Daong. Ndang didok Sibolis tu si Hawa, molo dipangan ibana parbue ni hau i, holan dagingna do na mate alai adong bagian sian dirina na so tarida (na didok godang halak saonari tongtong do mangolu tondina) na mangolu dope di inganan na asing. Marhite ulok, didok Sibolis do molo dipangan si Hawa parbue ni hau i, ‘ndang na tutu ibana mate’. Na didok ni Sibolis disi, tongtong do ibana mangolu di tano on, boi marlas ni roha, alai ndang diatur Debata.​—1 Mus. 2:17; 3:3-5.

Molo ajaran taringot tondi na tongtong mangolu i ndang diajarhon di porlak Eden, jadi nandigan do i mulai adong? Ndang boi pasti taboto. Alai taboto do, tingki ro Aek na Sumar di tingki ni si Noak, diripashon do sude angka ajaran na so sintong. Jala holan si Noak dohot keluargana do na malua sian Aek na Sumar. Sude do nasida sisomba Jahowa. Alani i, ndang adong ajaran na so sintong na diajarhon nasida.

Alani i, ajaran na mandok na mangolu dope tondi ni halak naung mate mulai adong dungkon Aek na Sumar. Tingki marserak angka halak Babel “tu liat portibi on” ala dibahen Debata godang bahasa, diboan nasida ma ajaran taringot tondi na tongtong mangolu i. (1 Mus. 11:8, 9) Nang pe ndang taboto sian dia do mulana ajaran na so sintong i, alai taboto do Sibolis, i ma “ama ni gabus” na mambahen i sude. Jala las do rohana ala nunga tarsar ajaran i di liat portibi on.​—Joh. 8:44.