Tubu ma au di taon 1955. Tolu halak do hami na marhaha maranggi, jala au ma na siappudan. Magodang di jonok ni pantai selatan Finlandia do au. Saonari digoari do kota i Vantaa.

Omakku tardidi gabe Saksi Jahowa piga-piga taon andorang so tubu au. Alai dang lomo roha ni bapak tu hasittongan, jala dang dipaloas omak mangajari hami marsiajar Bibel manang mamboan hami tu parpunguan. Jadi molo dang di jabu bapak, diajari omak do hami marsiajar Bibel.

Mulai sian dakdanak au, barani do au patuduhon haporseaokku tu Jahowa. Contohna, tikki marumur pitu taon, muruk do gurukku tu au ala dang olo au mangallang verilättyjä (kue khas Finlandia na dibahen sian mudar). Ditiop gurukku ma hurumhu asa hubukka babakku, naeng dipamasuk ibana ma kue i tu babakku. Alai pittor hutoppasson do tangan ni gurukki.

Marujung ngolu ma bapakku tikki au marumur 12 taon. Dukkon i, boi ma au ro tu parpunguan. Holong do roha ni akka dongan na di huria tu au. Diurupi nasida do au asa mambahen kemajuan. Mulai ma au taratur manjaha Bibel ganup ari, jala ringgas ma au mamparsiajari akka publikasitta. Ala songon i hubahen, gabe boi ma au tardidi tikki marumur 14 taon, i ma di tanggal 8 Agustus 1969.

Dung tamat sikkola au, mulai ma au merintis biasa. Piga-piga minggu dukkon i, pinda ma au tu  inganan na makkaporluhon parbarita, i ma di Pielavesi jonok ni kota Finlandia.

Di Pielavesi juppang ma au dohot si Sirkka. Lomo do rohakku tu ibana ala serep rohana huida jala holong hian rohana tu Jahowa. Dang hasangapon dohot hamoraon na dilului ibana. Lomo do rohanami na dua mangalehon na dumenggan tu Jahowa jala rade do hami mangulahon tugas aha pe na dilehon tu hami. Menikah ma hami di tanggal 23 Maret 1974. Dung menikah, dang lao hami bulan madu. Alai lao ma hami tu Karttula, alana upporlu do disi akka parbarita dibandingkon di Pielavesi.

Mulai sian na menikah hami, dipatudu Jahowa do na disarihon Ibana hami. Dilehon do kebutuhannami molo dijumolohon hami Harajaonna. (Mat. 6:33) Contohna tikki di Karttula hami, dang adong mobilnami. Mulana i, marsepeda do hami. Alai massai ngali do cuaca disi molo musim salju. Jala bidang do daerah dinas di hurianami. Jadi porlu do di hami mobil. Alai dang adong hepengnami lao manuhor i.

Di na so tarduga, ro ma abangku manjuppangi hami. Dilehon ibana ma mobilna. Jala nungnga digarar ibana asuransi ni mobil i. Holan mangisi miak nama hami. Gabe adong ma kendaraannami.

Sian on gabe pos ma rohanami tu Jahowa. Saonari tugasnami holan manjumolohon Harajaonna do. Asing sian i, Jahowa ma na mangurus sude na dihaporluhon hami.

Tikki dohot hami tu Sikkola Dinas Perintis taon 1978, si Raimo Kuokkanen a ma na gabe sada sian instrukturnami. Dijujui ibana do hami asa mendaftar tu Sikkola Gilead. Jadi mulai ma hami marsiajar bahasa Inggris asa boi memenuhi syarat tu Sikkola i. Alai di taon 1980, sebelum diisi hami formulir tu Sikkola Gilead diundang do hami melayani di kantor cabang di Finlandia. Di tikki i dang boi keluarga Betel mendaftar tu Sikkola Gilead. Alai lomo do rohanami melayani Jahowa manang didia pe ditugasson. Alana Jahowa do na mamboto na dumenggan di hami, dang hami. Jadi dijalo hami ma undangan i. Nang pe songon i, toktong do diparsiajari hami bahasa Inggris, atik boha adong kesempatannami lao mendaftar tu Sikkola Gilead.

 Piga-piga taon dukkon i, didok Punguan na Mangaradoti Organisasi do nungnga boi keluarga Betel mendaftar tu Sikkola Gilead. Pittor diisi hami ma formulirna. Diisi hami pe i, dang alana so las be rohanami melayani di Betel. Gariada lomo do rohanami melayani di inganan na makkaporluhon parbarita. Jadi disetujui ma hami dohot tu Sikkola Gilead kelas 79, jala diwisuda ma hami di bulan September 1985. Ditugasson ma hami tu Kolombia.

Tikki di Kolombia, ditugasson ma hami parjolo sahali tu kantor cabang. Marsitutu do au mangulahon na dumenggan di tugashu. Alai dung sataon di kantor cabang, huhilala porlu do muba tugasnami. Jadi hupangido ma asa pinda tugas hami, i ma na parjolo sahali jala na parpudi au mangido pinda tugas. Dukkon i, ditugasson ma hami gabe misionaris di kota Neiva, di daerah Huila.

Sai las do rohakku marbarita. Tikki merintis biasa au di Finlandia, marbarita do au sian na manogot sahat tu borngin. Songon i do tong dung mangoli au, boi do hami sadari manipat marbarita. Alai molo dao inganannami marbarita, dang mulak be hami tu jabu. Modom di mobil ma hami. Alana molo mulak hami tu jabu, nga suda be tikkinami. Ala dibahen hami songon i, gabe ukkatop ma hami lao marbarita marsogotna i.

Tikki gabe misionaris, sarupa do semangatnami di ulaon marbarita songon tikki parjolo sahali gabe penyiar. Lam maju do hurianami, marsihaholongan, jala marsipasangapan do akka dongan di Kolombia on.

Jonok sian Neiva adong do piga-piga huta na so adong Saksi Jahowa disi. Sai hupikkirhon do songon dia asa boi sahat barita na uli tu daerah i. Alai ala adong porang sipil disi, dang aman molo lao halak sian daerah na asing tusi. Jadi hutangiakkon ma asa adong sasahalak na tinggal disi boi gabe Saksi Jahowa. Ninna rohakku, molo adong sasahalak na naeng marsiajar Bibel, ikkon tinggal ma nian ibana di Neiva. Jala hutangiakkon do muse molo dung tardidi halak i, ikkon jolo mambahen kemajuan do ibana di Neiva. Dung pe i, mulak ma ibana tu hutana asa marbarita. Alai sasittongna Jahowa do mamboto dia na dumenggan sian na hupikkirhon.

Dang leleng dukkon i huurupi ma marsiajar Bibel sahalak bawa, i ma si Fernando González. Tinggal di Algeciras do ibana. I ma sada sian huta na so adong Saksi Jahowa disi. Molo naeng karejo si Fernando, ikkon lao do ibana tu Neiva. Daona lobi 50 kilometer sian jabuna. Denggan do ibana persiapan molo naeng marsiajar Bibel. Jala pittor ro do ibana tu sude acara ni parpunguan. Dung saminggu ibana marsiajar Bibel, dipapungu ibana do halak di hutana jala diajarhon ibana do akka naung diparsiajari ibana tu nasida.

Onom bulan dung marsiajar Bibel si Fernando, tardidi ma ibana di bulan Januari taon 1990. Dukkon i, gabe perintis biasa do ibana. Ala nungnga adong sahalak Saksi Jahowa di Algeciras, ditugasson kantor cabang ma perintis istimewa tu daerah i. Di bulan Februari taon 1992, dibahen ma huria di daerah i.

 Dang holan di hutana si Fernando marbarita. Dung mangoli ibana, pinda ma ibana dohot istrina si Olga tu San Vicente del Caguán, huta na asing na so adong tong Saksi Jahowa disi. Marbarita do nasida disi, jala ujungna gabe terbentuk ma disi sada huria. Di taon 2002, dilantik ma ibana gabe pengawas wilayah sahat tu saonari.

Sian pengalaman on, gabe marsiajar do au massai penting do spesifik manangiakkon tugasta di organisasi. Sanggup do Jahowa mangulahon manang aha pe na so boi taulahon. Alana Ibana do nappuna sisabion i, dang hita.—Mat. 9:38.

Di taon 1990, ditugasson ma au gabe pengawas wilayah. Tugas wilayahnami na parjolo, i ma di Bogotá ibukota ni Kolombia. Didok rohanami, hira dang sanggup hami mangulahon i. Alana halak na biasa do hami, dang adong bakatnami, jala dang biasa hami tinggal di kota besar. Alai sai dipasaut Jahowa do janjina di Pilippi 2:13. Didok di ayat i, “Debata do na mangalehon gogo tu hamu lao mangulahon lomo ni rohana. Dibahen Ibana do hamu rade jala margogo mangulahon i.”

Dukkon i, ditugasson ma hami tu wilayah di kota Medellín, i ma kota na hupaboa di mula ni cerita on. Akka halak na disi nungnga somal mangida kejahatan di dalan, jala dang adong be biar ni nasida. Hea ma tikki marsiajar Bibel au dohot sahalak bawa, hubege hami ma soara penembakan di luar ni jabu. Pittor tiarap ma au. Alai molo parsiajar Bibelhi tenang do ibana. Ditorusson ibana do manjaha bukkuna i. Tikki nungnga sae ibana manjaha, parmisi ma ibana naeng kaluar. Dung piga-piga leleng, mulak ma muse ibana dohot gellengna. Jala didok ibana ma, “Maap ma da, na mangalap gellengku do au nakkin.”

Alai memang hea do tarancam ngolunami. Hea ma tikki naeng marbarita hami sian jabu tu jabu, marlojong ma istrikku mandapotton au. Puccat do huida bohina. Didok ibana, adong sahalak bawa na naeng manembak ibana. Gabe songgot do rohakku. Alai dukkon i gabe disadari hami ma, hape dang si Sirkka na naeng ditembak bawa i, alai bawa na mardalan mangalewati si Sirkka do.

Ujungna gabe dang pola mabiar be hami mangida kejahatan di daerah i. Gabe dipatogu do hami ala mangida habaranion ni akka dongan disi na mangadopi situasi na sarupa, bahkan na upparah sian i. Pos do rohanami, molo diurupi Jahowa akka dongan i, pasti diurupi Jahowa do tong hami. Sai diihutton hami do petunjuk sian akka sintua. Manat do hami jala dipasahat hami ma ngolunami tu Jahowa.

Nang pe berbahaya daerahnami, alai dang sai songon na dibayakkon hami situasina. Misalna tikki lao hami marbarita tu sada jabu, hubege ma soara sian luar. Hira na adong dua borua na marbadai jala gogo hian soarana. Mulana dang olo au mangida aha na masa, alai diajak nappunasa jabu i do au tu teras. Dung kaluar hami, dang adong hape na marbadai. Soara ni dua burung beo do i, na pasuman-sumatton soara ni tetangga ni parjabu i.

Taon 1997 dilantik ma au gabe instruktur Sekolah Pelatihan Pelayanan. b Sai las do rohakku dohot tu sikkola na dibahen organisasi. Alai dang hea tarbayakkon au boi gabe instruktur ni sikkola i.

Dukkon i gabe pengawas distrik ma au. Alai di pudian ni ari dang adong be pengawas distrik. Jadi ditugasson ma au gabe pengawas wilayah muse. Las hian do rohakku gabe instruktur dohot pengawas wilayah lobi sian 30 taon. Godang do dapottu pasu-pasu di tugas on. Alai dang sai mura mangulahon i. Saonari hupatorang ma jo aha alasanna.

Halak na barani do au jala terus terang. Ala songon i kepribadianku, gabe boi do huadopi situasi na maol. Alai sipata pasemangattu do au lao padenggatton masalah di huria. Hea ma sada tikki, pasemangattu au mangalehon saran tu akka dongan asa patuduhon holong jala masuk akkal tu na asing. Hape sasittongna di tikki i dang hupatudu sifat i.—Rom 7:​21-23.

Alani hahurangakki, olo do sipata gabe metmet rohakku. (Rom 7:24) Sada tikki, hea ma au martangiang tu Jahowa asa unang gabe misionaris be au jala mulak tu Finlandia. Di botarina i, ro ma au tu parpunguan. Di parpunguan i dipatogu do au jala dipapos ma rohakku asa toktong mangulahon tugashi jala dang menyerah. Molo huingot i muse, dialusi Jahowa do tangiakki. Jala mandok mauliate do au tu Jahowa, ala diurupi Ibana do au mangadopi hahurangakki.

Mandok mauliate do au dohot si Sirkka tu Jahowa, ala boi dilehon hami ngolunami lao melayani sepenuh waktu. Mandok mauliate do tong au tu Jahowa ala dilehon ibana istri na burju jala na setia saleleng on.

Satokkin nai marumur 70 taon nama au, dang gabe instruktur sikkola dohot pengawas wilayah be au. Alai dang gabe lungun rohakku, alana nga huboto songon dia carana pasangappon Jahowa. Ikkon serep do rohatta manomba Ibana, jala tapuji Ibana sian nasa rohatta. (Mik. 6:8; Mrk. 12:​32-34) Asa boi tapasangap Jahowa, dang ikkon adong tugas na penting tadapot di organisasi.

Molo huingot-ingot muse tugas na hudalatton saleleng on, sadar do au dang ala na undenggan au sian na asing umbahen na dapottu tugas i, manang ala adong bakattu. Gariada boi pe dapottu akka tugashi, alani asi ni roha ni Jahowa na massai balga do tu au. Dilehon Jahowa do tugas istimewa i nang pe adong hahurangakku. Huboto do, boi pe huulahon i, holan alani bantuan ni Jahowa do. Takkas ma lam balga do huaso ni Debata alani hagaleokki.—2 Kor. 12:9.