1-2. Ise do si Sadok? (1 Kronika 12:​22, 26-28)

 BAYAKKON ma adong lobi sian 340.000 bawa na marpungu lao mambahen si Daud gabe raja di Israel. Saleleng tolu ari, tinggal ma nasida di inganan na mardolok-dolok di jonok ni Hebron. Disi makkata-hatai do nasida, mekkel, jala marende lao mamuji Jahowa. (1 Kron. 12:39) Sada sian nasida, i ma sahalak doli-doli na margoar si Sadok. Mungkin dang adong na mamboto molo si Sadok adong di punguan i. Alai lomo do roha ni Jahowa asa taboto adong do si Sadok disi. (Jaha 1 Kronika 12:​22, 26-28.) Ise do si Sadok?

² Si Sadok, i ma sahalak malim na jotjot bekerja sama dohot Sintua ni Malim Abiatar. Dilehon Jahowa do godang bisuk tu si Sadok dohot kemampuan lao mangattusi lomo ni roha ni Jahowa. (2 Sam. 15:27) Biasana tu si Sadok do akka halak mangido poda. Sahalak na barani do tong ibana. Di artikel on, taparsiajari ma taringot habaranion ni si Sadok.

3. (a) Boasa ikkon barani naposo ni Jahowa? b) Aha do na lao tabahas di artikel on?

³ Saleleng ari parpudi on, lam berupaya do Sibolis naeng manegai hubungatta tu Jahowa. (1 Ptr. 5:8) Alani i ma ikkon barani do hita sambil paimahon Jahowa manghancurhon Sibolis dohot portibi na jahat on. (Ps. 31:24) Tabahas ma tolu cara lao maniru habaranion ni si Sadok.

 DUKUNG MA HARAJAON NI DEBATA

4. Boasa ikkon barani naposo ni Jahowa lao mendukung Harajaonna? (Ida gambar.)

⁴ Ala Saksi Jahowa hita, pasti lomo do rohatta mendukung Harajaon ni Debata. Alai porlu do hita barani lao mangulahon i. (Mat. 6:33) Misalna, porlu do hita barani asa boi mangihutton aturan ni Jahowa dohot marbarita na uli. (1 Tes. 2:2) Jala ikkon barani do hita asa tetap netral di ulaon politik na mambahen akka halak dang marsada be. (Joh. 18:36) Asing ni i, godang do donganta na susa di parhepengon, dianiaya, manang na gabe dipenjara ala dang olo nasida dohot tu ulaon politik manang dinas militer.

5. Boasa ikkon barani si Sadok lao mendukung si Daud?

⁵ Sebenarna lao pe si Sadok tu Hebron dang holan lao mambahen si Daud gabe raja. Alai diboan ibana do sinjatana jala rade lao marporang. (1 Kron. 12:38) Lomo do rohana mendukung si Daud di parporangan jala melindungi halak Israel sian akka musu. Memang dang godang pengalaman ni si Sadok gabe tentara, alai barani do ibana.

6. Aha do na diulahon si Daud na gabe sitiruon tu si Sadok? (Psalmen 138:3)

⁶ Jadi, aha do na mambahen si Sadok gabe barani? Godang do akka bawa na gogo jala na barani na boi ditiru ibana. Contohna si Daud. Ala barani si Daud “mamimpin halak Israel marporang”, rade ma nasida mendukung si Daud gabe raja. (1 Kron. 11:​1, 2) Asing ni i, sai diandalhon si Daud do Jahowa tikki mangadopi akka musuna. (Ps. 28:7; jaha Psalmen 138:3.) Adong muse akka bawa na asing na boi ditiru si Sadok. Contohna si Jehoyada dohot anakna si Benaya, dohot 22 pamimpin na asing. (1 Kron. 11:​22-25; 12:​26-28) Akka bawa on marsitutu do lao mambahen si Daud gabe raja jala rade do nasida melindungi ibana.

7. (a) Aha do na boi taparsiajari sian sitiruon na dipatudu akka na poso saonari on? (b) Aha do na boi taparsiajari sian donganta si Nsilu, songon na dipatudu di video?

 ⁷ Hita pe boi do lam margogo jala barani molo tarimangi akka halak na rade mendukung pamarettaon ni Jahowa. Rajatta Jesus Kristus tegas do menolak asa unang terlibat tu ulaon politik di portibi na dirajai Sibolis. (Mat. 4:​8-11; Joh. 6:​14, 15) Sai diandalhon Jesus do Jahowa asa boi margogo. Saonari pe, godang do sitiruon sian akka na poso, na so olo terlibat tu akka ulaon politik manang tu dinas militer. Boi do tajaha taringot nasida di situs web jw.org. a

URUPI MA AKKA DONGAN

8. Tikki sadihari do akka sintua porlu patuduhon habaranion?

⁸ Las do roha ni naposo ni Jahowa marsiurupan. (2 Kor. 8:4) Alai sipata ikkon barani do nasida mangulahon i. Misalna tikki masa porang, diboto akka sintua do na porlu akka dongan diurupi mandapot sipanganon, pakkean, dohot tempat tinggal. Jala porlu do nasida dipatogu asa toktong jonok tu Jahowa. Holong do roha ni akka sintua tu nasida. On ma alasanna boasa rade akka sintua mangurupi nasida, nang pe gabe terancam ngolu ni akka sintua. (Joh. 15:​12, 13) Sasittongna tikki diulahon akka sintua i, na maniru habaranion ni si Sadok do nasida disi.

9. Songon na disurat di 2 Samuel 15:​27-29, aha do na diparettahon si Daud tu si Sadok? (Ida gambar.)

⁹ Taparrohahon ma songon dia si Sadok mangurupi donganna di situasi na berbahaya. Berupaya do si Absalom, anak ni si Daud, pamatehon si Daud asa ibana na gabe raja. (2 Sam. 15:​12, 13) Jadi ikkon hatop do si Daud lari sian Jerusalem. Dijou ibana ma akka parkarejona, “Beta, lari ma hita sian on. Ai molo dung ro si Absalom, dang adong sian hita na boi malua!” (2 Sam. 15:14) Dung lari  akka parkarejona, disadari si Daud ma, ikkon adong do halak na tetap di Jerusalem asa boi paboahon rencana ni si Absalom. Jadi, disuru si Daud ma si Sadok dohot akka malim na asing mulak muse tu Jerusalem gabe mata-mata. (Jaha 2 Samuel 15:​27-29.) Ikkon manat do nasida mangulahon tugas i. Alana boi do terancam ngolu ni nasida. Halak na kejam jala egois do si Absalom. Tega do ibana menghianati bapakna sandiri. Jadi bayakkon ma aha na lao diulahon si Absalom molo diboto ibana na dimata-matai si Sadok dohot akka malim na asing do ibana.

10. Songon dia do si Sadok dohot akka donganna melindungi si Daud?

¹⁰ Disukkun si Daud do pandapot ni si Sadok dohot donganna na asing, i ma si Husai. Dibahen nasida ma rencana. (2 Sam. 15:​32-37) Jadi direncanahon nasida ma asa berpura-pura si Husai mendukung si Absalom jala mangalehon nasehat taringot carana mangalo si Daud. Hape sasittongna marhite rencana i, gabe adong ma tikki di si Daud lao menyerang si Absalom. Dung dioloi si Absalom nasehat i, dipaboa si Husai ma i tu si Sadok dohot si Abiatar. (2 Sam. 17:​8-16) Dung i, dikirim si Sadok dohot si Abiatar ma hatorangan i tu si Daud. (2 Sam. 17:17) Marhite bantuan ni Jahowa, gabe boi ma dilindungi si Sadok dohot akka malim na asing si Daud asa unang mate.—2 Sam. 17:​21, 22.

11. Boha do caratta maniru habaranion ni si Sadok tikki mangurupi akka dongan?

¹¹ Molo dipangido hamu mangurupi akka dongan di situasi na berbahaya, boha do carana asa barani hamu songon si Sadok? (1) Ihutton ma petunjuk. Di situasi sisongon i, ikkon toktong do hita marsada. Jadi oloi ma petunjuk sian kantor cabang. (Heb. 13:17) Ikkon taratur do dibahas akka sintua petunjuk taringot cara mempersiappon diri sebelum ro bencana, jala aha na porlu diulahon tikki ro bencana. (1 Kor. 14:​33, 40) (2) Barani ma hamu alai ikkon manat. (Poda 22:3)  Marbisuk ma hamu. Jaga ma dirimuna asa toktong aman. (3) Andalhon ma Jahowa. Ingot ma, lomo do roha ni Jahowa asa toktong aman hamu dohot akka donganmuna. Boi do urupanna hamu asa toktong aman tikki mangurupi donganmuna.

12-13. Aha do na boi taparsiajari sian pengalaman ni si Viktor dohot si Vitalii? (Ida gambar.)

¹² Taida ma pengalaman ni si Viktor dohot si Vitalii, dua sintua na rade mangirimhon sipanganon dohot aek tu akka dongan di Ukraina. Didok si Viktor, “Tikki dilului hami didia adong sipanganon, jotjot do dibege hami soara ni tembakan. Adong ma sahalak donganta bawa na manyumbangkon sipanganon sian gudangna. Hasilna gabe adong ma sipanganon tu akka dongan asa boi bertahan saleleng piga-piga ari. Tikki dipamasuk hami sipanganon i tu truk, madabu ma bom na jarakna hira-hira 20 meter sian hami, alai tuani ma dang meledak bom i. Di bagasan sadari i, sai martangiang do au tu Jahowa asa tetap barani mangurupi akka dongan.”

¹³ Didok si Vitalii, “12 jom do pardalananku na parjolo, jala ikkon barani do au. Sai martangiang do au tu Jahowa saleleng di pardalanan i.” Barani do si Vitalii, alai manat do tong ibana. Didok ibana muse, “Sai martangiang do au tu Jahowa asa dilehon bisuk jala asa boi hujaga keselamatanku. Holan dalan na diloas pamaretta do na hulewati. Gabe dipatogu do haporseaokku tikki mangida akka dongan bekerja sama dohot hami. Dibolokkon nasida do puing-puing sian dalan. Diurupi nasida do hami papunguhon dohot pamasukkon sipanganon, pakkean, dohot akka barang na asing tu truk. Jala dilehon nasida do tu hami sipanganon dohot inganan marborngin asa boi hami melanjutton pardalanan.”

TOKTONG MA SETIA TU JAHOWA

14. Aha do pengaruhna tu hita molo adong keluarga manang ale-aletta na maninggalhon Jahowa?

¹⁴ Sada tantangan na massai maol diadopi, i ma tikki keluarga manang ale-aletta maninggalhon Jahowa. (Ps. 78:40; Poda 24:10) Pasti borat hian do tahilala mangadopi situasi i, tarlumobi molo nungnga leleng hita jonok tu nasida. Molo songon i situasi na diadopi hamu, boi do hamu dipatogu sian contoh ni si Sadok.

15. Boasa porlu barani si Sadok asa toktong setia tu Jahowa? (1 Raja-Raja 1:​5-8)

¹⁵ Toktong do si Sadok setia tu Jahowa nang pe ale-alena, si Abiatar, dang setia tu Jahowa. On terjadi di ujung ni pamarettaon ni si Daud. Tikki nungnga matua si Daud jala naeng mate, berupaya do anakna si Adonia mambahen dirina gabe raja. Hape nungnga ditottuhon Jahowa hian asa si Salomo na gabe raja. (1 Kron. 22:​9, 10) Alai, marpihak tu si Adonia do si Abiatar. (Jaha 1 Raja-Raja 1:​5-8.) On patuduhon dang holan si Daud na dihianati si Abiatar, alai tong do Jahowa na dihianati ibana. Pasti kecewa hian do si Sadok mamboto on. Alana, nungnga lobi sian 40 taon nasida rap karejo gabe malim. (2 Sam. 8:17) Hea do nasida rap mangurus “poti parpadanan ni Debata na sittong”. (2 Sam. 15:29) Didukung nasida do pamarettaon ni si Daud jala godang do na diulahon nasida lao melayani Jahowa.—2 Sam. 19:​11-14.

16. Aha do na mangurupi si Sadok asa toktong setia?

¹⁶ Toktong do setia si Sadok tu Jahowa nang pe si Abiatar daong. Diboto si Daud, halak na boi dihaporseai do si Sadok i. Dung diboto si Daud rencana ni si Adonia, dipillit ibana ma si Sadok, si Natan, dohot si Benaya lao melantik si Salomo gabe raja. (1 Raj. 1:​32-34) Pasti dipatogu do si Sadok tikki mangida si Natan  dohot akka na asing toktong setia mendukung si Daud. (1 Raj. 1:​38, 39) Dung gabe raja si Salomo, “dipillit ibana ma muse si Sadok gabe malim manggattihon si Abiatar”.—1 Raj. 2:35.

17. Molo adong keluarga manang ale-alemuna na maninggalhon Jahowa, songon dia do hamu maniru si Sadok?

¹⁷ Boha do carana asa boi ditiru hamu si Sadok? Molo adong keluarga manang ale-alemuna na maninggalhon Jahowa, takkas ma patudu na toktong do hamu setia tu Jahowa. (Jos. 24:15) Dilehon Jahowa do gogo dohot habaranion tu hamu asa boi mangulahon na sittong. Martangiang ma tu Jahowa jala toktong ma jonok tu akka dongan na setia tu Ibana. Diargai Jahowa do kesetiaanmuna, jala pasti pasu-pasuonna do hamu.—2 Sam. 22:26.

18. Aha do na diparsiajari hamu sian pengalaman ni si Marco dohot si Sidse?

¹⁸ Parrohahon ma pengalaman ni si Marco dohot istrina si Sidse. Dang Saksi Jahowa be dua boru ni nasida. Didok si Marco, “Holong hian do rohamuna tu gellengmuna mulai sian tubu nasida. Diulahon hamu do manang aha pe lao melindungi nasida sian bahaya. Jadi tikki dipillit nasida maninggalhon Jahowa, pasti hancur hian perasaanmuna.” Didok ibana, “Alai diurupi Jahowa do hami asa margogo manaon i. Dibahen Jahowa do asa boi hami masipatoguan. Molo lungun rohakku, istrikku ma na patoguhon au. Songon i ma sebalikna”. Didok si Sidse, “Dang sanggup hami mangadopi i molo dang dilehon Jahowa gogo tu hami. Lungun hian huhilala. Jotjot do husalahon dirikku alani situasi on. Jadi hupaboa ma perasaanki tu Jahowa. Dung piga-piga ari, ro ma sahalak donganta borua. Nungnga martaon-taon hami dang pajuppang. Tikki di Bale Harajaon, dihaol jala ditatap ibana ma au, jala didok, ‘Pos ma roham Sidse, dang salamuna on!’ Ala diurupi Jahowa, gabe toktong ma au marlas ni roha manomba Ibana.”

19. Aha do tekadmuna?

¹⁹ Lomo do roha ni Jahowa asa barani naposona songon si Sadok. (2 Tim. 1:7) Alai dang lomo rohana molo taandalhon diritta. Lomo do roha ni Jahowa asa taandalhon Ibana. Jadi molo borat sitaononmuna jala porlu di hamu habaranion, martangiang ma tu Jahowa. Pos ma rohamuna pasti bahenon ni Jahowa do hamu barani songon si Sadok.—1 Ptr. 5:10.