1-2. Aha do na ikkon diulahon sasahalak andorang so tardidi?

 SALELENG lima taon na parpudi on, adong lobi sian sajuta halak naung tardidi gabe Saksi Jahowa. Godang do sian nasida na songon si Timoteus naung mandapot hasittongan tikki “poso-poso” dope. (2 Tim. 3:​14, 15, surat na di toru) Alai adong do dung matua pe baru mandapot hasittongan. Contohna piga-piga taon naung salpu, adong sahalak borua dung marumur 97 taon pe ibana asa tardidi gabe Saksi Jahowa.

² Boha molo hamu? Olo do ra diboto hamu hasittongan sian natua-tuamuna manang sian halak na asing. Adong do rencanamuna naeng tardidi? Denggan do i. Memang sebelum tardidi hamu, ikkon dilehon hamu do ngolumuna tu Jahowa. Di artikel on, lao tabahas ma aha do lapatanna mangalehon ngolutta tu Jahowa. Jala molo nga rade hita lao mangalehon ngolutta tu Jahowa jala tardidi, unang pola mabiar mangulahon i.

AHA DO LAPATANNA MANGALEHON NGOLUTTA TU JAHOWA?

3. Paboa ma akka ise do na disurat di Bibel na mangalehon ngoluna tu Jahowa.

³ Di Bibel halak na mangalehon ngoluna tu Jahowa, i ma akka halak naung dipapulik lao mangulahon tugas khusus.  Contohna sude do bangso Israel najolo dipillit gabe bangso appuna ni Jahowa. Alai, adong do tong piga-piga sian nasida na mangalehon ngoluna tu Jahowa lao mangulahon tugas khusus. Contohna si Aron. Dipakke ibana do “tanda na badia”, i ma lempengan mas na marhillong na dibahen di sorbanna. Lempengan mas i patuduhon na dipapulik do ibana lao mangulahon tugas khusus, i ma gabe sintua ni malim ni halak Israel. (3 Mus. 8:9) Halak Nasir pe tong do dipillit lao mangulahon tugas khusus tu Jahowa. Hata “Halak Nasir” dibuat sian bahasa Heber nazirʹ na lapatanna, “Halak na Dipapulik”. Ikkon diihutton nasida do paretta na dibahen khusus tu nasida di Patik ni si Musa.—4 Mus. 6:​2-8.

4. (a) Aha do lapatanna mangalehon ngolumuna tu Jahowa? (b) Aha do lapatanna ‘ikkon disoadahon hamu dirimuna’? (Ida gambar.)

⁴ Molo dilehon hamu ngolumuna tu Jahowa lapatanna nungnga rade hamu gabe sisean ni Jesus, jala mangulahon lomo ni roha ni Debata ma na uppetting di ngolumuna. Alai aha ma na ikkon diulahon hamu? Didok Jesus, “Manang ise na naeng mangihutton au, ikkon disoadahon do dirina.” (Mat. 16:24) Bahasa Junani “ikkon disoadahon do dirina” lapatanna, dang mangihutton lomo ni rohana sandiri be ibana. Jadi molo nga talehon ngolutta gabe naposo ni Jahowa, dang taulahon be akka ulaon na dihasogohon Jahowa. (2 Kor. 5:​14, 15) Termasuk ma i “parniulaon ni daging”, songon seks na so patut. (Gal. 5:​19-21; 1 Kor. 6:18) Maol do dihilala hamu mangulahon paretta ni Debata i? Molo holong do rohatta tu Jahowa jala pos rohatta na bermanfaat do sude parettana, tottu dang maol mangulahon i. (Ps. 119:97; Jes. 48:​17, 18) Songon na didok donganta si Nicholas, “Hita do na manottuhon songon dia mangida paretta ni Debata i. Songon penjara na mambahen hita dang bebas do, manang songon pagar  bosi na kuat na melindungi hita sian singa na berbahaya.”

5. (a) Songon dia do carana mangalehon ngolumuna tu Jahowa? (b) Aha do beda ni mangalehon ngolumuna tu Jahowa dohot tardidi? (Ida gambar.)

⁵ Songon dia do carana mangalehon ngolumuna tu Jahowa? Martangiang ma hamu marjanji holan Jahowa do sombaonmuna, jala lomo ni rohana do na uppetting di ngolumuna. Marjanji ma hamu asa toktong makkaholongi Jahowa “sian nasa rohamuna, sian nasa ngolumuna, sian nasa pikkiranmuna, dohot sian nasa gogomuna”. (Mrk. 12:30) Tikki na martangiang i hamu, holan sahalakmuna do na marjanji tu Jahowa. Alai tikki tardidi hamu, diboto godang halak do naung dilehon hamu ngolumuna tu Jahowa. Janji na serius do on, jala dipangido Jahowa do asa digohi hamu janjimuna i.—Pjm. 5:​4, 5.

BOASA OLO HITA MANGALEHON NGOLUTTA TU JAHOWA?

6. Boasa olo hita mangalehon ngolutta tu Jahowa?

⁶ Boasa olo hita mangalehon ngolutta tu Jahowa? Alasan utamana, ala holong do rohatta tu Ibana. Alai dang holan perasaan sambing on. Boi pe holong rohatta tu Jahowa ala dapotta do “parbinotoan na bagas taringot tu lomo ni roha ni Debata”. (Kol. 1:9) Ala marsiajar Bibel hita gabe pos ma rohatta (1) na tutu do adong Jahowa i, (2) Hata ni Debata do Bibel i, jala (3) na dipakke Ibana do organisasina lao mangulahon lomo ni rohana.

7. Aha do na ikkon taulahon andorang so mangalehon ngolutta tu Jahowa?

⁷ Asa boi mangalehon ngolutta tu Jahowa, ikkon taboto do ajaran dasar ni Bibel jala taihutton paretta ni Jahowa di ngolutta. Marsitutu ma hita paboahon na taparsiajari tu  halak na asing. (Mat. 28:​19, 20) Ala holong rohatta tu Jahowa, gabe taronjar do rohatta asa holan manomba Ibana. Jadi olo pe hita tardidi dang ala naeng mambahen las roha ni guru studitta dohot natua-tuatta, manang holan asa sarupa hita dohot donganta.

8. Aha do pengaruhna molo tarimangi sude na dibahen Jahowa tu hita? (Psalmen 116:​12-14)

⁸ Molo dirimangi hamu sude na dibahen Jahowa tu hamu, tottu gabe taronjar do rohamuna lao mangalehon ngolumuna tu Ibana. (Jaha Psalmen 116:​12-14.) Didok di Bibel sian Jahowa do ro “sude silehon-lehon na denggan jala na sun denggan”. (Jak. 1:17) Rimangi ma muse silehon-lehon na luar biasa na dilehon Jahowa tu hita, i ma tobusan. Alani tobusan ni Jesus, gabe boi ma hita marale-ale tu Jahowa jala mangolu salelengna haduan. (1 Joh. 4:​9, 10, 19) Mangalehon diritta tu Jahowa ma cara na terbaik lao mandok mauliate tu Ibana alani tobusan dohot sude pasu-pasuna. (5 Mus. 16:17; 2 Kor. 5:15) Dibahas do on di bukku Mangolu Saleleng ni Lelengna di pelajaran 46 nomor 4 dohot di video Mangalehon Pelean tu Jahowa.

NUNGNGA RADE BE HAMU MANGALEHON NGOLUMUNA TU JAHOWA JALA TARDIDI?

9. Boasa dang pola tertekan hita lao mangalehon ngolutta tu Jahowa?

⁹ Olo do didok rohamuna dang rade dope hamu lao mangalehon ngolumuna tu Jahowa jala tardidi. Olo do ra ikkon dibahen hamu dope perubahan asa boi mangihutton sude paretta ni Jahowa. Manang porlu dope di hamu tikki lao patoguhon haporseaonmuna. (Kol. 2:​6, 7) Memang dang sai sarupa tikki na dihaporluhon ganup parsiajar Bibel lao mambahen kemajuan. Jala dang sai sarupa umur ni akka na poso tikki mangalehon ngolu ni nasida tu Jahowa jala tardidi. Alani i pikkirhon ma aha dope na porlu dipadenggan hamu, ulahon ma i, jala unang ma bandingkon dirimuna tu halak na asing.—Gal. 6:​4, 5.

10. Nang pe dang rade dope hamu mangalehon ngolumuna tu Jahowa jala tardidi, aha ma na ikkon diulahon hamu? (Ida muse kotak “ Tu Akka na Poso na Mulai sian Dakdanak Diajari Natua-tuana Taringot Jahowa”.)

¹⁰ Nang pe tikki on dang rade dope hamu mangalehon ngolumuna tu Jahowa, alai berupaya ma hamu mambahen i gabe cita-citamuna. Tangiakkon ma asa dipasu-pasu Jahowa upayamuna lao mambahen perubahan. (Plp. 2:13; 3:16) Jala pos ma rohamuna tangihonon ni Jahowa do tangiangmuna jala urupanna do hamu.—1 Joh. 5:14.

BOASA ADONG DOPE NA RAGU LAO MANGULAHON I?

11. Songon dia do cara ni Jahowa mangurupi hita asa toktong setia tu Ibana?

¹¹ Adong do piga-piga halak na ragu dope naeng mangalehon ngoluna tu Jahowa jala tardidi. Olo do ra ala mabiar nasida dung tardidi annon gabe diulahon nasida dosa na balga jala ujungna dipecat sian huria. Molo songon i na dihilala hamu, pos ma rohamuna pasti diurupi Jahowa do hamu asa boi ‘marpangalaho hombar tu lomo ni rohana’. (Kol. 1:10) Dilehon Jahowa do tong gogo tu hamu asa boi mangulahon na sittong. Jala nungnga godang na diurupi Jahowa mangulahon i. (1 Kor. 10:13) Buktina holan saotik do halak na dipecat sian huria. Takkas ma, diurupi Jahowa do naposona asa toktong setia tu Ibana.

12. Aha do na boi taulahon asa unang sappe mangulahon dosa?

¹² Ala jolma na so sempurna dope hita, olo do targoda hita lao mangulahon na sala. (Jak. 1:14) Alai hita do na mamutusson aha na naeng taulahon tikki targoda hita. Hita sandiri do na manottuhon naeng gabe halak na songon dia hita. Alai adong do piga-piga halak  na mandok, dang boi dirajai ibana dirina. Sasittongna dang toho i, alana boi do talatik diritta asa unang mangulahon na sala. Molo pe targoda hita lao mangulahon na sala, boi do tatolak i. Aha do na boi mangurupi hita mangulahon i? Toktong ma martangiang tu Jahowa. Toktong ma belajar pribadi, ro tu parpunguan, jala paboa ma haporseaonmuna tu halak na asing. Molo diulahon hamu on sude, boi ma hamu toktong setia tu Jahowa. Jala taingot ma sai diurupi Jahowa do hita lao mangulahon i.—Gal. 5:16.

13. Aha do na boi tatiru sian si Josep?

¹³ Molo nungnga tatottuhon hian aha na naeng taulahon molo digoda hita, gabe boi ma hita toktong setia tu Jahowa. Adong do dipaboa di Bibel piga-piga halak na mangulahon i, nang pe nasida dang sempurna. Contohna si Josep. Mulak-ulak do dirayu istri ni si Potipar ibana. Ala nungnga diboto si Josep hian aha na ikkon ulahononna, “ditolak si Josep do pangidoanna i”. Jala didok si Josep do, “Tung bahenokku ma na jahat asa mardosa au tu Debata?” (1 Mus. 39:​8-10) Nungnga diboto si Josep hian aha na lao ulahononna andorang so digoda istri ni si Potipar ibana. Alani i boi ma diulahon si Josep na sittong jala tetap setia tu Jahowa.

14. Boha do carana manolak godaan?

¹⁴ Tikki digoda hita, boha do caratta maniru si Josep? Mulai sian saonari, pikkirhon hian ma aha na naeng taulahon tikki digoda. Marlatik ma hita lao manolak akka ulaon na dihasogohon Jahowa, jala unang olo hita mamikkirhon akka ulaon i. (Ps. 97:10; 119:165) Alani i molo nungnga taboto hian aha na ikkon taulahon tikki digoda, gabe dang taulahon be dosa.

15. Aha do buktina na ‘marsitutu sasahalak mangalului’ Jahowa? (Heber 11:6)

¹⁵ Nungnga pos be rohamuna on do hasittongan, jala lomo do rohamuna manomba Jahowa sian nasa rohamuna. Alai mungkin adong dope na mambahen ragu hamu lao mangalehon ngolumuna tu Jahowa jala tardidi. Boi do ditiru hamu Raja Daud. Martangiang do ibana tu Jahowa, “Ale Debata, manat ma parrohahon au jala ida ma rohakku. Manat ma parrohahon au, jala ida ma arsak ni rohakku. Ida ma atik na adong do na jahat di rohakku, jala togu-togu ma au di dalan na so adong ujungna.” (Ps. 139:​23, 24) Dipasu-pasu  Jahowa do akka “halak na marsitutu mangalului Ibana”. Molo dibahen hamu upaya asa boi mangalehon ngolumuna tu Jahowa jala tardidi, gabe boi ma diida Jahowa na marsitutu do hamu mangalului Ibana.—Jaha Heber 11:6.

TORUS MA JONOK TU JAHOWA

16-17. Songon dia do Jahowa manogu-nogu sasahalak asa gabe naposona, nang pe Saksi Jahowa natua-tuana? (Johannes 6:44)

¹⁶ Didok Jesus, Jahowa do na manogu-nogu sasahalak asa gabe siseanna. (Jaha Johannes 6:44.) Coba ma tarimangi taringot on, jala pikkirhon ma aha do manfaatna tu hamu. Akka na denggan do na diida Jahowa sian sasahalak. Alani i ma ditarik Jahowa ibana gabe naposona. Jala dianggap Jahowa ma ibana “gabe appunana na massai arga”, manang “gabe hasianna”. (5 Mus. 7:6; surat na di toru.) Songon i do tong Jahowa mangida hamu.

¹⁷ Hamu akka na poso, olo do ra didok rohamuna disomba hamu pe Jahowa ala mangihutton natua-tuamuna. Ninna rohamuna dang ala na ditarik Jahowa hamu. Alai sasittongna ditarik Jahowa do sude halak gabe naposona, termasuk ma hamu, nang pe natua-tuamuna Saksi Jahowa. Bibel mandok, ‘Molo dipajonok hamu tu Debata, pajonokonna ma tu hamu.’ (Jak. 4:8; 1 Kron. 28:9) Jadi molo berupaya hamu pajonokkon dirimuna tu Jahowa, rade do Jahowa manjakkon hamu songon na disurat di Jakobus 4:8.—Bandingkon tu 2 Tessalonik 2:13.

18. Aha do na lao tabahas di artikel na mangihut? (Psalmen 40:8)

¹⁸ Rade do Jesus mangalehon ngoluna lao mangulahon lomo ni roha ni Bapakna. Jadi molo talehon ngolutta tu Jahowa jala tardidi, na maniru Jesus do hita disi. (Jaha Psalmen 40:8; Heb. 10:7) Di artikel na mangihut, lao tabahas ma dung tardidi aha do na ikkon taulahon asa toktong setia manomba Jahowa.