1. Aha do na dipangido Jahowa sian hita?

 LAS DO roha ni suami istri molo tubu ianakkon ni nasida. Alai umlas do roha ni nasida molo lam magodang ianakkonna i. Gariada, mabiar do nasida molo dang marna balga ianakkonna i. Dos songon i ma Jahowa, las do rohana tikki parjolo sahali taputusson lao mangihutton Jesus. Alai dang lomo rohana molo dang tabahen kemajuan. (1 Kor. 3:1) Alana dipangido Debata do asa “songon pikkiran ni halak na magodang” pikkiranta, dang songon pikkiran ni dakdanak.—1 Kor. 14:20.

2. Aha do na lao tabahas di artikel on?

² Di artikel on lao tabahas ma: Songon dia do halak Kristen na toras i? Aha do na ikkon taulahon asa gabe halak Kristen na toras? Aha do manfaatna molo taparsiajari akka hasittongan na bagas sian Bibel? Jala boasa dang boi papossu hita tu diritta sandiri?

SONGON DIA DO HALAK KRISTEN NA TORAS I?

3. Aha do maksudna gabe halak Kristen na toras? Bahen ma contoh.

³ Di Bibel, bahasa Junani ni hata togu haporseaonna boi do tong didok “toras”. (Eps. 4:​13, surat na di toru.) Sada poso-poso torus do bertumbuh gabe halak na magodang. Dos songon i ma hita, ikkon torus do tapatogu haporseaotta tu Jahowa asa gabe halak Kristen na toras. Jala nang pe nga toras hita, ikkon toktong do tapatogu haporseaotta. (1 Tim. 4:15) Dang soal poso dope hita manang naung matua, boi do hita gabe halak Kristen na toras. Alai songon dia do hita mamboto nungnga gabe halak Kristen na toras hita manang na dang?

4. Songon dia do halak Kristen na toras i?

⁴ Halak Kristen na toras, i ma halak na rade mangulahon sude paretta ni Debata, dang holan na dihalomohon rohana. Memang olo dope ibana mambahen kesalahan ala dang sempurna. Alai marsitutu do ibana mangulahon lomo ni roha ni  Debata. Nungnga dipakke ibana pangalaho na imbaru jala marsitutu do ibana asa boi maniru cara marpikkir ni Debata. (Eps. 4:​22-24) Nungnga tarlatik ibana mambahen keputusan na marbisuk mangihutton patik dohot prinsip ni Jahowa. Jadi dang porlu di ibana daftar aturan na ikkon diulahon ibana. Jala dung dibahen ibana keputusan, marsitutu do ibana mangulahon keputusanna i.—1 Kor. 9:​26, 27.

5. Songon dia do halak Kristen na so toras i? (Epesus 4:​14, 15)

⁵ Alai halak Kristen na so toras mura do ‘dioto-otoi’. Pittor porsea do ibana tu akka barita, gosip, dohot cerita na so sittong sian media manang sian halak na murtad. a (Jaha Epesus 4:​14, 15.) Lomo do rohana marsoal dohot halak na asing, mura do haccit rohana, cemburu, jala targoda mangulahon na sala.—1 Kor. 3:3.

6. Songon dia do sasahalak boi gabe halak Kristen na toras? Bahen ma tudosan. (Ida gambar.)

⁶ Songon naung tabahas nakkin, dipatudos Bibel do songon dia sasahalak gabe halak Kristen na toras tu pertumbuhan ni sahalak dakdanak. Molo dakdanak otik dope pengalamanna. Alani i, porlu dope ibana dijaga jala ditogu-togu halak naung magodang. Contohna, adong ma sahalak ina mandok tu boruna asa ditiop tanganna tikki naeng menyeberang nasida. Alai molo dung magodang boruna i, nungnga dipaloas omakna ibana menyeberang sahalakna. Nang pe songon i, toktong dope omakna i paingotton boruna i asa diparrohahon ibana dalanna tikki naeng menyeberang. Jadi dung magodang boruna i, dang porlu be ibana ditogu-togu. Alana, nungnga diboto ibana aha na boi parohon bahaya tu dirina. Dos songon dakdanak na porlu dope diurupi halak na magodang, songon i ma halak Kristen na so toras dope. Porlu dope ibana diurupi halak Kristen na toras asa unang mandao sian Jahowa jala boi mambahen keputusan na marbisuk. Alai imbar do halak Kristen na toras. Tikki naeng mambahen keputusan, manat do dipikkirhon ibana prinsip ni Bibel asa boi maniru pikkiran ni Jahowa. Dung i, diulahon ibana ma keputusanna i.

7. Porlu dope halak Kristen na toras diurupi halak na asing?

 ⁷ Alai molo nungnga gabe halak Kristen na toras pe sasahalak, na gabe so porlu do ibana diurupi halak na asing? Daong. Sipata porlu do ibana mangido bantuan tu na asing. Molo halak Kristen na so toras, dipangido ibana do halak na asing asa mambahen keputusan tu dirina sandiri. Alai asing do molo halak Kristen na toras. Memang tikki naeng mambahen keputusan, disukkun ibana do pandapot ni halak na umbisuk sian ibana jala na godang pengalamanna. Alai diboto ibana do, ikkon ibana sandiri na mambahen keputusan, jala martanggung jawab ‘tu na diulahonna i’.—Gal. 6:5.

8. Sai sarupa do sifat ni halak Kristen na toras? Patorang ma.

⁸ Dang sai sarupa penampilan fisik ni halak na magodang. Suang songon i ma, dang sai sarupa sifat ni halak Kristen na toras. Adong do na marbisuk, hape na asing barani. Adong na lomo rohana mangalehon na adong di ibana, hape na asing mura patuduhon roha sapakkilalaan. Jadi keputusan ni nasida pe olo do dang sai sarupa, tarlumobi tikki mambahen keputusan na berkaitan tu panggora ni roha ni nasida. Alai nang pe songon i, sadalan dope keputusan ni nasida i tu prinsip ni Bibel. Jala dang diuhumi nasida halak na asing molo dang sarupa keputusan ni nasida. Gariada toktong do nasida marsada.—Rom 14:10; 1 Kor. 1:10.

AHA DO NA IKKON TAULAHON ASA GABE HALAK KRISTEN NA TORAS?

9. Boi do otomatis gabe halak Kristen na toras hita? Patorang ma.

⁹ Molo dakdanak lam leleng lam balga do dagingna. Alai asing do molo naeng gabe halak Kristen na toras. Dang otomatis sasahalak boi gabe halak Kristen na toras. Contohna halak Kristen na di Korint. Dijalo nasida do barita na uli, dukkon i tardidi. Dijalo nasida do tondi parbadia, jala mandapot godang manfaat sian na diajarhon si Paulus. (Ul. 18:​8-11) Alai nang pe nungnga martaon-taon nasida tardidi, godang dope na so toras. (1 Kor. 3:2) Alani i, boha do carana asa unang songon nasida hita?

10. Aha do na ikkon taulahon asa boi gabe halak Kristen na toras? (Judas 20)

¹⁰ Parjolo sahali, ikkon adong do keinginanta gabe halak Kristen na toras. Alai adong do halak na lomo rohana torus gabe halak na so marpengalaman. Dang olo ibana mambahen kemajuan. Akibatna dang boi gabe halak na matoras ibana. (Poda 1:22) Tottu dang olo hita gabe halak sisongon i. Jala dang olo hita songon halak na torus bergantung tu natua-tuana tikki mambahen keputusan, hape nga magodang ibana. Gariada lomo do rohatta asa hita na martanggung jawab tu hubunganta tu Jahowa. (Jaha Judas 20.) Molo marsitutu hita asa boi gabe halak Kristen na toras, martangiang ma tu Jahowa. Pasti ‘lehononna do gogo tu hita lao mangulahon lomo ni rohana’.—Plp. 2:13.

11. Akka aha do na diparade Jahowa lao mangurupi hita gabe halak Kristen na toras? (Epesus 4:​11-13)

¹¹ Diurupi Jahowa do hita asa boi gabe halak Kristen na toras, dang dipasombu Ibana hita mangulahon i sahalakta. Diparade Ibana do akka sintua na gabe parmahan dohot guru di huria. Diurupi akka sintua do hita asa boi gabe halak Kristen na toras. “Dung i gabe togu ma hita songon Kristus i.” (Jaha Epesus 4:​11-13.) Diparade Ibana do tong tondi parbadiana na boi mangurupi hita asa maniru “pikkiran ni Kristus”. (1 Kor. 2:​14-16) Asing ni i, dilehon Jahowa do opat Injil tu hita na paboahon songon dia cara marpikkir ni Jesus, aha na didok ibana, dohot aha na diulahon ibana saleleng di tano on. Molo tatiru cara marpikkir ni Jesus  dohot aha na diulahon ibana, gabe halak Kristen na toras ma hita.

MANFAAT NI MAMPARSIAJARI HASITTONGAN NA BAGAS SIAN BIBEL

12. Akka aha do “ajaran na parjolo taringot tu Kristus”?

¹² Tikki mambahen kemajuan hita, ikkon taparsiajari do “ajaran na parjolo taringot tu Kristus”. Contohna taringot haporseaon, pertobatan, pandidion, dohot haheheon. (Heb. 6:​1, 2) Alana ajaran dasar do i. I ma na gabe fondasi haporseaon ni halak Kristen. Ajaran dasar on do na dipaboa si Petrus tu akka halak tikki ari Pentakosta. (Ul. 2:​32-35, 38) Jala dipaingot si Paulus do akka halak, dang boi nasida gabe halak Kristen molo dang porsea nasida tu haheheon. Takkas ma, ikkon jolo porsea do hita tu ajaran dasar asa boi gabe sisean ni Kristus. (1 Kor. 15:​12-14) Alai unang ma tadok di rohatta nga cukkup be holan mamparsiajari ajaran dasar i.

13. Aha do na ikkon taulahon asa boi tahilala manfaat na didok di Heber 5:14? (Ida gambar.)

¹³ Imbar do ajaran dasar sian ajaran na ikkon bagas taparsiajari sian Bibel. Alana dang holan paretta ni Jahowa na dipaboa disi. Alai adong do dipaboa taringot prinsip ni Bibel na boi mangurupi hita asa mangattusi cara marpikkir ni Jahowa. Asa boi tahilala manfaat sian paretta dohot prinsip ni Bibel, ikkon belajar pribadi do hita, mangarimangi, jala mangulahon i. Molo taulahon i, gabe tarlatik ma hita mambahen keputusan na boi palasson roha ni Jahowa. b—Jaha Heber 5:14.

14. Songon dia do si Paulus mangurupi halak Korint asa boi gabe halak Kristen na toras?

¹⁴ Halak Kristen na so toras dope, maol do mambahen keputusan molo dang adong dipaboa di Bibel aha na ikkon diulahon. Molo dang adong dipaboa paretta na spesifik di Bibel, olo do didok roha ni nasida bebas nasida mangulahon lomo ni roha ni nasida. Na deba mangido halak na asing asa mambahen keputusan tu ibana. Contohna, hea do halak Korint manukkun tu si Paulus boi do nasida mangallang siallangon naung dipelehon tu patung manang na dang. Dang didok si Paulus aha na ikkon diulahon nasida, ala diboto  ibana ‘marhak do nasida mamillit’ mangihutton panggora ni roha ni nasida. Alai dipaboa ibana do prinsip ni Bibel na boi mangurupi nasida mambahen keputusan na so maralo tu panggora ni roha ni nasida, jala dang mambahen tartuktuk halak na asing. (1 Kor. 8:​4, 7-9) Diajari si Paulus do nasida asa dang bergantung tu halak na asing manang holan bergantung tu paretta na spesifik di Bibel. Alai boi do nasida mambahen keputusan sandiri. On ma cara ni si Paulus mangurupi nasida gabe halak Kristen na toras.

15. Songon dia do si Paulus mangurupi halak Kristen Heber asa mambahen kemajuan?

¹⁵ Adong do muse na boi taparsiajari sian surat ni si Paulus tu halak Kristen Heber. Adong do piga-piga sian nasida na sengaja dang patoguhon parale-aleonna tu Jahowa. Bibel mandok, ‘manginum susu muse nasida, jala dang olo mangallang sipanganon na karas’. (Heb. 5:12) Dang olo nasida mamparsiajari jala manjalo pemahaman na baru na dilehon Jahowa tu nasida marhite huria. (Poda 4:18) Contohna, godang dope halak Kristen Jahudi na toktong mangihutton Patik ni si Musa. Hape 30 taon sebelumna nungnga dipelehon Jesus dirina. Mulai sian i, dang marlakku be Patik ni si Musa. (Rom 10:4; Tit. 1:10) Sasittongna nungnga cukkup be saleleng 30 taon i dilehon Jahowa tikki tu nasida lao mangattusi na so marlakku be Patik ni si Musa. Marsitutu do si Paulus mangurupi nasida asa boi manjalo penyesuaian on. Marhite suratna, dipaboa si Paulus do nungnga dibahen Jahowa pengaturan na baru lao manomba Ibana, i ma marhite Jesus Kristus. Diurupi si Paulus do nasida asa mangida dumenggan do pengaturan on sian Patik ni si Musa. Jala diurupi do nasida asa boi barani marbarita nang pe adong paraloan sian halak Jahudi.—Heb. 10:​19-23.

UNANG MA PAPOSSU HITA TU DIRITTA SANDIRI

16. Asa boi toktong hita mambahen kemajuan, aha do na ikkon taulahon?

¹⁶ Nang pe nungnga gabe halak Kristen na toras hita, ikkon berupaya do hita toktong mambahen kemajuan. Unang ma papossu hita tu diritta sandiri. (1 Kor. 10:12) Gariada, ikkon torus do ‘tauji’ diritta asa taboto nungnga mambahen kemajuan do hita manang na dang.—2 Kor. 13:5.

17. Aha do na dipaboa si Paulus di suratna tu halak Kolosse?

 ¹⁷ Di surat ni si Paulus tu halak Kristen na di Kolosse, dipaboa si Paulus do na massai penting do asa toktong gabe halak Kristen na toras. Sian dia taboto? Nang pe nungnga toras nasida, dipaingot si Paulus do nasida asa unang mangihutton cara marpikkir ni akka halak di portibi on. (Kol. 2:​6-10) Dipaboa si Paulus do muse taringot si Epapras naung takkas mananda akka halak na di huria i. Ditangiakkon si Epapras do nasida ‘asa hot jongjong’ manang toras. (Kol. 4:12) Aha ma na boi taparsiajari sian on? Diattusi si Paulus dohot si Epapras do asa toktong gabe halak Kristen na toras, ikkon adong do upaya sian hita jala ikkon diurupi Debata. Lomo do roha ni nasida na dua asa toktong toras halak Kristen na di Kolosse, nang pe mangadopi paraloan.

18. Aha do na boi masa tu halak Kristen na toras? (Ida gambar.)

¹⁸ Dipaingot si Paulus do halak Heber, nang pe nungnga toras nasida alai molo dang manat, boi do gabe dang las be roha ni Jahowa tu nasida. Alana molo dang olo nasida mangoloi Jahowa jala bertobat, lam leleng gabe mandao ma nasida sian Jahowa jala dang boi mandapot asi ni rohana. Alai tuani ma dang songon i halak Heber. (Heb. 6:​4-9) Alai songon dia do akka halak na so aktif manang na dipecat di jamanta saonari? Molo serep roha ni nasida jala olo muba, gabe dang songon akka halak na dipaboa si Paulus i nasida. Memang, porlu do nasida bantuan ni Jahowa asa boi muse mulak tu Ibana. (Hes. 34:​15, 16) Alani i, dibahen akka sintua do pengaturan asa adong sahalak Saksi na toras lao mangurupi nasida asa boi muse marale-ale tu Jahowa.

19. Aha do na lao gabe tekadta?

¹⁹ Pos ma rohamuna, pasti boi do hamu gabe halak Kristen na toras. Alani i toktong ma parsiajari hamu hasittongan na bagas sian Bibel jala marsitutu ma asa lam maniru cara marpikkir ni Jahowa. Jala molo nungnga toras hamu, partahatton ma i!