1. Aha do paradeiso rohani i? Jala aha do tekadta?

 ADONG do paradeiso di portibitta saonari na diingani akka halak na mangulahon na denggan. Adong do marjuta halak di luat i na makkilala hadameon. Bertekad do nasida dang olo kaluar sian luat i. Jala lomo do roha ni nasida asa lam godang halak rap dohot nasida tu luat i. Luat aha ma i? I ma paradeiso rohani. a

2. Boasa luar biasa paradeiso rohani i?

² Dibahen Jahowa do sada luat tu akka naposona. Luar biasa do luat on. Alana di luat i boi do nasida makkilala dame ni roha jala marsada nang pe mangolu di portibi na dirajai Sibolis, na jahat jala berbahaya. (1 Joh. 5:19; Pgk. 12:12) Diida Jahowa do gabe susa akka jolma dibahen portibi on. Alani i, diurupi Ibana do akka naposona asa toktong aman jala marlas ni roha manomba Ibana. Di Bibel dipatudos do paradeiso rohani on songon “inganan marlinggom” jala “songon porlak na toktong maraek”. (Jes. 4:6; 58:11) Alani bantuan ni Jahowa, akka halak na di paradeiso rohani on boi toktong marlas ni roha jala aman di ari parpudi on.—Jes. 54:14; 2 Tim. 3:1.

3. Nandigan do parjolo sahali saut surirang na dipaboa di Jesaya bindu 65?

³ Dipaboa Jahowa do tu Panurirang Jesaya songon dia ngolu ni akka halak na tinggal di paradeiso rohani i. Boi do i taboto di Jesaya bindu 65. Di taon 537 SM do parjolo sahali saut surirang i. Di tikki i, dipalua do halak Jahudi sian Babel jala mulak tu Jerusalem. Dipasu-pasu Jahowa do nasida jala diurupi do nasida padenggatton Jerusalem dohot bagas joro disi,  na gabe inganan ni nasida manomba Jahowa.—Jes. 51:11; Sak. 8:3.

4. Songon dia do surirang di Jesaya bindu 65 saut di tikkitta saonari?

⁴ Saut do muse surirang ni si Jesaya i mulai taon 1919. Mulai di taon i ma naposo ni Jahowa dipalua sian Babel na Balga. Dukkon i, lam tarsar ma paradeiso rohani on sahat tu liat portibi on. Lam godang do parbarita Harajaon na bersemangat jala dibahen nasida do godang huria. Asing ni i, dipatudu nasida do parbue ni tondi parbadia. Buktina, akka halak na kasar jala dang hasea pangalahona ujungna boi muba. Jala ‘dipakke nasida do pangalaho na imbaru na hombar tu lomo ni roha ni Debata’. (Eps. 4:24) Godang do pasu-pasu na dipaboa si Jesaya na lao saut annon di paradeiso. Alai saonari pe, boi do tahilala godang manfaat ala masuk hita tu paradeiso rohani. Saonari tabahas ma songon dia pakkilalaatta ala masuk tu paradeiso rohani on, jala boasa unang sappe kaluar hita sian i.

SONGON DIA DO PAKKILALAAN NI AKKA HALAK NA MASUK TU PARADEISO ROHANI?

5. Songon na dipaboa di Jesaya 65:​13, aha do na dihilala akka halak na masuk tu paradeiso rohani?

⁵ Lam dipatogu do haporseaotta tu Jahowa. Di surirang ni si Jesaya, dipaboa do imbar ni ngolu ni halak na masuk tu paradeiso rohani sian halak na so masuk tusi. (Jaha Jesaya 65:13.) Massai godang do dilehon Jahowa akka na boi mangurupi naposona asa toktong marale-ale dohot Ibana. Dilehon Ibana do tondi parbadiana, Bibel, dohot akka publikasi. Gabe boi ma hita ‘mangan, minum, jala marlas ni roha’. (Bandingkon tu Pangungkapon 22:17.) Alai molo halak na so masuk tusi, ‘male, mauas, jala maila’, alana dang ditanda nasida Debata.—Am. 8:11.

6. Songon dia do Joel 2:​21-24 manggombarhon sude na dilehon Jahowa tu hita? Jala aha do manfaat ni i sude?

⁶ Di surirang ni si Joel, dipakke ibana do hata gandum, anggur, dohot miak. Akka hata i patuduhon na burju do Jahowa mangalehon sude na dihaporluhon naposona asa toktong togu haporseaon ni nasida. (Joel 2:​21-24) Misalna dilehon Jahowa do tu hita Bibel, akka publikasi, dohot situs webta. Asing ni i diparade Jahowa do akka parpunguan ganup minggu, parpunguan wilayah, dohot parpunguan regional. Boi do dapotta manfaat sian i sude ganup ari. Jala hasilna, gabe lam togu ma haporseaotta.

7. Aha do na mambahen ‘sonang rohatta’? (Jesaya 65:14)

⁷ Marlas ni roha jala merasa puas. “Marsurak marlas ni roha” do hita ala taargai sude na dilehon Jahowa tu hita. (Jaha Jesaya 65:14.) Alani hasittongan na sian Bibel, gabe dipatogu do haporseaotta. Asing ni i, tarapul do rohatta ala taboto janji na dipaboa di Bibel. Jala pos do rohatta na lao saut do janji ni Debata i, ala nungnga dilehon Ibana Anakna gabe tobusan. On sude mambahen ‘sonang rohatta’. Pasti las do rohatta tikki makkatai dohot akka dongan taringot on.—Ps. 34:8; 133:​1-3.

8. Dua sifat utama aha do na dipatudu akka halak na di paradeiso rohani?

⁸ Marsada jala marsihaholongan do naposo ni Jahowa. On ma na gabe dua sifat utama ni akka halak na adong di paradeiso rohani. Gabe boi ma tabayakkon songon dia annon ngolutta di tano na imbaru. Disi lam marsada jala lam marsihaholongan ma nasida dibandikkon saonari. (Kol. 3:14) Taida ma pengalaman ni sahalak donganta borua. Diingot ibana do tikki parjolo sahali ibana pajuppang dohot Saksi Jahowa. Didok ibana, “Dang huboto songon dia asa marlas ni roha.  Di keluargakku pe dang boi dapottu las ni roha. Alai tikki huida na marsihaholongan Saksi Jahowa, disi ma parjolo sahali huida holong na sasittongna.” Manang ise na naeng marlas ni roha jala merasa puas, ikkon masuk do tu paradeiso rohani. Godang do memang halak di portibi on na mandok akka na so sittong taringot Saksi Jahowa. Alai dang gabe masalah i di hita, ala nungnga tabahen las roha ni Jahowa. Jala nungnga tabahen goar na denggan di adopan ni Jahowa dohot akka naposona. Alani i ma didok Jahowa, “Jouokku ma akka naposokku marhite goar na asing.”—Jes. 65:15.

9. Songon na disurat di Jesaya 65:​16, 17, aha do janji ni Debata tu naposona?

⁹ Makkilala dame ni roha. Dipaboa do di Jesaya 65:14 taringot na masa tu akka halak na so olo masuk tu paradeiso rohani. Didok lao ‘mangandungi do anggo nasida alani arsak ni roha ni nasida, jala sai tangis ma nasida ala nungnga mandele’. Alai aha do janji ni Debata tu akka halak na tinggal di paradeiso rohani? Didok Bibel, ‘dang na lao ingoton ni nasida be akka hasusaan na diadopi nasida. Buni nama i sude sian mata ni Debata’. (Jaha Jesaya 65:​16, 17.) Jadi na lao apusan ni Debata do sude sitaonon ni nasida, jala dang na lao ingoton ni nasida be i.

10. Boasa sada pasu-pasu di hamu boi gabe bagian sian organisasi ni Jahowa? (Ida gambar.)

¹⁰ Nang pe mangolu dope hita di portibi na dirajai Sibolis on, boi do tahilala dame ni roha tikki di parpunguan. Boi do tong taurupi akka donganta asa makkilala dame ni roha. Boha do carana? Tapatudu ma parbue ni tondi parbadia, songon holong, las ni roha, dame, haburjuon, dohot lambok ni roha. (Gal. 5:​22, 23) Sada pasu-pasu do di hita boi gabe bagian sian organisasi ni Jahowa. Molo toktong hita di paradeiso rohani, idaotta ma saut janji ni Debata i ma “langit na imbaru dohot tano na imbaru”.

11. Songon na disurat di Jesaya 65:​18, 19, songon dia do pakkilalaatta ala dibahen Jahowa paradeiso rohani?

¹¹ Mandok mauliate tu Jahowa jala patuduhon pangargaionta. Dipaboa si Jesaya do boasa “marlas ni roha situtu” hita ala tinggal di paradeiso rohani. Jahowa do na mambahen paradeiso rohani on. (Jaha Jesaya 65:​18, 19.) Alani i, dipakke Jahowa do hita lao mangurupi akka halak asa kaluar sian organisasi na so mangajarhon hasittongan taringot tu Ibana. Jala dipakke Jahowa do hita mangurupi nasida asa masuk tu paradeiso rohani.  Godang do pasu-pasu na tahilala ala mamboto hasittongan. Pasti mandok mauliate do hita tu Jahowa alani i, jala gabe taronjar ma rohatta paboahon i tu akka halak.—Jer. 31:12.

12. Boha do pakkilalaanmuna dung mamboto janji di Jesaya 65:​20-24?

¹² Mandok mauliate do tong hita tu Jahowa ala dilehon Ibana janji tu sude na tinggal di paradeiso rohani. Bayakkon ma akka na lao taulahon jala na taida di tano na imbaru haduan. Bibel mandok, ‘Dang adong disi poso-poso na mangolu holan piga-piga ari, jala dang mate halak na matua anggo so jolo ganjang umurna. . . . Lao tabangun ma jabu jala hita ma na mangingani, tabahen ma ladang anggur jala hita ma na mangallang parbuena. . . . Dang na lao marisuang halojaonta, . . . ai dipasu-pasu Jahowa do hita.’ Aman do annon ngolutta, puas, jala martujuan. ‘Andorang so tajou Jahowa’, nungnga diboto Ibana be aha na tahaporluhon, jala pasti lehononna do i.—Jes. 65:​20-24; Ps. 145:16.

13. Boha do Jesaya 65:25 manggombarhon perubahan ni sasahalak dung manomba Jahowa?

¹³ Dame jala aman. Ala diurupi tondi parbadia, godang do halak na kejam, kasar, jala dang jujur ujungna boi muba. (Jaha Jesaya 65:25.) Marsitutu do nasida paubahon pangalaho ni nasida. (Rom 12:2; Eps. 4:​22-24) Memang dang sempurna dope naposo ni Debata. Olo dope hita mambahen kesalahan. Nang pe songon i, dipasada Jahowa do “sude jolma” na makkaholongi Ibana dohot na marsihaholongan. Ujungna gabe boi ma hita mardame jala marsada. (Tit. 2:11) Sada mukjizat do on, jala holan Debata Natumimbul i do na boi mambahen on sude.

14. Songon dia do hata na didok di Jesaya 65:25 saut tu sahalak donganta bawa?

¹⁴ Tutu do boi muba pangalaho ni jolma. Taida ma pengalaman on. Adong sahalak doli-doli na jotjot kaluar masuk penjara mulai sian umur 20 taon. Kasar do ibana jala dang hasea pangalahona. Dipenjarahon do ibana ala manakko mobil, mangarampok, dohot mangulahon kejahatan na asing. Sai mambahen gara-gara do ibana asa marbadai. Tikki parjolo sahali ibana mamboto hasittongan ni Bibel jala ro tu parpunguan ni Saksi Jahowa, pos ma rohana nungnga dapotna tujuan ni ngoluna, i ma lao manomba Jahowa di paradeiso rohani. Dung tardidi, jotjot do dirimangi ibana songon dia hata na didok di Jesaya 65:25 saut tu dirina. Muba do sifatna na kasar songon singa, gabe lambok songon biru-biru.

15. Boasa lomo rohatta mangundang akka halak asa masuk tu paradeiso rohani, jala boha do caratta mangulahon i?

¹⁵ Jesaya 65:13 mandok, “Songon on ma hata ni Jahowa Tuan Natumimbul i.” Di ujung ni ayat 25 didok “ninna Jahowa”. On patuduhon, sai saut do hata ni Jahowa i. (Jes. 55:​10, 11) Saonari nungnga tahilala be paradeiso rohani i. Dibahen Jahowa do hita sude gabe sada keluarga, jala luar biasa do i. Boi ma tahilala dame ni roha, marsada, jala toktong aman nang pe mangolu dope di portibi na jahat on. (Ps. 72:7) Alani i, lomo do rohatta mangurupi godang halak asa rap dohot hita gabe keluarga ni Jahowa. Boha do caratta mangulahon i? Marsitutu ma hita mambahen sisean.—Mat. 28:​19, 20.

MANGURUPI AKKA HALAK MASUK TU PARADEISO ROHANI

16. Songon dia do akka halak ditogu-togu masuk tu paradeiso rohani?

¹⁶ Massai penting do tugasta mangurupi akka halak asa masuk tu paradeiso rohani. Asa marhasil hita mangulahon i, tatiru ma Jahowa. Dang dipaksa Jahowa akka halak asa masuk tu organisasina. Alai lambok do Ibana  manogu-nogu nasida. (Joh. 6:44; Jer. 31:3) Molo serep roha ni nasida jala lomo roha ni nasida mananda Jahowa dohot mamboto akka sifatna, pasti olo do nasida ditogu-togu Jahowa. Songon dia do caratta mangurupi akka halak asa masuk tu paradeiso rohani marhite pangalahotta na denggan?

17. Boha do caratta mangurupi akka halak tu paradeiso rohani?

¹⁷ Boha do caratta mangurupi akka halak tu paradeiso rohani? Tapatudu ma holong dohot haburjuon tu dongan sahaporseaotta. Tikki adong halak na parjolo sahali ro tu parpunguan, lomo do rohatta asa sarupa kesimpulan ni nasida songon akka halak na ro tu parpunguan di Korint najolo. Didok nasida do, “Tutu do Debata di tonga-tongamuna!” (1 Kor. 14:​24, 25; Sak. 8:23) Alani i, ikkon torus do taihutton nasehat di Bibel asa ‘toktong mardame dohot akka dongan na asing’.—1 Tes. 5:13.

18. Aha do na mambahen tertarik akka halak masuk tu paradeiso rohani?

¹⁸ Ikkon marsitutu do hita mangida akka dongan songon cara ni Jahowa mangida nasida. Boha do carana? Akka na denggan ma na taida sian akka dongan, unang ma hahurangan ni nasida. Alana molo nga sempurna nasida haduan, dang adong be hahurangan ni nasida. Memang, dang sai sarupa sifat dohot kepribadianta. Alai akka perbedaan i dang gabe masalah di hita, molo sai ‘burju hita, marasi ni roha, jala rade manalpuhon hasalaan ni akka dongan’. (Eps. 4:32) Molo taulahon i, gabe tertarik ma akka halak na so sisomba Jahowa masuk tu paradeiso rohani. Alana nasida pe lomo do rohana dihaholongi. b

 TOKTONG MA DI PARADEISO ROHANI

19. (a) Songon na dipaboa di kotak “ Hea do Nasida Kaluar jala Masuk Muse”, aha do na didok akka halak naung mulak tu paradeiso rohani? (b) Aha do tekadta? (Ida gambar.)

¹⁹ Sada hasangapon do di hita masuk tu paradeiso rohani. Lam denggan do paradeiso on sian tikki tu tikki, jala lam godang do akka halak na masuk tusi. Sai anggiat ma taargai paradeiso na dibahen Jahowa on. Manang ise na lomo rohana dipatogu, merasa puas, tenang, jala aman, ikkon masuk do ibana tu paradeiso rohani, jala unang ma kaluar ibana sian i. Alai manat ma hita, alana sai marsitutu do Sibolis mambahen hita asa kaluar sian paradeiso rohani. (1 Ptr. 5:8; Pgk. 12:9) Unang ma tapasombu ibana marhasil. Sai tajaga ma paradeiso on asa toktong badia jala dame.