1. Aha do pandangan ni angka halak taringot karejo?

AHA do pandangan ni angka halak di humaliangmuna taringot karejo? Di piga-piga negara, godang do halak na pagodanghu manang palelenghu di parkarejoan. Alani i, ndang adong be tingki ni nasida laho maradi, rap dohot keluarga, manang marsiajar taringot Debata. (Pjm. 2:23) Na asing, adong do piga-piga halak na so lomo rohana karejo jala mambahen sidalian asa unang karejo.​—Poda 26:13, 14.

2-3. Songon dia Jahowa dohot Jesus mangalehon sitiruon taringot karejo?

² Godang halak di portibi on na pagodanghu karejo. Na asing, adong do na so olo karejo. Alai, pingkirhon ma songon dia pangkilalaan ni Jahowa dohot Jesus taringot karejo. Taboto, lomo do roha ni Jahowa karejo. Didok Jesus, “Tongtong do karejo Damang sahat tu saonari, jala ahu pe tongtong do songon i.” (Joh. 5:17) Pingkirhon ma tingki ditompa Debata angka suru-suruan, angka bintang dohot planet. Taida do muse angka tompaan na uli na adong di tano on. Alani i, didok sahalak panurat psalmen ma, “Tung na lan situtu do angka jadijadianmu, ale Jahowa! Saluhutna i dipauli Ho marhitehite hapistaran, tung gok jadijadianmu do tano on.”​—Ps. 104:24.

³ Ditiru Jesus do Amana. Dohot do ibana tingki ditompa Debata angka na di langit. Tingki rap dohot Jahowa, gabe sahalak “pande” do ibana. (Poda 8:27-31) Tingki di tano on, mansai denggan do ulaon ni Jesus. Songon sipanganon do ulaon i di ibana, jala i patuduhon na sinuru ni Debata do ibana.​—Joh. 4:34; 5:36; 14:10.

4. Aha do na boi tatiru sian Jahowa dohot Jesus taringot mangalehon tingki laho maradi?

 ⁴ Nang pe dibahen Jahowa dohot Jesus sitiruon asa ringgas karejo, alai porlu do hita maradi. Ndang marnaloja Jahowa, alani i ndang porlu di Ibana laho maradi. Alai didok do di Bibel, dung sae ditompa Jahowa langit dohot tano on, ‘maradi ma Ibana jala dipasonang dirina’. (2 Mus. 31:17) Lapatanna, so do Jahowa sian karejona jala dilehon Ibana do tingkina laho marlas ni roha mangida angka tompaanna. Suang songon i ma Jesus tingki di tano on. Ringgas do ibana karejo, alai dilehon ibana do tingki laho maradi jala rap mangan dohot angka ale-alena.​—Mat. 14:13; Luk. 7:34.

5. Sipata, aha do na maol dihilala angka naposo ni Debata?

⁵ Dijujui Bibel do angka naposo ni Debata asa ringgas karejo jala unang malas. (Poda 15:19) Tontu, ingkon karejo do hamu asa boi paradehon angka na porlu di keluargamuna. Jala, sude sisean ni Jesus martanggung jawab do laho marbarita na uli. Nang pe songon i, porlu do hamu maradi. Alai sipata, olo do ra maol dihilala hamu mangatur tingki laho karejo, marbarita dohot maradi. Molo songon i, songon dia hita mamboto sadia godang tingkinta laho karejo dohot maradi?

6. Songon dia Markus 6:30-34 patuduhon pandangan ni Jesus na seimbang taringot karejo dohot maradi?

⁶ Ringkot do pandangan na seimbang taringot karejo. Raja Salomo mandok, “Martingki be do . . . nasa sangkapsangkap.” Dipaboa ibana do angka ulaon songon manuan, mambangun, tangis, mengkel, marjoget, dohot ulaon na asing. (Pjm. 3:1-8) Tangkas ma, ringkot do karejo dohot maradi. Seimbang do pandangan ni Jesus taringot karejo dohot maradi. Sada tingki, ala sibuk marbarita, gabe “so sanga be Jesus dohot angka siseanna mangan”. Alani i, didok Jesus ma, “Laho ma hita tu inganan na lungun asa boi hita maradi satongkin.” (Jaha Markus 6:30-34.) Nang pe jotjot ndang adong tingki ni nasida laho maradi, alai diboto Jesus porlu do nasida sude maradi.

7. Aha do laba na tadapot molo taparsiajari ari Sabbat?

⁷ Sipata, hita sude porlu do so satongkin manang paubahon ulaonta siganup ari. Alani i, laho taparsiajari ma taringot parenta na dilehon Debata tu naposona najolo, i ma ari Sabbat na ingkon diulahon ganup minggu. Tutu, ndang Patik ni si Musa be na taihuthon saonari. Alai, boi do tadapot laba molo taparsiajari taringot ari Sabbat. On boi mangurupi hita mamboto pandangan na seimbang taringot karejo dohot maradi.

8. Hombar tu 2 Musa 31:12-15, aha do na ingkon diulahon halak Israel di ari Sabbat?

⁸ Bibel mandok, dung “ari” paonomhon, so do Jahowa sian ulaonna manompa angka na adong di tano on. (1 Mus. 2:2) Alai lomo do roha ni Jahowa karejo jala marhite cara na asing, ‘tongtong do Ibana karejo’. (Joh. 5:17) Karejo do Jahowa saleleng onom ari jala maradi Ibana di ari papituhon. I do alana diparentahon Ibana halak Israel asa maradi di ari papituhon. Didok Debata molo ari Sabbat i gabe tanda parjanjian ni halak Israel dohot Ibana. Gabe ari “paradianan na badia ma i di Jahowa”. (Jaha 2 Musa  31:12-15.) Ndang diloas manang ise pe karejo di ari i, tarmasuk ma i dakdanak, hatoban, dohot binatang na di ladang. (2 Mus. 20:10) Di ari i, godang ma tingki tu angka halak laho patoguhon parale-aleonna tu Jahowa.

9. Di tingki ni Jesus, aha do pandangan na sala taringot ari Sabbat?

⁹ Marlaba do ari Sabbat tu naposo ni Debata. Alai di tingki ni Jesus, dibahen angka pamimpin agama ma aturan na kaku taringot ari Sabbat. Didok nasida, ndang boi sasahalak mamutik biur ni gandum manang pamalumhon halak na marsahit di ari Sabbat. (Mrk. 2:23-27; 3:2-5) Ndang songon i na dihalomohon Debata, alani i dipatangkas Jesus ma taringot i tu angka na manangihon ibana.

10. Di Mateus 12:9-12, aha do na boi taparsiajari sian Jesus taringot ari Sabbat?

¹⁰ Ala mangihuthon Patik ni si Musa, diulahon Jesus dohot angka siseanna na halak Jahudi do ari Sabbat. * Alai sian na dihatahon dohot na diulahon Jesus, dipatudu ibana do ndang sala mangulahon na denggan jala mangurupi na asing di ari Sabbat. Tangkas do didok ibana, “Boi do mangulahon na denggan di ari Sabbat.” (Jaha Mateus 12:9-12.) Diboto Jesus do, ndang sala mangulahon na denggan jala mangurupi halak di ari Sabbat. Dipatudu ibana do aha na rumingkot sian ari Sabbat. Ala ndang karejo naposo ni  Debata di ari i, gabe godang ma tingki ni nasida laho patoguhon parale-aleonna tu Debata. Jesus magodang di keluarga na mangulahon ari Sabbat. Jala dipangke nasida do ari i laho patoguhon parale-aleonna tu Debata. Tarida do on sian na diulahon Jesus tingki ibana di hutana di Nasaret. Didok Bibel, “Songon na somal diulahon [Jesus] di ari Sabbat, masuk ma ibana tu sinagoga jala jongjong laho manjaha.”​—Luk. 4:15-19.

11. Sitiruon aha do na dibahen si Josep tu Jesus?

¹¹ Tingki si Josep mangajari Jesus gabe tukang hau, tontu diajarhon do muse tu ibana songon dia pandangan ni Debata taringot karejo. (Mat. 13:55, 56) Diida Jesus do si Josep ringgas karejo ganup ari laho manarihon keluargana. Di pudian ni ari, didok Jesus do tu angka siseanna, “Tama do parkarejo manjalo upana.” (Luk. 10:7) Tangkas ma, sahalak parkarejo na ringgas do Jesus.

12. Di Bibel, ise do contoh na denggan taringot ringgas karejo?

¹² Sahalak parkarejo na ringgas do apostel Paulus. Mamaritahon taringot Jesus dohot ajaranna do na rumingkot di ibana. Alai, karejo do si Paulus laho manarihon dirina sandiri. Loja do si Paulus “karejo arian nang borngin” asa unang gabe susa halak Tessalonik laho “manarihon” ibana. (2 Tes. 3:8; Ul. 20:34, 35) Ra, karejo mambahen tenda do na didok si Paulus disi. Tingki di Korint, rap tading do ibana dohot si Akuila dohot si Priskila jala “rap karejo dohot nasida. Ai rap sibahen tenda do nasida”. Nang pe karejo “arian nang borngin” si Paulus, ndang na gabe ndang hea ibana maradi. Tingki ari Sabbat, ndang karejo ibana mambahen tenda. Di ari i, laho do ibana marbarita tu halak Jahudi, alana nasida pe ndang karejo di ari Sabbat.​—Ul. 13:14-16, 42-44; 16:13; 18:1-4.

13. Aha do na boi tatiru sian si Paulus?

¹³ Sitiruon na denggan do apostel Paulus. Nang pe ingkon karejo, tongtong do ringgas ibana laho “pasahathon barita na uli na sian Debata”. (Rom 15:16; 2 Kor. 11:23) Dijujui ibana do angka halak asa mangulahon na sarupa. I do alana, ‘dongan saulaon marhobas tu Kristus Jesus’ do si Akuila dohot si Priskila di si Paulus. (Rom 12:11; 16:3) Dijujui si Paulus do halak Korint asa “mangulahon godang ulaon ni Tuhan i”. (1 Kor. 15:58; 2 Kor. 9:8) Ditogu-togu Jahowa do si Paulus laho manurat, “Manang ise na so olo karejo, unang ma mangan ibana.”​—2 Tes. 3:10.

14. Aha do lapatan ni hata ni Jesus na disurat di Johannes 14:12?

¹⁴ Ulaon na rumingkot di ari parpudi on, i ma marbarita dohot mambahen sisean. Jala didok Jesus, umbalga do ulaon na laho diulahon angka siseanna sian na diulahon ibana! (Jaha Johannes 14:12.) Na didok Jesus dison, ndang na gabe mambahen mukjizat angka siseanna i. Alai laho marbarita dohot mangajari do nasida tu godang inganan dohot tu godang halak. Jala umleleng do nasida mangulahon i sian Jesus.

15. Aha do na ingkon tasungkun tu dirinta, jala boasa?

¹⁵ Pingkirhon ma angka sungkun-sungkun on, ‘Di ingananku karejo, ditanda do ahu sahalak parkarejo na ringgas? Hupasae do karejongku pas di tingkina  jala huulahon do na dumenggan?’ Molo songon i do na diulahon hamu, ra gabe pos ma roha ni bosmuna tu hamu. Jala, gabe olo ma angka dongan sakarejomuna laho manangihon barita na uli. Taringot ulaon marbarita dohot mangajari, boi do disungkun hamu dirimuna, ‘Ringgas do ahu di ulaon i? Hubahen do persiapan andorang so marbarita? Pintor hatop do hujumpangi muse angka halak na berminat? Olo do ahu dohot marbarita marhite cara na asing?’ Molo songon i na diulahon hamu, dapotmuna ma las ni roha.

16. Songon dia do pandangan ni angka halak taringot maradi imbar tu pandangan ni Jesus dohot siseanna?

¹⁶ Diboto Jesus, adong do tingkina ingkon maradi ibana dohot angka siseanna. Alai sian najolo sahat tu saonari, godangan halak sarupa do songon baoa na mora di tudosan ni Jesus. Didok ibana tu dirina sandiri, “Marsonang-sonang ma ho, mangan, minum, jala marlas ni roha.” (Luk. 12:19; 2 Tim. 3:4) Didok rohana, maradi dohot marsonang-sonang do na rumingkot di parngoluon on. Alai ndang songon i Jesus dohot angka apostelna. Ndang hasonangan na gabe na rumingkot di nasida.

17. Tingki libur karejo, aha do na boi taulahon?

¹⁷ Saonari pe, boi do tatiru Jesus. Tingki libur karejo, unang ma tapangke tingkinta holan laho maradi. Alai dohot ma hita tu ulaon marbarita jala ro tu parpunguan. Mansai ringkot do di hita mambahen sisean jala ro tu parpunguan. Alani i, tongtong ma taulahon i sian nasa tolapta. (Heb. 10:24, 25) Tingki laho pe hita liburan, tongtong ma marpungu jala marsitutu ma marbarita tu manang ise pe na tajumpangi.​—2 Tim. 4:2.

18. Aha do na dihalomohon Jesus asa taulahon?

¹⁸ Tontu mandok mauliate do hita tu Rajanta, Jesus Kristus. Ndang dipangido ibana na so tolap taulahon jala diurupi do hita asa seimbang taringot karejo dohot maradi! (Heb. 4:15) Lomo rohana asa adong tingkinta laho maradi jala asa ringgas hita karejo laho manarihon na tahaporluhon. Asing ni i, lomo rohana asa las rohanta di ulaon mambahen sisean. Di parsiajaran na mangihut, laho taulas ma songon dia Jesus paluahon hita sian parhatobanan na parohon jea.