos do rohana molo Jesus i Messias. Ala togu haporseaon ni si Timoteus, tardidi jala rap saulaon ma ibana dohot si Paulus.

6. Songon dia do hamu mangurupi ianakhonmu marhaporseaon tu Bibel?

⁶ Antong, songon dia do hamu mangurupi ianakhonmu asa boi marhaporseaon songon si Timoteus? Na parjolo,  ingkon sabar do hamu. Ndang boi sasahalak pintor marhaporseaon na togu. Suang songon i ma ianakhonmuna. Nang pe nunga porsea hamu, porlu do tingki di ianakhonmu laho mamingkirhon isi ni Bibel asa boi marhaporseaon. (Jaha Rom 12:1.) Hamu angka natuatua, denggan do molo olo ianakhonmuna manungkun tu hamu. Alani i, tongtong ma patogu haporseaonna. Saonari, taulas ma pengalaman ni sahalak ama.

7, 8. (a) Paboa ma songon dia sahalak ama na sabar mangajari boruna. (b) Tingki sadihari do hamu porlu sabar mangajari ianakhonmu?

⁷ Sipata, olo do boru ni si Thomas na marumur 11 taon manungkun, ”Na dibahen Jahowa do evolusi asa adong hangoluan di tano on?” manang, ”Boasa ndang dohot hita tu saringkat manang mamillit pamarenta?” Sipata, ingkon diorom si Thomas do dirina asa unang mamaksa boruna asa porsea. Ala diboto ibana, ingkon adong do marragam bukti na sederhana na mangurupi sasahalak asa marhaporseaon. Ndang sae holan patuduhon sada bukti na palongang roha.

⁸ Sude do halak Kristen ingkon sabar. (Kol. 3:12) Alani i, diboto si Thomas, ingkon sabar do ibana mangajari boruna. Ingkon dilehon do tingki laho mangkatahatai tu boruna taringot ajaran sian Bibel, asa boi boruna marpos ni roha jala marhaporseaon tu isi ni Bibel. Didok si Thomas, ”Tarlumobi tingki mangulas parsiajaran na maol, ingkon dipastihon hami do molo borunami mangantusi jala porsea tu parsiajaranna i. Las do rohanami molo adong sungkunsungkunna. Alana, hurang do pos ni rohanami molo holan dioloi sambing parsiajaranna i.”

9. Songon dia do cara mangurupi ianakhonmu marhaporseaon tu Bibel?

⁹ Molo sabar natuatua mangajari ianakhonna, boi ma diantusi ianakhonna ’ganjang dohot bidang, bagas dohot timbo’ ni haporseaon i. (Eps. 3:18) Taajari ma nasida hombar tu umurna jala mamangke cara na mura diantusi. Molo togu haporseaon ni nasida, mura ma nasida patorangkon haporseaonna tu na asing, umpamana dongan sasingkola. (1 Ptr. 3:15) Boi do dipatorang ianakhonmuna sian Bibel taringot hamatean? Pos do rohanasida tu hatorangan na sian Bibel? * Ingot ma, ingkon sabar do hamu mangurupi ianakhonmu marhaporseaon tu isi ni Bibel ala mangkorhon na denggan do i.​—5 Mus. 6:6, 7.

10. Aha do na ringkot dipatudu hamu tu ianakhonmu?

¹⁰ Asing ni i, sitiruon na pinatudumuna mangurupi ianakhonmuna  marhaporseaon. Si Stephanie, naung tolu boruna mandok, ”Nang pe gelleng dope ianakhonku, sai hurimangi do: ’Hupaboa do tu ianakhonku boasa pos rohangku na tutu adong Jahowa, pos rohangku tu holongNa dohot tu hatigoranNa? Tangkas do diida ianakhonku na holong rohangku tu Jahowa?’ Molo diringku sandiri pe ndang marpos ni roha tu Bibel, boha ma ianakhonku boi marpos ni roha?”

11, 12. Aha do lapatan ni bisuk, jala halak na songon dia do na marbisuk?

¹¹ Nunga taparsiajari taringot si Timoteus naung mandapot (1) parbinotoan sian Buku na Badia jala (2) pos rohana huhut marhaporseaon. Alai, aha do lapatanna tingki didok si Paulus taringot si Timoteus na marbisuk laho mandapot haluaon marhite buku na badia i?

¹² Buku Pemahaman Alkitab, Jilid 1 patorangkon, lapatan ni hata bisuk na disurat di Bibel, i ma ”mangantusi cara pasaehon masalah, padaohon diri sian mara manang jea, marsitutu asa mandapot na tinujuna, manang mangalehon poda tu halak na asing. Ndang sadalan habisuhon dohot haotoon”. Didok di Bibel, ”Haotoon do lohot di bagasan roha ni dakdanak.” (Poda 22:15) Habisuhon ndang diida sian umur, alai boi diboto sian parniulaon ni sasahalak. Halak na marbisuk pasangaphon Jahowa jala sai rade mangoloi Jahowa.​—Jaha Psalmen 111:10.

13. Aha do na patuduhon molo sahalak na poso marbisuk laho mandapot haluaon?

¹³ Angka na poso na togu paralealeonna tu Jahowa jala marbisuk, ndang olo ’pinalindaklindak jala pinamboanboan ni pangombus ni ragam’ ni giotgiot ni daging manang elaela sian dongan satorbang. (Eps. 4:14) Alana, parbinotoan mambahen nasida ”gabe malo mambolati na denggan sian na roa”. (Heb. 5:14) I do na mambahen nasida marbisuk manontuhon sipilliton nang pe ndang adong halak na asing na mangida. (Plp. 2:12) Bisuk sisongon i ma na boi parohon haluaon. (Jaha Poda 24:14.) Songon dia do cara mangurupi ianakhonmu asa marbisuk? Ingkon diboto ianakhonmuna do aha na rumingkot di hamu. Marhite pangkataion dohot parniulaonmu, ingkon boi do diida nasida molo hamu marsitutu mangihuthon aturan sian Bibel.​—Rom 2:21-23.

14, 15. (a) Molo adong na poso na naeng tardidi, aha do na ingkon botoonna? (b) Songon dia do hamu mangurupi ianakhonmuna asa mangarimangi pasupasu na didapot molo unduk tu Debata?

¹⁴ Asa boi ianakhonmu marhaporseaon, ndang sae holan mandok dia na sintong dohot na sala. Ingkon diurupi hamu do nasida asa boi mangalusi sungkunsungkun: ’Boasa ma diorai  Bibel hita mangulahon ulaon na didok rohanta songon na denggan? Boasa tadok aturan sian Bibel mangkorhon na denggan tu dirinta?’​—Jes. 48:17, 18.

¹⁵ Molo marsangkap ianakhonmuna naeng tardidi, ingkon botoonna do adong tanggung jawab na ingkon ulahononna dungkon tardidi. Sungkun ma ibana: ’Pasupasu aha do na didapot molo unduk? Ambatambat na songon dia do na boi masa? Aha do na boi masa molo mangalo?’ Paboa ma, godang do pasupasu na didapot nang pe adong ambatambat. (Mrk. 10:29, 30) Ringkot do mamingkirhon i andorang so tardidi. Molo diulahon songon i, pos ma rohana, sai mangkorhon na denggan do molo mangihuthon aturan sian Bibel.​—5 Mus. 30:19, 20.

16. Molo gale paralealeon ni ianakhonmuna tu Jahowa, aha do na ingkon ulahononmu?

¹⁶ Dungkon tardidi, olo do ra gabe gale paralealeon ni ianakhonmu tu Jahowa. Umpamana, olo do ra gabe lomo roha ni nasida mangulahon giotgiot ni portibi on. Manang didok rohana, ndang adong labana mangihuthon prinsip ni Bibel. (Ps. 73:1-3, 12, 13) Aha do na boi ulahononmu? Ndang soal dakdanak dope manang naung remaja  ianakhonmu, unang ma pintor muruki. Alana, olo do gabe metmet rohana jala ndang olo be manomba Jahowa. Alani i, ingkon sian roha do hamu mangurupi nasida.

17, 18. Songon dia do natuatua mangurupi ianakhonna na gale di partondion?

¹⁷ Sahalak na poso naung tardidi nunga marjanji asa mangkaholongi jala tongtong rade manomba Jahowa. (Jaha Markus 12:30.) Ingkon tagohi do janji laho manomba Jahowa, ala ringkot do i di adopan ni Jahowa. (Pjm. 5:3, 4) Paboa ma taringot on tu ianakhonmuna. Alai ingkon jolo jahaonmuna do angka publikasi na diparade organisasi tu natuatua. Dung i, tangkas ma paboa tu ianakhonmuna, ingkon sai diingot nasida do janji naung dibahen nasida laho manomba Jahowa. Alai, lambok ma paboa jala di tingki na pas.

¹⁸ Umpamana, boi do dapotmuna angka tudutudu di apendiks ”Pertanyaan Orang Tua” di halaman parpudi sian buku Pertanyaan Kaum Muda—Jawaban yang Praktis, Jilid 1. Didok disi, unang ma pintor didok roha ni natuatua molo ianakhon ni nasida ndang olo manomba Jahowa. Alai, ingkon diboto nasida do aha na mambahen ianakhonna gabe gale. Ra, ala dielaela donganna na saumur manang ala ndang adong na olo mardongan tu ibana. Manang, metmet rohana ala ndang boi songon angka na poso na asing na mangalehon gumodang tingkina tu Jahowa. Didok muse di apendiks i, molo masa sisongon i tu ianakhonmuna, unang ma pintor didok rohamu na so olo ibana manjalo hasintongan. Ra, metmet roha ni ianakhonmuna ala adong situasi na maol diadopi. I do umbahen na diparade godang tudutudu tu natuatua asa diurupi ianakhonna na gale partondionna.

19. Songon dia do angka natuatua mangurupi ianakhonna asa marbisuk laho mandapot haluaon?

¹⁹ Angka natuatua, hamu do na martanggung jawab mangurupi ianakhonmuna ”di bagasan ajar dohot poda ni Tuhan i”, alana i do na mambahen las roha ni Jahowa. (Eps. 6:4) Songon naung taparsiajari, ingkon diajari hamu do ianakhonmuna mangantusi isi ni Bibel jala mangurupi nasida porsea tu parsiajaranna. Molo nunga togu haporseaon ni nasida, rade ma nasida manomba Jahowa jala mangalehon na dumenggan tu Ibana. Sai anggiat ma diurupi Jahowa hamu mangajari ianakhonmuna marhite Bibel dohot tondi parbadia, asa boi nasida marbisuk laho mandapot haluaon.