Asa boi tabahen las roha ni Jahowa, ikkon marhaporseaon do hita. Alai Bibel mandok, “Dang tu sude halak dilehon haporseaon i.” (2 Tes. 3:​2, Terjemahan Dunia Baru) Taringot “halak na kejam dohot na jahat” na menganiaya ibana do na didok si Paulus di ayat on. Alai dang holan nasida na termasuk halak na so porsea. Adong do piga-piga halak na so olo porsea tu Debata, hape nungnga takkas diida nasida akka bukti na tutu do adong Debata Sitoppa saluhutna. (Rom 1:20) Adong muse na mangakku porsea tu Debata. Alai dang cukkup holan asal porsea boi mambahen las roha ni Debata.

Ikkon pos do rohatta memang tutu do adong Jahowa jala Ibana do na mangalehon upa tu halak na togu haporseaonna. (Heb. 11:6) Sada sian parbue ni tondi parbadia do haporseaon i. Asa boi tadapot tondi parbadia i, ikkon martangiang do hita tu Jahowa lao mangido i. (Luk. 11:​9, 10, 13) Asing ni i, ikkon tajaha do Bibel. Alana ditogu-togu tondi parbadia do akka halak na manuratton isi ni Bibel. Dung i tarimangi ma na tajaha i jala taulahon ma. Molo taulahon i sude, boi ma tondi parbadia mangurupi hita patuduhon haporseaon di ngolutta. Hasilna, gabe boi ma tabahen las roha ni Jahowa.