1. Di Psalmen 18:​46, dipatudos songon aha do Jahowa?

 DI TIKKITTA saonari on, olo do toppu ro masalah na mambahen muba ngolutta. Alai mandok mauliate do hita tu Jahowa ala diurupi Ibana do hita. Di artikel sebelumna, dipaingot do hita molo Jahowa i Debata na mangolu jala sai rade do Ibana mangurupi hita. Tikki diurupi Jahowa hita, gabe sarupa ma pakkilalaatta songon si Daud na mandok, “Debata na mangolu do Jahowa!” (Jaha Psalmen 18:46.) Alai dung didok si Daud songon i, dipatudos Ibana do Debata i songon benda mati. Didok ibana do, Jahowa “Dolok Batukku”. Aha do lapatan ni hata ni si Daud i?

2. Aha do na lao dibahas di artikel on?

² Di artikel on lao tabahas ma boasa Jahowa dipatudos songon dolok batu, jala aha do na boi taparsiajari taringot Ibana sian i. Tabahas ma muse songon dia hita mangandalhon Ibana gabe Dolok Batutta. Asing ni i, tabahas do muse songon dia carana maniru sifat ni Jahowa na songon dolok batu.

BOASA JAHOWA DIPATUDOS SONGON DOLOK BATU

3. Paboa ma akka ayat di Bibel na manggombarhon Jahowa songon “dolok batu”. (Ida sampul.)

³ Di Bibel, dipatudos do Jahowa songon “dolok batu” asa boi hita mambayakkon akka sifatna. Jotjot do naposo ni Jahowa najolo mandok Jahowa songon dolok batu lao mamuji akka sifatna na luar biasa. Di 5 Musa 32:4 do parjolo sahali Jahowa didok songon “Dolok Batu”. Tikki martangiang si Hanna, didok ibana do, “Dang adong dolok batu na songon Debatanta.” (1 Sam. 2:2) Molo si Habakuk, didok ibana do Jahowa “Dolok Batukku”. (Hab. 1:12) Jala Jahowa sandiri pe mandok Ibana songon dolok batu. (Jes. 44:8) Saonari, tabahas ma tolu sifat  na mambahen Jahowa songon dolok batu, jala songon dia hita mangandalhon Ibana gabe “Dolok Batutta”.​—5 Mus. 32:31.

4. Boasa boi tadok Jahowa gabe inganan parlinggoman di hita? (Psalmen 94:22)

⁴ Dilinggomi Jahowa do hita tikki susa. Tikki ro badai, boi do sasahalak marlinggom di gua na adong di dolok batu. Dos songon i ma, dilinggomi Jahowa do hita tikki masa hasusaan di ngolutta. (Jaha Psalmen 94:22.) Dijaga Jahowa do hita, jala dipapos Ibana do rohatta holan parsatokkinan do sitaonon na taadopi saonari. Gariada, marjanji do Jahowa di ari na naeng ro salpuhononna do sude na mambahen hita marsak jala susa.​—Hes. 34:​25, 26.

5. Boha do caratta mambahen Jahowa gabe Inganan Parlinggomanta?

⁵ Sada cara asa boi hita dilinggomi Jahowa, i ma martangiang tu Ibana. Tikki martangiang hita, dilehon Jahowa do tu hita “hadameon na so boi diattusi jolma” na boi manjaga roha dohot pikkiranta. (Plp. 4:​6, 7) Taida ma pengalaman ni si Artem, donganta na dipenjara alani haporseaonna. Tikki di penjara mulak-ulak do ibana diinterogasi, diancam, jala dileai. Didok si Artem, “Sai marsak do au molo diinterogasi. . . . Alani i, sai martangiang do au tu Jahowa. Hupangido ma asa dilehon tu au dame ni roha dohot bisuk.” Aha do hasilna? Didok si Artem muse, “Nang pe dianiaya au, boi do au tetap tenang. . . . Hira na marlinggom di balik dolok batu do huhilala ala sai dilindungi Jahowa.”

6. Boasa holan Jahowa na boi taandalhon? (Jesaya 26:​3, 4)

⁶ Setia do Jahowa jala dang tadikkononna hita. Songon dolok batu na sai hot di ingananna, Jahowa pe sai rade do lao mangurupi hita. Ala “Dolok Batu na hot saleleng ni lelengna” do Jahowa, boi do tahaporseai Ibana. (Jaha Jesaya 26:​3, 4.) Sai adong do Jahowa sahat tu saleleng ni lelengna. Alani i boi do Ibana manggohi sude janjina, mambege tangiangta, jala patoguhon hita. Boi do muse taandalhon Jahowa ala setia do Ibana tu akka naposona. (2 Sam. 22:26) Dang dilupahon Ibana akka na taulahon, jala pasti pasu-pasuonna do hita.​—Heb. 6:10; 11:6.

7. Aha do manfaatna molo taandalhon Jahowa? (Ida gambar.)

⁷ Sada cara mambahen Jahowa gabe Dolok Batutta, i ma molo taandalhon Ibana. Pos do rohatta pasti dapotta do manfaat molo taoloi Ibana nang pe susa situasitta. (Jes. 48:​17, 18) Tikki taida songon dia Jahowa mangurupi hita, gabe lam tamba ma haporseaotta tu Ibana. Jala gabe pos do rohatta, holan Jahowa do na boi mangurupi hita mangadopi sitaonon manang aha pe na lao masa annon. Jotjotan tikki masa situasi na maol, dang adong halak na boi mangurupi hita. Di tikki i ma gabe tasadari, holan Jahowa do na boi taandalhon. I ma na dihilala donganta si Vladimir. Didok ibana, “Tikki ditahan au, disi ma huhilala jonok hian hubunganku dohot Jahowa. Gabe husadari ma ikkon marhaposan tu Jahowa do au. Alana holan sahalakku do jala holan Jahowa do na boi mangurupi au.”

8. (a) Boasa boi tadok dang muba-uba Jahowa? (b) Aha do manfaatna molo tabahen Jahowa gabe Dolok Batutta? (Psalmen 62:​6, 7)

 ⁸ Dang muba-uba Jahowa. Dos songon dolok batu na balga do Jahowa na sai hot di ingananna. Dang hea muba sifat dohot sakkap ni Jahowa. (Mal. 3:6) Misalna, nang pe dialo si Adam dohot si Hawa Jahowa, dang diuba Ibana sakkapna tu jolma. Songon na didok Apostel Paulus, ‘dang ulahonon ni Jahowa na maralo tu lomo ni rohana’. (2 Tim. 2:13) Jadi, dang soal aha na masa manang aha na diulahon na asing, dang hea muba Jahowa. Alani i gabe pos ma rohatta, pasti urupanna do hita di tikki susa jala pasti pasautonna do janjina di ari na naeng ro.—Jaha Psalmen 62:​6, 7.

9. Aha do na boi taparsiajari sian pengalaman ni si Tatyana?

⁹ Boha do caratta mambahen Jahowa gabe Dolok Batutta? Tarimangi ma akka sifat ni Jahowa dohot sakkapna tu jolma dohot tu tano on. Molo tabahen songon i, gabe boi ma hita tetap tenang jala setia tu Jahowa nang pe marsitaonon. (Ps. 16:8) On ma na diulahon donganta borua na margoar si Tatyana. Gabe tahanan rumah do ibana alani haporseaonna. Didok si Tatyana, “Mulana maol hian do huhilala alana holan sahalakku do. Jotjot do metmet rohakku.” Alai, tikki dirimangi ibana songon dia sitaononna i adong kaitanna tu sakkap ni Jahowa, gabe boi ma ibana tetap tenang jala margogo asa toktong setia tu Jahowa. Didok ibana muse, “Saonari, nga huattusi be boasa masa songon on tu au. Gabe huboto ma, masa pe on ala holong do rohakku tu Jahowa jala lomo rohakku mambahen las rohana. Ujungna, dang holan dirikku sandiri be na sai hupikkiri.”

10. Sian saonari, boha do carana mambahen Jahowa gabe Dolok Batutta?

¹⁰ Satokkin nai lao masa ma situasi na maol di ngolutta. Jala ikkon taandalhon do Jahowa lobi sian na sebelumna. Jadi saonari ma tikkina patoguhon haporseaotta tu Jahowa. Jala pos ma rohatta, urupanna do hita asa toktong setia tu Ibana manang songon dia pe situasina. Boha do carana patoguhon haporseaotta? Jaha ma akka pengalaman ni naposo ni Jahowa na disurat di Bibel dohot na di jamanta saonari. Parrohahon ma songon dia Jahowa mangurupi nasida. Bagas ma rimangi akka pengalaman i. Molo dibahen hamu songon i, gabe boi ma dibahen hamu Jahowa songon Dolok Batumuna.

MANIRU SIFAT NI JAHOWA NA SONGON DOLOK BATU

11. Boasa lomo rohatta maniru sifat ni Jahowa na songon dolok batu? (Ida kotak “ Cita-Cita na Boi Dibahen Akka na Poso.”)

¹¹ Nungnga tabahas nakkin akka sifat ni Jahowa na dos songon dolok batu. Saonari tabahas ma songon dia caratta maniru akka sifatna i. Molo marsitutu hita maniru sifat ni Jahowa i, gabe boi do hita patoguhon akka donganta. Najolo digoari Jesus do si Simon  gabe si Kepas manang si Petrus, na lapatanna “Batu”. (Joh. 1:42) On patuduhon ibana ma na lao mangapuli akka dongan di huria jala patoguhon haporseaon ni nasida. Asing ni i, akka sintua di huria pe digombarhon do songon “batu na balga” na boi gabe inganan parlinggoman. Lapatanna dilinggomi nasida do akka dongan di huria. (Jes. 32:2) Alai sude hita boi do patoguhon akka dongan na asing molo tatiru sifat ni Jahowa on.—Eps. 5:1.

12. Paboa ma songon dia carana hita boi gabe inganan parlinggoman tu akka dongan.

¹² Taurupi ma akka donganta tikki susa. Molo hancur jabu ni akka donganta alani bencana alam manang porang, boi do tatogihon nasida asa tinggal di jabutta. Lam tu susana do annon parngoluotta di “ari parpudi” on. Jadi, lam godang ma kesempatan tu hita lao mangurupi akka donganta. (2 Tim. 3:1) Boi do taapuli akka donganta jala tapatudu ma na holong do rohatta tu nasida. Sada cara lao mangulahon i, tasambut ma akka donganta tikki ro tu parpunguan. Lomo do rohatta asa nyaman nasida tikki marpungu. Godang do halak di portibi on na kasar. Boi do on mambahen akka donganta gabe marsak jala merasa dang dihaholongi. Alani i, tikki ro nasida tu parpunguan, lomo do rohatta patoguhon nasida, jala tapatudu ma na holong do rohatta tu nasida.

13. Songon dia carana akka sintua boi gabe inganan parlinggoman tu akka dongan? (Ida gambar.)

¹³ Boi do akka sintua gabe inganan parlinggoman tu akka donganna. Saleleng bencana alam dohot situasi darurat medis, pittor hatop do akka sintua mambahen pengaturan lao mangurupi akka dongan. Jala diapuli nasida do akka dongan i. Molo lambok sahalak sintua, mangattusi perasaan ni akka dongan, jala olo manangihon, gabe ummura do akka dongan mangido bantuan sian ibana. Molo dipatudu  sintua akka sifat i, gabe merasa dihaholongi ma akka dongan. Jala gabe ummura ma di nasida mangihutton petunjuk na sian Bibel na dilehon sintua.—1 Tes. 2:​7, 8, 11.

14. Songon dia do carana patuduhon na boi do hita gabe halak na diandalhon?

¹⁴ Gabe halak na boi diandalhon ma hita. Lomo do rohatta asa diboto halak, na boi do hita diandalhon tarlumobi tikki susa situasi ni nasida. (Poda 17:17) Songon dia do carana asa gabe halak na boi diandalhon? Marsitutu ma hita maniru sifat ni Jahowa ganup ari. Contohna, tatepati ma janjitta jala tepat waktu ma hita. (Mat. 5:37) Boi do muse taurupi akka donganta na makkaporluhon bantuan. Asing ni i, taulahon ma tugasta di huria mangihutton petunjuk na dilehon tu hita.

15. Aha do manfaatna tu akka dongan di huria molo boi diandalhon akka sintua?

¹⁵ Molo diboto akka dongan boi dihubungi akka sintua manang sadihari pe, gabe dang marsak be nasida. Asing ni i, gabe boi ma dihilala akka dongan na parduli do akka sintua tu nasida. Molo dipakke akka sintua Bibel dohot  publikasitta lao mangalehon nasehat, gabe lam pos ma roha ni akka dongan tu akka sintua. Asing ni i, pos do roha ni akka dongan tu sintua na olo menepati janji, jala na so olo paboahon masalah pribadina tu halak na asing.

16. Aha do manfaatna tu hita dohot tu akka dongan molo sai taihutton paretta ni Jahowa?

¹⁶ Toktong ma ulahon paretta ni Jahowa. Molo sai taulahon paretta ni Jahowa jala taihutton prinsip ni Bibel tikki mambahen keputusan, gabe sitiruon ma hita tu halak na asing. Molo belajar pribadi hita, jala tapatogu haporseaotta tu Jahowa, gabe boi ma hita toktong setia tu Ibana jala mangihutton parettana. Asing ni i, gabe dang tarihut-ihut ma hita tu ajaran na sala dohot cara marpikkir na so sadalan tu cara marpikkir ni Jahowa. (Eps. 4:14; Jak. 1:​6-8) Ala porsea hita tu Jahowa dohot tu janjina, gabe boi ma hita toktong tenang tikki tabege barita na so denggan. (Ps. 112:​7, 8) Jala gabe boi ma hita mangurupi akka halak na mangadopi sitaonon.​—1 Tes. 3:​2, 3.

17. Boha do cara ni akka sintua mangurupi akka dongan asa toktong tenang jala asa togu haporseaon ni nasida tu Jahowa?

¹⁷ Akka sintua, i ma akka halak na boi mangarajai dirina, marbisuk, taratur, jala masuk akkal. Molo diihutton nasida ajaran na sittong, boi ma nasida mangurupi akka dongan asa toktong tenang jala asa togu haporseaon ni akka dongan tu Jahowa. (Tit. 1:9; 1 Tim. 3:​1-3) Marhite kunjungan penggembalaan dohot sitiruon na dibahen nasida, diurupi akka sintua do akka dongan di huria asa toktong ro tu parpunguan, marbarita jala pelajaran pribadi. Tikki adong masalah ni akka dongan, dijujui akka sintua do nasida asa marpos ni roha tu Jahowa dohot tu janjina.

18. Boasa lomo rohatta mamuji Jahowa jala jonok tu Ibana? (Ida kotak “ Cara asa Lam Jonok tu Jahowa”.)

¹⁸ Dung tabahas akka sifat ni Jahowa na luar biasa, gabe sarupa ma perasaanta songon Raja Daud. Didok ibana do, “Pinuji ma Jahowa Dolok Batukku.” (Ps. 144:1) Sai boi do taandalhon Jahowa. Nang pe lam matua hita, pos ma rohatta sai urupanna do hita asa toktong jonok tu Ibana. Jala boi ma tadok, “Ibana do Dolok Batu di au.”​—Ps. 92:​14, 15.