SAI DIDOK hamu do mauliate? Ringkot do sungkun-sungkun on tapingkirhon. Bibel mandok, godang halak saonari “ndang diboto mandok mauliate”. (2 Tim. 3:2) Ra, hea do hamu pajumpang dohot sasahalak na lomo rohana diurupi halak na asing. Alai, ndang olo ibana mandok mauliate tu halak na mangurupi ibana. Tontu ndang lomo rohamu mardongan dohot halak sisongon i.

Alai dijujui Jahowa do naposona, “Tongtong ma hamu mandok mauliate.” Jala, “Mandok mauliate ma hamu di saluhut.” (Kol. 3:15; 1 Tes. 5:18) Sasintongna, godang do labana molo sai tadok mauliate.

Sada alasan na ringkot boasa ingkon tadok mauliate, i ma ala boi do i mangurupi hita marpingkir na denggan taringot dirinta sandiri. Molo didok sasahalak mauliate, olo do gabe tabo pangkilalaanna songon i muse halak na manjalo hamauliateonna i. Boasa mandok mauliate boi mambahen hita dohot na asing marlas ni roha? Umpamana, molo rade sasahalak mangalehon tingkina laho mangurupi hamu, on lapatanna dihilala ibana ma na tama do hamu diurupi. Parduli do ibana tu hamu. Tingki diboto hamu taringot i, gabe diargai hamu ma dirimuna. Tarimangi ma pengalaman ni si Rut. Burju do si Boas tu ibana. Alani i, gabe las ma roha ni si Rut ala diboto adong do halak na parduli tu ibana.​—Rut 2:10-13.

Tontu, tama do hita mandok mauliate tu Debata. Sipata, hea do dipingkirhon hamu silehon-lehon naung didapot hamu jala na tongtong diparade Ibana. (5 Mus. 8:17, 18; Ul. 14:17) Alai, ingkon tarimangi do taringot sude na dilehon Jahowa tu hita. Molo dirimangi haburjuon na dipatudu Debata, gabe lam dihaholongi hamu ma Ibana. Jala gabe diboto hamu ma, na mansai holong do rohana tu hamu.​—1 Joh. 4:9.

Ingkon tarimangi do angka na dilehon Jahowa tu hita. Jala ingkon tadok do mauliate alani haburjuonna. (Ps. 100:4, 5) Adong do na mandok, “boi do tamba las ni roha ni sasahalak molo jotjot mandok mauliate.”

Alasan na asing boasa ringkot mandok mauliate, alana boi do i patoguhon parale-aleon. Lomo do rohanta diargai. Alani i, tingki didok hamu mauliate tu donganmuna, boi do gabe lam solhot hamu tu ibana. (Rom 16:3, 4) Halak na jotjot mandok mauliate lomo rohana mangurupi na asing. Diboto do molo adong halak na burju tu ibana, jala lomo rohana mangulahon na sarupa tu halak na burju i. Mangurupi na asing boi mambahen las roha. I do alana didok Jesus, “Umlas do roha ni halak na mangalehon sian na manjalo.”​—Ul. 20:35.

Sahalak dosen sian University of California na margoar si Robert Emmons mambahen penelitian taringot hamauliateon. Didok ibana, “Asa taronjar rohanta laho mandok mauliate, ingkon taantusi do na porlu do hita diurupi na asing. Sipata, hita do na mangalehon jala sipata hita na manjalo.” Asa boi tongtong mangolu jala marlas ni roha, porlu do hita diurupi na asing. Umpamana, ra diurupi nasida do hita asa mandapot sipanganon manang perawatan kesehatan. (1 Kor. 12:21) Halak na sai mandok mauliate, diargai do aha na diulahon na asing tu ibana. Alani i, somal do hamu mandok mauliate tu na asing?

Asing ni i, molo sai mandok mauliate, boi do i mangurupi hamu asa mamingkirhon angka na denggan. Boi ma dipatudos pingkiranmuna songon saringan. Tingki mandok mauliate, dipillit hamu do asa mamingkirhon angka na denggan jala mambolongkon angka na roa sian pingkiranmuna. Molo sai mandok mauliate, gabe godang ma angka na denggan na dipingkirhon, jala gabe lam lomo ma rohamuna laho mandok mauliate. Molo diulahon hamu i, boi ma dihilala hamu songon na didok apostel Paulus, “Sai marlas ni roha ma hamu alani Tuhan.”​—Plp. 4:4.

Molo tapatudu hamauliateon, on mangurupi hamu asa unang mamingkirhon na so denggan. Molo sai tadok mauliate, ndang mura hita mangiburu, marlungun ni roha, manang muruk. Halak na patuduhon hamauliateon pe ndang olo holongan di hepeng. Alana sai didok ibana do mauliate tu na adong di ibana. Ndang dilului ibana lobi sian na dihaporluhon.​—Plp. 4:12.

Taboto do, lomo do roha ni Sibolis asa lungun jala metmet rohamu alani hasusaan di ari parpudi on. Jala lomo do rohana asa marpangalaho na roa hamu jala sai marungut-ungut. Molo songon i hamu, gabe maol ma halak manjangkon barita na uli na dipasahat hamu. Alai molo tapatudu hamauliateon, gabe boi ma tapatudu angka parbue ni tondi. Umpamana, boi do hita marlas ni roha tu angka na denggan naung dilehon Debata. Jala, marhaporseaon do hita tu angka janji ni Jahowa di ari na naeng ro.​—Gal. 5:22, 23.

Las do rohanta gabe naposo ni Jahowa. Alani i, satolop do hita tu na diulas di artikel on taringot hamauliateon. Alai, olo dope dihilala hamu ndang mura asa tongtong patuduhon hamauliateon jala mamingkirhon angka na denggan. Nang pe songon i, unang ma metmet rohamuna. Boi do hamu mangalatik dirimuna asa tongtong patuduhon hamauliateon. Songon dia carana? Ganup ari, lehon ma tingkimuna laho mamingkirhon angka na denggan di ngolumuna. Molo diulahon hamu i, gabe taronjar ma rohamu laho mandok mauliate. Gabe umlas do rohamu marimbangkon angka halak na sai mamingkirhon angka hasusaan di parngoluon. Jala molo sai dipingkirhon hamu angka na denggan na sian Debata dohot dongan na asing, on boi patoguhon jala parohon las ni roha tu hamu. Ra, boi do dibahen hamu catatan taringot i. Ganup ari, surat ma dua manang tolu angka na denggan na mangonjar rohamuna laho mandok mauliate.

Piga-piga peneliti paboahon, “molo sai tadok mauliate tu na asing, adong do pengaruhna i tu cara kerja ni otak. Gabe lam mura ma hita marpingkir na denggan taringot ngolunta”. Umlas do roha ni halak na sai patuduhon hamauliateon. Alani i, pingkirhon jala hilala ma las ni roha sian angka na denggan naung dapotmuna. Jala tongtong ma sai patuduhon hamauliateon! Sai argai ma angka na denggan di ngolumuna, jala “mandok mauliate ma hamu di Jahowa, ai na basa do ibana”. Tongtong ma ‘mandok mauliate di saluhut’.​—1 Kron. 16:34; 1 Tes. 5:18.