1, 2. Boasa dumenggan molo diihuthon hamu poda ni Debata tingki mambahen keputusan? (Ida gombar di mula ni parsiajaran.)

MOLO na poso dope hamu, tontu godang do dapotmuna poda taringot masa depan. Ra dijujui angka guru, penasehat dohot halak na asing do hamu asa kuliah manang asa mandapot karejo na godang gajina. Alai imbar do poda na ni Jahowa sian poda ni angka halak. Molo Jahowa, lomo rohana asa ringgas hamu marsiajar di singkola asa boi hamu annon manarihon dirimuna sandiri. Diboto Jahowa do, molo keputusan na dibahen hamu saonari mangkorhon do i tu masa depanmuna. (Kol. 3:23) Diparade Jahowa do tudu-tudu na boi mangurupi hamu mambahen keputusan na mambahen las rohana di ari parpudi on.​—Mat. 24:14.

² Ingot ma, sude do diboto Jahowa. Diboto Ibana do aha na laho masa di ari na naeng ro jala andigan ajal ni  portibi on. (Jes. 46:10; Mat. 24:3, 36) Hamu pe, tangkas do ditanda Jahowa. Diboto Ibana do aha na boi mambahen hamu marlas ni roha dohot na mambahen hamu ndang marlas ni roha. Godang do poda ni jolma songon na denggan begeon, alai molo ndang sian Bibel i, ndang adong labana.​—Poda 19:21.

3, 4. Ala ndang mangoloi Debata, aha do na masa tu si Adam, si Hawa dohot pinomparna?

³ Najolo, didok Sibolis do tu si Hawa, molo nasida sandiri na mamillit dia na dumenggan di ngoluna, lam marlas ni roha ma nasida. Poda na so denggan do on! (1 Mus. 3:1-6) Didok Sibolis pe songon i, na lomo do rohana asa holan ibana na disomba jala dioloi si Adam, si Hawa dohot angka pinomparna. On patuduhon, holan mamingkirhon dirina sandiri do Sibolis. Hape, ndang hea adong na dilehon Sibolis manang aha pe tu nasida. Jahowa do na mangalehon sude na dihaporluhon nasida. Dibahen do nasida mardongan saripe, tading di inganan na mansai uli jala dibahen do nasida sempurna asa boi mangolu salelengna.

⁴ Alai, ndang dioloi si Adam dohot si Hawa Debata. Alani i, gabe susa ma ngolu ni nasida jala ndang marale-ale be dohot Debata. Songon bunga naung diputik sian bonana, songon i ma si Adam dohot si Hawa. Lam leleng, lam matua ma nasida jala mate. Pinomparna pe, gabe susa ma jala mate. (Rom 5:12) Saonari pe godang do halak na mangalo tu Debata. Holan lomo ni rohana do na diulahon nasida. (Eps. 2:1-3) Aha do hasilna? Didok Bibel, ndang marguna habisuhon ni jolma i “anggo maralohon Jahowa”.​—Poda 21:30.

5. Aha do pos ni roha ni Jahowa tu jolma, jala tutu do i?

⁵ Pos do roha ni Jahowa, sai adong do jolma na olo mananda jala manomba Ibana, dohot ma i angka na poso. (Ps. 103:17, 18; 110:3) Molo hamu sahalak na poso, pos ma rohamuna godang do dapotmuna pasu-pasu sian Debata. Alana, arga do angka na poso di adopan ni Jahowa. Jala lomo rohana asa marlas ni roha hamu. Di Psalmen 103: 5, Bibel siganup ari mandok, “Digohi do ngolungku marhite angka na denggan.” Saonari taulas ma opat “angka na denggan” i, i ma angka na diparade organisasi, ale-ale na burju, cita-cita na mambahen las ni roha, mangargai kebebasan na dilehon Jahowa.​—Poda 10:22.

6. Boasa ringkot mananda Debata, jala aha do na diparade Jahowa laho mangurupi hamu?

⁶ Imbar do jolma sian binatang. Molo jolma, porlu do mamboto ise na manompa nasida. (Mat. 4:4) Holan jolma do na hea manungkun songon, “Aha do tujuan ni ngolu on?” dohot “Aha do na laho masa di ari na naeng ro?” Didok Jesus, “Marlas ni roha ma na mamboto ringkot ni marale-ale tu Debata.” (Mat. 5:3) Asa boi togu  haporseaonta dohot parale-aleonta tu Debata, dilehon Ibana do Bibel. Jala marhite “naposo haposan” diparade do angka sijahaon. (Mat. 24:45) Alani i, molo tatangihon Debata, tadapot ma parbinotoan, bisuk, dohot las ni roha. Ala marragam do na diparade organisasi laho patoguhon haporseaonta, on mambahen hita marlas ni roha.​—Jes. 65:13, 14.

7. Aha do laba ni sude na diparade organisasi tu hamu?

⁷ Angka na diparade organisasi, mangurupi hamu asa mananda Jahowa jala mangantusi isi ni Bibel. Jala mangurupi hamu asa marbisuk dohot marpangantusion na denggan. (Jaha Poda 2:10-14.) Umpamana, molo marbisuk jala marpangantusion hamu, boi ma diboto hamu na adong do Debata. Jala botoonmuna ma, molo hepeng dohot arta ndang boi mambahen hamu marlas ni roha. Diurupi ma muse hamu laho pasidingkon angka ulaon dohot hasomalan na boi parohon jea. Alani i, ulahon ma angka na boi mambahen hamu gabe marbisuk jala marpangantusion. Molo diulahon hamu i, botoonmuna ma na dihaholongi Jahowa do hamu jala lomo rohana asa denggan ngolumuna.​—Ps. 34:9; Jes. 48:17, 18.

8. Sian saonari, boasa ingkon tapatogu parale-aleonta tu Debata, jala aha do na laho hilalaonmuna?

⁸ Ndang sadia leleng nai, laho salpu nama portibi ni Sibolis. Alani i, sian saonari ingkon tapatogu do parale-aleonta tu Debata jala porsea ma tu Ibana. (2 Ptr. 2:9) Alana, holan Jahowa do na boi mangalinggomi jala paradehon na tahaporluhon, dohot ma i sipanganonta. (Hab. 3:2, 12-19) Molo togu parale-aleonmuna jala porsea tu Jahowa, hilalaonmuna ma songon na didok si Daud “Tongtong do  hubahen Jahowa tu jolongku, ai molo di siamunhu Ibana, ndang tagamon humordit ahu.”​—Ps. 16:8.

9. (a) Molo tajaha Johannes 6:44, aha do na diulahon Jahowa? (b)  Aha do na pintor diboto hamu tingki marsitandaan dohot donganta Sitindangi?

⁹ Tingki parjolo sahali hamu marsitandaan dohot na so Sitindangi, ra gabe diboto hamu ma goarna, jala songon dia rupana. Alai ndang godang dope na diboto hamu taringot ibana. Alai tingki parjolo sahali hamu marsitandaan dohot donganta Sitindangi, pintor diboto hamu do na dihaholongi ibana Jahowa. Jala diboto hamu do adong na denggan na diida Jahowa sian ibana. I do alana gabe naposo ni Jahowa ibana. (Jaha Johannes 6:44.) Ndang soal sian dia haroroanna, ise keluargana, alai nunga godang na diboto hamu taringot ibana. Jala ibana pe songon i do tu hamu!

10, 11. Aha do na mambahen sarupa sude Sitindangi, jala aha labana tu hita?

¹⁰ Tingki pajumpang hamu dohot Sitindangi na asing, pintor diboto hamu do na sarupa haporseaonmuna dohot nasida. Nang pe marasing-asing bahasanta, alai adong do bahasanta na sarupa, i ma hasintongan. (Sep. 3:9) On lapatanna, sarupa do Debatanta, sarupa do aturan na taihuthon, jala sarupa do pangkirimonta. On do na mambahen hita marpos ni roha tu angka donganta jala boi marale-ale dohot nasida salelengna.

¹¹ Ala sisomba Jahowa do hamu, umbahen dapotmuna ale-ale na burju. Godang do ale-alemuna di liat portibi on nang pe ndang hea hamu pajumpang dohot nasida! Asing ni Sitindangi ni Jahowa, adong dope halak na asing na mangkilala las ni roha sisongon on?

12. Aha do cita-cita na boi dibahen hamu?

¹² Jaha Parjamita 11:9–12:1. Adong do cita-cita na dibahen hamu? Ra, marcita-cita do hamu laho manjaha Bibel ganup ari, asa lam denggan komentarmuna di parpunguan, manang asa lam godang mamboto ayat ni Bibel na laho dipangke hamu tingki marbarita. Songon dia do pangkilalaanmuna molo lam denggan hamu mangulahon i manang gabe dipuji halak? Tontu, las do rohamuna. Alana, nunga ditiru hamu Jesus mangulahon lomo ni roha ni Jahowa.​—Ps. 40:9; Poda 27:11.

13. Boasa dumenggan manomba Jahowa sian angka na dilului halak di portibi on?

¹³ Molo marsitutu hamu manomba Jahowa, boi ma las rohamuna jala adong ma tujuan ni ngolumuna. Didok si Paulus, “Ingkon togu ma hamu, jala ndang muba-uba. Sai marsitutu ma hamu mangulahon godang ulaon ni Tuhan i. Ai diboto hamu do, ndang marisuang halojaonmuna marhobas di Tuhan i.” (1 Kor. 15:58) Godang halak na marcita-cita mangalului hepeng manang asa terkenal, alai ndang boi i mambahen nasida marlas ni roha. Nang pe mamora nasida, alai  jotjot do dihilala nasida hira na so marlapatan ngoluna. (Luk. 9:25) Songon i ma na dihilala Raja Salomo.​—Rom 15:4.

14. Aha do na boi taparsiajari sian pengalaman ni si Salomo?

¹⁴ Ndang hea dope adong jolma na ummora jala na umsangap songon si Salomo. Hea do didok ibana tu dirina sandiri, “Antong unjunanku ma ho marhite sian las ni roha, guru lomo ni roham idaonmu!” (Pjm. 2:1-10) Alani i, dibangun ibana do jabu dohot taman na mansai bagak. Dibahen ibana do sude aha na dihalomohon rohana. Alai ndang boi i mambahen ibana marlas ni roha. Didok ibana do, “Ida ma laho salpu do saluhutna.” Jala didok muse, “Ndang adong hape na hot anggo di hasiangan on.” (Pjm. 2:11) Olo do hamu marsiajar sian pengalaman ni si Salomo?

15. Hombar tu Psalmen 32:8, boasa ingkon marhaporseaon hamu, jala boasa on boi mangurupi hamu?

¹⁵ Lomo roha ni Jahowa asa tatangihon jala taoloi hatana. Alana, ndang lomo roha ni Jahowa jolo tahilala na susa, baru pe taboto sala do na taulahon i. Molo porsea jala taoloi Ibana, ndang solsolanta keputusan na tabahen. Jala ndang lupahonon ni Jahowa “holong na pinatudumuna tu goarna”. (Heb. 6:10) Alani i, patogu ma haporseaonmuna asa boi hamu mambahen keputusan na denggan di ngolumuna. Alana lomo do roha ni Jahowa asa denggan ngolumuna.​—Jaha Psalmen 32:8.

16. Nang pe bebas, alai boasa ingkon marbisuk hita mambahen keputusan?

¹⁶ Didok si Paulus, “Manang didia adong tondi parbadia ni Jahowa, disi do adong haluaon.” (2 Kor. 3:17) Tingki ditompa Jahowa hita, dilehon do tu hita kebebasan laho mamillit. Alani i, tingki mambahen keputusan ingkon marbisuk do hita. Ra adong do diida hamu piga-piga donganmuna na mangida pornografi, mangulahon seks na so patut, mangihuthon olahraga na berbahaya dohot kecanduan narkoba manang alkohol. Hira na las do roha ni nasida mangulahon i. Alai angka ulaon i, boi do mambahen nasida gabe marsahit, kecanduan jala boi gabe mate. (Gal. 6:7, 8) Dirimpu nasida, molo diulahon i nunga dapot ni nasida las ni roha. Alai sasintongna, ndang songon i.​—Tit. 3:3.

17, 18. (a) Boasa marlaba molo mangoloi hata ni Debata? (b) Aha do imbar ni parenta na dilehon Jahowa tu si Adam dohot si Hawa sian na dibahen jolma?

¹⁷ Molo dioloi hamu Jahowa jala diargai hamu kebebasan na dilehonna, marlaba do i tu hamu. Boi ma hamu tongtong sehat jala ndang susa be ngolumuna. (Ps. 19:8-12) Gabe halak na  martanggung jawab ma hamu di adopan ni Jahowa dohot natua-tuamuna, molo marbisuk hamu jala dioloi hamu Hata ni Debata. Gabe pos ma roha ni natua-tuamuna tu hamu. Marjanji do Jahowa, di ari na naeng ro laho lehononna do tu hita “haluaon hasangapon ni angka anak ni Debata”.​—Rom 8:21, Bibel siganup ari.

¹⁸ Tingki di porlak Eden, dihilala si Adam dohot si Hawa haluaon sisongon i. Alana, holan sada do parenta na dilehon Jahowa tu nasida, i ma ndang boi mangallang parbue ni hau i. (1 Mus. 2:9, 17) Sasintongna ndang borat parentana i. Alana ndang songon godang ni parenta manang aturan na dibahen jolma parenta ni Jahowa i. Jala ndang dipaksa Jahowa nasida laho mangulahon i.

19. Asa unang tataon na susa, aha do na di ajarhon Jahowa dohot Jesus tu hita?

¹⁹ Tingki mangalehon aturan tu jolma, marbisuk do Jahowa. Ndang dilehon Ibana tu hita godang aturan. Alai sabar do Jahowa mangajari hita asa boi taulahon uhumna. Diajari do hita asa mangihuthon podana jala pasidingkon angka na so denggan. (Rom 12:9) Marhite jamita ni Jesus di Dolok, diajari do hita asa mangantusi boasa adong halak mangulahon na so denggan. (Mat. 5:27, 28) Molo dung Raja Jesus di tano na imbaru, ajaranna dope hita laho mamboto aha na denggan dohot na so denggan. (Heb. 1:9) Bahenon ni Jesus ma hita gabe sempurna. Boi ma tabayangkon, ndang tarela-ela be hita mangulahon na so denggan jala manaon hasusaan. Las ma rohanta ala mangkilala “haluaon hasangapon” songon na dijanjihon Jahowa tu hita.

20. (a) Songon dia do Jahowa mangulahon lomo ni rohana? (b) Songon dia hamu boi maniru Jahowa?

²⁰ Di tano na imbaru, nang pe bebas hita, alai adong do aturanna. Boasa? Alana, nang pe Jahowa na marhuaso jala bebas mangulahon lomo ni rohana, alai marhite holong do Ibana mangulahon i. (1 Joh. 4:7, 8) Sude na taulahon, ingkon alani holong tu dongan do i dohot tu Debata. Molo taulahon on, na maniru Jahowa do hita disi. Jala tahilala ma dame dohot las ni roha.

21. (a) Songon dia do pangkilalaan ni si Daud taringot Jahowa? (b) Aha do na laho taulas di parsiajaran na mangihut?

²¹ Diargai hamu do sude angka na denggan na dilehon Jahowa tu hamu? Nunga dilehon Ibana angka na diparade organisasi, ale-ale na burju, cita-cita na mambahen las roha, pangkirimon di ari na naeng ro, dohot angka na asing. (Ps. 103:5) Olo do ra songon si Daud pangkilalaanmuna songon na disurat di Psalmen 16:11. Didok, “Sai pabotohononmu do tu ahu dalan hangoluan, sun ma las ni roha di adopan ni bohim, angka hasudungan ni roha masa di siamunmu salelenglelengna.” Di parsiajaran na mangihut, taulas ma piga-piga ayat sian Psalmen 16. On mangurupi hita mamboto songon dia mandapot hangoluan na dumenggan!