MOLO adong halak na burju tu hita, tontu las do rohanta. Gabe taboto ma, na parduli do nasida tu hita. Alai songon dia do hita asa burju muse tu na asing?

Haburjuon, i ma sada sian parbue ni tondi. (Gal. 5:22, 23) Lomo do roha ni Jahowa asa burju hita tu na asing. Alani i, halak na burju tarida do i sian pangkataion dohot parniulaonna. Alai ndang sae holan burju, ingkon dihaholongi jala ingkon diantusi do songon dia pangkilalaan ni na asing. Saonari, taulas ma sitiruon sian Jahowa dohot Jesus na patuduhon haburjuon.

Burju do Jahowa tu sude halak, dohot ma i “tu halak na so umboto mandok mauliate dohot tu halak na jahat”. (Luk. 6:35) Umpamana, “dipabinsar Ibana do mata ni ari tu angka parjahat dohot tu na burju. Jala diparo do udan tu halak na mangulahon na sintong dohot tu halak na mangulahon na jahat”. (Mat. 5:45) Ala burju do Jahowa, halak na so porsea pe, boi do mangolu jala mangkilala las ni roha.

Dung mardosa si Adom dohot si Hawa, “Dipadomudomu [nasida] ma bulung ni hau ara bahen abitnasida”. Alai dipatudu Jahowa do burju ni rohana tu nasida. Dibahen Jahowa ma “pahean sian hulinghuling ni binatang” laho abit ni nasida. Alana molo di luar ni porlak Eden, gok do “duhutduhut na marsuga dohot duri” na boi mambahen nasida gabe luka.​—1 Mus. 3:7, 17, 18, 21, Bibel siganup ari.

Nang pe burju Jahowa “tu angka parjahat dohot tu na burju,” alai umburju do Jahowa tu halak na setia tu Ibana. Umpamana, di tingki ni panurirang Sakaria, adong sada suru-suruan na marsak ala ndang ditorushon halak Israel paulihon bagas joro ni Jahowa na di Jerusalem. Alani i, marhite “angka hata na denggan dohot hata apulapul” dipatogu Jahowa ma roha ni suru-suruan i. (Sak. 1:12, 13) Dipatudu Jahowa do muse burju ni rohana tu si Elia. Sada tingki, marsak jala lungun-lungunan ma si Elia. Didok ibana tu Jahowa, tumagon ma ibana mate. Alani i, disuru Jahowa ma sada suru-suruan laho patoguhon rohana. Dipapos Jahowa ma roha ni si Elia, na sai dongananna do ibana laho mangulahon tugasna i. Dung i, gabe barani ma si Elia mangulahon tugasna muse. (1 Raj. 19:1-18) Sian sude na poso ni Jahowa, ise do na dumenggan maniru haburjuonna?

Tingki di tano on Jesus, ditanda do ibana sahalak na burju. Ndang hea kasar ibana jala ndang ginjang rohana. Parduli do Jesus tu angka halak. Didok ibana do, “Ro  ma hamu tu ahu, hamu angka na loja jala na mamboan boban na borat, asa hupargogoi hamu . . . Ai lambok do augangku.” (Mat. 11:28-30) Ala burju do Jesus, sai diihuthon angka halak do ibana manang tudia pe. Ala asi roha ni Jesus, dilehon ibana do halak mangan, dipalum do na marsahit, jala “godang” do diajarhon ibana taringot Debata tu nasida.​—Mrk. 6:34; Mat. 14:14; 15:32-38.

Burju jala asi do roha ni Jesus tu angka halak. Diantusi ibana do songon dia pangkilalaan ni nasida. Nang pe loja Jesus, alai burju do ibana mangurupi angka halak na ro tu ibana. (Luk. 9:10, 11) Tingki ditiop sahalak borua na pendarahan saleleng 12 taon abit ni Jesus, ndang muruk ibana. Hape molo mangihuthon Patik ni si Musa, ramun do borua i. Jala ndang boi ulahononna i. (3 Mus. 15:25-28) Alai ala asi roha ni Jesus, didok do, “Ale borungku, haporseaonmi do mambahen ho malum. Mulak ma ho di bagasan dame jala malum ma sahitmi.” (Mrk. 5:25-34) Tutu ma, mansai burju do Jesus!

Sian angka contoh i taboto ma, burju ni roha ingkon dipatudu do sian parniulaon. Laho patuduhon na mansai ringkot do burju ni roha, dipaboa Jesus ma sada tudosan taringot halak Samaria na burju. Adong ma sada halak Jahudi na dirampok, dipungkuli sampe naeng mate, dung i ditinggalhon di pinggir dalan. Alai lewat ma sada halak Samaria jala asi ma rohana tu baoa i. Hape sasintongna, marmusu do halak Samaria dohot halak Jahudi. Alai alani asi ni rohana, dipaias ibana ma luka ni baoa i jala diboan ma tu penginapan. Jala digarar ibana do sude biaya na dihaporluhon baoa i.​—Luk. 10:29-37.

Burju ni roha mangonjar rohanta asa marasi ni roha. Jala ndang holan sian parniulaonta boi tapatogu na asing, alai boi do i sian pangkataionta. Didok Bibel, “Holsoholso di bagasan roha ni baoa patungki ibana, alai anggo hata na denggan pahinsahon rohana muse.” (Poda 12:25) Tingki tapatogu halak na asing, boi do on mambahen nasida marlas ni roha. * Sian pangkataionta, tarida do na parduli hita tu nasida. Jala on boi mambahen nasida martahan mangadopi sitaononna.​—Poda 16:24.

Ala tumiru rupana do hita ditompa Debata, sude hita boi do maniru haburjuonna. (1 Mus. 1:27) Umpamana, si Julius sahalak tentara Rom na martanggung jawab manjaga si Paulus sahat tu Rom. Tingki di kota Sidon, “burju do si Julius tu si Paulus, diloas do ibana mandapothon angka donganna. Alani i boi ma diurupi nasida si Paulus”. (Ul. 27:3) Tingki di pardalanan si Paulus dohot angka tahanan na asing, kandas ma kapal ni nasida di pulo Malta. Alai “mansai burju” do halak Malta tu nasida. Dipagalak halak Malta do api, asa unang ngalian si Paulus dohot angka na asing. (Ul. 28:1, 2) Tutu, denggan do burju ni roha sisongon i. Alai asa las roha ni Jahowa, ingkon ganup tingki do tapatudu burju ni roha.

Lomo do roha ni Jahowa asa tongtong tapatudu burju ni roha. I do alana didok Jahowa, “patuduhon” ma burju ni roha. (Kol. 3:12) Alai ndang sai mura mangulahon on. Olo do ala maila, mabiar, mamingkirhon dirinta sandiri, manang ala adong na mambahen na so denggan tu hita, gabe ndang olo hita patuduhon burju ni roha. Alai boi  do tapatudu i molo tapangido tondi parbadia jala maniru Jahowa patuduhon burju ni roha.​—1 Kor. 2:12.

Songon dia carana asa lam tapatudu burju ni roha? Sungkun ma dirimuna: ‘Olo do ahu manangihon sasahalak jala mangantusi pangkilalaanna? Huparrohahon do halak na asing? Asing ni keluargangku dohot ale-alengku, huurupi do halak na asing?’ Asa lam ditanda hamu angka dongan di huria, lehon ma tingkimuna. Molo diulahon hamu songon i, botoonmuna ma aha sitaonon ni nasida dohot na dihaporluhon. Ala lomo do rohanta dibahen halak na denggan tu hita, ingkon tabahen ma na denggan tu nasida. (Mat. 7:12) Martangiang ma tu Jahowa asa diurupi hamu gabe halak na burju.​—Luk. 11:13.

Dipaboa si Paulus do aha na mambahen ibana gabe parbarita na denggan, i ma alani burju ni roha. (2 Kor. 6:3-6) Ala burju do si Paulus, lomo do roha ni halak mangida ibana. Jala tarida do i sian pangkataion dohot sian parniulaonna. (Ul. 28:30, 31) Suang songon i ma, molo burju hita tu sude halak, dohot ma i tu halak na mambahen na so denggan tu hita, ra olo do gabe muba pandapot ni nasida tu hita. Jala olo do ra gabe marsiajar Bibel nasida.​—Rom 12:20.

Di Paradeiso haduan, las do roha ni halak na dipahehe ala mangkilala burju ni roha. Ra, on ma na dihilala nasida parjolo sahali. Alani i, gabe taronjar ma roha ni nasida laho patuduhon burju ni roha tu na asing. Molo adong na so patuduhon burju ni roha jala ndang olo mangurupi na asing, ndang boi mangolu ibana mangolu di Paradeiso. Holan halak na mangkaholongi dohot na burju do na boi tading disi. (Ps. 37:9-11) Molo songon i do situasina, tontu dame ma portibi on. Andorang so Paradeiso, aha do labana patuduhon burju ni roha saonari?

Didok Bibel, “Na mambahen na denggan tu dirina do halak, molo mardenggan basa ibana.” (Poda 11:17, Bibel siganup ari) Molo burju hita tu na asing, nasida pe burju ma tu hita. I do alana didok Jesus, “Panuhatan na pinangkemuna laho manuhat, i do suhathononna tu hamu.” (Luk. 6:38) Jadi halak na burju, mura do mandapot ale-ale.

Didok si Paulus do tu angka halak na di huria Epesus, “Burju ma hamu tu na asing, marasi ni roha, jala rade manalpuhon hasalaan ni donganmuna.” (Eps. 4:32) Molo burju do sude angka dongan di huria, on boi mambahen marsada huria. Tontu ndang taparoa-roa dongan, ndang tapahata-hata, manang ndang tadok hata na kasar nang pe holan margait-gait. Gariada, ingkon hata na patoguhon do na tadok tu angka dongan. (Poda 12:18) Molo taulahon i, boi ma tongtong hita marlas ni roha manomba Jahowa.

Nunga taulas, molo haburjuon i ma parange na ingkon tapatudu sian pangkataion dohot parniulaonta. Molo burju hita, na maniru Jahowa do hita disi. (Eps. 5:1) Molo burju hita, boi ma tapatogu dongan di huria jala boi taronjar roha ni halak laho manomba Jahowa. Alani i, tapatudu ma burju ni roha asa ditanda halak hita Sitindangi Ni Jahowa!