1. Songon dia do Jahowa mangarahon akka naposona di abad na parjolo?

 TIKKI dilehon Jahowa tugas tu naposona, lomo do rohana asa denggan jala taratur nasida mandalatton i. (1 Kor. 14:33) Misalna, lomo do roha ni Jahowa asa dibaritahon barita na uli di liat portibi on. (Mat. 24:14) Alani i, disuru Jahowa do Jesus lao mangarahon ulaon i. Denggan do Jesus mandalatton tugasna on. Misalna di abad na parjolo, dibahen ma sada punguan ni akka bawa, i ma akka apostel dohot akka sintua di Jerusalem. Nasida ma na mambahen keputusan tu akka huria na adong di godang inganan. (Ul. 14:23) Dung i, dipasahat akka sintua na di huria ma keputusan i tu akka dongan. (Ul. 15:2; 16:4) Ala rade akka dongan mangihutton petunjuk na dilean tu nasida, “gabe lam togu ma haporseaon ni akka huria i jala lam tamba ma godang ni nasida ganup ari”.—Ul. 16:5.

2. Mulai taon 1919, songon dia do Jahowa mangarahon dohot paradehon kebutuhan ni akka naposona?

² Sahat tu saonari, torus dope diarahon Jahowa akka naposona. Mulai taon 1919, dibahen Jesus do sada punguan ni akka bawa na miniahan lao mangarahon ulaon marbarita dohot mangalehon sipanganon na patoguhon parale-aleotta tu Jahowa. a (Luk. 12:42) Takkas ma, dipasu-pasu Jahowa do ulaon ni nasida.—Jes. 60:22; 65:​13, 14.

3-4. (a) Aha do akibatna molo dang denggan hita diorganisasi? Paboa ma contohna. (b) Aha do na lao tabahas di artikel on?

³ Molo dang adong na mangarahon hita, dang boi marhasil hita mangulahon tugas na dilehon Jesus. (Mat. 28:​19, 20) Misalna, bayakkon ma molo dang adong na mangatur daerah ni  huriatta marbarita, boi do gabe sursar ala sude parbarita holan makkarejohon daerah na dihalomohon rohana. Jala olo do gabe mulak-ulak sada daerah takarejohon, hape daerah na asing dang takarejohon dope. Jadi molo dirimangi hamu, adong do muse pengaruhna molo diorganisasi hita?

⁴ Tikki di tano on Jesus, diorganisasi ibana do akka siseanna. Jala songon i do tong sahat tu saonari. Di artikel on, lao tabahas ma pola na dibahen Jesus, jala songon dia organisasitta maniru ibana. Dung i, tabahas ma muse songon dia hita patuduhon pangargaionta tu organisasi ni Jahowa.

SONGON DIA ORGANISASITTA MANIRU TELADAN NI JESUS

5. Songon dia do organisasitta maniru teladan ni Jesus? (Johannes 8:28)

⁵ Akka na diajarhon Bapakna do na diulahon dohot na dihatahon Jesus. Songon i do na diulahon organisasi ni Jahowa. Hata ni Debata do na dipakke lao manogu-nogu hita jala mangurupi hita mamboto dia na sittong dohot na sala. (Jaha Johannes 8:28; 2 Tim. 3:​16, 17) Alani i, jotjot do hita dipaingot asa manjaha jala mangulahon Hata ni Debata. Aha do manfaatna ala taihutton nasehat on?

6. Songon dia do asa godang dapotta manfaat tikki marsiajar Bibel?

⁶ Godang do manfaat na tadapot molo tapakke akka publikasi tikki marsiajar Bibel. Misalna gabe boi ma taida kaitan ni ajaran ni Bibel tu akka petunjuk na tadapot sian organisasi. Tikki taida na berdasarhon Bibel do akka petunjuk i, gabe lam balga ma pos ni rohatta tu organisasi ni Jahowa.—Rom 12:2.

7. Aha do na dibaritahon Jesus, jala songon dia do organisasitta maniru ibana?

⁷ Jesus mambaritahon “barita na uli taringot tu Harajaon ni Debata”. (Luk. 4:​43, 44) Diparettahon Jesus do akka siseanna asa mambaritahon taringot tu Harajaon ni Debata. (Luk. 9:​1, 2; 10:​8, 9) Jadi sude na bergabung tu organisasi ni Jahowa dohot do marbarita na uli, dang soal didia nasida tinggal, manang sadia godang tugas ni nasida di organisasi.

8. Aha do tugas na penting na dilehon Jahowa tu hita?

⁸ Sada hasangapon do di hita boi mambaritahon Harajaon ni Debata. Alana dang tu sude halak dilean tugas on. Misalna tikki di tano on Jesus, dang diloas ibana suru-suruan na jahat paboahon taringot ibana. (Luk. 4:41) Saonari pe, asa boi sasahalak marbarita na uli dohot Saksi Jahowa, ikkon jolo diihutton ibana do standar ni Jahowa di ngoluna. Molo rade hita marbarita manang didia pe jala tikki sadihari pe, on patuduhon na taargai do tugasta marbarita na uli. Songon Jesus, marsitutu ma hita marbarita jala mangajarhon hasittongan tu akka halak.—Mat. 13:​3, 23; 1 Kor. 3:6.

9. Songon dia do organisasi ni Jahowa paboahon goar ni Debata?

⁹ Dibahen Jesus do asa diboto akka halak goar ni Debata. Tikki martangiang Jesus tu Bapakna, didok ibana do, “Nungnga hupaboa goarmu tu nasida.” (Joh. 17:26) Ditiru organisasi ni Jahowa do Jesus, berupaya do nasida mangurupi godang halak asa mamboto goar ni Debata. Sada cara ni organisasi mangulahon i, marhite Bibel Hata ni Debata tu Akka Jolma na Naeng Mangolu di Tano na Imbaru. Disi dipaulak do goar ni Debata di akka ayat na adong goar i songon na tarsurat di Bibel bahasa aslina. Jala Bibel terjemahan on nungnga adong be saonari sebagian manang lengkap, lobi sian 270 bahasa. Molo diida hamu Lampiran A4 dohot A5 di Bibel i, adong do dipaboa hatorangan  taringot songon dia goar ni Debata i dipaulak tu Bibel i. Jala molo diida hamu Lampiran C di Alkitab Edisi Pelajaran, boi ma annon diida hamu adong 237 hali goar ni Debata na dipaulak di Akka Bukku Junani Kristen.

10. Aha do na boi taparsiajari sian na didok sahalak borua di Myanmar?

¹⁰ Songon Jesus, lomo do rohatta mangurupi godang halak asa boi mamboto goar ni Debata. Taida ma na didok sahalak borua di Myanmar na marumur 67 taon. Dung diboto ibana adong do goar ni Debata, gabe tangis ma ibana. Didok ibana do, “On ma parjolo sahali huboto, Jahowa do goar ni Debata. . . . Massai penting do na diajarhonmuna on tu au.” Sian pengalaman on taboto ma, boi do muba ngolu ni sasahalak dung diboto ibana goar ni Debata.

TOKTONG MA PATUDU PANGARGAIONMUNA TU ORGANISASITTA

11. Songon dia do akka sintua patuduhon pangargaion ni nasida tu organisasi ni Debata? (Ida gambar.)

¹¹ Songon dia do akka sintua patuduhon pangargaion ni nasida tu organisasi ni Debata? Tikki dilehon petunjuk tu akka sintua, porlu do manat dijaha nasida akka petunjuk i jala marsitutu mangulahon i. Misalna, dilehon do tu nasida petunjuk dang holan songon dia mamboatton bagian ni nasida di parpunguan, dohot songon dia carana martangiang di parpunguan. Alai dipaboa do tong tu nasida songon dia carana mamparmahani biru-biru ni Kristus. Molo diulahon akka sintua petunjuk ni organisasi i, gabe boi ma dirasahon akka dongan na parduli jala na dihaholongi Jahowa do nasida.

12. (a) Boasa ikkon taoloi akka sintua? (Heber 13:​7, 17) (b) Aha do akibatna molo hahurangan ni akka sintua na sai taida?

¹² Molo tadapot petunjuk sian akka sintua, rade ma hita mangihutton i. Alana molo taulahon i, gabe lam mura ma akka sintua mangulahon tugas ni nasida. Di Bibel, dijujui do hita asa unduk jala mangoloi akka dongan na manguluhon hita di huria. (Jaha Heber 13:​7, 17.) Sipata dang mura mangulahon on. Alana, dang sempurna akka sintua. Alai molo hahurangan ni nasida na sai taida, gabe las ma roha ni akka musutta. Boasa tadok songon i? Alana, lomo do roha ni akka musutta asa ragu hita tu organisasi ni Jahowa. Jadi molo holan hahurangan ni akka sintua na sai taida, ujungna gabe dang pos be rohatta tu organisasi ni Jahowa. Attong songon dia do mamboto jala menolak cara marpikkir ni akka musu i?

UNANG MA LOAS MUSUTTA MAMBAHEN RAGU HAMU TU ORGANISASITTA

13. Aha do na diulahon musu ni Debata lao paroa-roahon organisasi ni Jahowa?

¹³ Godang do akka na denggan na diajarhon organisasi ni Jahowa. Alai, berupaya do akka musu mambahen hita asa marpikkiran negatif tu organisasi ni Jahowa. Misalna, diajari Jahowa do hita asa tajaga dagingta toktong ias, asa denggan pangalahotta, jala asa tasomba Ibana sesuai tu lomo ni rohana. Didok Jahowa do muse molo halak na mangulahon dosa jala dang olo bertobat, ikkon dipakaluar do ibana sian huria. (1 Kor. 5:​11-13; 6:​9, 10) Rade do hita mangoloi paretta ni Jahowa i. Alai ala taulahon i, gabe didok nasida do hita halak na so parholong jala pakakuhu.

14. Ise do na mambahen barita na so sittong taringot organisasi ni Jahowa?

¹⁴ Ingot ma ise do sasittongna musutta. Sibolis do na mambahen barita na so sittong taringot organisasi ni Jahowa. Didok di Bibel, ibana ma “ama ni gabus”. (Joh. 8:44; 1 Mus. 3:​1-5) Jadi dang heran hita, Sibolis do na mempengaruhi akka halak asa mandok akka cerita na so sittong taringot organisasi ni  Jahowa. Jala hea do on masa di abad na parjolo.

15. Aha do na dibahen akka pamimpin agama tu Jesus dohot tu akka siseanna?

¹⁵ Anak ni Debata do Jesus. Sempurna do ibana, jala godang do mukjizat na dibahen ibana. Alai dipengaruhi Sibolis do akka halak asa paboahon gabus taringot ibana. Contohna, didok akka pamimpin agama ‘huaso ni pamimpin ni suru-suruan na jahat do dipakke Jesus lao palaohon suru-suruan na jahat’. (Mrk. 3:22) Tikki diadili Jesus, didok akka pamimpin agama do muse, na mangaleai Debata do ibana. Jala dihasut nasida do akka halak asa dipamate Jesus. (Mat. 27:20) Di pudian ni ari, ‘dipamohop-mohop akka musu’ do roha ni akka halak asa dianiaya nasida halak Kristen na paboahon barita na uli. (Ul. 14:​2, 19) Hea do dipatorang di Menara Pengawal 1 Desember 1998 taringot Ulaon ni Apostel 14:2. Didok disi, “Dang puas akka musu holan menolak barita na uli. Alai berupaya do nasida menghasut akka halak asa marsogo ni roha tu halak Kristen i dohot tu barita na uli.”

16. Aha do na ikkon taingot molo tabege akka barita na so sittong taringot organisasitta?

¹⁶ Sian abad na parjolo sahat tu saonari, dang marna so Sibolis mambahen akka barita na so sittong. Didok di Bibel, “Ibana do na mangaliluhon sude portibi on.” (Pgk. 12:9) Molo tabege akka barita na so sittong taringot organisasitta manang taringot akka donganta na manguluhon, taingot ma nungnga hea dibahen songon i tu Jesus dohot tu halak Kristen na di abad na parjolo. Nungnga didok Jesus hian, na lao dibahen na haccit jala diparoa-roa do naposo ni Debata. I do alana dang heran hita molo masa i saonari. (Mat. 5:​11, 12) Jadi gabe dang tartipu be hita tu barita na so sittong molo nga taboto ise  na mambahen i. Jala pittor tajaga do diritta sian i. Alani i, aha ma na porlu taulahon asa boi tajaga diritta?

17. Aha do na ikkon taulahon molo tabege barita na so sittong? (2 Timoteus 1:13) (Ida kotak “ Na Ikkon Taulahon Tikki Mambege Barita na So Sittong”.)

¹⁷ Unang ma tangihon akka barita na so sittong. Takkas do dipaboa Apostel Paulus aha na ikkon taulahon molo tabege barita na so sittong. Didok ibana do tu si Timoteus, asa ‘pasingotton akka halak na mangajarhon ajaran na sala’. Jala asa unang ‘ditangihon si Timoteus akka cerita na so tutu’. (1 Tim. 1:​3, 4; 4:7) Pikkirhon ma jo contoh on, olo do diallang dakdanak sipanganon na madabu tu lante. Alai molo halak na magodang dang olo mangallang i, alana nga kotor i. Diboto ibana do molo diallang ibana i, gabe haccit ma annon butuhana. Songon i ma nang hita. Dang olo hita porsea tu akka barita na so sittong. Ala nungnga taboto ise do na mambahen barita i. Gariada holan “ajaran na sittong” do na taihutton.—Jaha 2 Timoteus 1:13.

18. Songon dia caratta patuduhon na taargai do organisasi ni Jahowa?

¹⁸ Di artikel on, nungnga tabahas tolu cara ni organisasitta maniru Jesus. Tikki pelajaran pribadi hamu, coba ma lului akka cara na asing na dipakke organisasitta lao mangihutton teladan ni Jesus. Urupi ma akka dongan di huria asa lam balga pangargaion ni nasida tu organisasitta. Toktong ma patudu pangargaionmuna marhite setia melayani Jahowa jala toktong jonok tu organisasi na dipakke Ibana lao pasautton lomo ni rohana. (Ps. 37:28) Sai anggiat ma taargai torus hasangaponta gabe naposo ni Jahowa na setia jala na marsihaholongan.