1-2. Aha do na ikkon torus taulahon dukkon tardidi hita?

 SADIA jotjot do hamu paiasson jabumuna? Molo pinda hamu tu sada jabu na baru, pasti na parjolo sahali diulahon hamu, i ma paiasson jabu i. Alai boha do molo holan sahali dipaias hamu i? Pittor gok ma abuna jala kotor ma muse jabu i. Alani i asa torus ias jabumuna i, porlu do taratur dipaias hamu.

² Dos songon i ma, ikkon torus do tapareso cara marpikkirta dohot sifatta. Memang sebelum tardidi hita, nungnga berupaya hita mambahen perubahan asa ‘ias diritta sian akka na mambahen ramun daging dohot pikkiranta’. (2 Kor. 7:1) Alai dukkon tardidi, porlu do taihutton nasehat ni Apostel Paulus asa toktong ‘tapaimbaru roha dohot pikkiranta’. (Eps. 4:23) Boasa penting mangulahon on? Alana boi do hatop portibi on manegai cara marpikkirta, gabe dang dihalomohon Jahowa be hita. Jadi asa boi torus tabahen las roha ni Jahowa, taratur ma hita mamareso cara marpikkir, sifat, dohot keinginanta.

3. Aha do maksudna ‘paubahon pikkiran’? (Rom 12:2)

³ Aha do na porlu taulahon asa boi tauba cara marpikkirta? (Jaha Rom 12:2.) Hata Junani ‘paubahon pikkiran’ boi do diterjemahon gabe “paturehon pikkiran”. Songon  sasahalak na paturehon jabu, dang sae holan mendekorasi jabu i asa bagak. Alai ikkon dipadenggan ibana do molo adong na sega. Suang songon i ma, asa boi tapauba pikkiranta, ikkon torus do tapareso diritta jala tabahen perubahan na porlu asa sesuai pangalahotta tu standar ni Jahowa. Ikkon torus do hita mangulahon i, dang sae holan sahali.

4. Songon dia do asa unang dipengaruhi portibi on cara marpikkirta?

⁴ Molo nungnga sempurna hita, boi do torus tabahen las roha ni Jahowa. Alai saonari ikkon berupaya keras dope hita mambahen las roha ni Jahowa. Parrohahon ma na disurat di Rom 12:2. Didok si Paulus, porlu do tapauba pikkiranta asa taboto aha do na dihalomohon Debata sian hita. Unang ma tapaloas portibi on mempengaruhi cara marpikkirta. Alani i tapastihon ma cara marpikkir ni Debata do na manogu-nogu hita tikki mambahen keputusan manang cita-cita, dang cara marpikkir ni portibi on.

5. Ala nungnga jonok ari ni Jahowa, sukkun-sukkun aha do na porlu tapikkirhon? (Ida gambar.)

⁵ Taparrohahon ma sada contoh. Lomo do roha ni Jahowa asa ‘sai taingot haroro ni ari ni Jahowa’. (2 Ptr. 3:12) Tasukkun ma tu diritta: ‘Sian parngoluokku, takkas do hupatudu naung jonok ujung ni portibi na jahat on? Sian keputusanku taringot pendidikan dohot karejo, hupatudu do melayani Jahowa na uppetting di ngolukku? Pos do rohakku na paradeon ni Jahowa do kebutuhanku dohot kebutuhan ni keluargakku, manang sai khawatir do au tu hal-hal materi?’ Pasti las do roha ni Jahowa molo berupaya hita mangulahon lomo ni rohana.​—Mat. 6:25-27, 33; Plp. 4:12, 13.

6. Aha do na ikkon torus taulahon?

 ⁶ Ikkon taratur do hita mamareso cara marpikkirta jala mambahen hamubaon na porlu. Didok Apostel Paulus do tu halak Korint, “Toktong ma uji jala pareso hamu dirimuna, asa botoonmuna na diihutton hamu dope haporseaon ni halak Kristen manang na dang.” (2 Kor. 13:5) Asa toktong sesuai parngoluotta tu “haporseaon ni halak Kristen”, dang sae holan ro tu parpunguan manang marbarita na uli. Cara marpikkir, keinginan, dohot rohatta pe ikkon sesuai do tu haporseaon ni halak Kristen. Jadi asa boi tapauba pikkiranta, tajaha ma Bibel, taparsiajari ma cara marpikkir ni Jahowa, jala taulahon ma manang aha pe na sesuai tu lomo ni rohana.​—1 Kor. 2:14-16.

7. Sesuai tu Epesus 4:31, 32, aha dope na ikkon taulahon, jala boasa gabe tantangan on?

⁷ Jaha Epesus 4:31, 32. Asing ni ikkon paubahon cara marpikkirta, porlu do muse ‘tapakke pangalaho na imbaru’. (Eps. 4:24) Ikkon berupaya do hita mangulahon on. Misalna, ikkon berjuang do hita mambolokkon sogo ni roha, muruk, dohot rimas sian diritta. Boasa gabe tantangan on? Alana sifat na roa i olo do nungnga marurat marakar di diritta. Misalna dipaboa do di Bibel, adong halak na sifatna “mura muruk”. (Poda 29:22) Akka halak na sifatna songon on ikkon torus do berjuang asa boi mambahen hamubaon, nang pe nungnga tardidi nasida. On ma na lao taida di pengalaman na mangihut.

8-9. Sian pengalaman ni si Stephen, boasa ikkon torus hita berjuang mambolokkon sifat na so denggan?

⁸ Sahalak donganta na margoar si Stephen berjuang mangatasi sifatna na mura muruk. Didok ibana, “Nang pe nungnga tardidi au, alai berupaya do au mangorom emosikku. Contohna hea ma tikki marbarita, huida adong panakko mambuat radio sian mobilhu. Hukejar ma ibana. Tikki naeng dapottu panakko i, didabuhon ibana ma radio i dung i lari. Tikki huceritahon tu akka dongan songon dia carana boi dapottu muse radio i, disukkun sahalak sintua ma tu au, ‘Autsugari ma dapotmu panakko i Stephen, hahuaonmu ma ibana?’ Gabe sadar ma au mambege sukkun-sukkunna i, jala berusaha ma au gabe halak na marroha na dame.” b

⁹ Sian pengalaman ni si Stephen, taboto ma boi do akka sifat na roa i toppu ro muse, nang pe didok rohatta nungnga takendalihon i. Molo masa songon i, unang ma metmet rohatta manang merasa nungnga gagal hita gabe halak Kristen. Apostel Paulus pe mandok, “Tikki naeng huulahon na sittong, sai na jahat i do na adong di au.” (Rom 7:21-23) Ala dang sempurna hita, akka sifat na so denggan boi do ro muse, songon abu na masuk muse tu jabu naung dipaias. Alani i, ikkon torus do hita berjuang mambolokkon sifat na so denggan i asa toktong ias diritta. Songon dia ma carana mangulahon i?

10. Songon dia do carana mambolokkon akka sifat na so denggan sian diritta? (1 Johannes 5:14, 15)

¹⁰ Molo maol hamu mambolokkon sifat na so denggan, martangiang ma hamu tu Jahowa. Pos ma rohamuna tangihononna do hamu jala urupanna hamu. (Jaha 1 Johannes 5:14, 15.) Memang dang secara mukjizat dibolokkon Jahowa akka  sifatmuna na so denggan i. Alai lehononna do gogo tu hamu asa unang menyerah. (1 Ptr. 5:10) Asing ni i, berupaya ma asa sesuai pangalahomuna tu tangiangmuna i. Pasiding ma akka ulaon na mambahen mulak muse pangalahomuna na leleng i. Misalna, unang ma tatonton film, acara TV, manang sijahaon na patuduhon hira dang sala akka sifat na roa i. Jala molo toppu ro muse akka sifat na roa i, pittor hatop ma bolokkon.​—Plp. 4:8; Kol. 3:2.

11. Aha do na porlu taulahon asa boi tapakke pangalaho na imbaru?

¹¹ Asing ni mambolokkon pangalaho na leleng, tapakke ma pangalaho na imbaru. Songon dia ma carana mangulahon i? Taparsiajari ma akka sifat ni Jahowa, jala tatiru ma Ibana. (Eps. 5:1, 2) Misalna tikki tajaha di Bibel taringot songon dia Jahowa rade manalpuhon hasalaan, tasukkun ma diritta, ‘Olo do au manalpuhon hasalaan ni na asing?’ Tikki tajaha taringot asi ni roha ni Jahowa tu akka halak na pogos, tasukkun ma diritta, ‘Asi do rohakku tu akka dongan na porlu bantuan materi, jala hupatudu do i sian tindakanku?’ Torus ma tapauba cara marpikkirta marhite mamakke pangalaho na imbaru. Sabar jala unang ma menyerah hita mangulahon i.

12. Sian pengalaman ni si Stephen, songon dia do Bibel boi manguba pangalahona?

¹² Si Stephen naung dipaboa nakkin secara bertahap marhasil do mamakke pangalaho na imbaru. Didok ibana, “Dung tardidi au, sai adong do situasi na mambahen au emosi. Alai molo adong halak manang situasi na mambahen au emosi, pittor lao ma au. Godang do halak na mamuji au ala boi au muba, termasuk ma i istrikku. Au pe heran do boasa boi au muba! Alai pos do rohakku dang alani gogokku i, alani Hata ni Debata do.​”

13. Aha do na mangurupi hita mangulahon na sittong? (Galatia 5:16)

¹³ Jaha Galatia 5:16. Dilehon Jahowa do tondi parbadiana asa boi hita mangulahon na sittong. Molo taparsiajari Hata ni Debata, boi do hita ditogu-togu tondi parbadia. Boi do muse dapotta tondi parbadia tikki di parpunguan. Alana di parpunguan sisongon i, boi ma hita marsipatoguan dohot akka dongan, na sarupa songon hita berupaya mangulahon na sittong. (Heb. 10:24, 25; 13:7) Jala tikki martangiang hita tu Jahowa mangido asa diurupi hita mengatasi kelemahanta, lehonon ni Jahowa do tondi parbadiana asa unang menyerah hita. Memang nang pe taulahon i sude, olo dope ro keinginan na sala. Alai gabe margogo ma hita manolak keinginan na sala i. Songon na didok di Galatia 5:16, halak na mangihutton tondi parbadia dang be ‘mangulahon hisap-hisap ni daging’.

14. Boasa penting asa torus mangulahon na sittong?

¹⁴ Molo nungnga dimulai hamu akka ulaon na mambahen jonok hubunganmuna tu Debata Jahowa, partahatton ma i. Jala torus ma berupaya mangulahon na sittong. Alana godaan lao mangulahon na sala boi do toppu muncul, songon musu na sai berupaya menyerang hita. Bahkan nang pe nungnga tardidi hita, boi dope hita tergoda mangulahon sada ulaon na seharusna tahindari, misalna marjuji, minum alkohol berlebihan, manang mangida pornografi. (Eps. 5:3, 4) Sahalak donganta bawa na poso mandok, “Sada  keinginan na paling maol hualo i ma tertarik tu sesama jenis. Didok rohakku holan satokkin do perasaan i, hape leleng do i martahan.” Aha do na boi mangurupi hamu molo muncul keinginan na sala?

15. Boasa gabe dipatogu rohatta mamboto molo keinginan na sala i “sitaonon na somal masa do i tu akka jolma”? (Ida gambar.)

¹⁵ Ingot ma dang sahalakmu na berjuang mambolokkon keinginan na sala. Bibel mandok, “Sude sitaonon na masa tu hamu, sitaonon na somal masa do i tu akka jolma.” (1 Kor. 10:13a) Ayat on ditujuhon tu akka bawa dohot borua Kristen na tinggal di Korint. Piga-piga sian nasida adong do na hea gabe pangalakkup, parmabuk, jala mangulahon seks dohot sesama jenis. (1 Kor. 6:9-11) Menurut hamu dung tardidi halak i, pittor mago do keinginan ni nasida na sala i? Daong, sai adong dope i. Nang pe nungnga dimiahi tondi parbadia nasida, jolma na so sempurna dope nasida. Alani i, ikkon torus do nasida berjuang mangalo keinginan na sala. Gabe tarapul do rohatta mamboto on. Boasa? Alana dang holan sahalakta na berjuang mangalo keinginan na sala. Godang do akka donganta naung marhasil mangatasi i. Gabe dipatogu do haporseaotta ala taboto ‘akka dongan sahaporseaotta na di liat portibi on pe manaon sitaonon na songon i do’.​—1 Ptr. 5:9.

16. Cara marpikkir na songon dia do na ikkon tahindari?

¹⁶ Unang ma didok rohatta dang adong na mangattusi tantangan na taadopi. Alana molo songon i pikkiranta, gabe kecil hati ma hita jala dang olo be hita berjuang mangalo keinginan na sala. Hape Bibel mandok, “Toktong do dipasaut Debata sude hatana. Dang pasombuonna hamu manaon sitaonon lobi sian na tolapmuna. Jala molo adong sitaononmuna,  patuduonna do tu hamu dalan asa boi hamu sabar jala martahan manaon i.” (1 Kor. 10:13b) Jadi nang pe kuat keinginanmuna lao mangulahon na sala, alai boi do hamu marhasil mangatasi i marhite bantuan ni Jahowa.

17. Nang pe sipata ro muse keinginan na sala tu pikkiranta, aha do na boi taulahon?

¹⁷ Ingot ma on: Ala jolma na so sempurna hita, pasti sai ro do keinginan na sala tu pikkiranta. Alai molo ro keinginan na sala i, pittor hatop ma tatolak i. Tatiru ma si Josep. Pittor lari do ibana tikki digoda istri ni si Potifar. (1 Mus. 39:12) Unang ma oloi hamu keinginan na sala i!

18-19. Sukkun-sukkun aha do na porlu tapikkirhon tikki paubahon pikkiranta?

¹⁸ Penting do paubahon cara marpikkirta. Artina, tapastihon ma cara marpikkir dohot parniulaotta sesuai tu lomo ni roha ni Jahowa. Rimangi ma sukkun-sukkun on: ‘Hupatudu do sian tindakanku na massai jonok ujung ni portibi na jahat on? Torus do au berupaya mamakke pangalaho na imbaru? Hupaloas do tondi parbadia ni Jahowa mangurupi au manolak keinginan na sala?’

¹⁹ Unang ma tapaksa diritta ikkon sempurna. Alai las ma rohatta ala nungnga berupaya hita mambahen kemajuan. Molo taida adong na porlu tapadenggan sian diritta, unang ma gabe kecil hati hita. Alai taihutton ma nasehat di Pilippi 3:16 na mandok, “Molo nungnga togu haporseaotta, toktong ma taulahon songon naung taulahon saleleng on.” Molo taulahon i, pos ma rohatta pasu-pasuon ni Jahowa do upayatta lao paubahon pikkiranta.