Diboto Hamu do?
Boasa akka bawa na so halak Israel boi gabe tentara ni si Daud?
TIKKI mamaretta Raja Daud, adong do akka bawa na so halak Israel na gabe tentarana. Contohna si Selek halak Ammon, si Uria halak Het, dohot si Itma halak Moab. a (1 Kron. 11:39, 41, 46) Adong muse halak Heret, halak Pleti, dohot halak Gat. (2 Sam. 15:18, surat na di toru) Halak Palistim do halak Gat, jala adong do hubungan ni halak Heret dohot halak Pleti tu halak Palistim.—Hes. 25:16; Jos. 13:2, 3; 1 Sam. 6:17, 18.
Boasa dipillit si Daud akka bawa na so halak Israel gabe tentarana? Alana pos do rohana na setia do nasida tu ibana dohot tu Jahowa. Contohna, dipaboa do di The New Interpreter’s Dictionary of the Bible taringot halak Heret dohot Pleti, “Nang pe godang hasusaan na diadopi si Daud saleleng mamaretta ibana, toktong do nasida setia tu si Daud.” Aha ma buktina? Hea do “sude halak Israel” maninggalhon si Daud ala mangihutton “sahalak bawa na jahat na margoar si Syeba”. Alai toktong do halak Heret dohot halak Pleti setia tu si Daud. Jala diurupi nasida do si Daud manggagalhon rencana ni Syeba lao mambuat tahtana. (2 Sam. 20:1, 2, 7) Hea do muse berupaya si Adonia anak ni si Daud naeng mambuat tahta ni bapakna. Alai setia do halak Heret dohot halak Pleti tu si Daud. Diurupi nasida do si Salomo, ala ibana do na dipillit Jahowa lao gabe raja manggattihon si Daud.—1 Raj. 1:24-27, 38, 39.
Contoh na asing muse, i ma si Ittai. Halak Gat do ibana, alai toktong setia tu si Daud. Hea ma sada tikki naeng dibuat si Absalom do tahta ni si Daud bapakna. Jala berupaya do si Absalom mambuat roha ni halak Israel asa marpihak tu ibana. Alani i ro ma si Ittai dohot 600 tentarana mangurupi Raja Daud. Nungnga dipaboa si Daud tu si Ittai dang pola ikkon marporang ibana lao mangurupi si Daud, alana dang halak Israel ibana. Alai didok si Ittai do, “Songon pastina Jahowa mangolu jala songon pastina raja i mangolu, marsumpa ma au, nang pe ikkon mate au, torus do ihuttonon ni naposomon ho manang na tudia pe ho lao!”—2 Sam. 15:6, 18-21.
Setia do si Ittai tu si Daud, raja na dipillit Jahowa
Nang pe halak Heret, halak Pleti, dohot halak Gat on dang halak Israel, alai diakkui nasida do Jahowa Debata na sittong, jala si Daud do na dipillit Jahowa gabe raja. Pasti diargai si Daud do akka bawa i, ala setia nasida mangurupi ibana.
a Di Patik na disurat di 5 Musa 23:3-6, diorai Jahowa do halak Ammon dohot halak Moab masuk tu punguan ni halak Israel. Olo do ra dang boi nasida mandapot hak na sarupa songon na dihilala halak Israel ala gabe naposo ni Debata. Alai boi do nasida marsaor manang rap tinggal dohot naposo ni Debata molo olo nasida manomba Jahowa. Ida topik “Kawin Campur dengan Orang Israel” di bagian “Ammon, Orang” na adong di bukku Pemahaman Alkitab.
