1-2. Pasu-pasu aha do na dapot ni sasahalak dung tardidi ibana?

 TOTTU las do rohatta tikki tardidi hita jala gabe bagian sian keluarga ni Jahowa. Sada hasangapon do boi marale-ale tu Jahowa. Didok si Daud do, “Marlas ni roha ma halak na pinillitmu, na binoanmu lao tinggal di alamanmu.”—Ps. 65:4.

² Dang sude halak dipillit Jahowa lao gabe keluargana. Songon naung tabahas di artikel sebelumna halak na dipillit Jahowa, i ma halak na mambuktihon na lomo do roha ni nasida marale-ale tu Ibana. (Jak. 4:8) Sada hasangapon do molo dilehon hamu ngolumuna tu Jahowa jala tardidi, alana gabe lam solhot ma hamu tu Jahowa. Dung tardidi hamu, gabe pos ma rohamuna ‘lao usehonon ni Jahowa do pasu-pasu tu hamu sappe so adong be na hurangan’.—Mal. 3:10; Jer. 17:​7, 8.

3. Aha do tanggung jawab ni halak naung mangalehon ngoluna tu Jahowa jala tardidi? (Parjamita 5:​4, 5)

³ Tikki tardidi hamu, i ma mulana dilehon hamu ngolumuna tu Jahowa. Pasti lomo do rohamuna manggohi janjimuna  i, jala toktong setia tu Jahowa nang pe godang tantangan dohot godaan na ro. (Jaha Parjamita 5:​4, 5.) Ala nungnga gabe sisean ni Jesus hamu, ihutton ma teladan ni Jesus jala ulahon ma parettana sian nasa tolapmuna. (Mat. 28:​19, 20; 1 Ptr. 2:21) Di artikel on diurupi do hamu annon lao mangulahon i.

‘TOKTONG MA IHUTTON’ JESUS NANG PE MANGADOPI TANTANGAN DOHOT GODAAN

4. Aha do lapatanna ikkon dituhuk sisean ni Jesus “hau partinaonan” i? (Lukas 9:23)

⁴ Nang pe nungnga tardidi hamu, dang berarti dang adong be masalahmuna. Alana takkas do didok Jesus ikkon dituhuk siseanna do “hau partinaonan” jala ikkon ditaon nasida do i “ganup ari”. (Jaha Lukas 9:23.) Maksud ni Jesus, na lao torus do marsitaonon akka siseanna? Dang songon i maksudna. Memang didok Jesus do lao dapot ni nasida pasu-pasu. Alai tong do adong tantangan na ikkon diadopi nasida. Bahkan adong do tantangan na massai borat diadopi.—2 Tim. 3:12.

5. Pasu-pasu aha do na lao dilehon Jesus tu akka halak na mambahen pengorbanan?

⁵ Olo do ra diorai keluargamuna hamu marsiajar Bibel. Manang nungnga dibahen hamu godang pengorbanan jala dipakke hamu artamuna lao manjumolohon Harajaon ni Debata. (Mat. 6:33) Pos ma rohamuna pasti diida Jahowa do pengorbananmuna i. (Heb. 6:10) Nungnga dihilala hamu hata ni Jesus na mandok, “Manang ise na manadikkon jabuna, haha anggina, ibotona, omakna, bapakna, anakkonna, manang tanona alani au dohot alani barita na uli, jaloonna do 100 hali loppit unggodang di tikki on. Jaloonna do unggodang jabu, haha anggi, iboto, omak, anakkon, dohot tano, nang pe ikkon manaon na haccit ibana. Jala jaloonna do hangoluan saleleng ni lelengna di tikki na naeng ro.” (Mrk. 10:​29, 30) Jadi unggodang do pasu-pasu na lao jaloonmuna sian pengorbanan na dibahen hamu.—Ps. 37:4.

6. Boasa ikkon taalo ‘hisap-hisap ni dagingta’ dung tardidi?

⁶ Ala jolma na so sempurna hita, ikkon berjuang dope hita lao mangalo ‘hisap-hisap ni dagingta’ nang pe nungnga tardidi hita. (1 Joh. 2:16) Songon i do tong na dihilala si Paulus. Didok ibana, “Di bagasan rohakku, massai lomo do rohakku tu patik ni Debata. Alai huida, adong do patik na asing na mangarajai dagingku, i ma patik ni dosa. Maralo do patik i tu patik ni Debata na adong di rohakku.” (Rom 7:​22, 23) Olo do ra gabe metmet rohamuna ala sipata dang marhasil hamu mangalo hisap-hisap ni dagingmuna. Alai molo taingot janjitta tu Jahowa, pasti gabe lam bertekad do hita lao menolak akka godaan. Boasa?

7. Songon dia do janji naung tabahen tu Jahowa mangurupi hita asa toktong setia tu Jahowa?

⁷ Tikki dilehon hamu ngolumuna tu Jahowa, na disoadahon hamu do dirimuna sandiri. Lapatanna, dang mangihutton lomo ni rohamuna sandiri be hamu, jala akka na mambahen las roha ni Jahowa do na diulahon hamu. (Mat. 16:24) Jadi tikki ro godaan pittor diboto hamu aha na lao ulahononmuna, alana nungnga dibahen hamu hian keputusan sebelum ro godaan i. Gabe boi ma hamu songon si Job na toktong mambahen las roha ni Jahowa. Nang pe borat sitaonon ni si Job, didok ibana do, “Toktong do au setia tu Debata!”—Job 27:5.

8. Aha do manfaatna molo diingot hamu tangiangmuna tikki mangalehon ngolumuna tu Jahowa?

 ⁸ Molo diingot hamu tangiangmuna tikki mangalehon ngolumuna tu Jahowa, gabe margogo ma hamu lao menolak godaan. Tottu dang olo hamu manggoda na so pasanganmuna. Alana nungnga marjanji hamu tu Jahowa dang mangulahon akka na dihasogohon rohana. Jala molo dang diloas hamu keinginan na sala adong di rohamuna, gabe dang maol be hamu annon lao mambolokkon keinginan sisongon i. Jala boi ma hamu mandao sian “dalan ni parjahat”.—Poda 4:​14, 15.

9. Aha do muse manfaatna molo diingot hamu tangiangmuna tikki mangalehon ngolumuna tu Jahowa?

⁹ Boha do molo adong na menawarhon karejo tu hamu, alai gabe dang boi hamu taratur marpungu? Ala nungnga bertekad hian hamu dang olo manjalo karejo sisongon i, gabe dang targoda be hamu lao manjalo i. Jala dang didok rohamuna boi do annon tetap huutamahon Jahowa nang pe hujalo karejo i. Asing ni i, molo dirimangi hamu songon dia teladan ni Jesus na toktong mambahen las roha ni Bapakna, gabe boi ma pittor ditolak hamu akka na dihasogohon Debata.—Mat. 4:10; Joh. 8:29.

10. Songon dia do cara ni Jahowa mangurupi hamu ‘toktong mangihutton’ Jesus?

¹⁰ Sasittongna tikki mangadopi tantangan dohot godaan, di tikki i ma hamu boi patuduhon na ‘toktong do diihutton’ hamu Jesus. Molo diulahon hamu i, gabe pos ma rohamuna na diurupi Jahowa do hamu. Alana didok di Bibel, “Toktong do dipasaut Debata sude hatana. Dang pasombuonna hamu manaon sitaonon lobi sian na tolapmuna. Jala molo adong sitaononmuna, patuduonna do tu hamu dalan asa boi hamu sabar jala martahan manaon i.”—1 Kor. 10:13.

 CARA ASA TOKTONG MANGIHUTTON JESUS

11. Aha do cara na terbaik asa toktong mangihutton Jesus? (Ida gambar.)

¹¹ Sian nasa rohana do Jesus manomba Jahowa, jala toktong do ibana martangiang tu Jahowa. (Luk. 6:12) Sada cara na terbaik asa toktong mangihutton Jesus dung tardidi, i ma torus mangulahon akka ulaon na mambahen hita solhot tu Jahowa. Bibel mandok, “Molo nungnga togu haporseaotta, toktong ma taulahon songon naung taulahon saleleng on.” (Plp. 3:16) Jotjot do ra dibege hamu pengalaman ni akka donganta na mangalehon gumodang tikkina tu Jahowa. Misalna, dohot do nasida tu Sikkola tu Parbarita Harajaon manang pinda tu inganan na makkaporluhon parbarita. Molo cocok do tu situasimuna, bahen ma i gabe cita-citamuna. Lomo do roha ni naposo ni Jahowa mangalehon gumodang tikkina tu Jahowa. (Ul. 16:9) Alai molo dang boi dope diulahon hamu i, unang ma pola metmet rohamuna. Toktong ma hamu setia tu Jahowa, alana i do na uppetting di Ibana. (Mat. 10:22) Ingot ma, las do roha ni Jahowa molo disomba hamu Ibana sian nasa tolapmuna. Jadi on ma cara na dumenggan asa boi toktong mangihutton Jesus.—Ps. 26:1.

12-13. Aha ma na boi diulahon hamu molo moru semangatmuna lao manomba Jahowa? (1 Korint 9:​16, 17) (Ida kotak “ Toktong ma di Parlumbaan i Hita”.)

¹² Boha do molo dihilala hamu dang sian nasa roha be hamu martangiang? Manang boha do molo dang dinikmati hamu be manjaha Bibel, jala dang pola semangat be marbarita? Molo songon i na dihilala hamu, dang na so diurupi Jahowa be hamu. Olo do songon i perasaanta ala dang sempurna dope hita. Molo moru semangatmuna, ingot ma  si Paulus. Nang pe berupaya ibana maniru Jesus, olo do sipata moru semangatna mangulahon i. (Jaha 1 Korint 9:​16, 17.) Alai didok ibana, “Nang pe terpaksa au mangulahon i, tong do pos roha ni Debata mangalehon tanggung jawab tu au.” Sian on taboto ma, marsitutu do si Paulus mangulahon tanggung jawabna nang pe sipata dang semangat ibana mangulahon i.

¹³ Tiru ma si Paulus. Unang ma dibahen hamu keputusan mangihutton perasaanmuna. Alai toktong ma ulahon na sittong nang pe dang semangat hamu mangulahon i. Molo toktong diulahon hamu na denggan, pasti boi do hamu semangat muse. Molo nungnga tardidi hamu, toktong ma taratur hamu belajar pribadi, marpungu, dohot marbarita. Alana boi do on mangurupi hamu asa toktong mangihutton Jesus, jala boi ma hamu gabe sitiruon tu akka dongan na asing.—1 Tes. 5:11.

“TOKTONG MA UJI JALA PARESO”

14. Aha do na ikkon tapareso, jala boasa? (2 Korint 13:5)

¹⁴ Dung tardidi hamu, porlu do dipareso hamu dirimuna. (Jaha 2 Korint 13:5.) Parrohahon ma ngolumuna dohot hasomalanmuna tikki martangiang, manjaha Bibel, belajar pribadi, marpungu, dohot di ulaon marbarita. Lului ma cara asa boi hamu marlas ni roha mangulahon akka ulaon i. Contohna sukkun ma tu dirimuna: ‘Boi do hupatorang tu halak taringot ajaran dasar ni Bibel? Hulului do cara asa boi toktong marlas ni roha di ulaon marbarita? Spesifik do tangiakku, jala tarida do sian tangiakki na marpos ni roha au tu Jahowa? Toktong do au ro tu parpunguan? Songon dia do asa boi au lam fokus jala mangalehon komentar di parpunguan?’

15-16. Aha do na boi diparsiajari hamu sian pengalaman ni si Robert?

¹⁵ Massai rikkot do molo taboto aha kelemahanta. Taida ma pengalaman ni donganta si Robert. Didok ibana, “Nungnga karejo au tikki marumur 20 taon. Hea ma sada tikki dung mulak karejo, diajak donganku borua do au tu jabuna. Didok ibana holan hami na dua ma annon di jabuna jala ‘bebas’ do hami disi. Parjolona i, dang pittor tegas au mangalusi ibana. Alai memang ujungna hutolak do ajakanna jala hupaboa ma alasanna.” Las do rohatta ala marhasil si Robert menolak godaan i. Alai dukkon i, gabe dirimangi  ibana ma muse na masa i. Jala disadari ibana ma, ikkon tegas do ibana molo masa muse situasi sisongon i. Didok ibana muse, “Tikki i dang pittor hatop au menolak godaan i, songon na diulahon si Josep tikki digoda istri ni si Potipar. (1 Mus. 39:​7-9) Memang maol do huhilala mangadopi na masa di tikki i. Gabe husadari ma porlu dope hape hupatogu hubungakku tu Jahowa.”

¹⁶ Songon si Robert, boi do tadapot manfaat molo tapareso diritta. Nang pe marhasil hamu menolak godaan, alai sukkun ma dirimuna: ‘Pittor hatop do hudokkon daong?’ Molo diida hamu adong na porlu dipadenggan sian dirimuna, unang ma gabe metmet rohamuna. Gariada, las ma rohamuna alana nungnga diboto hamu aha kelemahanmuna. Tangiakkon ma i, jala bertekad ma hamu asa mangoloi paretta ni Jahowa.—Ps. 139:​23, 24.

17. Molo toktong hita setia tu Jahowa, aha do pengaruh ni i tu goar ni Jahowa?

¹⁷ Adong do muse na boi taparsiajari sian pengalaman ni si Robert. Didok si Robert do, “Dung hutolak donganki, didok ibana do tu au, ‘Lulus do ho.’ Husukkun ma tu ibana aha do maksud ni hatana i. Didok ibana ma, adong sada donganna na hea gabe Saksi Jahowa mandok tu ibana, olo do sip-sip Saksi Jahowa mangulahon na sala. Jadi didok ibana ma tu donganna i, lao diuji ibana do au. Dung didok ibana songon i, gabe husadari ma nungnga hupabadia goar ni Jahowa.”

18. Aha ma tekadmuna dung tardidi? (Ida kotak “ Dua Artikel na Boi Mangurupi Hamu”.)

¹⁸ Molo dilehon hamu ngolumuna tu Jahowa jala tardidi, on patuduhon na lomo do rohamuna pabadiahon goarna dang soal aha pe na masa. Jala na pos do rohamuna, diboto Jahowa do tantangan dohot godaan na diadopi hamu. Urupan ni Jahowa do hamu molo berupaya hamu toktong setia. Pos ma rohamuna, lehononna do tondi parbadiana tu hamu asa boi marhasil mangulahon i. (Luk. 11:​11-13) Urupan ni Jahowa do hamu asa boi toktong mangihutton Jesus.