1, 2. Sian na didok di Heber 13:4, aha do na ingkon taingot taringot parsaripeon?

TONTU lomo do rohanta pasangaphon Jahowa. Asa dipasangap Jahowa hita, ingkon tapasangap do Ibana. (1 Sam. 2:30; Poda 3:9; Pgk. 4:11) Lomo do roha ni Jahowa asa tapasangap halak na asing, dohot ma i pamarenta. (Rom 12:10; 13:7) Asing ni i, adong na ringkot na ingkon tapasangap, i ma parsaripeon.

² Didok apostel Paulus, “Ingkon sangap do pardongan saripeon bahenon ni sude halak. Ingkon marsihohot do tunggane doli dohot tunggane boru tu janji na binahen ni nasida.” (Heb. 13:4) Ndang na holan paboahon sambing si Paulus dison. Alai ayat on manjujui asa dipasangap jala diargai halak Kristen parsaripeonna. Alani i, hamu angka naung mardongan saripe, sangap do dibahen hamu parsaripeonmuna?

3. Aha do na didok Jesus taringot parsaripeon? (Ida gombar di mula ni parsiajaran.)

³ Dipasangap Jesus do parsaripeon. Alani i, ingkon tatiru do ibana. Tingki disungkun halak Parise tu Jesus taringot parsirangan, dipaboa ibana do aha na didok Debata taringot parsaripeon na parjolo sahali. Didok Jesus, “Alani i, tadingkonon ni baoa ma amana dohot inana,  jala gabe sada ma nasida na dua.’ Jadi, ndang dua be nasida alai sada nama.” Didok muse, “Naung pinadomu ni Debata, ndang jadi sirangon ni jolma.”​—Jaha Markus 10:2-12; 1 Mus. 2:24.

4. Aha do sangkap ni Jahowa taringot parsaripeon?

⁴ Diboto Jesus, Jahowa do na mambahen parsaripeon jala ingkon hot do parsaripeon i salelengna. Alani i, tingki dibahen Debata parsaripeon na parjolo, ndang didok Ibana tu si Adam dohot si Hawa boi nasida marsirang. Gariada, lomo do rohana asa rap “nasida nadua” salelengna.

5. Baosa hamatean mambahen muba parsaripeon?

⁵ Dung mardosa si Adam, gabe godang do na muba. Umpamana, gabe mate ma jolma, jala on mambahen muba parsaripeon. I do alana didok si Paulus tu halak Kristen, molo mate dongan saripe ni sasahalak, boi do muse ibana marhasohotan.​—Rom 7:1-3.

6. Aha do na diajarhon Patik ni si Musa tu hita taringot parsaripeon di adopan ni Debata?

⁶ Tangkas do di paboa Debata di Patik na dilehon tu halak Israel taringot parsaripeon. Umpamana, di tingki i boi do sahalak baoa Israel mambuat istri lobi sian sada. Nunga somal on diulahon andorang so dilehon Debata dope Patik tu nasida. Alai di Patik i, dipaboa ma aha na ingkon ulahonon ni nasida. Umpamana, molo dibuat sahalak baoa sahalak hatoban gabe istrina dung i mangoli muse tu borua na asing, ingkon tongtong do sarihononna istrina na parjolo i dohot ianakhonna. (2 Mus. 21:9, 10) Saonari, ndang Patik ni si Musa be na taihuthon. Alai gabe taboto do, na mansai arga do parsaripeon i di adopan ni Debata. On mangurupi hita asa tongtong pasangaphon parsaripeon.

7, 8. (a) Hombar tu 5 Musa 24:1, aha do na didok Patik i taringot parsirangan? (b) Songon dia do pangkilalaan ni Jahowa taringot parsirangan?

 ⁷ Aha do na didok Patik ni si Musa taringot parsirangan? Ndang hea disuru Jahowa naung marsaripe asa marsirang. Alai di Patik i, dipaloas do sahalak baoa manirangkon istrina molo “adong jumpangsa di nasida manang aha tau tihasna [manang parniulaon na roa]”. (Jaha 5 Musa 24:1.) Alai ndang dipaboa di patik i, angka aha do parniulaon na roa i. Tontu dosa na balga do na didok disi. (5 Mus. 23:15) Alai di tingki ni Jesus, godang do halak Jahudi manirangkon istrina hombar tu lomo ni rohana. (Mat. 19:3) Tontu ndang olo hita maniru i.

⁸ Di tingki ni si Maleaki, godang angka baoa na manirangkon istrina na parjolo. Ra asa boi do muse mangoli tu borua na umposo nang pe na so sisomba Jahowa. Alai tangkas do dipaboa Jahowa tu nasida taringot parsirangan. Didok, “Huhagigihon do parsirangan.” (Mal. 2:14-16) Ndang muba dope pangkilalaan ni Jahowa taringot parsaripeon sahat tu saonari. Jala didok Ibana, sahalak baoa ingkon tongtong “mandongani jolmana, jadi sada sibuk nasida”. (1 Mus. 2:24) Sarupa do pangkilalaan ni Jesus dohot Jahowa taringot parsaripeon. Didok Jesus do, “Naung pinadomu ni Debata, ndang jadi sirangon ni jolma.”​—Mat.19:6.

9. Aha do lapatan ni hata ni Jesus na didok di Markus 10:11, 12?

⁹ Adong do alasanna sahalak Kristen boi marsirang jala marhasohotan muse? Parrohahon ma aha na didok Jesus, “Manang ise na manirangkon tunggane boruna jala mangoli tu na asing, na mangalangkup do ibana disi jala mardosa maradophon tunggane boruna. Laos songon i, molo adong sahalak borua na manirangkon tunggane dolina jala muli tu na asing, na mangalangkup do ibana disi.” (Mrk. 10:11, 12; Luk. 16:18) Tangkas ma, diargai Jesus do parsaripeon jala lomo rohana asa tatiru ibana. Molo sahalak baoa manang borua manirangkon dongan saripena na setia jala marhasohotan muse, na mangalangkup do ibana disi. Boasa? Alana molo holan sada do sian nasida na manirangkon dongan saripena, “sada daging” dope nasida di adopan ni Debata. Didok Jesus, molo disirangkon sahalak baoa do istrina na so marsala, olo do gabe mangalangkup istrina i. Boasa? Ra, ala susa parhepengon ni istrina i, gabe muli ma ibana muse. Jadi sarupa na mangalangkup do nasida na dua disi.

10. Aha do alasan na mambahen halak Kristen boi marsirang jala marhasohotan muse?

¹⁰ Dipaboa Jesus do alasanna sasahalak boi marsirang. Didok ibana, “Hudok ma tu hamu, manang ise na manirangkon tunggane boruna molo so  alani na mangulahon seks na so patut jala mangoli muse tu na asing, na mangalangkup do ibana disi.” (Mat. 19:9) Dipaboa Jesus do muse taringot i tingki pasahathon Jamita di Dolok. (Mat. 5:31, 32) Na didok Jesus taringot “seks na so patut”, i ma mangalangkup, melacur, mangulahon seks tu na so dongan saripena, borua tu borua, baoa tu baoa, dohot tu binatang. Jadi, molo sahalak baoa naung marhasohotan mangulahon seks na so patut, boi do dipillit istrina laho manirangkon ibana manang na ndang. Molo nunga marsirang, ndang na marsaripe be nasida di adopan ni Debata.

11. Boasa adong sahalak Kristen na mamillit ndang marsirang nang pe dongan saripena mangulahon seks na so patut?

¹¹ Ndang hea didok Jesus, molo adong suami manang istri na mangulahon seks na so patut, ingkon sirangkonon ni dongan saripena ibana. Umpamana, adong do sahalak istri na olo tongtong rap dohot suamina nang pe naung mangulahon seks na so patut suamina i. Boasa? Ra, ala holong dope rohana jala rade manalpuhon hasalaan ni suamina i. Olo do nasida rap padengganhon parsaripeon ni nasida. Asing ni i, molo marsirang nasida jala ndang marhasohotan muse, boi do gabe susa parngoluonna. Songon dia taringot parhepengon dohot kebutuhan seksna? Songon dia molo gabe lungun-lungunan ibana? Aha do pangkorhonna tu ianakhonna? Songon dia mangurupi ianakhonna asa tongtong di bagasan hasintongan? (1 Kor. 7:14) Alani i, molo dipillit dongan saripe na so marsala i do asa marsirang, tontu godang do hasusaan na diadopi.

12, 13. (a) Aha do na masa tu parsaripeon ni si Hosea? (b) Boasa diboan si Hosea muse mulak si Gomer, jala aha do parsiajaranna tu hita?

¹² Pengalaman ni panurirang Hosea paboahon tu hita songon dia pangkilalaan ni Jahowa taringot parsaripeon. Disuru Jahowa ma si Hosea asa mangoli tu borua na margoar si Gomer. Alai didok Jahowa, gabe “boru-boru pelacur” do istrina i jala adong do ianakhonna sian baoa na asing. Alai adong do sada anak ni si Gomer sian si Hosea. (Hos. 1:2, 3, Bibel siganup ari) Adong do muse anak dohot boru ni si Gomer sian baoa na asing. Nang pe lobi sian sahali si Gomer mangalangkup, alai ndang disirangkon si Hosea ibana. Ditinggalhon si Gomer ma muse si Hosea jala laho gabe hatoban. Alai diboan si Hosea do muse ibana mulak. (Hos. 3:1, 2) Dipaboa Jahowa pe pengalaman ni si Hosea on, laho patuduhon na sai disalpuhon Jahowa do hasalaan ni halak Israel. Nang pe marulak-ulak nasida maninggalhon Jahowa jala manomba debata na asing. Aha do parsiajaranna tu hita?

¹³ Didok Jesus molo adong sahalak Kristen na dongan saripena mangulahon seks na so patut, boi do dipillit ibana marsirang jala marhasohotan muse. Alai, ndang sala molo olo ibana manalpuhon hasalaan ni dongan saripena i. Songon si Hosea, olo do ibana manalpuhon hasalaan ni si Gomer. Didok si Hosea ma tu istrina, asa unang mangulahon seks be dohot baoa na asing. Jala ibana pe ndang pintor  mangulahon seks dohot si Gomer di tingki i. (Hos. 3:3) Nang pe ujungna ingkon mangulahon seks do nasida muse. On manggombarhon, na olo do Jahowa manalpuhon hasalaan ni halak Israel jala boi muse nasida marale-ale tu Ibana. (Hos. 2:2; 3:3-5) Sian cerita on, aha do parsiajaranna taringot parsaripeon? Molo olo do suami manang istri mangulahon seks muse dohot dongan saripena na marsala i, on patuduhon naung disalpuhon ibana do hasalaan ni dongan saripena i. (1 Kor. 7:3, 5) Jadi, ndang adong be alasan ni nasida laho marsirang. Ingkon dipadenggan nasida do muse parsaripeon ni nasida i, songon na dihalomohon Debata.

14. Songon na didok di 1 Korint 7:10, 11, aha do na boi masa di parsaripeon?

¹⁴ Sangap do parsaripeon di Jahowa dohot di Jesus. Alani i, sude halak Kristen ingkon maniru nasida. Ala sude hita ndang sempurna, adong do na so mangargai parsaripeonna. (Rom 7:18-23) I do alana halak Kristen di abad na parjolo pe, hea do mangadopi hasusaan di parsaripeon ni nasida. Didok si Paulus di suratna, “Ndang boi tunggane boru manadingkon tunggane dolina.” Alai, adong do na gabe maninggalhon dongan saripena.​—Jaha 1 Korint 7:10, 11.

15, 16. (a) Nang pe adong parsoalan di parsaripeon, aha na ingkon diulahon na mardongan saripe, jala boasa? (b) Songon dia molo ndang sisomba Jahowa dongan saripena?

¹⁵ Ndang tangkas dipaboa si Paulus aha alasan na mambahen na mardongan saripe gabe padao-dao. Songon naung taparsiajari, molo adong sahalak suami mangulahon seks na so patut, boi do istrina mangido sirang dung i marhasohotan muse. Alai didok si Paulus, molo padao-dao sahalak istri dohot suamina ingkon “tongtong ma ibana ndang marhasohotan. Molo so i, mulak ma ibana muse tu tunggane dolina”. Alana di adopan ni Debata, tongtong dope nasida mardongan saripe. Jadi na didok si Paulus dison, nang pe adong parsoalan na borat di parsaripeon ni nasida, alai molo ndang alani na mangulahon seks na so patut, ingkon tongtong do nasida rap. Alai molo adong parsoalan ni nasida, boi do dipangido asa diurupi sintua. Jala ndang boi angka sintua mangampini manang ise pe sian nasida. Gariada, ingkon dilehon nasida do poda sian Bibel laho mangurupi.

 ¹⁶ Songon dia molo dongan saripena ndang sisomba Jahowa? Boi do nasida pintor padao-dao tingki adong masala? Songon naung taulas, holan alani na mangulahon seks na so patut do na mardongan saripe boi marsirang. Alai ndang dipaboa di Bibel aha na mambahen nasida boi padao-dao. Didok si Paulus, “Molo ndang halak na porsea tunggane doli ni sahalak donganta borua, jala olo do tunggane dolina i rap tading dohot ibana, unang ma ditadingkon ibana tunggane dolina i.” (1 Kor. 7:12, 13) Marlangku dope ayat on sahat tu saonari.

17, 18. Boasa adong donganta na tongtong rap dohot dongan saripena nang pe godang parsoalan?

¹⁷ Alai, adong do piga-piga donganta ndang olo be rap tading dohot suamina na so sisomba Jahowa. Ra, ala olo suamina i mamungkuli, na boi mambahen tarancam ngoluna. Jala ndang dibalanjoi keluargana, manang diorai laho manomba Jahowa. Nang pe didok suamina i asa tongtong nasida rap tading, alai boi do dipillit istrina i ndang rap tading dohot suamina molo masa situasi sisongon i. Alai adong do donganta na olo tongtong rap dohot suamina, nang pe songon i situasina. Jala marsitutu do nasida laho padengganhon parsaripeonna. Boasa dibahen nasida keputusan sisongon i?

¹⁸ Songon naung taulas, molo adong na mamillit gabe padao-dao dohot dongan saripena olo do gabe susa parngoluonna. Alani i, didok si Paulus do asa tongtong rap tading na mardongan saripe. Didok muse, “Molo ndang halak na porsea tunggane doli ni sahalak donganta borua, jala olo do tunggane dolina i rap tading dohot ibana, unang ma ditadingkon ibana tunggane dolina i.” (1 Kor. 7:14) Godang do donganta na mamillit tongtong rap tading dohot dongan saripena na so sisomba Jahowa, nang pe susa dihilala. Alana, molo tongtong martahan ibana, olo da ra gabe sisomba Jahowa dongan saripena i.​—Jaha 1 Korint 7:16; 1 Ptr. 3:1, 2.

19. Boasa godang angka donganta na denggan parsaripeonna?

¹⁹ Dilehon Jesus do sipaingot taringot parsirangan. Jala si Paulus pe, dilehon do sipaingot taringot tu na padao-dao. Dijujui nasida do angka naposo ni Debata asa tongtong mangargai parsaripeon. Saonari, godang do angka donganta na denggan parsaripeonna. Boi do diida hamu di huriamuna angka suami na setia dohot angka istri na unduk tu suamina. Dipasangap nasida do parsaripeonna. Las do rohanta mangida ala diulahon nasida Hata ni Debata na mandok, “Alani i, tadingkonon ni baoa ma amana dohot inana asa rap dohot tunggane boruna, jala gabe sada ma nasida na dua.”​—Eps. 5:31, 33.