1, 2. Sian pengalaman ni si Tony, songon dia do sasahalak boi mambahen hamubaon?

ADONG ma sahalak na poso na margoar si Tony. Sian na gelleng, ndang adong be bapakna. Dung SMA, ndang lomo be rohana singkola. Alani i, naeng kaluar ma ibana sian singkola. Di ari sabtu manang ari minggu, jotjot do si Tony dohot angka donganna laho tu bioskop manang marmeami. Ndang halak na kasar ibana jala ndang marnarkoba. Alai ndang diboto ibana aha do tujuan ni ngoluna. Hurang porsea do ibana na adong Debata. Di sada tingki, pajumpang ma ibana dohot dua Sitindangi Ni Jahowa. Dipaboa ibana ma tu nasida na hurang porsea ibana na adong Debata. Dilehon Sitindangi i ma tu ibana dua brosur, i ma Benarkah Kehidupan Diciptakan? dohot Asal Mula Kehidupan—Lima Pertanyaan yang Patut Direnungkan.

² Dijaha si Tony ma brosur i marulak-ulak. Tingki ro Sitindangi i manjumpangi ibana, didok ma, “Tutu do adong Debata.” Ujungna, gabe marsiajar Bibel ma ibana. Lam  leleng, gabe muba ma pandapotna taringot hangoluan. Di singkola pe, gabe lam burju do ibana jala lam malo. Alani i, gabe longang ma roha ni kepala singkolana mangida ibana. Didok kepala singkola i ma, “Gabe lam burju do ho huida jala lam malo. Ala naung gabe Saksi Jahowa i do ho?” Ujungna, marbarita ma si Tony tu kepala singkolana i. Nunga tamat be ibana jala nunga gabe perintis biasa dohot parhobas di huria. Saonari, las do roha ni si Tony ala adong Bapak na mangkaholongi ibana, i ma Jahowa!​—Ps. 68:6.

3. Aha do na didok Jahowa tu angka na poso?

³ Sian pengalaman ni si Tony, taboto ma na disarihon Jahowa do angka na poso. Didok Jahowa do tu angka na poso, ingot ma “Sitompa ho di angka ari haposoonmu” asa boi marlas ni roha jala marhasil ngolumuna. (Pjm. 12:1) Diboto Jahowa do ndang mura mangulahon on. Alai molo diurupi Jahowa, boi do hamu tongtong marhasil saleleng ni ngolum. Saonari, taulas ma pengalaman ni halak Israel songon dia nasida boi sahat tu Tano na Dijanjihon dohot pengalaman ni si Daud na manaluhon si Goliat.

4, 5. Aha do parsiajaran na tadapot sian pengalaman ni halak Israel dohot si Daud? (Ida gombar di mula ni parsiajaran.)

⁴ Andorang so sahat dope halak Israel tu Tano na Dijanjihon, ndang disuru Jahowa nasida marlatik marporang asa gabe tentara na jago. (5 Mus. 28:1, 2) Hira na so masuk akal do parenta on. Alai didok Jahowa, ingkon porsea do nasida tu Ibana jala mangoloi hatana. (Jos. 1:7-9) On ma parenta na dumenggan tu halak Israel. Alana, nunga jotjot diurupi Jahowa nasida manaluhon halak Kanaan. (Jos. 24:11-13) Asa boi taoloi Debata, ingkon porsea do hita tu Ibana. Alana, i do na mambahen hita asa tongtong marhasil. Sahat tu saonari, i do na dipangido Jahowa tu hita.

⁵ Sahalak tentara na jago do si Goliat. Timbona pe hampir tolu meter jala lengkap do senjatana. (1 Sam. 17:4-7) Alai si Daud, holan ambalang dohot haporseaonna tu Jahowa do dibahen ibana mangalo si Goliat. Molo halak na so porsea tu Debata, didok do si Daud na oto ala barani mangalo si Goliat! Hape sasintongna, si Goliat do na oto.​—1 Sam. 17:48-51.

6. Aha do na laho taulas di parsiajaran on?

⁶ Di parsiajaran naung salpu, nunga taulas opat na boi mambahen hita asa tongtong marhasil jala marlas ni roha. I ma angka na diparade organisasi, ale-ale na burju, cita-cita na mambahen las ni roha, mangargai kebebasan na dilehon Jahowa. Di parsiajaran on, taulas ma muse laba na asing na boi tadapot molo taulahon angka na denggan i. Asa boi taboto i, taulas ma on sian Psalmen 16.

7. (a) Songon dia do halak na solhot parale-aleonna tu Jahowa? (b) Aha do ‘parjambaran’ ni si Daud, jala aha do labana?

⁷ Halak na solhot parale-aleonna tu Jahowa, ditiru do pingkiran ni Jahowa. Unduk jala dioloi do Ibana. Didok  si Daud do di endena, “Ale Jahowa, holan Ho do parjambaranku.” (Ps. 16:5, Bibel siganup ari) Mandok mauliate do si Daud tu Jahowa ala boi ibana marale-ale jala marhaposan tu Jahowa. (Ps. 16:1) On ma na sai mambahen las roha ni si Daud. Alani i didok ibana ma, “Marolopolop” jala mandok mauliate do ahu tu Jahowa. (Jaha Psalmen 16:9, 11.) Sitiruon na denggan do si Daud!​—1 Kor. 2:12, 13.

8. Aha do na boi mambahen hamu asa marlas ni roha?

⁸ Songon pengalaman ni si Daud, ndang hepeng dohot hasonangan ni portibi on na mambahen las rohana. (1 Tim. 6:9, 10) Sahalak donganta di Kanada pe mandok, “Ndang boi tadapot las ni roha sian angka na di portibi on. Alai tahilala ma las ni roha molo adong na talehon tu Jahowa.” (Jak. 1:17) Molo togu haporseaonmuna jala tongtong manomba Jahowa, on do na mambahen hamu marlas ni roha. Carana, lehon ma tingki laho manjaha Bibel, mangida jala mangarimangi angka tompaanna, parangena, dohot holong ni rohana tu hamu.​—Rom 1:20; 5:8.

9. Songon dia do Bibel mangurupi hamu maniru pingkiran ni Debata?

⁹ Songon ama parholong, sipata dipasingot Debata do hita. Olo do si Daud manangihon sipasingot ni Debata. Didok ibana, “Hupuji ma Jahowa na manogunogu ahu, jala di tingki borngin panggora ni rohangku mangajari ahu.” (Ps. 16:7, Bibel siganup ari) Dirimangi jala ditiru si Daud do pingkiran ni Debata. Diihuthon ibana do poda sian Debata na mambahen ibana asa marpangalaho na denggan. Molo ditiru hamu si Daud, gabe lam holong ma rohamu tu Debata, dibahen hamu ma las rohana jala lam solhot ma parale-aleonmuna tu Ibana. Songon na didok donganta si Christin, tingki mangariset jala dirimangi ibana na dijaha, didok rohana laho tu ahu do on disurat!

10. Songon na didok di Jesaya 26:3, aha do labana molo solhot parale-aleonta tu Jahowa?

¹⁰ Lomo do roha ni Debata asa diboto hamu dia na rumingkot di ngolumuna, songon dia mambahen keputusan na denggan, jala asa unang mabiar tu aha na laho masa! (Jaha Jesaya 26:3.) I do alana dilehon Jahowa tu hamu parbinotoan dohot pangantusion taringot na masa saonari on dohot di ari na naeng ro. Songon donganta si Josua na tading di Amerika Serikat, didok ibana molo solhot parale-aleonta tu Jahowa gabe taboto ma dia na rumingkot di ngolunta.

11. Ale-ale na songon dia do na dipillit si Daud?

¹¹ Songon naung taulas di minggu naung salpu, holan di angka halak na mangkaholongi jala mangoloi Jahowa do boi tadapot ale-ale na denggan. (Jaha Psalmen 16:3.) Songon si Daud, diboto ibana do mamillit ale-ale na denggan. Dapotna do las ni roha sian ale-alena na mangkaholongi Jahowa. Didok ibana do ale-alena i angka “nabadia”, ala ias do pangalaho ni nasida di adopan ni Jahowa. Songon i do muse na dihilala panurat psalmen na asing. Didok, “Aleale ni sude angka na mangkabiari Ho do ahu, ro di angka  na mangaradoti angka parentam.” (Ps. 119:63) Alani i, ndang ingkon tu na satorbang hita boi marale-ale.

12. Boasa boi solhot parale-aleon ni si Daud dohot si Jonatan?

¹² Ndang holan tu na satorbangna si Daud marale-ale. Diboto hamu do ise na dipillit si Daud gabe ale-alena? I ma si Jonatan. Molo tajaha di Bibel, mansai solhot do parale-aleon ni nasida, nang pe umtua si Jonatan 30 taon sian si Daud. Diargai si Jonatan do habaranion ni si Daud. Suang songon i do si Daud tu si Jonatan. Barani do nasida mangadopi musu ni Debata. Boasa boi solhot parale-aleon ni nasida? Ala rap mangkaholongi Jahowa do nasida.​—1 Sam. 13:3; 14:13; 17:48-50; 18:1.

13. Songon dia do hamu boi mandapot godang ale-ale? Paboa ma sada contoh.

¹³ Molo marale-ale hita tu halak na mangkaholongi jala mangoloi Jahowa, boi do tadapot las ni roha songon na dihilala si Daud dohot si Jonatan. Songon na didok donganta si Kiera, “Godang do ale-alengku di liat portibi on, nang pe marasing-asing suku dohot kebudayaan ni nasida.” Molo ditiru hamu songon i, botoonmuna ma songon dia Bibel dohot tondi parbadia boi mambahen hita sude gabe sada keluarga.

14. (a) Songon dia carana mambahen cita-cita na parohon las ni roha? (b) Aha do na didok piga-piga na poso taringot cita-cita ni nasida?

¹⁴ Jaha Psalmen 16:8. Manomba Jahowa do na rumingkot disi si Daud. Tingki mambahen cita-cita, tiru hamu ma si Daud jala dipingkirhon ma aha na dihalomohon Jahowa, asa marlas ni roha hamu. Sahalak na poso na margoar si Steven mandok, “Las do rohangku molo saut cita-cita na hubahen. Jala las do rohangku molo lam denggan i huulahon.” Asing ni i, sahalak na poso sian Jerman mandok, “Saonari, ndang olo ahu holan mamingkirhon diringku sandiri, asa unang husolsoli i haduan dung matua.”  Songon i do pangkilalaanmuna? Alani i, pangke ma bakat dohot parbinotoanmuna laho pasangaphon Jahowa dohot mangurupi na asing. (Gal. 6:10) Tingki mambahen cita-cita manang keputusan, martangiang ma hamu asa diurupi Jahowa. Pos ma rohamuna sai na alusan ni Jahowa do tangiangmuna!​—1 Joh. 3:22; 5:14, 15.

15. Aha do cita-cita na boi dibahen hamu? (Ida kotak “ Cita-Cita na Boi Dibahen Hamu.”)

¹⁵ Aha do cita-cita na boi dibahen hamu? Ra, marcita-cita do hamu laho mambahen komentarmuna sandiri di parpunguan. Manang marcita-cita asa gabe perintis manang karejo di Betel. Boi do muse hamu marsiajar bahasa na baru asa boi marbarita tu godang halak. Sahalak donganta na margoar si Barak naung di dinas sepenuh waktu mandok, “Disi dungo ahu manogot nai, huboto aha na laho ulahononku na mambahen las roha ni Jahowa. Ndang boi dapothu las ni roha sisongon on di ulaon na asing.”

16. Songon dia do pangkilalaan ni si Daud tu uhum ni Jahowa, jala boasa?

¹⁶ Jaha Psalmen 16:2, 4. Songon naung taparsiajari di minggu naung salpu, molo taihuthon uhum dohot poda ni Debata boi ma denggan ngolunta. Gabe tahaholongi ma na denggan jala tapasiding ma na roa. (Am. 5:15) Songon si Daud, di haholongi ibana do na denggan jala dipasiding do na roa. Umpamana, ndang pasangaphu dibahen ibana sasahalak asing ni Jahowa. Alana molo pasangaphu dibahen tu sasahalak, dos do i songon na manomba gana-ganaan. Alani i, holan Jahowa do na ingkon tapasangap. Didok si Daud muse, sude angka na denggan na adong di ibana, sian Jahowa do i jala denggan do sude na diulahon Jahowa. Alani i, marsitutu do si Daud maniru Jahowa.​—Jes. 2:8, 9; Pgk. 4:11.

17, 18. (a) Didok si Daud, aha do akibatna molo manomba gana-ganaan? (b) Saonari boasa godang halak gabe lam susa?

¹⁷ Najolo, mangulahon seks na so patut, sada bagian sian panombaon tu gana-ganaan. (Hos. 4:13, 14) I do alana godang halak na lomo rohana manomba gana-ganaan. Alai boi do nasida marlas ni roha tingki mangulahon i? Daong! Alana ingkon dipelehon nasida do muse ianakhonna. Didok si Daud, gabe susa do halak na manomba gana-ganaan. (Jes. 57:5) Dihagigihon Jahowa do ulaon sisongon i. (Jer. 7:31) Aut sugari disi hamu di tingki i, tontu mandok mauliate do hamu molo sisomba Jahowa natua-tuamuna!

¹⁸ Saonari, godang do agama na paloashon halak mangulahon seks na so patut. Umpamana, boi do baoa mangulahon seks dohot baoa, manang borua dohot borua. I do alana godang halak bebas mangulahon lomo ni rohana. Ra, godang do diida hamu na songon i. Alai gabe susa do nasida. (1 Kor. 6:18, 19) Alani i hamu angka na poso, oloi hamu ma Debata. Buktihon hamu ma, molo unduk tu Debata, hilalaonmuna ma las ni roha. Pingkirhon ma aha akibatna molo diulahon hamu seks na so patut. Alana gabe lam susa do hamu  molo mangulahon i. (Gal. 6:8) Songon na didok si Josua na diulas di mula ni parsiajaran on, “Bebas do hamu mamillit, alai molo sala pillit hamu gabe susa do ngolumuna.”

19, 20. Aha do pasu-pasu na boi dapot ni angka na poso molo porsea jala mangoloi Jahowa?

¹⁹ Didok Jesus, “Molo diihuthon hamu hatangku, tutu ma hamu angka siseanku. Botoonmuna ma hasintongan jala paluaon ni hasintongan i ma hamu.” (Joh. 8:31, 32) Molo diihuthon hamu pangajarion ni Jesus, gabe bebas ma hamu sian agama palsu, cerita na so tutu jala ndang dioto-otoi portibi on be hamu. Jala di ari na naeng ro, lehonon ni Jahowa do muse tu hita “hasangapon na mansai balga songon na dilehon tu angka anak ni Debata”. (Rom 8:21) Tontu mandok mauliate do hita tu Jahowa ala tadapot hasintongan. Alai ndang sae holan ‘mamboto hasintongan’ i, ingkon ulahononmuna do i di ngolumuna!

²⁰ Hamu angka na poso, argai ma kebebasan na dilehon Debata tu hamu. Molo marbisuk hamu, boi ma dapotmuna hangoluan na dumenggan. Sahalak baoa na poso mandok, “Molo marbisuk hamu mambahen keputusan sian tingki poso dope, boi do i mangurupi hamu mambahen keputusan na rumingkot di ari na naeng ro. Umpamana, tingki naeng mangalului karejo, naeng marhasohotan manang andigan laho marhasohotan.”

21. Asa boi dapotmuna “hangoluan na saleleng ni lelengna”, aha do na ingkon ulahononmuna?

²¹ Nang pe godang angka na denggan na didapot halak saonari on, alai parsatongkinan do i. Alana ndang taboto aha na laho masa haduan. (Jak. 4:13, 14) Alani i, bahen ma Jahowa gabe “parjambaran” di hamu, i ma marhite pajonokkon diri tu Ibana jala argai ma angka na denggan na dilehon Ibana. (Ps. 103:5) Ndang dipaksa Jahowa angka halak laho manomba Ibana. Nasida sandiri do na ingkon mamillit. Alai molo tongtong dioloi hamu Debata, dapotmuna ma “hangoluan na saleleng ni lelengna”. (1 Tim. 6:19) Pos ma rohamuna lehonon ni Jahowa do las ni roha na salelengna!​—Ps. 16:11.