Au tubu di tanggal 22 November 1929 di Noville, huta na gelleng di jonok ni Bastogne, Belgia. Adong sia peternakan di hutanami. Las do rohakku mangurupi natua-tuakku di peternakan sian na gelleng. Ganup ari, memeras susu ni lombu do au dohot anggikku si Raymond jala marladang do hami. Nang pe gelleng hutanami alai kompak do hami na martetangga, jala marsiurupan do hami.

Natua-tuakku goarna si Emile dohot si Alice, jala maragama Katolik do nasida. Ganup Minggu sai ro do nasida tu acara Misa. Alai hira-hira taon 1939, ro ma perintis sian Inggris tu hutanami jala ditawarhon nasida do bapakku berlangganan majalah Consolation (saonari digoari Dungo ma!). Pittor disadari bapakku ma hasittongan do na dipaboa di majalah i, jala mulai ma ibana manjaha Bibel. Dukkon i, dang ro be ibana tu acara Misa. Gabe ditentang akka tetangganami ma ibana, hape sebelumna kompak do bapa dohot nasida. Sai jotjot do nasida marsoal ala dipaksa nasida bapa asa toktong di Katolik.

Lungun do rohakku ala dibahen nasida songon i tu bapa. Jadi martangiang ma au tu Jahowa, songon na hupaboa di mula ni artikel on. Dukkon i, dang ditentang akka tetangganami be bapakku. Las hian do rohakku, jala mulai sian i gabe pos do rohakku tutu do Jahowa “Sitangihon tangiang”.

Di tanggal 10 Mei 1940, ro ma Nazi Jerman menguasai Belgia. Akibatna godang do na ikkon melarikan diri sian negara i, termasuk do keluarganami. Lao ma hami tu sabola selatan ni Prancis. Saleleng di pardalanan, jotjot do tarancam ngolunami, alana marporang do tentara ni Jerman dohot tentara ni Prancis.

Dung i, boi ma muse hami mulak tu peternakannami. Alai diida hami ma nga ditakko be hampir sude artanami. Holan biangnami si Bobbie do na ro manjakkon hami. Gabe sukkun-sukkun ma  rohakku, “Boasa ikkon masa porang? Gabe susa jolma alani i.”

Saleleng masa porang, dipatogu do hami sian kunjungan ni donganta si Emile Schrantz, a sahalak sintua dohot perintis na setia. Takkas do dipatorang ibana sian Bibel boasa masa hasusaan, jala dialusi ibana do sukkun-sukkunku na asing taringot parngoluon on. Gabe berupaya ma au pajonokkon dirikku tu Jahowa jala gabe pos rohakku Debata parholong do Ibana.

Nang pe dang sae dope porang, alai boi do hami sekeluarga bergaul dohot akka dongan sahaporseaon. Di bulan Agustus 1943, ro ma donganta si José-Nicolas Minet tu peternakannami lao pasahatton jamita. Disukkun ibana ma, “Ise do sian hamu na olo tardidi?” Martudu ma bapa dohot au. Tardidi ma hami di sunge na gelleng, di jonok ni peternakannami.

Di bulan Desember 1944 dibahen tentara Jerman ma serangan ni nasida na parpudi, digoari ma i Pertempuran Bulge. Hami tinggal di jonok ni lokasi porang i, jala hira-hira sabulan ma hami tinggal di ruang bawah tanah. Hea ma tikki naeng mangalehon mangan pinahan, toppu ma adong na menembakkon atap ni lumbungnami. Dung i, ro ma sahalak tentara Amerika tu jonokku. Gogo do soarana mandok, “Tiarap!” Lari ma au mandapotton ibana jala tiarap ma au di jonokna. Dung i dibahen ibana ma helmna tu ulukku lao melindungi au.

Dung sae porang, diatur hami ma asa boi torus berkomunikasi dohot akka dongan di huria na di Liège. Hira-hira 90 kilometer tu sabola utara ma i sian inganannami. Dibahen hami ma sada kelompok na gelleng di Bastogne. Mulai ma au karejo di kantor pajak, jala sikkola ma au di bagian hukum. Dung i, karejo ma au di kantor pemerintahan. Di taon 1951, dibahen hami do kebaktian wilayah di Bastogne. Hira-hira 100 halak do na ro tu kebaktian i, termasuk ma i si Elly Reuter, sahalak perintis na bersemangat. Marsepeda do ibana 50 kilometer daona asa boi ro tu kebaktian. Saling cinta do hami. Dung i martunangan ma hami. Hape baru dope dapot ni si Elly undangan lao tu  Sikkola Gilead di Amerika Serikat. Jadi dibahen si Elly ma surat lao paboahon boasa ditolak ibana undangan i. Denggan do dialusi donganta si Knorr suratna. Di tikki i, donganta si Knorr do na martanggung jawab di organisasi. Didok ibana, mungkin sada tikki boi do si Elly dohot tu Sikkola Gilead raphon suamina. Dung i menikah ma hami di bulan Februari 1953.

Laos di taon i, ro do hami tu Kebaktian Masyarakat Dunia Baru na dibahen di Yankee Stadium, New York. Disi pajuppang ma au dohot sahalak donganta bawa na menawarhon karejo na mantap tu au jala mengajak hami asa pinda tu Amerika Serikat. Dung ditangiakkon hami tu Jahowa taringot i, diputusson hami ma menolak tawaran i jala mulak tu Belgia lao mangurupi sappulu penyiar di kelompok na gelleng di Bastogne. Sataon dukkon i, las do rohanami ala tubu anaknami si Serge. Alai pitu bulan dukkon i, marsahit jala marujung ngolu do anaknami i. Dipaboa hami ma lungun ni rohanami tu Jahowa, jala dipatogu do hami alani janji taringot haheheon.

Di bulan Oktober 1961, dapottu ma karejo paruh waktu. Gabe kesempatan do on di au lao merintis. Alai laos di ari i, ditelepon hamba cabang di Belgia do au jala disukkun ma au rade do au gabe hamba wilayah (saonari digoari pengawas wilayah) manang na dang. Nikku ma, “Boi do jolo gabe perintis au andorang so hujalo tugas on?” Setuju do ibana. Dung ualu bulan gabe perintis, ditugasson ma au gabe pengawas wilayah di bulan September 1962.

Dua taon dung gabe pengawas wilayah au, diundang ma hami lao melayani di Betel na di Brussels. Masuk Betel ma hami di bulan Oktober 1964. Godang do pasu-pasu na dapotnami di tugas na baru on. Dang leleng dung ro donganta si Knorr tu Betel taon 1965, tarsonggot do au ala dilantik gabe hamba cabang. Dung i diundang do au dohot si Elly tu Sikkola Gilead kelas ke-41. Tutu do na didok donganta si Knorr 13 taon sebelumna! Dung wisuda, mulak ma hami tu Betel Belgia.

Saleleng martaon-taon, dapottu do kesempatan lao mamakke parbinotoanku di bidang hukum. Parbinotoakki hupakke do lao membela naposo ni Jahowa di Eropa dohot di negara na asing asa bebas nasida beribadat. (Plp. 1:7) Alani tugas on, gabe boi ma au menghubungi akka pejabat di lobi sian 55 negara na mangorai manang membatasi ulaonta. Dang pengalamanku taringot hukum na huanggarhon, alai hupatandahon do dirikku sahalak “parhobas ni Debata”. Sai martangiang do au tu Jahowa ala huboto “dos songon aek na mardalan do roha ni raja di tangan ni Jahowa. Ibana do na manottuhon tudia pe lomo ni rohana”.—Poda 21:1.

Hea ma sada tikki makkatai au dohot anggota Parlemen Eropa. Sebelumna nga mulak-ulak au mangido waktuna asa boi hami makkatai. Ujungna  setuju do ibana. Didok ibana, “Olo. Alai holan lima menit da, dang lobi sian i.” Hupaunduk ma ulukku jala martangiang ma au. Bingung do ibana mamereng au. Gabe disukkun ibana ma au. Nikku ma, “Na mandok mauliate do au tu Debata ala parhobas ni Debata do ho.” Didok ibana ma, “Aha do maksudmu?” Hupatudu ma tu ibana Rom 13:4. Ala maragama Protestan do ibana, diboto ibana do Bibel jala diargai ibana do isina. Ujungna gabe dilean ibana ma waktuna satonga jom makkatai dohot au, jala tabo do pakkataionnami. Gariada diargai ibana do organisasitta.

Saleleng martaon-taon, berjuang do naposo ni Jahowa mangadopi godang kasus hukum di Eropa. Contohna taringot kenetralan, hak asuh anak, pajak, dohot na asing. Sada hasangapon do di au boi mambela naposo ni Jahowa jala mangida songon dia Jahowa mambahen hita monang di godang kasus i. Monang do Saksi Jahowa di lobi sian 140 kasus hukum di Mahkamah Eropa untuk Hak Asasi Manusia!

Saleleng taon 1990-an, kerja sama do au dohot donganta si Philip Brumley sian kantor pusat dohot donganta si Valter Farneti sian Italia, lao mangurupi akka dongan na di Kuba asa bebas beribadat tu Jahowa. Alana diorai do ulaonta disi. Hubahen ma surat tu kedutaan besar Kuba di Belgia. Dung i pajuppang ma au dohot sahalak pejabat na disuru lao menangani permohonan i. Saleleng pertemuan na parjolo, dang marhasil hami mambahen asa unang salah paham be pamaretta tu ulaonta na di Kuba.

Dung martangiang hami tu Jahowa, dipangido hami ma ijin asa boi mangirim 5.000 Bibel tu Kuba. Dapotnami ma ijin i, jala sahat ma Bibel i di Kuba. Dibagihon ma i tu akka dongan. Gabe pos do rohanami, na dipasu-pasu Jahowa do upayanami. Dung i dipangido hami ma muse ijin asa boi mangirim 27.500 Bibel. On pe disetujui do tong. Las hian do rohakku ala boi mangurupi akka dongan na di Kuba mandapot Bibel.

Jotjot do au mangunjungi Kuba lao mangurupi akka dongan asa bebas beribadat tu Jahowa. Saleleng na lao tu Kuba i, denggan do au kerja sama dohot godang pejabat.

Di taon 1994, lobi sian 1.000.000 halak na tarbunu alani pembantaian tu suku Tutsi di Rwanda. Jala adong do piga-piga donganta na dibunu. Pittor dibahen ma sada kelompok lao mangirim bantuan kemanusiaan tu akka donganta na disi.

 Tikki sahat hami di Kigali, ibukota ni Rwanda, diida hami ma nungnga ditembaki dinding ni kantor penerjemahan dohot depot publikasitta. Dibege hami do godang cerita na ngeri taringot akka donganta na ditikkam. Alai dibege hami do tong songon dia akka donganta patuduhon holong. Contohna, pajuppang do hami dohot sahalak donganta sian suku Tutsi na dilindungi sada keluarga sian suku Hutu. Ditabunihon nasida do donganta na suku Tutsi i di lubang bawah tanah saleleng 28 ari. Saleleng parpunguan di Kigali, marsitutu do hami patoguhon lobi sian 900 donganta.

Dung i menyeberang ma hami tu perbatasan lao tu Zaire (saonari digoari ma i Republik Demokratik Kongo). Tujuanna lao mangalului godang donganta sian Rwanda na gabe melarikan diri tu kamp pengungsi di kota Goma. Ala dang dapotnami nasida, martangiang ma hami tu Jahowa asa boi pajuppang dohot nasida. Dung i adong ma sahalak bawa ro manjuppangi hami. Jadi disukkun hami ma tu ibana adong do diboto ibana Saksi Jahowa disi manang na dang. Didok ibana do, “Bah, au Saksi Jahowa do. Hutaruhon pe hamu tu tempat ni panitia penanggulangan bencana.” Ujungna pajuppang ma hami dohot panitia penanggulangan bencana i. Dung i pajuppang ma hami muse dohot lobi sian 1.600 pengungsi. Dipatogu hami do nasida, jala dijahahon hami ma surat sian Punguan na Mangaradoti. Hona do tu roha ni nasida tikki mambege hata di surat i na mandok, “Sai ditangiakkon hami do hamu. Pos do rohanami dang tadikkonon ni Jahowa hamu.” Tutu do na didok Punguan na Mangaradoti i. Saonari nungnga adong lobi sian 30.000 Saksi Jahowa di Rwanda.

Di taon 2011, marujung ngolu do si Elly. Nungnga hampir 58 taon hami menikah. Hupaboa ma tu Jahowa lungun ni rohakku jala dipatogu Ibana do au. Dipatogu do muse au ala toktong marbarita na uli.

Nang pe nga lobi 90 taon umurhu, alai torus do au marbarita ganup minggu. Las do muse rohakku ala boi mangurupi Departemen Hukum di Betel Belgia, ala boi hubagihon pengalamanku tu akka dongan, jala patoguhon akka na poso na karejo di Betel.

Hira-hira 84 taon naung salpu ma parjolo sahali au martangiang tu Jahowa. Jala i ma mulana perjalanan hidup na luar biasa na mambahen au lam jonok tu Jahowa. Mandok mauliate do au tu Jahowa ala sai ditangihon Ibana do tangiakku saleleng ni ngolukku.—Ps. 66:19. b