1. Boasa ikkon ditogu-togu Jahowa hita? Bahen ma contoh.

 BAYAKKON ma molo lilu hamu di hutan. Godang do binatang buas, tanaman na marraccun, dohot serangga na berbahaya disi. Adong do muse lubang na bagas, gabe boi ma hamu madabu tusi. Pasti mabiar do hamu di hutan i. Alai las do rohamuna molo pajuppang hamu dohot sasahalak na takkas mamboto hutan i. Boi do ditogu-togu ibana hamu asa kaluar sian hutan i. Sarupa songon hutan i do portibi on. Godang do akka bahaya na boi manegai parale-aleotta tu Jahowa. Alai las do rohatta ala adong Jahowa, jala rade do Ibana manogu-nogu hita. Diurupi Ibana do hita asa mandao sian akka bahaya jala asa boi sahat tu tujuanta, i ma hangoluan salelengna di tano na imbaru.

2. Songon dia do Jahowa manogu-nogu hita?

² Marhite Bibel ditogu-togu Jahowa do hita. Alai dipakke Ibana do tong akka jolma lao manogu-nogu hita. Contohna dipillit Ibana do “naposo haposan jala na marbisuk”. Diparade nasida do akka petunjuk, sijahaon, dohot video na boi mangurupi hita mambahen keputusan na denggan. (Mat. 24:45) Dipakke Jahowa do tong akka bawa na boi diandalhon lao manogu-nogu hita. Contohna akka pengawas wilayah dohot akka sintua. Dipatogu nasida do hita jala dilehon nasida do petunjuk tikki maol situasitta. Mandok mauliate do hita tu Jahowa ala ditogu-togu hita saleleng ari parpudi on. Gabe diurupi do hita asa boi toktong marale-ale tu Ibana jala marlas ni roha sahat tu salelengna.

3. Aha do na lao tabahas di artikel on?

³ Olo do sipata maol hita mangihutton petunjuk ni Jahowa, tarlumobi molo akka bawa na so sempurna na mangalehon petunjuk i. Boasa? Alana olo do dilehon nasida petunjuk na so tahalomohon. Manang olo do tahilala hira na so masuk akkal do petunjuk i. Gabe didok rohatta ma, dang sian Jahowa petunjuk i. Alai di tikki sisongon i ma ikkon pos do rohatta Jahowa  do na manogu-nogu naposona. Jala molo taihutton petunjukna, parohon manfaat do i tu hita. Asa boi pos rohatta tu petunjuk ni Jahowa, tabahas ma jo (1) songon dia Jahowa manogu-nogu naposona di tikki najolo, (2) songon dia Jahowa manogu-nogu hita saonari, jala (3) manfaat aha na boi tadapot molo sai taihutton petunjukna.

SONGON DIA JAHOWA MANOGU-NOGU HALAK ISRAEL NAJOLO

4-5. Songon dia do Jahowa mambuktihon si Musa do na dipillit Ibana lao manogu-nogu halak Israel? (Ida gambar sampul.)

⁴ Dipillit Jahowa do si Musa lao manogu-nogu halak Israel kaluar sian Mesir. Jala dibahen Jahowa do tanda asa diboto nasida na si Musa do na dipakke Ibana lao manogu-nogu nasida. Contohna dibahen Jahowa do ombun di tikki arian dohot api di tikki borngin. Songon tiang do bentuk ni ombun dohot api i. (2 Mus. 13:21) Diihutton si Musa do ombun dohot api i, jala sahat ma si Musa dohot bangso i di Laut Merah. Alai dukkon i, dilele halak Mesir do nasida. Gabe mabiar ma halak Israel, ala didok roha ni nasida lao bunuon ni halak Mesir i nama nasida. Didok nasida sala ni si Musa do on, alai sasittongna Jahowa do na mamakke si Musa lao manogu-nogu nasida. (2 Mus. 14:2) Dukkon i, dipalua Jahowa do nasida marhite cara na so hea dope tarbayakkon nasida.—2 Mus. 14:​26-28.

⁵ Dung masa peristiwa i, toktong dope diihutton si Musa ombun na dibahen Jahowa lao manogu-nogu halak Israel saleleng 40 taon di padang belantara. a Jala adong do tikkina dibahen Jahowa ombun i di ginjang ni kemah ni si Musa. Sude do halak Israel boi mangida i. (2 Mus. 33:​7, 9, 10) Marhite ombun i do Jahowa makkatai tu si Musa. Dung i, si Musa do na paboahon tu halak Israel aha na dipaboa Jahowa tu ibana. (Ps. 99:7) Jadi boi do diida halak Israel memang si Musa do na dipakke Jahowa lao manogu-nogu nasida.

6. Boha do sikap ni halak Israel tu halak na dipillit Jahowa lao manogu-nogu nasida? (4 Musa 14:​2, 10, 11)

⁶ Nang pe nga takkas diida nasida akka bukti sian Jahowa, alai godang do halak Israel na so mangakkui si Musa na dipakke Jahowa lao manogu-nogu nasida. (Jaha 4 Musa 14:​2, 10, 11.) Mulak-ulak do nasida dang mangargai si Musa. Akibatna dang diloas Jahowa nasida masuk tu Tano na Dijanjihon.—4 Mus. 14:30.

7. Paboa ma contohna akka ise na olo mangihutton petunjuk ni Jahowa. (4 Musa 14:24) (Ida gambar.)

⁷ Alai adong do halak Israel na olo mangihutton petunjuk ni Jahowa. Contohna didok Jahowa do, “Anggo si Kaleb . . . torus do diihutton ibana Au sian nasa rohana.” (Jaha 4 Musa 14:24.) Dipasu-pasu Jahowa do si Kaleb. Diloas Jahowa do ibana mamillit tano parbagiananna di Kanaan. (Jos. 14:​12-14) Akka pinoppar ni halak Israel na mate di padang belantara pe tong do mangihutton petunjuk ni Jahowa. Tikki dipillit si Musa si Josua lao manggattihon ibana, ‘dipasangap nasida ma si Josua saleleng ni ngoluna’. (Jos. 4:14) Hasilna dipasu-pasu Jahowa do nasida. Boi ma nasida tinggal di Tano na Dijanjihon i.—Jos. 21:​43, 44.

8. Patorang ma songon dia cara ni Jahowa manogu-nogu naposona dung mamaretta akka raja ni Israel. (Ida gambar.)

⁸ Martaon-taon dukkon i, dipillit Jahowa do akka panguhum lao manogu-nogu naposona. Jala dung mamaretta akka raja di Israel, dipillit Jahowa ma akka panurirang lao manogu-nogu naposona. Dioloi akka raja na setia do petunjuk sian akka panurirang i. Contohna, olo do Raja Daud manjalo sipasingot sian  Panurirang Natan. (2 Sam. 12:​7, 13; 1 Kron. 17:​3, 4) Raja Jehosapat pe olo do mangido petunjuk sian Panurirang Jehasiel, jala dijujui ibana do halak Juda asa ‘porsea tu akka panurirang ni Jahowa’. (2 Kron. 20:​14, 15, 20) Asing ni i, tikki marsak Raja Hiskia, dipangido ibana do petunjuk sian Panurirang Jesaya. (Jes. 37:​1-6) Molo diihutton akka raja ni Israel petunjuk ni Jahowa, pasti dipasu-pasu Jahowa do nasida jala dijaga Jahowa do bangso Israel. (2 Kron. 20:​29, 30; 32:22) Sasittongna takkas do tarida na dipakke Jahowa do akka panurirangna lao manogu-nogu naposona. Alai godang do raja dohot halak Israel na so olo manangihon panurirang ni Jahowa.—Jer. 35:​12-15.

SONGON DIA JAHOWA MANOGU-NOGU HALAK KRISTEN DI ABAD NA PARJOLO

9. Ise do na dipakke Jahowa lao manogu-nogu halak Kristen di abad na parjolo? (Ida gambar.)

⁹ Di ari Pentakosta taon 33 M, dibahen Jahowa do huria Kristen. Songon dia do Jahowa manogu-nogu halak Kristen di tikki i? Dipillit Ibana do Jesus gabe ulu ni huria. (Eps. 5:23) Dang maksudna Jesus makkatai langsung tu ganup halak Kristen i. Alai dipakke ibana do akka apostel dohot akka sintua di Jerusalem lao mangarahon akka huria. (Ul. 15:​1, 2) Asing ni i, dipillit do tong akka sintua lao mangurupi akka dongan di ganup huria.—1 Tes. 5:12; Tit. 1:5.

10. (a) Boha do sikap ni halak Kristen di abad na parjolo tikki mandapot petunjuk sian Jahowa? (Ulaon ni Apostel 15:​30, 31) (b) Di tikki najolo, boasa adong na so mangargai halak na dipillit Jahowa? (Ida kotak “ Boasa Adong na So Mangargai Halak na Dipakke Jahowa lao Manogu-nogu Naposona?”)

¹⁰ Las do roha ni godang halak Kristen di abad na parjolo mangihutton petunjuk na dijalo nasida. Didok Bibel, “Dung dijaha nasida surat i, las ma roha ni nasida.” (Jaha Ulaon ni Apostel 15:​30, 31.) Alai boha molo di tikkitta saonari? Songon dia do Jahowa manogu-nogu naposona?

SONGON DIA JAHOWA MANOGU-NOGU HITA SAONARI

11. Paboa ma contoh na patuduhon na ditogu-togu Jahowa do naposona di tikkitta saonari.

¹¹ Sahat tu saonari pe, torus do ditogu-togu Jahowa naposona. Dilehon Ibana do Bibel jala dipakke Ibana do Anakna Jesus lao manguluhon huria. Boi do taida akka bukti na dipakke  Jahowa do tong akka jolma di tikkitta saonari lao manogu-nogu naposona. Contohna, parrohahon ma na masa dung taon 1870. Dung diriset si Charles Taze Russel dohot akka donganna Bibel, gabe diboto nasida ma taon na massai penting do taon 1914 i. Alana di taon i do dipajongjong Debata Harajaonna. (Dan. 4:​25, 26) Boasa boi dibahen nasida kesimpulan sisongon i? Alana diriset nasida do taringot surirang ni Bibel, jala pos roha ni nasida lao idaon ni nasida do saut akka surirang i. Dipasu-pasu Jahowa do upaya ni Akka Parsiajar Bibel i. Akka na masa di taon 1914 mambuktihon nungnga mamaretta be Harajaon ni Debata. Di taon i, masa do Perang Dunia I. Jala masa do gempa na massai gogo, haraparon, dohot sahit di godang inganan. (Luk. 21:​10, 11) Takkas ma, dipakke Jahowa do Akka Parsiajar Bibel i lao mangurupi naposona.

12-13. Aha do na dibahen akka dongan na martanggung jawab di kantor pusat saleleng masa Perang Dunia II?

¹² Taparrohahon ma muse aha na masa saleleng Perang Dunia II. Dibahen akka dongan na martanggung jawab di kantor pusat ma riset taringot Pangungkapon 17:8. Sian hasil riset ni nasida, diboto nasida ma molo na masa di Perang Dunia II dang na lao mengarah tu Armagedon. Alai na lao adong do situasi na dame dung sae Perang Dunia II. Gabe boi ma Saksi Jahowa marbarita tu sude halak. Jadi dibahen nasida ma Perguruan Tinggi (Sekolah) Alkitab Gilead Menara Pengawal lao mangalatik akka misionaris tu ulaon marbarita dohot mangajari. Idaon hira na so masuk akkal do dibahen sikkola on. Alana dibahen nasida sikkola i jala dikirim nasida akka misionaris i, tikki masa dope porang. Asing ni i, dibahen naposo haposan do Kursus Pelayanan Teokratis b tu sude huria. Kursus on mangurupi sude parbarita asa lam denggan marbarita dohot mangajari. Sude on dibahen lao mangurupi naposo ni Debata asa rade tu ulaon marbarita di ari na naeng ro.

¹³ Dung tapikkirhon akka contoh on, boi ma takkas taida na ditogu-togu Jahowa do naposona saleleng masa porang i. Buktina dung sae porang i, bebas do nasida marbarita na uli di godang negara. Hasilna lam godang ma halak na boi mananda Jahowa.

14. Boasa pos rohatta tu petunjuk na dilehon naposo haposan dohot akka sintua? (Pangungkapon 2:1) (Ida gambar.)

 ¹⁴ Saonari toktong do Punguan na Mangaradoti Organisasi mangalului petunjuk sian Jesus. Alana lomo do roha ni nasida asa sarupa petunjuk na dilehon nasida songon cara marpikkir ni Jahowa dohot Jesus. Jala dipakke nasida do akka pengawas wilayah dohot akka sintua lao mangalehon petunjuk i tu sude huria. c Jadi di ‘tangan kanan’ ni Jesus do sude sintua, na miniahan nang songon i na so miniahan. (Jaha Pangungkapon 2:1.) Memang, dang sempurna akka sintua i jala olo do mambahen kesalahan. Si Musa dohot si Josua pe hea do mambahen kesalahan. Songon i do tong akka apostel. (4 Mus. 20:12; Jos. 9:​14, 15; Rom 3:23) Alai ditogu-togu Jesus do naposo haposan dohot akka sintua. Jala toktong do diulahon Jesus i “sahat tu panutup ni jaman on”. (Mat. 28:20) I do alasanna boasa pos rohatta tu petunjuk na dilehon Jesus marhite akka halak na dipillit Jahowa.

MANFAATNA MOLO TOKTONG TAIHUTTON PETUNJUK NI JAHOWA

15-16. Aha do na boi taparsiajari sian pengalaman ni akka donganta na mangihutton petunjuk ni Jahowa?

¹⁵ Molo toktong taihutton petunjuk ni Jahowa, boi do tahilala manfaatna di ngolutta saonari. Songon i ma na dihilala si Andi dohot si Rosa. Diihutton nasida do nasehat sian naposo haposan asa mambahen sederhana ngolu ni nasida. Didok si Rosa, d “Tinggal di akka jabu na gelleng do hami jala dang adong dapurna. Asing ni i, ikkon hujual do kamerakku dohot akka peralatanna, hape lomo hian rohakku mamoto. Sappe tangis do au tikki na hujual i kamerakki. Alai huingot ma contoh ni si Sara, istri ni si Abraham. Gabe bertekad do au asa unang torus mamikkirhon akka naung hutinggalhon. Alai hupikkirhon ma aha na boi huulahon saonari tu Jahowa.” (Heb. 11:15) Ala dibahen nasida pengorbanan, boi ma nasida mangurupi ulaon pembangunan Bale Harajaon dohot bangunan ni organisasitta. Pasu-pasu aha do na dihilala nasida? Didok si Rosa, “Las hian do rohanami ala diboto hami nungnga dilehon hami na dumenggan tu Jahowa. Tikki diulahon hami akka tugas sian organisasi, boi ma dibayakkon hami songon dia annon ngolunami di tano na imbaru.” Didok si Andi, “Las do rohanami ala boi mangalehon tikki  dohot gogonami lao mendukung Harajaon ni Debata.”

¹⁶ Aha do manfaat na asing na boi tahilala molo toktong taihutton petunjuk ni Jahowa? Taida ma pengalaman ni si Maria. Dung tamat SMA ibana, lomo do rohana mangihutton saran sian organisasitta lao merintis. (Mat. 6:33; Rom 12:11) Didok ibana, “Sasittongna dapottu do beasiswa lao kuliah saleleng opat taon. Alai lomo do rohakku mangalehon na unggodang tu Jahowa. Jadi huputusson ma masuk tu kursus keterampilan, asa adong annon karejokku na mendukung au merintis. On sada keputusan na terbaik do na hea hubahen. Saonari las do rohakku gabe perintis biasa. Jala ala bebas do huatur tikkikku, gabe boi ma au mangurupi di Betel dohot mangulahon tugas na asing di organisasi.”

17. Aha do muse manfaatna molo toktong taihutton petunjuk ni Jahowa? (Jesaya 48:​17, 18)

¹⁷ Olo do sipata tadapot nasehat sian organisasi asa unang holongan di hepeng hita manang mangulahon aha pe na boi manegai parale-aleotta tu Jahowa. Lao manjaga hita do umbahen dilehon akka nasehat i. Molo taihutton i, gabe ias ma panggora ni rohatta jala gabe dang porlu tahilala na haccit alani keputusan na sala na tabahen. (1 Tim. 6:​9, 10) Hasilna boi ma tasomba Jahowa sian nasa rohatta. Holan manomba Jahowa do na boi mambahen las rohatta jala dame ngolutta.—Jaha Jesaya 48:​17, 18.

18. Boasa bertekad hita toktong mangihutton petunjuk ni Jahowa?

¹⁸ Pos do rohatta, toktong do dipakke Jahowa akka jolma lao mangalehon petunjuk saleleng hasusaan bolon dohot Pamarettaon Saribu Taon. (Ps. 45:16) Olo do hita mangihutton petunjuk i nang pe dang songon na dihalomohon rohatta? Molo sian saonari hita mangihutton petunjuk ni Jahowa, gabe ummura ma hita mangihutton petunjukna haduan. Alani i, toktong ma taihutton petunjuk ni Jahowa, termasuk ma i petunjuk na dilehon akka bawa na dipillit Ibana lao manogu-nogu hita. (Jes. 32:​1, 2; Heb. 13:17) Boi do pos rohatta tu Jahowa ala Ibana do na mangurupi hita asa boi marale-ale dohot Ibana jala boi mangolu salelengna di Paradeiso.