1-2. Sian pengalaman ni si Angelito, aha do parsiajaran na tadapot?

SITINDANGI NI Jahowa do natua-tuamuna? Molo i do ingot ma, ndang boi hamu gabe ale-ale ni Jahowa nang pe marale-ale nasida tu Jahowa. Sitindangi Ni Jahowa manang na ndang natua-tuanta, ingkon hita sandiri do na patoguhon parale-aleonta tu Jahowa.

² Pingkirhon ma pengalaman ni donganta na margoar si Angelito. Sitindangi Ni Jahowa do sude keluargana. Alai tingki poso dope, dihilala ndang solhot ibana tu Debata. Didok ibana ma, “Husomba pe Jahowa, ala songon i do na diulahon keluargangku.” Alai dilehon ibana ma gumodang tingkina laho manjaha Bibel, mangarimangi, dohot martangiang tu Jahowa. Aha ma hasilna? Didok ibana ma, “Huboto ma, ingkon tangkas do hutanda Jahowa. Holan on do carana asa boi ahu marale-ale tu Ibana.” Sian pengalaman ni si Angelito, adong ma sungkun-sungkun na ringkot: Aha do imbar ni holan mamboto taringot Jahowa dohot tangkas mananda Ibana? Songon dia do carana asa boi tangkas tatanda Jahowa?

3. Aha do imbar ni mamboto taringot Jahowa dohot mananda Ibana?

³ Ra, didok rohanta nunga tangkas tatanda Jahowa ala nunga taboto goarna, aha na dihatahon dohot na diulahon Ibana. Alai ndang sae holan i. Ingkon talehon do tingkinta marsiajar taringot Ibana dohot angka parangena na denggan. Gabe taantusi ma aha na mangonjar roha ni Jahowa sian na dihatahon dohot na diulahon Ibana.  Jala on mangurupi hita laho mamboto aha na dihalomohon Ibana asa tapingkirhon jala taulahon. Molo nunga taboto aha na dihalomohon rohana, taulahon ma i.

4. Songon dia contoh na adong di Bibel boi mangurupi hita?

⁴ Ra, direhei piga-piga halak do hita ala naeng manomba Jahowa. Manang diorai do hita tingki parjolo sahali laho marpungu dohot angka dongan. Alai molo pos rohanta tu Jahowa, ndang tadingkononna hita. On ma na patuduhon naung marale-ale hita tu Jahowa, jala boi do i martahan salelengna. Boi do tangkas tatanda Jahowa? Boi! Taparsiajari ma contoh sian si Musa dohot Raja Daud. Nang pe ndang sempurna, boi do nasida marale-ale tu Debata. Tingki taparsiajari aha na diulahon nasida, taalusi ma dua sungkun-sungkun on: Songon dia nasida boi tangkas mananda Jahowa? Jala aha do na boi taparsiajari sian contoh ni nasida?

5. Aha do na dipillit si Musa?

⁵ Dipillit si Musa do laho manomba Debata. Tingki marumur 40 taon, dipillit si Musa ma asa rap ibana dohot naposo ni Debata i ma halak Israel sian apala gabe “anak ni boru ni si Firaun”. (Heb. 11:24) Ditadingkon si Musa do hasangaponna i. Tingki i, si Firaun do raja na marhuaso di Mesir, jala didok halak Mesir, dos do ibana songon debata. Tingki marpihak tu halak Israel, diboto si Musa do na laho muruk situtu si Firaun tu ibana. Alai pos do roha ni si Musa tu Jahowa. On patuduhon na mansai togu do haporseaon ni si Musa! Alani haporseaonna ma umbahen boi togu parale-aleonna tu Debata saleleng ni ngoluna.​—Poda 3:5.

6. Aha do na boi taparsiajari sian si Musa?

⁶ Aha ma parsiajaranna tu hita? Songon si Musa, sude hita ingkon mambahen keputusan: Tapillit do laho manomba Jahowa jala marsaor dohot angka naposona? Ra ingkon tabahen do pengorbanan laho manomba Jahowa. Manang olo do gabe diorai angka halak na so sisomba Jahowa hita. Alai, molo porsea hita tu Jahowa, ndang tadingkononna hita!

7-8. Aha do na tongtong diparsiajari si Musa?

⁷ Tongtong do diparsiajari si Musa taringot parange ni Jahowa dohot lomo ni rohana. Umpamana, tingki disuru Debata ibana laho manguluhon halak Israel kaluar sian Mesir, ndang pos roha ni si Musa tu dirina. Jala sai didok ibana do tu Jahowa ndang tama ibana mangulahon tugas i. Alai dipatudu Debata do asi ni rohana tu ibana. Diantusi Jahowa do pangkilalaan ni si Musa jala diurupi do ibana. (2 Mus. 4:10-16) Hasilna, gabe boi ma si Musa paboahon barita panguhuman tu si Firaun. Diida si Musa do huaso ni Jahowa tingki dipalua Ibana halak Israel. Dung i, dilonongkon ma si Firaun dohot angka tentarana di Laut Merah.​—2 Mus. 14:26-31; Ps. 136:15.

⁸ Dung diboan si Musa halak Israel kaluar sian Mesir, sai marungut-ungut do nasida. Hape nunga dipalua Jahowa nasida sian parhatobanan. Alai, boi do diida si Musa songon dia Jahowa patuduhon hasabaron. (Ps. 78:40-43) Jala  diida si Musa do muse songon dia Jahowa patuduhon serep ni roha tingki dioloi Debata pangidoanna asa unang diripashon halak Israel.​—2 Mus. 32:9-14.

9. Hombar tu Heber 11:27, aha na patuduhon na togu do parale-aleon ni si Musa tu Jahowa?

⁹ Dung kaluar halak Israel sian Mesir, lam togu do parale-aleon ni si Musa tu Jahowa. Jala didok do, alani solhotna hira na boi do si Musa mangida Debata. (Jaha Heber 11:27.) Dipaboa do di Bibel songon dia solhot ni parale-aleon ni nasida. Didok, “Dung i mangkatai ma Jahowa dohot Musa adop bohi be, songon sada baoa na mangkatai dohot alealena.”​—2 Mus. 33:11.

10. Asa lam tangkas tatanda Jahowa, aha do na ingkon taulahon?

¹⁰ Aha do parsiajaranna tu hita? Asa boi lam tangkas tatanda Jahowa, ndang sae holan mamparsiajari taringot parangena. Alai ingkon taulahon do lomo ni rohana. Lomo ni roha ni Jahowa saonari, i ma “asa malua saluhut jolma jala boi mandapot parbinotoan na bagas taringot tu hasintongan i”. (1 Tim. 2:3, 4) Sada cara asa boi taulahon lomo ni roha ni Debata, i ma mangajarhon taringot Jahowa tu angka halak.

11. Molo jotjot taajarhon taringot Jahowa tu angka halak, boasa i mambahen hita gabe lam solhot tu Ibana?

¹¹ Molo jotjot taajarhon taringot Jahowa tu angka halak, boi do i mambahen hita gabe lam solhot tu Ibana. Umpamana, taida do asi ni roha ni Jahowa tingki ditogu-togu Ibana hita mangalului halak na olo gabe ale-alena. (Joh. 6:44; Ul. 13:48) Taida do huaso ni Debata marhite Bibel na mangurupi parsiajar Bibelta manadingkon hasomalan na roa jala patuduhon pangalaho na imbaru. (Kol. 3:9, 10) Boi do muse taida hasabaron ni Jahowa ala dilehon Ibana tingki tu angka halak di luatta asa marsiajar taringot Ibana jala dipalua.​—Rom 10:13-15.

12. Songon na dipaboa di 2 Musa 33:13, aha do na dipangido si Musa, jala boasa?

¹² Arga do di si Musa parale-aleonna tu Jahowa. Nang pe si Musa nunga dipangke Jahowa mangulahon godang tugas na ringkot, alai tongtong do dipangido si Musa asa diurupi ibana lam mananda Jahowa. (Jaha 2 Musa 33:13.) Tingki i nunga lobi 80 taon umur ni si Musa. Alai diboto ibana do, godang nai dope na ingkon diparsiajari ibana taringot Jahowa.

13. Aha do sada cara laho patuduhon na taargai parale-aleonta tu Jahowa?

¹³ Aha do parsiajaranna tu hita? Manang sadia leleng pe hita manomba Jahowa, ingkon tongtong do taargai parale-aleonta tu Ibana. Sada cara laho patuduhon i, ingkon tongtong do hita martangiang.

14. Boasa tangiang sada cara na ringkot laho mananda Jahowa?

¹⁴ Asa boi lam jonok tu sasahalak, ingkon jotjot do hamu mangkatai tu ibana. Suang songon i ma, asa boi lam solhot tu Jahowa, ingkon jotjot do jala unang mabiar paboahon aha na di bagas roha dohot pingkiranmuna marhite tangiang. (Eps. 6:18) Donganta si Krista na tading di Turki mandok, “Tingki martangiang ahu tu Jahowa laho paboahon sude na di rohangku gabe boi ma huida songon dia Ibana mangurupi ahu, on mambahen lam holong jala lam pos rohangku tu Ibana. Tingki dialusi tangiangku, gabe boi ma huida Jahowa songon Ama dohot Ale-alengku.”

15. Aha do na dipaboa Jahowa taringot si Daud?

¹⁵ Tingki tubu Raja Daud, sisomba Jahowa do natua-tuana dohot halak Israel na asing. Alai, ndang i na mambahen togu parale-aleon ni si Daud tu Debata. Ibana sandiri do na patoguhon parale-aleonna tu Debata. On mambahen lam holong roha ni Jahowa tu ibana. Dipaboa Jahowa do taringot si Daud, didok “las do rohangku mangida ibana”. (Ul. 13:22) Songon dia si Daud boi solhot tu Jahowa?

16. Aha do na diparsiajari si Daud taringot Jahowa sian angka tompaan?

¹⁶ Marsiajar do si Daud taringot Jahowa sian angka tompaan. Tingki poso, gabe parmahan ni biru-biru ni bapakna do si Daud. Tingki di adaran, ra jotjot do dirimangi ibana angka tompaan ni Jahowa. Umpamana tingki borngin, diida si Daud do marribu angka bintang di langit. Alai ndang holan diida ibana. Huhut do dipingkirhon ibana parange ni Debata na manompa i sude. Gabe didok si Daud ma, “Angka langit do mamaritahon hamuliaon ni Debata, jala jadijadian ni tanganna do pinaboa ni na ratarata ni langit.” (Ps. 19:2, 3) Tingki dirimangi si Daud songon dia angka jolma ditompa, diida ibana ma songon dia bisuk ni Jahowa. (Ps. 139:14) Tingki dirimangi si Daud sude tompaan ni Jahowa, gabe diantusi si Daud ma na mansai metmet do ibana marimbangkon Debata.​—Ps. 139:6.

17. Aha na boi taparsiajari tingki mangarimangi angka tompaan?

¹⁷ Aha do parsiajaranna tu hita? Parsiajari ma angka tompaan. Molo dilehon hamu tingki laho mamparrohahon angka tompaan ni Jahowa na mansai uli, boi do on mambahen longang rohamu! Ganup ari, rimangi ma songon dia angka tompaan na adong di humaliangmuna. Umpamana suan-suanan, binatang, dohot jolma, na mangajarhon tu hamu taringot Jahowa. Hasilna, ganup ari lam godang ma parsiajaran na dapotmuna taringot Ibana. (Rom 1:20) Jala boi ma lam bagas holongmuna tu Debata.

18. Songon na dipaboa di Psalmen 18, aha do na diboto si Daud?

¹⁸ Diida si Daud do songon dia Jahowa mangurupi ibana. Umpamana, tingki dijaga si Daud biru-biru ni bapakna sian singa dohot beruang, tangkas do diboto ibana Jahowa do na mangurupi ibana pamatehon binatang buas i. Tingki ditaluhon ibana si Goliat, tangkas do diboto si Daud, Jahowa do na mangurupi Ibana. (1 Sam. 17:37) Tingki malua ibana sian Raja Saul na jahat, diboto si Daud do Jahowa do na paluahon ibana. (Ps. 18:1) Molo ginjang roha ni si Daud, boi do gabe didok rohana alani gogona do ibana boi songon i. Alai serep do roha ni si Daud. Diboto ibana, Jahowa do na sai mangurupi ibana di ngoluna.​—Ps. 138:6.

19. Sian contoh ni si Daud, aha do na boi taparsiajari?

¹⁹ Aha do parsiajaranna tu hita? Ndang sae holan tapangido asa diurupi Jahowa hita. Ingkon taboto do andigan jala songon dia Ibana mangurupi hita. Molo serep rohanta, taantusi do ndang boi sude taulahon molo mangasahon gogonta sandiri. Porlu do hita diurupi Jahowa. Tingki taida songon dia Jahowa mangurupi hita, gabe lam togu ma parale-aleonta tu Ibana. On ma na dihilala  donganta si Isaac na tading di Fiji. Nunga martaon-taon ibana gabe sisomba Jahowa. Didok ibana, “Molo huingot muse angka na masa di ngolungku, huida ma songon dia Jahowa mangurupi ahu sian parjolo sahali ahu marsiajar Bibel sahat tu saonari. Hasilna, lam tangkas ma hutanda Ibana.”

20. Aha do na boi taparsiajari sian parale-aleon ni si Daud tu Debata?

²⁰ Ditiru si Daud do parange ni Jahowa. Ditompa Jahowa do hita asa boi maniru Ibana. (1 Mus. 1:26) Molo jotjot taparsiajari taringot angka parangena, boi do i mangurupi hita maniru Ibana. Tangkas do ditanda si Daud Debata. Alani i, boi do ditiru ibana parangena tingki maradophon angka halak. Pingkirhon ma sada contoh. Mardosa do si Daud tu Jahowa ala mangalangkup tu si Batseba jala mambunu suamina. (2 Sam. 11:1-4, 15) Alai, dipatudu Jahowa do asi ni roha tu si Daud, ala si Daud pe marasi ni roha do tu na asing. Ala togu parale-aleon ni si Daud tu Jahowa, gabe holong hian do roha ni halak Israel tu ibana. Jala dipangke Jahowa do si Daud gabe contoh na denggan tu angka raja ni Israel na asing.​—1 Raj. 15:11; 2 Raj. 14:1-3.

21. Hombar tu Epesus 4:24 dohot 5:1, aha do hasilna molo tatiru Debata?

²¹ Aha ma parsiajaranna tu hita? Ingkon tatiru do Debata. Molo tatiru Ibana, marlaba do i tu hita jala lam godang ma na taparsiajari taringot Ibana. Tingki tatiru angka parangena, on patuduhon molo hita angka anak ni Debata.​—Jaha Epesus 4:24; 5:1.

22-23. Aha do labana molo taulahon aha na taparsiajari taringot Jahowa?

²² Songon naung taulas, nunga diurupi Jahowa hita asa boi mananda Ibana marhite tompaanna dohot Hatana i ma Bibel. Di Bibel, boi do taida angka contoh sian naposo ni Jahowa na setia na boi tatiru, songon si Musa dohot si Daud. Alani i, ingkon taulahon ma sian nasa tolapta laho marsiajar taringot Jahowa.

²³ Tongtong do hita marsiajar taringot Jahowa. (Pjm. 3:11) Ra, godang do na taboto taringot Ibana. Alai na rumingkot, ingkon taulahon do na taparsiajari i. Molo taulahon i jala marsitutu maniru Ibana, pajonokon ni Jahowa ma dirina tu hita. (Jak. 4:8) Marhite Hatana, marjanji do Jahowa ndang tadingkononna angka halak na marsitutu mananda Ibana.