Asa Toktong Marlas ni Roha Huhut Paimahon Jahowa
TOTTU tarpaima-ima do hita sada tikki diripasson Jahowa akka parjahat jala dibahen denggan sude portibi on. (Pgk. 21:1-5) Alai alani godang ni sitaononta, olo do gabe dang sabar hita paimahon Jahowa mangulahon i. Haccit do memang rohatta molo sundat na taharappon.—Poda 13:12, surat na di toru.
Harap do roha ni Jahowa asa sabar hita paimahon Ibana lao bertindak di tikkina. Boasa? Jala boha do carana asa tetap hita marlas ni roha huhut paimahon Jahowa bertindak?
BOASA DIPANGIDO JAHOWA HITA ASA SABAR PAIMAHON?
Didok Bibel, “Sabar do Jahowa paima-imahon lao patuduhon asi ni rohana tu hamu. Ro nama Ibana lao patuduhon asi ni rohana tu hamu. Ai Debata na adil do Jahowa. Marlas ni roha do sude na marhaposan tu Ibana.” (Jes. 30:18) Sasittongna hata ni si Jesaya di bindu 30 on dipaboa tu akka halak Jahudi sijogal rukkung do. (Jes. 30:1) Alai hata ni si Jesaya di ayat 18, paposson roha ni piga-piga halak Jahudi na setia di tikki i dohot tu hita saonari.
Hita pe ikkon sabar paimahon Jahowa bertindak, alana Jahowa pe sabar do paimahon andigan ripassononna pamarettaon ni Sibolis. Nungnga ditottuhon Jahowa ari dohot jamna, jala sabar do Ibana paimahon i. (Mat. 24:36) Annon gabe takkas ma tarida, sala do tuduhan ni Sibolis taringot Jahowa dohot akka naposona. Jala lao ripassonon ni Jahowa ma Sibolis dohot na berpihak tu ibana. Alai dipatudu Jahowa do annon asi ni rohana tu hita.
Saonari, memang dang pittor dipasiding Jahowa hasusaan na taadopi. Alai didok Ibana do tu hita, na boi do hita marlas ni roha huhut paimahon janjina i. Songon na didok di bukku Jesaya nakkin, boi do hita marlas ni roha huhut paimahon akka na denggan na taharappon. (Jes. 30:18) Jadi songon dia do carana asa boi dapotta las ni roha? Adong opat carana.
NA MAMBAHEN HITA MARLAS NI ROHA HUHUT PAIMAHON I
Tapikkirhon ma akka na denggan di ngolutta. Godang do diida Raja Daud akka na jahat saleleng ngoluna. (Ps. 37:35) Alai didok ibana, “Hohom ma ho di jolo ni Jahowa, jala sabar ma ho paimahon Ibana. Molo adong halak na marhasil mangulahon sakkapna, unang ma gabe jut roham.” (Ps. 37:7) Sai diingot ibana do hatana on di bagasan rohana, asa boi sai diingot ibana janji ni Jahowa na lao paluahon ibana. Jala sai diingot ibana do akka pasu-pasu naung dijalo ibana sian Jahowa. (Ps. 40:5) Jadi molo sai tapikkirhon akka na denggan di ngolutta, dang tu akka masalahta, gabe lam sabar ma hita paimahon Jahowa.
Tabahen ma tikkitta lao mamuji Jahowa. Di Psalmen 71, didok si Daud do tu Jahowa, “Sai toktong do hupaima Ho, pujiokku do Ho jala lam jotjot do Ho hupuji.” (Ps. 71:14) Songon dia do si Daud mamuji Jahowa? Dipaboa ibana do tu halak na asing taringot Jahowa jala diendehon ibana do ende puji-pujian tu Jahowa. (Ps. 71:16, 23) Tatiru ma si Daud asa boi hita marlas ni roha huhut paimahon Jahowa. Tapuji ma Jahowa tikki hita marbarita, tapaboa ma tu akka donganta dohot keluargatta taringot Jahowa, jala taendehon ma akka endetta. Tikki diendehon hamu ende Harajaon, manat ma parrohahon lirik ni akka endetta i jala songon dia do lirik ni ende i boi mambahen hamu marlas ni roha.
Tapajonok ma diritta tu akka donganta. Tikki mangadopi sitaonon si Daud, didok ibana do tu Jahowa, “Di jolo ni akka naposom na setia, patuduokku do na pos rohakku tu goarmu.” (Ps. 52:9) Tapajonok ma diritta tu akka donganta dang holan tikki marpungu manang tikki marbarita, alai dohot do tikki bergaul dohot nasida. Molo taulahon i, gabe dipatogu ma hita.—Rom 1:11, 12.
Toktong ma taingot janji ni Jahowa. Psalmen 62:5 mandok, “Sabar do au paimahon Debata, ai sian Ibana do ro na hupaima-ima.” Massai penting do sai taingot janji ni Jahowa, nang pe dang saut janji ni Jahowa i di tikki na taharappon. Ikkon porsea do hita na lao saut do janji ni Jahowa i dang soal sadia leleng tapaima janjina i. Boi do lam pos rohatta tu janji ni Jahowa molo marsiajar Bibel hita. Taparsiajari ma akka surirang na adong di Bibel, songon dia akka bukku na di Bibel saling berkaitan, dohot mamparsiajari akka na dipaboa Jahowa taringot dirina. (Ps. 1:2, 3) Asing ni i, ikkon toktong do hita ‘martangiang di bagasan panogu-noguon ni tondi parbadia’ asa jonok hubungatta tu Jahowa huhut paimahon saut janjina i.—Jud. 20, 21.
Songon Raja Daud pos ma rohatta, diparrohahon Jahowa do akka halak na paimahon Ibana jala dipatudu Jahowa do holong na manoktong tu naposona. (Ps. 33:18, 22) Alani i, toktong ma hita sabar paimahon Jahowa. Taingot ma akka na denggan di ngolutta, tapuji ma Jahowa, tapajonok ma diritta tu akka dongan, jala sai taingot ma janji ni Jahowa.
