Sukkun-Sukkun sian na Manjaha
Boasa boi tasimpulhon hata na disurat di Psalmen 12:7 ditujuhon tu “halak na dangol” na dipaboa di ayat 5?
Boi do taboto alusna sian sude ayat di psalmen on.
Di Psalmen 12:1-4 didok, “Dang adong be halak na boi dihaporseai di tonga-tonga ni jolma.” Dung i ayat 5 sahat tu 7 mandok,
“Didok Jahowa do, ‘Ro nama Au,
Ai nungnga disiksa be akka halak na dangol,
Jala morong-orong do akka halak na pogos,
Alani i, paluaokku ma nasida sian akka halak na leas rohana tu nasida.”
Ias do hata ni Jahowa.
Dos do i songon perak naung ditutung pitu hali di hudon tano asa ias.
Linggomanmu do nasida ale Jahowa.
Sude do nasida jagaonmu sian sundut on saleleng ni lelengna.”
Di ayat 5 didok Jahowa do paluaonna ma akka halak na dangol.
Di ayat 6 didok, ‘Ias do hata ni Jahowa songon perak naung ditutung.’ Sude do halak Kristen setuju tu ayat on.—Ps. 18:30; 119:140.
Dung i taida ma ayat 7. Didok, “Linggomanmu do nasida ale Jahowa. Sude do nasida jagaonmu sian sundut on saleleng ni lelengna.”
Ala hata ni Jahowa do na ditaringoti di ayat 6, gabe dibahen piga-piga halak ma kesimpulan hata ni Jahowa do na lao dilinggomi. Jala memang songon na taboto, dilinggomi Jahowa do Hatana nang pe berupaya akka halak lao manghancurhon i.—Jes. 40:8; 1 Ptr. 1:25.
Alai songon na didok di ayat 5, dipalua Jahowa do tong akka halak na “disiksa” dohot halak na “dangol”. Tutu do i, diurupi Jahowa do akka halak sisongon i sian najolo sahat tu saonari.—Job 36:15; Ps. 6:4; 31:1, 2; 54:7; 145:20.
Jadi aha do na dilinggomi Jahowa di ayat 7? Halak na dangol do manang hata ni Jahowa?
Molo taida sude ayat di Psalmen 12 i, takkas ma halak na dangol do maksudna disi.
Di Psalmen 12:1,2 didok masigabusan do akka halak. Akibatna gabe susa ma naposo ni Jahowa. Dukkon i tajaha, hukumon ni Jahowa do akka halak na sai mamanggar-manggar jala na marhata manggang. Dipaboa do muse na ias do hata ni Jahowa. Jadi pos do rohatta linggoman ni Jahowa do naposona.
Alani i, na dimaksud di ayat 7, linggoman ni Jahowa do akka naposona na disiksa.
Attong boasa asing kesimpulan ni piga-piga halak? Alana di teks Masoret (salinan ni Akka Bukku Heber na boi dihaporseai) dipakke do kata ganti na boi dua artina, jolma manang hata ni Debata. Alai molo taida Septuaginta (terjemahan na parjolo Akka Bukku Heber di bahasa Junani) dua hali do di ayat 7 dipakke hata “hita”. Maksudna halak na setia, na dangol, jala na disiksa. Dung i di ayat 7 didok, “Sude do nasida jagaon ni Jahowa sian sundut on saleleng ni lelengna”, i ma sian akka halak na lomo rohana tu na jahat. (Ps. 12:7, 8) Taida ma muse songon dia Targum Aram (terjemahan ni Akka Bukku Heber di bahasa Aram) menerjemahon ayat 7. Didok, “Jagaonmu do halak na sittong, ale DEBATA. Jagaonmu do nasida sian sundut na jahat on saleleng ni lelengna.” On ma bukti na asing dang hata ni Jahowa na ditaringoti di ayat 7.
Takkas ma, taringot naposo ni Jahowa na setia do na dimaksud di ayat 7. Jala ayat i marisi janji sian Debata na lao jagaonna do nasida.
