1. Boasa naposo ni Jahowa toktong setia manomba Jahowa nang pe marsitaonon?

 DIDOK di Bibel godang do hasusaan na taadopi di tikkitta saonari. (2 Tim. 3:1) Sarupa do sitaonon na diadopi naposo ni Jahowa songon na diadopi akka halak di portibi on. Alai dang holan i na taadopi. Olo do dianiaya hita jala diorai manomba Jahowa. Alai boasa toktong setia hita tu Jahowa nang pe mangadopi akka sitaonon i? Sada alasanna, ala taboto “Debata na mangolu” do Jahowa.—Jer. 10:10; 2 Tim. 1:12.

2. Aha do na taboto taringot Jahowa?

² Diboto Jahowa do sude sitaononta jala lomo do rohana mangurupi hita. (2 Kron. 16:9; Ps. 23:4) Molo taingot sai parduli do Jahowa tu hita jala rade mangurupi hita, gabe margogo ma hita mangadopi sitaonon manang aha pe. Saonari, taparrohahon ma pengalaman ni Raja Daud.

3. Aha do maksud ni si Daud tikki didok ibana “Debata na mangolu” do Jahowa?

³ Takkas do ditanda Raja Daud Jahowa, jala diandalhon ibana do Jahowa. Godang do musu na berupaya mambunu si Daud, termasuk ma i Raja Saul. Alai martangiang do si Daud tu Jahowa asa diurupi. (Ps. 18:6) Dung dialusi Jahowa tangiangna jala dipalua ibana, didok si Daud do, “Debata na mangolu do Jahowa!” (Ps. 18:46) Aha do maksud ni si Daud di ayat on? Sada referensi mandok, “Tikki dibahen si Daud psalmen on, dipatudu ibana do Debata na sittong do Jahowa i na sai rade mangurupi akka naposona.” Takkas do diboto si Daud, sai diparrohahon Jahowa do aha na masa tu ibana jala sai rade do Jahowa mangurupi ibana. On ma na mangonjar roha ni si Daud  asa toktong manomba jala mamuji Jahowa.—Ps. 18:​28, 29, 49.

4. Aha do manfaatna molo sai taingot Debata na mangolu do Jahowa i?

⁴ Molo pos rohatta Debata na mangolu do Jahowa, gabe taronjar ma rohatta toktong semangat manomba Ibana. Gabe margogo ma hita mangadopi sitaononta, jala gabe taronjar ma rohatta asa toktong ringgas melayani Jahowa. Asing ni i, gabe bertekad ma hita toktong jonok tu Jahowa.

PARGOGOANNA MA HAMU

5. Aha do na paposson rohamuna taringot Jahowa tikki mangadopi sitaonon hamu? (Pilippi 4:13)

⁵ Molo sai taingot Jahowa i Debata na mangolu jala rade mangurupi hita, gabe boi ma hita mangadopi sitaonon manang aha pe, na balga nang na gelleng. Manang aha pe sitaonotta, boi do Jahowa mangurupi hita. Alana Pargogo na So Hatudosan do Ibana, jala boi do dilehon Ibana gogo tu hita lao mangadopi i. (Jaha Pilippi 4:13.) On do na paposson rohatta tikki taadopi sitaonon. Tikki taida songon dia Jahowa mangurupi hita mangadopi sitaonon na gelleng, gabe pos ma rohatta pasti urupanna do hita mangadopi sitaonon na umbalga sian i.

6. Paboa ma pengalaman ni si Daud tikki poso na mambahen lam pos rohana tu Jahowa.

⁶ Taida ma jo dua pengalaman ni si Daud na mambahen lam pos rohana tu Jahowa. Tikki poso si Daud, sahalak parmahan do ibana. Hea do ro singa dohot beruang mambuat sada biru-biru ni bapakna. Di dua peristiwa on, barani do si Daud mangalele singa dohot beruang i jala boi do dipalua ibana biru-biru ni bapakna. Alai dang didok rohana alani gogona do ibana boi mangulahon i. Diboto ibana do, Jahowa do na mangalehon gogo tu ibana. (1 Sam. 17:​34-37) Dang hea dilupahon si Daud pengalamanna i. Ala sai dirimangi ibana i, gabe lam pos ma rohana, lehonon ni Debata na mangolu i do gogo tu ibana di ari na naeng ro.

7. Aha do na diingot si Daud, jala boasa i mangurupi ibana tikki mangalo si Goliat?

⁷ Dung i, tikki naeng marumur 20 taon si Daud, ro ma ibana tu perkemahan tentara ni Israel. Diida ibana ma disi, mabiar do akka tentara i ala ro si Goliat menantang nasida. Tentara ni halak Palistim do si Goliat, jala songon raksasa do ibana. (1 Sam. 17:​10, 11) Gabe mabiar do akka tentara i alani tantangan na didok si Goliat, jala balga ni pamatang ni si Goliat do na sai diida nasida. (1 Sam. 17:​24, 25) Alai asing do molo si Daud. Diboto si Daud do tikki ditantang si Goliat tentara ni Israel, sasittongna na menantang “Debata na mangolu” do ibana disi. (1 Sam. 17:26) Jahowa do na sai diingot si Daud. Diingot ibana do songon dia Debata mangurupi ibana tikki gabe parmahan. Jadi pos do rohana pasti urupan ni Debata do tong ibana di situasi on. Ala Jahowa do na diandalhon si Daud, dialo ibana ma si Goliat, jala monang ma ibana!—1 Sam. 17:​45-51.

8. Songon dia do asa lam pos rohatta tu Jahowa tikki mangadopi sitaonon? (Ida gambar.)

⁸ Boi do hita marhasil mangadopi sitaonon manang aha pe molo sai taingot Debata na mangolu do Jahowa i, na sai rade mangurupi hita. (Ps. 118:6) Songon dia do carana asa lam pos rohatta tu Jahowa? Taingot ma akka naung diulahon Ibana. Molo tajaha akka pengalaman na disurat di Bibel, gabe dipaingot do hita songon dia do Jahowa paluahon akka naposona. (Jes. 37:​17, 33-37) Asing ni i, tajaha manang tatonton ma akka laporan na adong di jw.org na patuduhon songon dia Jahowa mangurupi akka donganta di tikkitta saonari on. Jala, ingot ma songon dia Jahowa mangurupi hamu. Olo do ra dihilala hamu dang apala luar biasa pengalamanmuna, ala dang hea  dialo hamu singa manang beruang. Alai sasittongna, godang do naung diulahon Jahowa tu hamu di ngolumuna. Nungnga ditogu-togu Jahowa hamu asa boi gabe ale-alena. (Joh. 6:44) Gariada boi pe hamu toktong di organisasi ni Jahowa sahat tu saonari, ala diurupi Jahowa do hamu. Jadi tikki martangiang hamu, pangido ma tu Jahowa asa diurupi hamu mangingot songon dia Ibana mangalusi tangiangmuna, patoguhon hamu di tikki na pas, manang mangalehon sude na dihaporluhon hamu di tikki susa. Molo diingot hamu sudena i, gabe lam pos ma rohamuna urupan ni Jahowa do hamu.

9. Aha do na ikkon sai taingot tikki mangadopi sitaonon? (Poda 27:11)

⁹ Molo dianggap hamu Jahowa Debata na mangolu, pasti denggan do cara pandangmuna tikki mangadopi sitaonon. Boasa tadok songon i? Taingot ma, sitaonon na taadopi gabe bagian sian parsoalan na dibahen Sibolis lao mangalo Jahowa. Didok Sibolis do, molo marsitaonon hita, pasti tatinggalhon do Jahowa. (Job 1:​10, 11; jaha Poda 27:11.) Alai molo toktong hita setia nang pe marsitaonon, on patuduhon na holong do rohatta tu Jahowa, jala on mambuktihon dang toho na didok Sibolis i. Olo do ra diorai pamaretta hamu manomba Jahowa, maol parhepengonmuna, dang lomo roha ni akka halak di daerahmuna molo marbarita hamu, manang adong sitaononmuna na asing. Molo songon i do situasimuna, sasittongna sada kesempatan do on di hamu lao mambahen las roha ni Jahowa. Ingot ma muse, dang na lao pasombuon ni Jahowa hamu manaon sitaononmuna i lobi sian na tolapmuna. (1 Kor. 10:13) Pasti lehonon ni Jahowa do hamu gogo lao manaon i sude.

PASU-PASUONNA MA HAMU

10. Aha do na lao diulahon Jahowa tu akka naposona?

¹⁰ Sai dipasu-pasu Jahowa do akka naposona. (Heb. 11:6) Dilehon Ibana do tu hita dame ni roha dohot las ni roha na boi tahilala saonari. Jala haduan, lehononna do tu hita hangoluan salelengna. Pos do rohatta na lomo do roha ni Jahowa mangalehon pasu-pasu i tu hita jala  sanggup do Ibana mangulahon i. Alani i, toktong ma talehon na dumenggan tu Ibana songon na diulahon akka naposona najolo. On ma na diulahon si Timoteus.—Heb. 6:​10-12.

11. Boasa marsitutu si Timoteus melayani Jahowa dohot mangurupi akka donganna? (1 Timoteus 4:10)

¹¹ Jaha 1 Timoteus 4:10. Pos do roha ni si Timoteus tu Debata na mangolu i. Alani i, marsitutu do ibana melayani Jahowa dohot mangurupi akka donganna. Songon dia carana? Dijujui Apostel Paulus do ibana asa gabe guru na lam denggan di ulaon marbarita dohot di huria. Gabe sitiruon do tong si Timoteus tu akka dongan sahaporseaonna, na poso dohot na matua. Jala dilehon do tu ibana akka tugas na borat, termasuk ma i mangalehon sipasingot na tegas tu akka dongan alai toktong patuduhon holong. (1 Tim. 4:​11-16; 2 Tim. 4:​1-5) Nang pe dang adong halak na mangida kerja keras ni si Timoteus manang mandok mauliate tu ibana, alai pos do rohana pasti dipasu-pasu Jahowa do ibana.—Rom 2:​6, 7.

12. Boasa marsitutu akka sintua mangurupi huria? (Ida gambar.)

¹² Saonari pe pos do roha ni akka sintua pasti diida jala diargai Jahowa do kerja keras ni nasida. Marsitutu do akka sintua marbarita na uli, mengajar di huria, jala menggembalahon akka dongan. Alai dang holan i na diulahon nasida. Godang do akka sintua na dohot tu proyek pembangunan jala mangurupi akka dongan na hona bencana. Adong muse na gabe Kelompok Pengunjung Pasien manang Panitia Penghubung Rumah Sakit. Diboto akka sintua i do, organisasi ni Jahowa do on dang organisasi na dibahen jolma. Jadi diulahon nasida do tugas ni nasida sian nasa roha. Jala pos do roha ni nasida, pasti dipasu-pasu Jahowa do kerja keras ni nasida.—Kol. 3:​23, 24.

13. Songon dia do perasaan ni Jahowa tikki mangida upayatta lao manomba Ibana?

¹³ Memang dang sude hita boi gabe sintua. Alai adong do na boi talehon tu Jahowa. Las  do roha ni Jahowa molo talehon na terbaik lao melayani Ibana. Diida Jahowa do tikki talehon sumbangan tu ulaon Harajaon, nang pe holan otik na boi talehon. Las do rohana tikki berupaya hita tunjuk tangan lao mangalehon komentar di parpunguan, nang pe parila hita. Jala las do rohana molo tasalpuhon hasalaan ni akka dongan na mambahen jut rohatta. Jadi, nang pe holan otik na boi dilehon hamu tu Jahowa, pos ma rohamuna diargai Jahowa do i. Holong do rohana tu hamu ala dibahen hamu songon i, jala pasti pasu-pasuonna do hamu.—Luk. 21:​1-4.

TOKTONG MA JONOK TU DEBATA NA MANGOLU

14. Aha do manfaatna molo toktong hita jonok tu Jahowa? (Ida gambar.)

¹⁴ Molo taanggap do Jahowa i Debata na mangolu, gabe ummura do hita mangoloi Ibana. I ma na diulahon si Josep. Tegas do ibana menolak lao mangulahon seks na so patut. Alana dianggap ibana do Jahowa i Debata na mangolu, jala dang olo ibana mambahen haccit roha ni Jahowa. (1 Mus. 39:9) Jadi asa taanggap Jahowa i Debata na mangolu, ikkon talehon do tikkitta lao martangiang tu Ibana jala marsiajar Bibel. Molo taulahon i, gabe lam togu ma parale-aleotta dohot Ibana. Hasilna, songon si Josep gabe dang olo hita mambahen haccit roha ni Jahowa.—Jak. 4:8.

15. Aha do na boi taparsiajari sian pengalaman ni halak Israel tikki di padang gurun? (Heber 3:12)

¹⁵ Alai molo dang taanggap be Jahowa Debata na mangolu, gabe ummura ma hita dang mangoloi Jahowa. I ma na masa tu halak Israel tikki di padang gurun nasida. Disadari nasida do na tutu adong Jahowa, alai gabe ragu do nasida songon dia Jahowa annon paradehon kebutuhan ni nasida. Gariada didok nasida do, “Tutu do hita didongani Jahowa manang na dang?” (2 Mus. 17:​2, 7) Akibatna, gabe dialo nasida do Debata. Tottu dang lomo rohatta songon nasida.—Jaha Heber 3:12.

16. Aha do na boi manguji haporseaotta?

¹⁶ Akka halak di portibi on pe boi do mambahen  hita gabe maol toktong jonok tu Jahowa. Godang do halak na mandok dang tutu adong Debata. Adong muse na so mangulahon Hata ni Debata alai denggan do ngoluna taida. Di tikki sisongon i, olo do gabe diuji haporseaotta. Memang porsea do hita adong Debata. Alai olo do hita mulai ragu tutu do Debata boi mangurupi hita manang na dang. Songon i ma perasaan ni panurat Psalmen 73. Diida ibana do denggan ngolu ni akka halak na so mangulahon paretta ni Debata. Akibatna didok rohana ma, hira na so adong gunana di ibana manomba Debata.—Ps. 73:​11-13.

17. Aha do na mangurupi hita asa toktong jonok tu Jahowa?

¹⁷ Aha do na mangurupi panurat psalmen padenggatton cara marpikkirna? Dirimangi ibana do aha na lao masa tu akka halak na so porsea be tu Jahowa. (Ps. 73:​18, 19, 27) Jala, dirimangi ibana do akka pasu-pasu na dijalo ibana ala manomba Debata. (Ps. 73:24) Suang songon i ma hita, boi do tarimangi akka pasu-pasu naung dilehon Jahowa tu hita. Jala tarimangi ma muse gabe songon dia do ngolutta molo dang tasomba Jahowa. Molo tarimangi on sude, on mangurupi hita asa toktong setia tu Jahowa. Jala songon panurat psalmen, gabe tadok ma, “Alai molo au, marlaba do huhilala pajonokkon diri tu Debata.”—Ps. 73:28.

18. Boasa dang pola mabiar hita mangadopi aha na lao masa di ari na naeng ro?

¹⁸ Boi do hita mangadopi sitaonon manang aha pe saleleng ari parpudi on, alana “naposo ni Debata na mangolu dohot na sittong” i do hita. (1 Tes. 1:9) Parduli do Debatanta tu hita jala sai diurupi Ibana do hita. Nungnga dibuktihon Ibana i. Diurupi Ibana do naposona di tikki najolo, jala saonari diurupi Ibana do hita. Satokkin nai lao masa ma hasusaan bolon. Alai dang sahalakta mangadopi i, didongani Jahowa do hita. (Jes. 41:10) Anggiat ma pos rohatta mandok, “Jahowa do na mangurupi au, dang mabiar au.”—Heb. 13:​5, 6.