PARSIAJARAN 52
Natua-tua—Latik ma Ianakhonmuna Asa Mangkaholongi Jahowa
“Silehonlehon ni Jahowa do angka ianakkon.”—PS. 127:3, Bibel siganup ari.
ENDE 134 Silehonlehon ni Debata do Ianakhon
NA LAHO DIULAS *
1. Aha do tanggung jawab na dilehon Jahowa tu angka natua-tua?
TINGKI ditompa Jahowa jolma na parjolo, dibahen Jahowa do tu bagas roha ni nasida asa lomo rohana marianakhon. Didok do di Bibel, “Silehonlehon ni Jahowa do angka ianakkon.” (Ps. 127:3, Bibel siganup ari) Aha do lapatanna? Bayangkon ma dipangido ale-alemuna asa dijaga hamu hepengna na mansai godang. Boha do pangkilalaanmu? Tontu las do rohamu ala porsea ibana tu hamu. Alai, olo do gabe mabiar hamu laho mamingkirhon songon dia carana manjaga hepeng i. Suang songon i ma, Jahowa i ma Ale-alenta na sumurung. Dipangido Ibana do asa dijaga natua-tua silehon-lehon na ummarga sian hepeng na godang i, i ma ianakhon. Dipangido Ibana do asa disarihon natua-tua ianakhonna jala mambahen nasida marlas ni roha.
2. Sungkun-sungkun aha do na laho taulas?
2 Ise do na manontuhon boi jala andigan na mardongan saripe laho marianakhon? Aha do na boi diulahon natua-tua asa marlas ni roha ianakhonna di ngoluna? Laho taulas ma piga-piga prinsip ni Bibel na boi mangurupi halak Kristen na mardongan saripe mambahen keputusan na denggan.
MANGARGAI KEPUTUSAN NI NA MARDONGAN SARIPE
3. (a) Ise do na mambahen keputusan marianakhon manang na ndang na mardongan saripe? (b) Prinsip ni Bibel na dia do na ingkon diingot keluarga dohot angka dongan na asing?
3 Di piga-piga budaya, dijujui keluarga dohot dongan na asing do na baru marhasohotan asa pintor marianakhon. Si Jethro, sahalak donganta baoa na tading di Asia mandok, “Di huria, piga-piga donganta naung marianakhon manjujui angka na so adong dope ianakhonna asa marianakhon.” Si Jeffrey, donganta na asing na tading di Asia mandok, “Adong piga-piga dongan na mandok, molo ndang adong ianakhon ni na mardongan saripe, ndang adong annon na mangurus nasida dung matua.” Alai ingot ma, na mardongan saripe i do na ingkon mambahen keputusan laho marianakhon manang na ndang. Nasida do na martanggung jawab. (Gal. 6:5) Ra ala ni holongna, dijujui angka dongan manang keluarga do na baru mardongan saripe asa marianakhon. Alai ingkon diingot nasida do, na mardongan saripe i do na mambahen keputusan.—1 Tes. 4:11.
4-5. Aha do dua sungkun-sungkun na ingkon diulas na laho marhasohotan, jala andigan do tingki na pas laho mangulas i? Patorang ma.
4 Angka na laho marhasohotan na lomo rohana marianakhon, ingkon mangulas dua sungkun-sungkun na ringkot on: Na parjolo, andigan do nasida laho marianakhon? Na paduahon, piga do ianakhon na dihalomohon nasida? Andigan do tingki na pas dihatai nasida taringot i? Jala boasa ringkot dua sungkun-sungkun i?
5 Denggan do molo dihatai taringot marianakhon andorang so marhasohotan dope. Boasa? Alana ringkot do parjolo sahali asa sapingkiran nasida taringot i. Jala on mangurupi nasida asa rade mandalanhon tanggung jawab i. Piga-piga na mardongan saripe, mamillit asa paimahon sataon manang dua taon dung marhasohotan asa marianakhon. Boasa? Asa adong tingki ni nasida laho patoguhon parsaripeon ni nasida andorang so gabe natua-tua. Alana molo dung marianakhon, godang do tingki dohot gogo na dipangke nasida laho manjaga ianakhonna.—Eps. 5:33.
6. Alani hasusaan di tingkinta saonari, aha do na dipillit angka donganta na mardongan saripe?
6 Piga-piga donganta mamillit laho maniru tolu anak ni si Noak dohot angka istri ni nasida. Dung marhasohotan, ndang pintor marianakhon nasida. (1 Mus. 6:18; 9:18, 19; 10:1; 2 Ptr. 2:5) Dipatudos Jesus do tingkinta saonari songon “tingki ni si Noak”, jala taboto do hita mangolu di “tingki hasusaan di ari parpudi”. (Mat. 24:37; 2 Tim. 3:1) Alani i, piga-piga donganta naung mardongan saripe, mamillit asa ndang pintor marianakhon asa boi mangalehon gumodang tingki di ulaon marbarita.
Tingki na mardongan saripe mambahen keputusan taringot marianakhon, nasida ingkon “mangetong sipalaoonna” (Ida paragraf 7) *
7. Songon dia prinsip di Lukas 14:28, 29 dohot Poda 21:5 boi mangurupi na mardongan saripe?
7 Tingki na mardongan saripe mambahen keputusan taringot marianakhon, ingkon ‘dietong nasida do sipalaoonna’. (Jaha Lukas 14:28, 29.) Angka natua-tua naung marianakhon mandok, asing ni biaya na godang, ingkon dipangke nasida do godang tingki dohot gogo laho pagodang-godangkon ianakhonna. Alani i, ringkot do dipingkirhon na mardongan saripe sungkun-sungkun on, ‘Ingkon karejo do hami na dua laho paradehon angka na porlu di keluarga? Satolop do hami tu “angka na porlu” di keluarga? Molo karejo hami na dua, ise ma na manjaga ianakhonnami?’ Ise do na gabe ditiru ibana? Tingki diulas na mardongan saripe sungkun-sungkun i, nunga diihuthon nasida Poda 21:5.—Jaha.
Diurupi suami na parholong do istrina laho manjaga ianakhonna (Ida paragraf 8)
8. Aha do hasusaan na diadopi angka natua-tua, jala aha do na boi diulahon suami na parholong?
8 Ingkon dilehon natua-tua do godang tingki dohot gogona laho manarihon ianakhonna. Alai molo jonok-jonok umur ni angka ianakhonna, olo do ra gabe maol natua-tua manarihon ganup ianakhonna. Piga-piga natua-tua mandok, gabe palojahu do nasida alani i. Ra, ala sai loja dihilala sahalak ina, olo do gabe ndang adong be gogona laho marsiajar, martangiang, dohot marbarita na uli. Asing ni i, olo do gabe maol dihilala ibana manangihon acara di parpunguan. Gabe ndang dapotan laba ibana sian i. Tontu, diurupi suami na parholong do istrina laho manjaga ianakhonna tingki di parpunguan dohot di jabu. Umpamana, diurupi ibana do istrina mangkarejohon ulaon di jabu. Marsitutu do ibana asa sude mandapot laba sian Ibadat Keluarga. Jala ringgas do ibana mangurupi keluargana di ulaon marbarita.
MANGAJARI IANAKHON ASA MANGKAHOLONGI JAHOWA
9-10. Aha do na ingkon diulahon natua-tua laho mangurupi ianakhonna?
9 Aha do na ingkon diulahon natua-tua laho mangurupi ianakhonna asa mangkaholongi Jahowa? Songon dia nasida boi manjaga ianakhonna sian angka bahaya di portibi on? Taulas ma piga-piga cara na boi diulahon natua-tua.
10 Martangiang ma asa diurupi Jahowa. Parrohahon ma contoh ni si Manoah dohot istrina, i ma natua-tua ni si Simson. Tingki diboto nasida na laho marianakhon nasida, dipangido si Manoah do tu Jahowa asa diurupi nasida laho pagodang-godangkon anakna i.
11. Hombar tu Panguhum 13:8, songon dia angka natua-tua boi maniru contoh ni si Manoah?
11 Si Nihad dohot si Alma sian Bosnia dohot Herzegovina marsiajar sian contoh ni si Manoah. Didok nasida, “Songon si Manoah, dipangido hami do tu Jahowa asa diurupi hami gabe natua-tua na burju. Dialusi Jahowa do tangiangnami marhite marragam cara, songon ayat ni Bibel, publikasi, parpunguan, dohot angka kebaktian.”—Jaha Panguhum 13:8.
12. Songon dia do si Josep dohot si Maria gabe sitiruon tu ianakhonna?
12 Gabe sitiruon ma hamu. Umbalga do pengaruh ni na diulahon hamu sian na dihatahon hamu tu ianakhonmuna. Dilehon si Josep dohot si Maria do sitiruon na denggan tu ianakhonna, tarmasuk ma tu Jesus. Ringgas do si Josep karejo laho manarihon keluargana. Jala, dijujui ibana do keluargana asa mangargai parale-aleonna tu Debata. (5 Mus. 4:9, 10) Sasintongna, mangihuthon Patik, ndang ingkon diboan si Josep keluargana “ganup taon” laho mangarayahon Paska. Alai diulahon ibana do i. (Luk. 2:41, 42) Ra, piga-piga kepala keluarga di tingki i marpingkir, maol do mamboan sude keluargana tu Jerusalem. Boi do i pasudahon godang tingki dohot hepeng. Nang pe songon i, diharingkothon si Josep do parale-aleon tu Debata, jala diajarhon ibana do i tu ianakhonna. Asing ni i, tangkas do diboto si Maria Hata ni Debata. Marhite na dihatahon dohot na diulahon ibana, diajarhon si Maria do ianakhonna asa mangkaholongi Hata ni Debata.
13. Songon dia donganta na mardongan saripe maniru contoh ni si Josep dohot si Maria?
13 Si Nihad dohot si Alma na dipaboa nangkin, naeng maniru contoh ni si Josep dohot si Maria. Songon dia contoh i mangurupi nasida pagodang-godangkon ianakhonna asa mangkaholongi jala manomba Debata? Didok nasida, “Sian parngoluonnami, dipatudu hami do songon dia hami mandapot godang laba ala mangihuthon prinsip na diajarhon Jahowa.” Didok si Nihad muse, “Molo lomo rohamu asa ianakhonmuna gabe halak na burju, ingkon parjolo do hamu songon i.”
14. Boasa ingkon diboto natua-tua ise dongan ni ianakhonna?
14 Urupi ma ianakhonmuna asa mamillit dongan na burju. Ingkon diboto natua-tua do ise dongan ni ianakhonna jala aha na diulahon nasida. Dohot ma i angka dongan ni nasida na jotjot mangkatai marhite jejaring sosial dohot di HP ni nasida. Balga do pengaruh ni dongan i tu na dipingkirhon dohot na diulahon ianakhonmuna.—1 Kor. 15:33.
15. Sian contoh ni si Jessie, aha do na boi diparsiajari natua-tua?
15 Boha do molo ndang pola diboto natua-tua taringot alat elektronik? Sahalak ama na margoar si Jessie, na tading di Filipina mandok, “Ndang pola diboto hami taringot alat elektronik. Alai sai dipaingot hami do nasida asa pasidingkon bahaya na adong di alat elektronik.” Ndang diorai si Jessie ianakhonna mamangke alat elektronik nang pe ndang pola diantusi ibana taringot i. Didok ibana do muse, “Hujujui do ianakhonku asa mamangke alat elektronik laho marsiajar bahasa na baru, mambahen persiapan tu parpunguan, dohot manjaha Bibel ganup ari.” Molo natua-tua do hamu, hea do hamu manjaha jala mangulas dohot ianakhonmuna sipaingot taringot mar-SMS dohot mambagihon foto di Internet na adong di bagian “Angka na Poso” di jw.org®? Hea do diulas hamu video Ise do na Mangatur—Ho manang Alat Elektronik? dohot Marbisuk ma Mamangke Jejaring Sosial dohot nasida? * On boi mangurupi hamu mangajari ianakhonmuna asa marbisuk mamangke alat elektronik.—Poda 13:20.
16. Aha do na diulahon godang natua-tua, jala aha do hasilna?
16 Godang natua-tua mambahen cara asa boi ianakhonna marsaor dohot angka dongan na togu parale-aleonna tu Debata. Umpamana, si N’Déni dohot si Bomine na tading di Pantai Gading, jotjot manogihon angka pengawas wilayah asa manginap di jabu ni nasida. Didok si N’Déni, “Marlaba situtu do on tu anaknami. Gabe perintis ma ibana, jala saonari nunga gabe pengawas wilayah pengganti.” Boi do dibahen hamu cara na sarupa?
17-18. Andigan do natua-tua ingkon mangalatik ianakhon ni nasida?
17 Latik ma ianakhonmuna sian na gelleng dope. Lam hatop dilatik hamu ianakhonmuna, lam denggan do i. (Poda 22:6) Pingkirhon ma taringot si Timoteus. Dung magodang, gabe dongan sapardalanan ni apostel Paulus ma ibana. Omak ni si Timoteus, i ma si Eunike dohot ompungna, si Lois nunga mangalatik ibana “sian na metmet”.—2 Tim. 1:5; 3:15.
18 Si Jean-Claude dohot si Peace, na tading di Pantai Gading marhasil mangurupi onom ianakhon ni nasida asa mangkaholongi jala manomba Jahowa. Aha do na mangurupi nasida? Ditiru nasida do contoh ni si Eunike dohot si Lois. Didok nasida, “Ndang leleng dung tubu ianakhonnami, diajarhon hami do Hata ni Debata tu nasida.”—5 Mus. 6:6, 7.
19. Aha do lapatan ni “mangajarhon” Hata ni Debata tu ianakhonmuna?
19 Aha do lapatan ni “mangajarhon” Hata ni Debata tu ianakhonmuna? Hata “mangajarhon” boi do lapatanna “marulak-ulak mangajari dohot paingothon.” Laho mangulahon i, ingkon dilehon angka natua-tua do godang tingki tu ianakhonna. Sipata, olo do gabe metmet roha ni natua-tua ala marulak-ulak paingothon ianakhon ni nasida. Alai, on ma sada cara laho mangurupi ianakhon ni nasida asa mangantusi Hata ni Debata jala mangulahon i.
Ingkon marsitutu do natua-tua laho mangalatik ganup ianakhonna (Ida paragraf 20) *
20. Songon dia Psalmen 127:4 boi mangurupi natua-tua pagodang-godangkon ianakhonna? Patorang ma.
20 Ingkon tangkas do ditanda hamu ianakhonmuna. Di Psalmen 127, dipatudos do ianakhon songon panah. (Jaha Psalmen 127:4.) Marragam do jenis ni panah dohot ukuranna. Suang songon i ma, ndang sai sarupa ganup dakdanak. Ingkon marsitutu do natua-tua laho mangalatik ganup ianakhon ni nasida. Di negara Israel, adong natua-tua na marhasil pagodang-godangkon dua ianakhon ni nasida. Aha do na mangurupi nasida? Didok nasida, “Ndang sahali rap dibahen hami ianakhonnami marsiajar Bibel.” Tontu, kepala keluarga do na manontuhon porlu manang na ndang dibahen nasida cara sisongon i.
DIURUPI JAHOWA DO HAMU
21. Songon dia do Jahowa mangurupi natua-tua?
21 Sipata, mansai susa do dihilala natua-tua laho mangajarhon ianakhon ni nasida. Alai silehon-lehon sian Jahowa do ianakhon. Sai rade do Ibana laho mangurupi natua-tua. Ditangihon Ibana do tangiang ni natua-tua. Jala dialusi Ibana do i marhite Bibel, publikasi, dohot contoh manang poda sian angka natua-tua naung marpengalaman di huria.
22. Aha do angka na dumenggan na boi dilehon natua-tua tu ianakhonna?
22 Piga-piga halak mandok, 20 taon do lelengna natua-tua pagodang-godang ianakhon. Alai sasintongna, tongtong do nasida gabe natua-tua. Jala na dumenggan na boi dilehon nasida tu ianakhon, i ma holong, tingki, dohot pelatihan na sian Bibel. Marragam do cara ni ganup dakdanak manjalo pelatihan i. Alai, godang do donganta na dipagodang-godang natua-tuana na mangkaholongi Jahowa, mangkilala na sarupa songon na dihilala donganta si Joanna Mae na tading di Asia. Didok ibana, “Molo huingot muse pelatihan na dilehon natua-tuangku, mandok mauliate do ahu ala nunga dipaingot jala diajari ahu asa mangkaholongi Jahowa. Ndang holan disarihon nasida ahu, alai gabe marlaba situtu do ngolungku alani nasida.” (Poda 23:24, 25) Marjuta donganta di liat portibi on pe mangkilala na sarupa.
ENDE 59 Rap ma Hita Mamuji Jahowa
^ par. 5 Ingkon marianakhon do na mardongan saripe? Molo dipillit nasida laho marianakhon, piga do ianakhon na dihalomohon nasida? Songon dia nasida boi mangajari ianakhonna asa mangkaholongi jala manomba Jahowa? Di parsiajaran on, laho taulas ma angka contoh di tingkinta saonari dohot angka prinsip ni Bibel na boi mangurupi hita mangalusi sungkun-sungkun i.
