1-2. (a) Aha do taon yobel i? (Ida kotak  “Aha do Taon Yobel i?”) (b) Songon na disurat di Lukas 4:16-18, taringot aha do na didok Jesus disi?

DI PIGA-PIGA negara, dung 50 taon mamarenta sahalak raja manang ratu dibahen do acara laho mangarayahon i. Ra, dirayahon do i saleleng piga-piga ari, saminggu manang lobi. Alai dung sae perayaan i, pintor lupa do angka halak taringot i.

² Laho taulas ma sada taon yobel na dumenggan sian na dirayahon halak Israel najolo ganup 50 taon. Taon Yobel parohon haluaon tu halak Israel. Alai boasa ingkon taparsiajari taringot i saonari? Alana, taon Yobel di tingki ni halak Israel paingothon hita tu aha na diulahon Jahowa laho paluahon hita. Gabe malua ma hita salelengna jala boi do tadapot laba sian i saonari. Didok Jesus, haluaon na mansai denggan do i.​—Jaha Lukas 4:16-18.

3. Hombar tu 3 Musa 25:8-12, songon dia do halak Israel mandapot laba tingki taon Yobel?

³ Asa mura taantusi taringot haluaon na didok Jesus, parjolo taulas ma taringot taon Yobel na diparentahon Debata tu naposona najolo. Didok Jahowa tu halak Israel, “Ingkon parbadiaanmuna do taon palimapuluhon jala tingtingkononmuna haluaon di tano i tu saluhut halak pangisina; ingkon gabe taon parolopolopon do i di hamu, jala ingkon mulak hamu ganup tu partalianna, mulak huhut ganup tu donganna hian.” (Jaha 3 Musa 25:8-12.) Di minggu naung salpu, nunga taparsiajari laba ni ari Sabbat na diulahon halak Israel ganup minggu. Alani i, songon dia do halak Israel mandapot laba di taon Yobel? Umpamana,  bayangkon ma adong sahalak Israel na godang utangna. Ingkon digadis ibana do tanona asa boi digarar utangna i. Alai tingki taon Yobel, ingkon mulak do muse tanona i tu ibana. Gabe adong ma warisan na boi dilehon tu ianakhonna. Suang songon i ma, bayangkon ma molo adong sahalak baoa na gabe hatoban manang manggadis anakna gabe hatoban laho manggarar utang. Tingki taon Yobel, ingkon mulak do muse ibana manang anakna i tu keluargana. Alani i, ndang boi adong halak na gabe hatoban saleleng ngoluna. On patuduhon, na parduli do Jahowa tu naposona!

4-5. Boasa ringkot taparsiajari taringot taon Yobel na masa di tingki ni halak Israel?

⁴ Aha do muse laba na asing sian taon Yobel? Didok Jahowa, “Na so tupa adong di tongatongamuna halak na pogos, ai buas do pasupasuon ni Jahowa ho di tano silehonon ni Jahowa, Debatam tu ho soluhonmu bahen partalianmu.” (5 Mus. 15:4) Imbar situtu do on tu na masa di tingkinta saonari. Taida do halak na mora gabe lam mamora jala halak na pogos gabe lam pogos!

⁵ Ala naung gabe halak Kristen, ndang Patik ni si Musa be na taihuthon. Lapatanna, ndang taihuthon be aturan na diulahon di taon Yobel, songon paluahon hatoban, manalpuhon utang, dohot paulakkon tano warisan. (Rom 7:4; 10:4; Eps. 2:15) Alai ringkot do taparsiajari taringot taon Yobel. Boasa? Alana pengaturan na dibahen Jahowa tu halak Israel i, paingothon hita tu haluaon na boi tahilala.

6. Sian aha do hita porlu dipalua?

⁶ Sude hita porlu do dipalua sian parhatobanan ni dosa. Ala diparhatoban dosa, gabe matua ma hita, marsahit, jala mate. Tingki markaca manang tingki marubat tu dokter, gabe diboto godang halak ma na tutu do i masa. Asing ni i, tingki taulahon dosa, on mambahen metmet  rohanta. I do alana didok apostel Paulus adong ‘patik ni dosa na mangarajai dagingna’. Didok ibana muse, “Tung jolma na dangol do ahu. Ise ma na paluahon ahu sian daging na parohon hamatean on?”​—Rom 7:23, 24.

7. Aha do na disurirangkon si Jesaya taringot haluaon?

⁷ Tontu mandok mauliate do hita tu Debata ala dibahen Ibana pengaturan asa boi hita malua sian dosa. Jesus ma na dipillit laho paluahon hita. Lobi sian 700 taon andorang so ro Jesus tu tano on, nunga disurirangkon si Jesaya na laho adong haluaon na dumenggan sian haluaon ni halak Israel saleleng taon Yobel. Didok ibana, “Songgop do tu ahu tondi ni Tuhan Jahowa, ala naung miniahan ni Jahowa ahu mamaritahon barita na uli tu halak na dangol, marsuru ahu pauliuli halak parroha na bojok, maningtingkon haluaon tu halak na tarhurung.” (Jes. 61:1) Tu ise do surirang i marlangku?

8. Taringot ise do na didok surirang ni si Jesaya i?

⁸ Mansai ringkot do surirang taringot haluaon i. Jala dimulai ma i dung di mulai Jesus ulaonna marbarita. Tingki laho ibana tu sinagoga di hutana di Nasaret, dijahahon Jesus do surirang ni si Jesaya i tu angka halak Jahudi na ro tusi. Taringot dirina do na didok Jesus disi. Didok, “Songgop do tu ahu tondi parbadia ni Jahowa ala dipillit do ahu laho mamaritahon barita na uli tu na pogos. Disuru do ahu paboahon haluaon tu angka na tartaban, pamalumhon parnidaan ni na mapitung, paluahon na marsitaonon, jala mamaritahon taon parasi ni rohaon ni Jahowa.” (Luk. 4:16-19) Songon dia do Jesus pasauthon surirang i?

9. Haluaon aha do na dihirim godangan halak di tingki ni Jesus?

⁹ Dapot ni angka halak di abad na parjolo do haluaon na disurirangkon si Jesaya dohot na dijahahon Jesus. Dipatangkas Jesus do i tingki didok ibana, “Sadari on ma saut ayat na binegemuna on.” (Luk. 4:21) Hirim do roha ni godang halak na mambege Jesus di tingki i asa dipalua sian pamarentaon ni Rom. Ra, sarupa do pangkilalaan ni nasida songon dua baoa na mandok, “Mangkirim do hami asa ibana na paluahon Israel.” (Luk. 24:13, 21) Alai taboto do, ndang  diajarhon Jesus angka siseanna asa mangalo tu pamarenta ni Rom. Gariada didok ibana do tu nasida, “Lehon ma tu Kesar ampuna ni Kesar.” (Mat. 22:21) Molo songon i, songon dia do Jesus paluahon angka halak di tingki i?

10. Sian aha do angka halak dipalua Jesus?

¹⁰ Diurupi Jesus do angka halak asa mandapot haluaon marhite dua cara. Na parjolo, dipalua Jesus do angka halak asa malua sian ajaran na so sintong na diajarhon angka pamimpin agama. Di tingki i, godang do halak Jahudi na dipaksa asa mangihuthon adat dohot angka ajaran na so sintong. (Mat. 5:31-37; 15:1-11) Didok angka pamimpin agama, diurupi nasida do angka halak asa manomba Debata, hape cara ni nasida sandiri pe ndang denggan manomba Debata. Alani i, gabe songon halak na mapitung do nasida. Ala ndang dijangkon nasida Messias dohot ajaranna, gabe tongtong ma nasida mapitung jala ndang boi disesa dosa ni nasida. (Joh. 9:1, 14-16, 35-41) Ala diajarhon Jesus na sintong jala mangalehon sitiruon na denggan, boi ma angka halak na serep roha malua sian ajaran na so sintong.​—Mrk. 1:22; 2:23–3:5.

11. Sian aha do muse angka halak dipalua Jesus?

¹¹ Na paduahon, dipalua Jesus do angka halak sian parhatobanan ni dosa. Ala dilehon Jesus ngoluna gabe tobusan, gabe boi ma disalpuhon Debata dosa ni sude halak na patuduhon haporseaon tu tobusan i marhite parniulaonna. (Heb. 10:12-18) Didok Jesus, “Molo dipalua Anak i hamu, tutu ma hamu malua.” (Joh. 8:36) Dumenggan do haluaon on sian haluaon na didapot halak Israel saleleng taon Yobel! Umpamana, sahalak baoa na dipalua di taon Yobel olo do ra gabe hatoban muse. Jala ujungna mate do ibana.

12. Ise do na parjolo sahali mandapot laba sian haluaon na dipaboa Jesus?

¹² Tingki Pentakosta 33 M, marhite tondi parbadia dimiahi Jahowa ma angka apostel dohot angka sisean ni Jesus na setia. Gabe anak ni Debata ma nasida, jala di ari na naeng ro laho dipahehe nasida tu surgo laho mamarenta dohot Jesus. (Rom 8:2, 15-17) Nasida ma na parjolo sahali mandapot laba sian haluaon na dipaboa Jesus tingki di sinagoga di Nasaret. Dipalua do nasida sian  ajaran na so sintong dohot hasomalan na maralo tu Debata na diajarhon angka pamimpin agama Jahudi. Jala dipalua Debata ma nasida sian dosa dohot hamatean. Haluaon on dimulai tingki parjolo sahali sisean ni Jesus dimiahi Debata taon 33 M. Jala dipaujung ma i di ujung ni Pamarentaon Saribu Taon. Aha do na laho masa saleleng tingki i?

13-14. Asing ni halak Kristen na miniahan, ise do muse na mandapot haluaon na dipaboa Jesus?

¹³ Saonari, marjuta halak na serep roha sian saluhut bangso gabe ‘biru-biru na asing’. (Joh. 10:16) Ndang laho mamarenta dohot Jesus nasida di surgo. Alai marpangkirimon do nasida laho mangolu salelengna di tano on. I do pangkirimonmuna?

¹⁴ Saonari pe, boi do hamu mandapot laba na sarupa songon na didapot angka halak Kristen na miniahan. Molo porsea hamu tu tobusan ni Jesus, boi ma disesa Jahowa dosamuna. Hasilna, boi ma ias panggora ni rohamuna di adopan ni Debata. (Eps. 1:7; Pgk. 7:14, 15) Pingkirhon ma muse pasu-pasu na dapotmuna ala dipalua sian angka ajaran na so sintong. Didok Jesus, “Botoonmuna ma hasintongan jala paluaon ni hasintongan i ma hamu.” (Joh. 8:32) Tontu las hian do rohanta alani haluaon i!

15. Aha do na laho masa di ari na naeng ro?

 ¹⁵ Boi do hamu marpos ni roha tu haluaon i. Satongkin nai, laho dihancurhon Jesus ma angka agama na so sintong dohot pamarentaon ni jolma na jahat. Jagaon ni Debata ma “punguan bolon” sahat tu paradeiso. Jala dapot ni nasida ma godang pasu-pasu disi. (Pgk. 7:9, 14) Mansai godang do angka halak na laho dipahehe jala dipalua ma nasida sian dosa ni si Adam.​—Ul. 24:15.

16. Haluaon aha do na laho masa di ari na naeng ro?

¹⁶ Saleleng Pamarentaon Saribu Taon, diurupi Jesus dohot angka na miniahan ma sude jolma asa gabe sempurna jala marale-ale tu Debata. Haluaon na masa di tingki i dos songon taon Yobel di tingki ni halak Israel. Ujungna, sude jolma na setia manomba Jahowa gabe sempurna jala ndang mardosa.

17. Hombar tu Jesaya 65:21-23, songon dia do ngolunta di ari na naeng ro? (Ida gambar sampul.)

¹⁷ Di Jesaya 65:21-23 (Jaha.) dipaboa do tu hita songon dia ngolunta di tano on di ari na naeng ro. Mansai godang do ulaon di tingki i. Didok di Bibel, godang do ulaon ni naposo ni Debata na mambahen las roha. Jala di ujung ni Pamarentaon Saribu Taon, pos ma rohanta ndang “gabe hatoban ni dosa dohot hamatean sude tompaan i. Jala dapot ni nasida ma hasangapon na mansai balga songon na dilehon tu angka anak ni Debata”.​—Rom 8:21.

18. Boasa boi pos rohanta taringot ngolunta di ari na naeng ro?

¹⁸ Dibahen Jahowa do pengaturan tu halak Israel taringot tingki laho karejo dohot tingki maradi. Jala laho dibahen Jahowa do pengaturan na sarupa tu naposona saleleng Pamarentaon Saribu Taon. Disi, godang ma tingkinta laho manomba Debata. Jala i do na mambahen hita marlas ni roha saonari dohot di tano na imbaru. Tontu, marlas ni roha ma sude naposo ni Jahowa na setia saleleng Pamarentaon Saribu Taon. Alana, mansai godang do ulaon na parohon las ni roha jala sude hita manomba Debata.