Angka na Poso—”Ulahon Hamu ma Haluaonmuna!”
”Songon tongtong ni pangoloionmuna nasailaon, . . . Mardongan biar dohot lomos ni roha ulahon hamu ma haluaonmuna!”—PLP. 2:12.
1. Boasa ringkot tardidi? (Ida gombar di mula ni parsiajaran.)
GANUP TAON, adong marribu parsiajar Bibel na tardidi. Gumodangan angka remaja dohot dakdanak do na tardidi i, naung marsiajar Bibel sian na gelleng. Ra, hamu pe songon i do. Boasa ringkot tardidi? Alana, ingkon tardidi do ganup halak Kristen asa boi mandapot haluaon jala mangolu salelengna.—Mat. 28:19, 20; 1 Ptr. 3:21.
2. Porlu do hamu mabiar molo naeng marjanji tu Jahowa? Boasa?
2 Molo nunga tardidi hamu, dipasupasu Jahowa ma hamu marhite godang cara na so hea dope dihilala hamu. Alai, adong do tanggung jawab na baru di hamu. Aha ma i? Di tingki naeng tardidi hamu, disungkun parjamita na pasahathon jamita pandidion ma hamu: ”Marhite tobusan ni Jesus Kristus, nunga muba hamu sian angka dosamuna, jala mangalehon dirimuna tu Jahowa laho mangulahon lomo ni rohaNa?” Dialusi hamu do, ”Nunga.” Marjanji do hamu mangkaholongi jala mangkaringkothon lomo ni rohaNa. Disolsoli hamu do janjimuna i? Tontu,
ndang disolsoli ho panogunoguon naung dilehon Jahowa tu ho. Alana, sasahalak na so olo ditogutogu Jahowa, i ma na gabe bagian sian portibi na nirajaan ni Sibolis. Lomo do roha ni Sibolis asa maup hamu. Sasintongna, las situtu do roha ni Sibolis molo mago pangkirimonmuna ala mangihuthon ibana jala mangalo tu Jahowa.3. Pasupasu aha do na boi dapotmu molo marjanji tu Jahowa?
3 Pingkirhon ma songon dia Jahowa naung mamasumasu ho ala marjanji tu Ibana jala tardidi. Ala dipillit ho manomba Jahowa, pos do roham mandok, ”Jahowa do donganku, ndang mabiar ahu, tung aha ma tagamon bahenon ni jolma tu ahu?” (Ps. 118:6) Ala didongani Jahowa do hita jala las rohaNa mangida hita, tontu hasangapon na umbalga do i.
TANGGUNG JAWABMUNA
4, 5. (a) Ise do na martanggung jawab molo marjanji hita tu Jahowa? (b) Aha do na boi masa tu sude naposo ni Jahowa?
4 Ndang natuatuam na martanggung jawab tu haporseaonmu. Nang pe ho tading rap dohot natuatuam, alai tanggung jawabmuna do taringot haporseaonmu. Boasa i ringkot diingot ho? Ndang adong nanggo sada pe sian hita na mamboto songon dia haporseaonta diuji di ari na naeng ro. Umpamana, ra tingki dakdanak dope ho tardidi. Alai dung remaja, olo do ho tompu lungunlungunan manang tompu muruk jala tamba ma sipingkiran. Sahalak borua remaja mandok, ”Di roha ni angka dakdanak naung tardidi, ndang pola soal molo ndang mandapot kue ulang tahun di singkola. Alai dung remaja, ala lam balga elaela manang godaan laho mangulahon seks, porlu do dipapos rohana, sai parohon na denggan do molo mangihuthon patik ni Jahowa.”
5 Ndang holan angka na poso na mangadopi elaela. Sude do angka naposo ni Jahowa naung tardidi ingkon mangadopi elaela. Boi do i ro sian parsaripeon, sahit, manang parkarejoan. Alani i, manang aha pe na masa, sude naposo ni Jahowa porlu marhaporseaon.—Jak. 1:12-14.
6. (a) Aha do na rumingkot ulahononmu? (b) Aha do na diparsiajari ho sian Pilippi 4:11-13?
6 Asa tongtong marhaporseaon, ingot ma janji naung dibahen ho tu Jahowa. Alana, nunga sian ias ni roham ho marjanji tu Ibana. Lapatanna, aha pe na masa, tongtong do ho mangulahon lomo ni rohaNa, nang pe angka donganmu manang natuatuam ndang mangulahon i be. (Ps. 27:10) Di sude situasi, sai pangido ma pangurupion ni Jahowa asa boi tongtong diulahon ho janjimi.—Jaha Pilippi 4:11-13.
7. Aha do lapatan ni mangulahon haluaonmu ”mardongan biar dohot lomos ni roha”?
7 Lomo do roha ni Jahowa maraleale dohot ho. Alai ingkon marsitutu do asa tongtong togu paralealeonmuna jala asa boi malua. Pilippi 2:12 mandok, ”Mardongan biar dohot lomos ni roha ulahon hamu ma haluaonmuna!” Lapatanna, porlu do sai mamparrohahon songon dia asa boi tongtong jonok tu Jahowa jala marsihohot aha pe na masa. Unang ma paposhu roham tu diri sandiri. Ingot ma, godang do naung leleng tardidi na so marsihohot be. Aha do na boi mangurupi ho asa boi malua?
RINGKOT MARSIAJAR BIBEL
8. Aha do lapatan ni marsiajar Bibel sahalakmu? Jala, boasa i ringkot?
8 Asa boi gabe aleale ni Jahowa, ingkon tatangihon jala mangkatai do hita tu Ibana. Cara laho manangihon Jahowa, i ma marhite mamparsiajari Bibel. Tajaha jala tarimangi ma Hata ni Debata manang angka sijahaon na diparade organisasi. Alai, marsiajar Bibel ndang dos songon mangapil parsiajaran tingki naeng ujian ho di singkola. Marsiajar Bibel boi do dipatudos songon mardalani tu inganan na so hea dope didalani ho. Di pardalanan i, dapotmu ma pengalaman na baru. Suang songon i ma tingki marsiajar Bibel, dapotmu ma gumodang hatorangan taringot Jahowa. Lam jonok ma ho tu Debata jala jonok ma Ibana tu ho.—Jak. 4:8.
Sadia jotjot do hamu martangiang tu Jahowa? (Ida paragraf 8-11)
9. Angka aha do na diparade laho mangurupi hamu marsiajar sahalakmuna?
9 Godang do angka alat na diparade organisasi ni Jahowa na boi mangurupi ho marsiajar Bibel sahalakmu. Umpamana, boi do hamu diurupi laho mangulahon aha naung diparsiajari hamu sian Bibel marhite seri ”Menggali Isi Alkitab” di bagian ”Anak Muda” di situs jw.org. Adong do muse panduan belajar ”Apa yang Sebenarnya Alkitab Ajarkan?” On boi mangurupi hamu patoguhon haporseaonmuna jala paboahon i tu na asing. Dapotmuna ma muse cara na asing laho marsiajar di artikel ”Kaum Muda Bertanya . . . Bagaimana Aku Bisa Menikmati Pembacaan Alkitab?” di Sedarlah! April 2009. Ringkot do marsiajar jala mangarimangi, asa boi malua.—Jaha Psalmen 119:105.
RINGKOT SITUTU MARTANGIANG
10. Boasa hamu ringkot martangiang?
Tingki adong na borat dipingkiri ho, didok Bibel do, ”Sai tu Jahowa ma pasahat parsorionmi”
10 Tingki marsiajar Bibel, na manangihon Jahowa do hita. Alai tingki martangiang, hita mangkatai tu Ibana. Mansai ringkot do martangiang. Alai, unang ma didok roham tangiang i holan hasomalan sambing manang songon jimat na mambahen ho sukses. Tangiang, i ma sada cara mangkatai tu Sitompa hita. Ingot ma, lomo do roha ni Jahowa manangihon tangiangmu! (Jaha Pilippi 4:6.) Alani i, tingki adong na borat dipingkiri ho, didok Bibel do, ”Sai tu Jahowa ma pasahat parsorionmi.” (Ps. 55:23) Diurupi do marjuta donganta ala mangihuthon poda on. Ho pe boi do urupanNa!
11. Boasa ingkon tongtong mandok mauliate tu Jahowa?
11 Unang ma didok roham, martangiang pe ahu holan asa diurupi Jahowa. Dipaingot Bibel do hita, ”Gabe parroha mauliate ma hamu!” (Kol. 3:15) Sipata, susa do hita alani godang ni sitaonon, hape ndang taparrohahon angka na denggan na tadapot. Alani i, ganup ari, lului ma tolu na palashon roham, jala hamauliatehon ma i tu Jahowa. Sahalak remaja na margoar si Abigail, na tardidi tingki marumur 12 taon mandok, ”Godang do na dilehon Jahowa tu hita. Alani i, tongtong ma hita mandok mauliate tu Ibana.” Sipata disungkun si Abigail do dirina: ”Sadia godang do na laho huhamauliatehon tu Jahowa ganup ari?” *
MARSIAJAR SIAN PENGALAMAN
12, 13. Paboa ma pengalamanmu na denggan taringot pangurupion ni Jahowa. Boasa ringkot mangarimangi i?
12 Diurupi Jahowa do Raja Daud asa marsihohot tingki mangadopi sitaonon. Disurat do taringot pengalaman ni si Daud di Bibel, ”Dai jala ida hamu denggan basa ni Jahowa, martua ma baoa na marhaposan tu Ibana.” (Ps. 34:9) Dipatorang do di ayat on, lomo roha ni Jahowa asa dihilala ho haburjuonNa. Tingki dijaha hamu Bibel dohot angka publikasi jala ro tu parpunguan, botoonmuna ma songon dia Jahowa mangurupi angka dongan tongtong marsihohot. Asa lam togu paralealeonmu tu Jahowa, ingkon ho sandiri do na mangkilala pangurupion ni Jahowa. Adong do pengalamanmu taringot cara ni Jahowa mangurupi ho?
Hamauliatehon hamu ma angka naung dilehon Jahowa marhite organisasiNa
13 Sai adong do pengalamanta taringot pangurupion ni Jahowa. Ditogihon do hamu asa maraleale tu Ibana dohot tu Jesus. Didok Jesus, ”Ndang adong na tarbahen ro tu Ahu, ia so na tinogu ni Ama i na marsuru Ahu.” (Joh. 6:44) Boi do dihilala ho na jonok Jahowa tu ho? Manang didok roham, ’Ahu kan holan na mangihutihut do. Natuatuangku do na jonok tu Jahowa.’ Ingot ma, tingki marjanji ho tu Jahowa jala tardidi, sasintongna nunga maraleale ho tu Ibana. Didok di Bibel, ”Alai anggo adong na mangkaholongi Debata, i do na tinanda ni Debata.” (1 Kor. 8:3) Hamauliatehon hamu ma angka naung dilehon Jahowa marhite organisasiNa.
14, 15. Songon dia do marbarita na uli boi patoguhon haporseaonmu?
14 Hilalaonmu ma burju ni Jahowa tingki diurupi hamu marbarita na uli sian jabu tu jabu manang di singkola. Ra, ndang mura marbarita tu dongan sasingkolam. Sungkunsungkun do ra roham, ’Dijangkon do ahu?’ Ra, taroktokon do ho tarlumobi tingki patorangkon haporseaonmu di jolo ni torop halak. Molo songon i, aha do na boi mangurupi ho?
15 Pingkirhon ma taringot boasa pos roham tu haporseaonmu i. Molo nunga adong di bahasamu panduan belajar di situs jw.org, parsiajari ma i. Ala marhite i, diantusi ho ma taringot haporseaonmu, boasa pos roham tu haporseaonmi, jala songon dia do ho patorangkon haporseaonmi tu na asing. Molo nunga pos roham tu haporseaonmi jala denggan diparade ho na laho sipaboaonmu, gabe lomo ma roham mangkatindangkon taringot Jahowa.—Jer. 20:8, 9.
16. Songon dia do carana asa barani mancaritahon haporseaonmu?
16 Sipata olo do taroktokon ho nang pe nunga denggan diparade ho na laho sipaboaonmu. Donganta borua na marumur 18 taon, na tardidi tingki marumur 13 taon mandok, ”Huboto do aha na huhaporseai, alai sipata olo do borat huhilala laho mangkatahon i.” Alai dicoba ibana ma songon somalna mangkatai siganup ari. Ibana mandok, ”Molo dongan sakalashu lancar do marcarita taringot ulaon ni nasida. Sasintongna ahu pe boi do songon i. Alani i, hupaboa ma tu nasida taringot ulaonku tingki mangurupi halak marsiajar Bibel. Dung i, hucaritahon ma muse ulaonku na asing. Jotjot do disungkun nasida aha do na huulahon tingki mangurupi halak marsiajar Bibel. Alai, ndang pintor taringot
Bibel na huhatai tu nasida. Nang pe songon i, adong do sian nasida na manungkun taringot ulaonki. Songon i ma cara na mura patorangkon haporseaonku tu nasida. Alani i, mansai las ma rohangku!”17. Aha dope na boi mangurupi hamu asa barani?
17 Molo dipatudu ho do pangargaion tu angka donganmu, tontu nasida pe patuduhon pangargaion tu ho dohot haporseaonmu. Si Olivia na marumur 17 taon, na tardidi tingki dakdanak mandok, ”Sai mabiar do ahu mancaritahon isi ni Bibel, ala didok rohangku dirimpu nasida ma ahu na Bibelon.” Alani i, dipasiding ibana ma pamingkirionna na sala i. Ndang pandapotna i na sai dipingkiri. Didok ibana, ”Godang dope angka na poso na so mamboto taringot Sitindangi Ni Jahowa. Holan hita do Sitindangi na ditanda nasida. Mangkorhon na denggan do tu nasida molo taulahon na denggan. Maila do hita mangkatahon haporseaonta? Barani do hita mangida bohina tingki mangkatai? Molo ndang pos rohanta tu na tapasahat, boi do gabe ndang olo nasida manangihon hita. Molo lambok hita, marpos ni roha, jala denggan paboahon angka na laho sidohononta, gabe lomo ma roha ni nasida jala diargai ma hita.”
MARSITUTU MA HAMU DI ULAON HALUAON
18. Aha do na ingkon ulahononmu asa boi malua?
18 Ingkon marsitutu do ho mangulahon ulaon haluaon i. Alani i, ringkot do ho manjaha jala mangarimangi Hata ni Debata, martangiang tu Jahowa, jala ingot ma songon dia Jahowa nunga mangurupi ho. Molo diulahon ho songon i, pos ma roham, boi do Jahowa gabe Alealem. Gabe lomo ma roham paboahon haporseaonmu tu na asing.—Jaha Psalmen 73:28.
19. Boasa porlu marsitutu laho mandapot haluaon?
19 Didok Jesus, ”Nasa na giot mangihuthon Ahu, disoadahon ma dirina, diporsan ma [tiang] na tu ibana; diihuthon ma Ahu!” (Mat. 16:24) Ganup halak Kristen ingkon marjanji asa manomba Jahowa jala tardidi. Molo diulahon ho songon i, hilalaonmu ma las ni roha saonari, jala marpangkirimon laho mangolu salelengna di paradeiso. Jadi, ulahon ma angka na boi mambahen hamu malua!
^ par. 11 Laho mandapot gumodang hatorangan, ida ma ”Pertanyaan Anak Muda—Apa Gunanya Berdoa?” dohot lembar kegiatan di jw.org.