1, 2. Aha do pandapot ni angka halak taringot paradeiso?

TINGKI dibahen kebaktian di Seoul, Korea, godang do Sitindangi na ro sian negara na asing. Dung sae kebaktian i, rap jongjong ma angka donganta na tading disi, huhut mandok tu angka Sitindangi na ro i, “Pajumpang muse di Paradeiso!” Alai, aha do lapatan ni Paradeiso na didok nasida i?

² Marragam do pandapot ni halak taringot paradeiso. Adong na mandok, holan cerita do paradeiso i. Na asing mandok, paradeiso i, i ma inganan na mambahen sonang roha. Piga-piga taon naung salpu, adong sahalak borua mangida sada rura na godang bunga tubu disi. Longang do rohana mangida i, jala didok ma, “On ma Paradeiso!” Nang pe ganup taon inganan i ditutupi salju sahat tu 15 meter, alai sahat tu saonari digoari do inganan i Paradeiso. Molo pandapotmuna, aha do Paradeiso i? Lomo do rohamuna molo adong Paradeiso?

3. Di ayat dia do parjolo sahali dipaboa taringot Paradeiso?

³ Di Bibel, dipaboa do na hea adong paradeiso jala dipaboa do muse laho adong paradeiso di ari na naeng ro. Di  buku 1 Musa 2:8 ma parjolo sahali dipaboa taringot Paradeiso. Di bahasa Heber didok do, ‘porlak Eden’. Hata “Eden” lapatanna, “Hasonangan”, i ma inganan na mambahen las roha. Tontu inganan na mansai uli do on jala gok sipanganon. Disi, mardame ma jolma dohot binatang.​—1 Mus. 1:29-31.

4. Boasa didok porlak Eden i paradeiso?

⁴ Di bahasa Heber na didok “porlak” molo diterjemahon tu bahasa Junani gabe pa·raʹdei·sos na lapatanna, “paradeiso”. Di buku Cyclopaedia by M’Clintock and Strong mandok, molo dibege halak Junani hata pa·raʹdei·sos, na dipingkirhon nasida, i ma porlak na mansai bidang, uli jala ndang adong na mambahen bahaya. Disi godang do angka hau na marparbue dohot sunge na mansai tio. Adong muse biru-biru dohot ursa na maringanan disi.​—Bandingkon 1 Mus. 2:15, 16.

5, 6. Boasa ndang tading di Paradeiso be si Adam dohot si Hawa, jala aha do na dipingkirhon piga-piga halak?

⁵ Dibahen Jahowa ma si Adam dohot si Hawa tinggal di porlak na uli, i ma Paradeiso. Ala ndang dioloi nasida Jahowa, gabe ndang boi be nasida dohot pinomparna tading disi. (1 Mus. 3:23, 24) Nang pe ndang adong be jolma na tading disi, alai adong dope porlak i sahat tu na ro Aek na Sumar di tingki ni si Noak.

⁶ Ra piga-piga halak marpingkir, ‘Tutu do laho adong muse Paradeiso di tano on?’ Molo tutu, aha ma buktina? Molo mangkirim do hamu mangolu di Paradeiso rap dohot halak na di haholongi hamu, aha do na boi paposhon rohamuna tu pangkirimon i? Boi do dipatorang hamu boasa porsea hamu na laho adong muse paradeiso i?

7, 8. (a) Aha do janji ni Debata tu si Abraham? (b) Aha do na diboto si Abraham taringot janji ni Debata?

⁷ Alus ni sungkun-sungkun taringot Paradeiso, boi ma tadapot di Bibel. Alana Hata ni Jahowa do i, jala Ibana do na mambahen Paradeiso. Rimangi ma janji ni Jahowa tu ale-alena si Abraham. Didok Debata, bahenonna ma torop pinompar ni si Abraham ‘songon torop ni rihit na di topi ni laut’. Ringkot situtu do janji ni Jahowa on. Didok do muse, “Martua sogot saluhut bangso ni tano on marhitehite pinomparmu, ala ditangihon ho soarangku.” (1 Mus. 22:17, 18) Dipaboa Debata do muse janjina i tu pinompar ni si Abraham.​—Jaha 1 Musa 26:4; 28:14.

⁸ Ndang adong dipaboa di Bibel, na hea ro tu roha ni si Abraham molo paradeiso i laho dibahen di surgo. Tingki didok Debata laho dipasu-pasu “saluhut bangso ni tano on”, diboto si Abraham do na di tano on do i laho masa. Alai holan i do bukti na dipaboa di Bibel molo paradeiso i laho saut di tano on?

9, 10. Aha do janji na paposhon rohanta tu paradeiso di ari na naeng ro?

⁹ Sada sian pinompar ni si Abraham, i ma si Daud, mandok molo di ari na naeng ro ‘ndang adong be parjahat’. (Ps.37:1, 2, 10) Gariada didok do laho  “teanon ni angka parlambohi do sogot tano i, jala hahilashononna hinadeak ni hadameon”. Didok si Daud muse, “Teanon ni angka partigor i do sogot tano i, jala tongtong do nasida maringanan disi.” (Ps. 37:11, 29; 2 Sam. 23:2) Songon dia do janji on marlaba tu angka halak na mangoloi Debata? Diboto nasida do, molo haduan holan halak partigor do na laho tading di tano on. Jala bahenon ni Debata ma tano on gabe paradeiso songon porlak Eden.

¹⁰ Godang do halak Israel na mangangku manomba Jahowa, alai lam leleng ndang dioloi nasida be Jahowa. Alani i, gabe dipaloas Jahowa ma halak Babel manaluhon nasida. Jala diboan ma nasida gabe hatoban ni halak Babel. (2 Kron. 36:15-21; Jer. 4:22-27) Alai marhite panurirangna, dipaboa Debata do na laho mulak do muse halak Israel sian Babel dungkon 70 taon. Saut do masa surirang i. Alai, adong do laba ni i tu hita saonari. Saleleng mangulas parsiajaran on, tarimangi ma boasa porsea hita na laho saut paradeiso i di tano on.

11. Songon dia do Jesaya 11:6-9 parjolo sahali saut, alai sungkun-sungkun aha do na gabe olo tapingkirhon?

¹¹ Jaha Jesaya 11:6-9. Didok Debata marhite panurirang Jesaya, na laho mulak do muse halak Israel tu huta ni nasida, jala hilalaon ni nasida ma hadameon disi. Ndang mabiar be nasida tu binatang buas dohot tu jolma na jahat. Malua ma nasida sude. Tutu do hadameon na dihilala nasida i dos songon na di porlak Eden? (Jes. 51:3) Didok si Jesaya, “Gok parbinotoan di Jahowa tano on sogot, songon aek ni laut mangalungkupi tondolanna.” Jadi ndang holan bangso Israel na mangkilala i, alai dohot do sude tano on. Andigan do i masa? Di ari na naeng ro.

12. (a) Aha do pasu-pasu na didapot angka halak na mulak sian Babel? (b) Aha do na patuduhon molo surirang di Jesaya 35:5-10 laho saut di ari na naeng ro?

¹² Jaha Jesaya 35:5-10. Didok si Jesaya, tingki mulak halak Israel sian Babel, ndang adong binatang buas manang halak na jahat na manggugai nasida. Didok ibana muse, marhasil do suan-suanan ni nasida ala gok do aek disi songon na di porlak Eden. (1 Mus. 2:10-14; Jer. 31:12) Holan di tingki ni halak Israel do surirang i masa? Didok do muse di surirang i laho pamalumonna do na mapitung, na lumpu dohot na nengel. Alai ndang masa dope on tingki mulak halak Israel sian Babel. Di ari na naeng ro do didok Debata laho pasautonna surirang on.

13, 14. Songon dia do Jesaya 65:21-23 saut tingki mulak halak Israel sian Babel? Sian ayat i, surirang na dia dope na so saut? (Ida gombar di mula ni parsiajaran.)

¹³ Jaha Jesaya 65:21-23. Tingki  mulak halak Jahudi tu huta ni nasida, nunga sega be jabu ni nasida, jala ndang adong be suan-suanan di porlak ni nasida. Alai ala dipasu-pasu Debata, gabe muba do situasi ni nasida. Tontu las hian do roha ni nasida ala boi muse nasida mambangun jabu jala angka suan-suananna pe godang parbuena!

¹⁴ Hombar tu surirang ni si Jesaya, dos ma umurta “songon ariari ni hau”. Alana, piga-piga hau boi do mangolu marribu taon. Alani i, ingkon tongtong do jolma sehat asa boi leleng mangolu. Tontu mansai las do roha molo boi mangolu di inganan na dame jala uli songon na disurirangkon ni si Jesaya. Jala tutu do surirang on laho saut!

15. Angka aha do pasu-pasu na dipaboa di buku Jesaya?

¹⁵ Pingkirhon ma angka janji ni Debata naung taulas, na patuduhon na laho saut do paradeiso i. Disi, dipasu-pasu Debata ma sude jolma. Ndang adong be binatang buas manang halak parjahat. Ndang adong be halak na mapitung, na nengel dohot na lumpu. Dibangun nasida do jabu laho diingani, jala gok parbue ni suan-suanan ni nasida. Umur ni nasida pe, umganjang do sian umur ni hau. Tangkas do didok di Bibel, na ingkon saut do paradeiso i. Alai piga-piga halak mandok, ndang di tano on i saut. Molo didok songon i, boha do alusmuna? Adong do bukti na patuduhon molo paradeiso i saut di tano on? Tingki di tano on Jesus, tangkas do dipaboa ibana na laho adong do paradeiso.

16, 17. Nandigan do Jesus paboahon taringot Paradeiso?

¹⁶ Nang pe ndang marsala Jesus, alai didok do ibana marsala jala digantung di tiang rap dohot dua parjahat halak Jahudi. Sada sian nasida mamboto, molo Jesus i raja. Didok ibana, “O Jesus, ingot ma ahu molo dung masuk ho tu Harajaonmi.” (Luk. 23:39-42) Ringkot do taboto janji na dibahen Jesus tu parjahat i. Disurat do hata ni Jesus i di Lukas 23:43. Piga-piga panulingkit mambahen tanda koma andorang so hata “sadari on”. Jala molo diterjemahon, gabe, “Tutu do na hudok on tu ho, sadari on rap do ho dohot ahu di Paradeiso.” Marragam do pandapot ni angka halak taringot tanda koma na di kalimat i. Alai aha do lapatan ni hata “sadari on” na didok Jesus?

¹⁷ Di manuskrip Junani najolo, ndang sai dipangke tanda baca. Saonari di godangan bahasa, dipangke angka penerjemah do tanda koma asa mura mangantusi lapatan ni sada kalimat. On mambahen sungkun-sungkun rohanta. Toho do didok Jesus, “Tutu do na hudok on tu ho, sadari on rap do ho dohot ahu di Paradeiso?” Manang, “Tutu do na hudok on tu ho sadari on, rap do ho dohot ahu di Paradeiso?” Ra, diganti angka penerjemah do susunan ni kalimat i, manang dibahen nasida do tanda koma andorang so hata “sadari on” manang dungkon hata i hombar tu na diantusi nasida. Di angka terjemahan  ni Bibel saonari, boi do tadapot imbar ni susunan ni kalimat i.

18, 19. Aha do na boi mangurupi hita laho mangantusi hata ni Jesus?

¹⁸ Ingot ma, hea didok Jesus tu angka siseanna taringot parmatena. Didok ibana, “Songon i ma Anak ni jolma i di bagasan kuburan tolu ari tolu borngin.” Jala didok muse, “Pasahatonna ma Anak ni jolma i tu angka musuna, jala bunuon ni nasida ma ibana. Alai, hehe do ibana di ari patoluhon.” (Mat.12:40; 16:21; 17:22, 23; Mrk. 10:34) Didok si Petrus, tutu do i masa. (Ul. 10:39, 40) Jadi, dung mate Jesus dohot parjahat i, ndang pintor laho nasida tu Paradeiso. Alai dipaboa di Bibel, “di Kuburan” dope Jesus saleleng tolu ari, sahat tu na dipahehe Debata ibana.​—Ul. 2:31, 32. *

¹⁹ Tingki didok Jesus, “Tutu do na hudok on tu ho sadari on” na laho paboahon janjina i do ibana tu parjahat i. Di tingki ni si Musa pe, somal do angka halak mangkatai songon i. Hea do didok si Musa, “Ingkon parateatehononmu luhut hata on, angka na hutonahon tu ho sadarion.”​—5 Mus. 6:6; 7:11; 8:1, 19; 30:15.

20. Aha do muse na mangurupi hita asa mangantusi hata ni Jesus?

 ²⁰ Sahalak penerjemah Bibel sian Timur Tengah mandok, “Hata na ringkot di ayat on, i ma hata ‘sadari on’. Jala ingkon songon on do dijaha, ‘Tutu do na hudok on tu ho sadari on, rap do ho dohot ahu di Paradeiso.’ Nang pe di sadari i Jesus marjanji, alai ndang pintor saut i di tingki i.” Di tingki i, somal do angka halak di luat i mangkatai songon i. Lapatanna, “nang pe marjanji nasida di sadari i, alai ingkon dipasaut do i haduan”. Di Bibel bahasa Siria na disurat hira-hira 1.600 taon naung salpu menerjemahon ayat i songon on, “Amen, hudok ma tu ho sadari on laho rap ho dohot ahu di Porlak Eden.” Tontu patoguhon rohanta do janji on.

21. Tudia do pangkirimon ni parjahat i, jala boasa?

²¹ Tingki didok Jesus taringot Paradeiso tu parjahat i, ndang na di surgo na nidokna disi. Sian dia taboto? Alana, ndang diboto parjahat i naung marjanji Jesus tu angka apostelna na setia na laho rap nasida mamarenta di surgo. (Luk. 22:29) Jala parjahat i pe, ndang tardidi dope. (Joh. 3:3-6, 12) Alani i, tingki marjanji Jesus tu parjahat i, tontu paradeiso na di tano on do na nidokna. Piga-piga taon dungkon i, didok si Paulus diida ibana sahalak baoa na ‘diboan tompu tu paradeiso’. (2 Kor. 12:1-4) Ndang songon parjahat i, nunga dipillit si Paulus dohot angka apostel asa rap mamarenta dohot Jesus di surgo. Jadi, paradeiso * aha do na diida si Paulus? Paradeiso na di tano on do na nidokna? Boi do hamu dohot tusi?

22, 23. Aha do na tapaima?

²² Taingot ma hata ni si Daud na mandok “teanon ni angka partigor i do sogot tano i”. (Ps.37:29; 2 Ptr. 3:13) Na didok si Daud dison, sada tingki sude halak na di tano on unduk tu hata ni Debata. Surirang di Jesaya 65:22 mandok, “Ai songon ariari ni hau, songon i do ariari ni bangsongku.” On paboahon, molo angka naposo ni Jahowa laho mangolu salelengna di tano na imbaru. Porsea do hamu disi? Tontu porsea. Alana didok di Pangungkapon 21:1-4, pasu-pasuon ni Debata ma sude jolma. Sada sian pasu-pasuna i, i ma “ndang adong be hamatean”.

²³ Tangkas do dipaboa di Bibel taringot Paradeiso. Ndang saut dope sude tano on gabe Paradeiso dibahen si Adam dohot si Hawa. Alai marjanji do Debata laho bahenonna do muse tano on gabe Paradeiso. Jala pasu-pasuonna do muse sude halak na tading disi. Songon na didok si Daud, mangolu salelengna ma disi angka halak partigor dohot na lambok roha. Marhite surirang ni si Jesaya, diurupi do hita asa paimahon na ro nama tingkina laho tading hita di Paradeiso jala marlas ni roha. Andigan do masa i? Tingki dipasaut Jesus janjina tu parjahat na di lambungna i. Pos ma rohanta, boi do hita tading di Paradeiso i. Songon na didok angka donganta na kebaktian di Korea, “Pajumpang muse di Paradeiso!”