SUSA do dihilala donganta si Diana naung marumur 80 taon. Alana marsahit Alzheimer do suamina, i ma sahit na mambahen gabe pikun. Andorang so mate suamina i, sanga do dirawat di panti jompo. Mate ma muse dua ianakhonna jala ibana pe marsahit kanker payudara. Alai tingki marpungu dohot marbarita, diida angka dongan tongtong do las rohana.

Donganta si John, gabe pengawas wilayah saleleng 43 taon. Lomo do rohana mangulahon tugasna i. Alai, ala naeng mangurus keluargana na marsahit, gabe ndang pengawas wilayah be ibana. Tingki pajumpang angka dongan dohot si John di kebaktian, diida nasida tongtong do si John marlas ni roha.

Boasa si Diana dohot si John boi tongtong marlas ni roha nang pe songon i situasi ni nasida? Dipaboa Bibel do alusna. Didok, “Marlas ni roha ma ianggo partigor i mangasahon Jahowa.” (Ps. 64:11) Asa taantusi lapatan ni ayat on, ingkon taboto do aha na boi mambahen hita tongtong marlas ni roha.

Godang do na boi mambahen marlas ni roha. Umpamana, las do roha ni halak na baru marhasohotan, na baru tubu ianakhonna, manang ala mandapot tugas na baru sian organisai. Sude on, silehon-lehon sian Jahowa do.​—1 Mus. 2:18, 22; Ps. 127:3; 1 Tim. 3:1.

Alai adong do na mambahen hita gabe ndang marlas ni roha. Umpamana, mate dongan saripena manang ndang setia. (Hes. 24:18; Hos. 3:1) Ndang dioloi ianakhonna natua-tuana dohot Debata, jala adong do na gabe dipecat. Songon pengalaman ni si Samuel, susa do dihilala ibana ala ndang unduk be ianakhonna tu Debata. Gabe susa do keluarga ni si Daud ala mangalangkup ibana dohot si Batseba. Tingki masa sisongon i, gabe susa do tahilala —1 Sam. 8:1-3; 2 Sam. 12:11.

 Sipata, ndang boi be hita mangulahon tugas na sian organisasi. Ra, ala adong perubahan sian organisasi, ala marsahit, manang mangurus keluarganta na marsahit. Godang do angka dongan na masihol muse tu las ni roha na dihilala nasida tingki mangulahon tugas i.

Alani piga-piga situasi, olo do gabe ndang marlas ni roha be hita. Alai, adong do na boi mambahen hita tongtong marlas ni roha nang pe mangadopi hasusaan? Tontu adong! Songon si Samuel, si Daud dohot na asing, tongtong do marlas ni roha nasida nang pe mangadopi hasusaan.

Diboto Jesus do aha na mambahen tongtong marlas ni roha. Andorang so ro ibana tu tano on, didok di Bibel, molo Jesus ‘marmeami tongtong di jolo ni Jahowa’. (Poda  8:30) Nang pe godang sitaonon ni Jesus tingki di tano on, alai tongtong do ibana marlas ni roha mangulahon sangkap ni Amana. (Joh. 4:34) Tingki naeng mate pe ibana, didok di Bibel, “alani las ni roha naung diparade di jolona, sabar do ibana manaon na hansit di hau partinaonan i”. (Heb. 12:2) Alai, adong dua na dipaboa Jesus taringot marlas ni roha. Aha ma i?

Dung mulak 70 sisean ni Jesus marbarita, las do roha ni nasida ala marhasil jala boi do nasida mangusir suru-suruan na jahat. Alai didok Jesus ma tu nasida, “Unang ma las rohamuna ala tunduk tu hamu angka suru-suruan na jahat i. Alai, marlas ni roha ma hamu ala nunga tarsurat goarmuna di banua ginjang.” (Luk. 10:1-9, 17, 20) Tutu, las do rohanta tingki mandapot tugas sian organisai. Alai, mambahen las roha ni Jahowa do na rumingkot. Alana, umlas do rohanta molo taulahon i.

Sada tingki, mangkatai ma Jesus di jolo ni godang halak. Alai adong ma sada borua halak Jahudi na longang rohana mangida cara ni Jesus mangajar. Didok ibana, tontu las do roha ni omakmu mangida ho. Alai, didok Jesus ma, “Ndang songon i. Halak na manangihon hata ni Debata jala na mangulahon i do na marlas ni roha!” (Luk.  11:27, 28) Las do roha ni natua-tua molo diulahon ianakhonna na denggan. Alai umlas do roha ni natua-tua molo tongtong mangoloi Jahowa jala marale-ale tu Ibana.

Tontu, las do rohanta ala taboto nunga taulahon na mambahen las roha ni Jahowa. Alani i, tingki mangadopi hasusaan, boi do hita tongtong marlas ni roha. Jala tamba do las ni rohanta molo setia hita nang pe mangadopi hasusaan. (Rom 5:3-5) Asing ni i, dilehon Jahowa do tondi parbadiana tu na porsea tu Ibana. Alana las ni roha, i ma sada sian parbue ni tondi. (Gal. 5:22) Saonari taboto ma boasa didok Psalmen 64:11, “Marlas ni roha ma ianggo partigor i mangasahon Jahowa.”

Taboto ma, boasa si Diana dohot si John boi tongtong marlas ni roha nang pe mangadopi sitaonon. Didok si Diana, “Sai marhaposan tu Jahowa do ahu songon dakdanak na marhaposan tu natua-tuana.” Didok muse, “Huhilala do na sai dipargogoi Jahowa ahu asa boi tongtong marbarita jala marlas ni roha.” Aha do na mambahen si John tongtong ringgas marbarita jala marlas ni roha nang pe ndang pengawas wilayah be ibana? Didok ibana, “Dung ditugashon ahu gabe instruktur tu Singkola Pelatihan Pelayanan di taon 1998, lam jotjot do huparsiajari Bibel.” I do na mangurupi ibana dohot istrina asa rade mangulahon tugas aha pe na dilehon tu nasida. Didok muse, “Ndang adong na disolsoli hami.”

Godang do naung mangkilala na didok Psalmen 64:11. Umpamana, songon pengalaman ni donganta naung mardongan saripe jala nunga lobi 30 taon karejo di Betel Amerika Serikat. Tingki ditugashon nasida gabe perintis istimewa, didok nasida do, “Tutu, lungun do roha ala ndang boi be mangulahon tugas na tahalomohon hian. Alai unang ma gabe marmetmet ni roha hita alani i.” Dung sahat tu daerah penugasan na baru, pintor marbarita do nasida dohot angka dongan di huria. Didok nasida muse, “Ditangiangkon hami do aha na dihaporluhon hami. Ala dihilala hami na dialusi do tangiang nami, lam togu ma hami jala marlas ni roha. Ndang sadia leleng dung sahat hami di huria i, adong ma piga-piga penyiar gabe perintis. Jala adong dua parsiajar Bibelnami na ringgas marsiajar jala nunga ro marpungu.”

Ndang torus hita boi marlas ni roha. Sipata, olo do lungun roha. Alai, dipapos Jahowa do rohanta marhite ayat di Psalmen 64:11. Nang pe sipata metmet rohanta, alai boi do hita “marlas ni roha . . . mangasahon Jahowa” molo tongtong setia tingki mangadopi hasusaan. Las do rohanta na laho pasauton ni Jahowa janjina taringot “langit na imbaru dohot tano na imbaru”. Di tingki i, sude jolma gabe sempurna. Tongtong ma nasida ‘marlas ni roha jala marolopolop ro di salelenglelengna’.​—Jes. 65:17, 18.

Bayangkon ma molo ndang adong be na marsahit. Ndang adong be na mambahen hita tangis manang na mambahen lungun roha. Jala paheheonna ma muse angka sisolhotta naung mate. Tingki masa i, las ma rohanta songon na dihilala natua-tua ni sahalak borua na marumur 12 taon na dipahehe Jesus. Di tingki i, “longang jala las situtu ma roha ni natua-tuana i”. (Mrk. 5:42) Didok Jahowa do muse, “Ndang be ingoton angka na parjolo i manang tarsunggul tu roha.” Ujungna, holan halak partigor ma na tading di tano on jala marlas ni roha mangasahon Jahowa salelengna.