1. Tikki mandele hita, sukkun-sukkun aha do na olo ro tu rohatta?

 BIBEL mandok, “Las do roha ni Jahowa mangida bangsona.” (Ps. 149:4) Pasti dipatogu do hita mamboto na dihaholongi Jahowa do sude naposona. Alai tikki mandele hita olo do sukkun-sukkun rohatta, ‘Dihaholongi Jahowa do au?’ Najolo godang do tong naposo ni Jahowa na disurat di Bibel na makkilala songon i.—1 Sam. 1:​6-10; Job 29:​2, 4; Ps. 51:11.

2. Boi do jolma na so sempurna dihaholongi Jahowa?

² Takkas do dipaboa di Bibel na boi do jolma na so sempurna dihaholongi Jahowa. Boha do carana? Ikkon tapatudu do haporseaon tu Jesus Kristus jala ikkon tardidi do hita. (Joh. 3:16) Molo taulahon i, gabe boi ma diida akka halak naung muba hita sian akka dosatta jala naung marjanji hita tu Debata lao mangulahon lomo ni rohana. (Ul. 2:38; 3:19) Las do roha ni Jahowa molo taulahon i. Alana on patuduhon na lomo rohatta gabe ale-alena. Jadi molo torus hita setia tu Jahowa, jala taulahon sian nasa gogotta lao manggohi janjitta i, gabe las ma roha ni Jahowa jala dianggap Ibana ma hita ale-alena.—Ps. 25:14.

3. Aha do na lao tabahas di artikel on?

³ Alai boasa adong halak na merasa dang dihaholongi Jahowa nasida? Boha do cara ni Jahowa patuduhon na dihaholongi Ibana hita? Jala boha ma carana paposson rohatta na dihaholongi Jahowa do hita? Tabahas ma i di artikel on.

BOASA MA ADONG HALAK NA MERASA DANG DIHAHOLONGI JAHOWA NASIDA

4-5. Nang pe dang sempurna hita, alai boha do perasaan ni Jahowa mangida hita?

⁴ Godang do sian hita mulai sian na gelleng berjuang asa unang merasa dang mararga. (Ps. 88:15) Songon i ma na dihilala  donganta si Adrián. Didok ibana, “Jotjot do au merasa dang marguna. Huingot do tikki gelleng au, hea do au martangiang asa boi keluargakku mangolu di Paradeiso, alai huhilala dang cocok au mangolu disi.” Songon i do tong na dihilala si Tony na so Saksi keluargana. Didok ibana, “Dang hea dipuji natua-tuakku au, jala dang hea didok nasida na dihaholongi nasida au. Alani i huhilala dang boi au pasonakkon roha ni nasida.”

⁵ Molo berjuang dope hita asa unang merasa dang mararga, taingot ma nungnga ditarik Jahowa hita gabe naposona. (Joh. 6:44) Berarti diida Ibana sude sifatta na denggan, termasuk akka na denggan sian diritta na so tasadari. Jala diboto Ibana do na di bagasan rohatta. (1 Sam. 16:7; 2 Kron. 6:30) Jadi pos ma rohatta massai arga do hita di Jahowa.—1 Joh. 3:​19, 20.

6. Boha do perasaan ni Apostel Paulus molo diingot ibana dosana najolo i?

⁶ Sude do naposo ni Jahowa saonari torus berjuang mambolokkon keinginan na sala. Jala adong do hita na torus merasa bersalah ala hea mangulahon dosa andorang so marsiajar Bibel. (1 Ptr. 4:3) Hea do dihilala hamu songon i? Molo hea, pasti tarapul do rohamuna mamboto akka naposo ni Jahowa najolo pe berjuang do lao mambolokkon perasaan sisongon i. Contohna merasa bersalah do Apostel Paulus molo diingot ibana dosana najolo i. (Rom 7:24) Memang nungnga muba si Paulus jala nungnga tardidi ibana. Alai nang pe songon i, sai torus do merasa ibana “na ummetmet sian sude apostel” jala ‘dosana ma na unggodang’.—1 Kor. 15:9; 1 Tim. 1:15.

7. Molo tung pe najolo hea hita mangulahon dosa, aha do na porlu taingot?

⁷ Nungnga marjanji Jahowa salpuhononna do dosatta molo bertobat hita. (Ps. 86:5) Boi do tahaporseai janjina i. Jadi molo tasolsoli dosatta, pasti salpuhononna do i.—Kol. 2:13.

8-9. Molo tahilala dang sanggup hita mambahen las roha ni Jahowa, aha do na ikkon taingot?

⁸ Pasti hita sude berupaya do naeng mangulahon na dumenggan lao palasson roha ni Jahowa. Alai adong na merasa dang sanggup nasida mambahen las roha ni Jahowa. Songon i ma na dihilala si Amanda. Didok ibana, “Menuruttu molo mangalehon na terbaik tu Jahowa, lapatanna ikkon godang do na huulahon. Ujungna gabe jotjot ma hupaksahon dirikku mangulahon lobi sian na tolap tarbahen au. Molo gagal au, gabe kecewa ma au tu dirikku jala huhilala kecewa do tong Jahowa mangida au.”

⁹ Molo tahilala dang sanggup hita mambahen las roha ni Jahowa, aha do na ikkon taingot? Taingot ma masuk akkal do Jahowa i. Dang hea dipaksa hita mangulahon lobi sian na tolap taulahon. Gariada diargai Ibana do sude na taulahon sian nasa gogotta. Asing ni i, rimangi ma akka halak na disurat di Bibel na toktong manomba Jahowa sian nasa gogona. Contohna si Paulus. Semangat do ibana marbarita na uli saleleng martaon-taon. Lao do ibana marribu-ribu kilometer jala dibahen ibana do godang huria na baru. Alai tikki muba situasina, dang boi diulahon ibana songon najolo i. Gabe kecewa do Jahowa mangida ibana? Daong, alana torus do diulahon si Paulus aha na boi diulahon ibana, jala dipasu-pasu Jahowa do ibana. (Ul. 28:​30, 31) Dos songon i ma, molo dang boi be taulahon songon najolo i, ingot ma alasanta mangulahon i do na uppetting di Jahowa, dang godangna. Saonari tabahas ma boha do cara ni Jahowa patuduhon na dihaholongi Ibana hita jala na las rohana mangida hita.

 SONGON DIA DO CARA NI JAHOWA PATUDUHON HOLONGNA TU HITA?

10. Songon dia do cara ni Jahowa patuduhon holongna tu hita? (Johannes 16:27)

¹⁰ Marhite Bibel. Sai dipatudu Jahowa do holongna tu akka naposona. Contohna dua hali do disurat di Bibel na holong rohana tu Anakna Jesus. (Mat. 3:17; 17:5) Pasti lomo do rohatta mambege Jahowa langsung mandokkon na holong do rohana tu hita. Alai saonari dang langsung be Jahowa makkatai tu hita, marhite Bibel nama. Hira na “mambege” soara ni Jahowa do hita tikki tajaha hata ni Jesus na disurat di Injil. (Jaha Johannes 16:27.) Sempurna do Jesus maniru akka sifat ni Bapakna. Jadi tikki tajaha hata ni Jesus na paboahon holong ni rohana tu akka siseanna na so sempurna, tabayakkon ma i songon hata ni Jahowa tu hita.—Joh. 15:​9, 15.

11. Na so holong be roha ni Jahowa tu hita umbahen na masa sitaonon tu hita? (Jakobus 1:12)

¹¹ Mangalehon na tahaporluhon. Lomo do roha ni Jahowa mangurupi hita. Buktina dilehon Ibana do akka na tahaporluhon. Memang, sipata dipasombu Jahowa do hita manaon sitaonon, songon na masa tu si Job. (Job 1:​8-11) Alai molo masa sitaonon, dang na berarti na so dihaholongi Jahowa be hita. Gariada gabe kesempatan ma i di hita lao patuduhon na marhaposan do hita tu Debata jala holong rohatta tu Ibana. (Jaha Jakobus 1:12.) Asing ni i, boi do tahilala na parduli Jahowa tu hita jala diurupi hita asa boi martahan.

12. Aha do na boi taparsiajari sian pengalaman ni si Dmitrii?

¹² Taida ma pengalaman ni donganta si Dmitrii na tinggal di Asia. Di-PHK do ibana jala nungnga marbulan-bulan dang dapotna karejo. Alai pos do rohana tu Jahowa, jadi diputusson ibana mangalehon lam godang tikki lao marbarita. Alai marbulan-bulan dukkon i pe, tong do dang dapotna karejo. Jala marsahit na parah do ibana sappe dang boi meret sian podoman. Merasa dang marguna be ibana ala dang boi mangulahon tanggung jawabna gabe suami dohot ama. Jala didok rohana dang holong be Jahowa tu ibana. Alai di sada borngin, dibahen boruna ma di sada harotas isi ni Jesaya 30:15 na mandok, “Molo torus do hamu porsea jala dang busisaon, lam margogo ma hamu.” Ro ma boruna tu kamarna jala didok boruna i ma, “Molo lungun roha  ni bapa, ingot da ayat on.” Gabe disadari si Dmitrii ma sai dipasu-pasu Jahowa do keluargana. Sai dilehon do na dihaporluhon nasida. Adong dope sipanganon, pakkean, dohot tempat tinggal ni nasida. Didok si Dmitrii ma muse, “Jadi ikkon torus do au porsea jala dang busisaon.” Alani i molo masa sitaonon tu hamu, pos ma rohamuna pasti diparrohahon Jahowa do hamu jala dilehon Ibana do gogo asa boi hamu martahan.

13. Songon dia do muse cara ni Jahowa patuduhon holongna tu hita?

¹³ Marhite akka dongan. Dipakke Jahowa do akka dongan lao patuduhon holongna tu hita. Misalna, tikki susa hita dipakke Jahowa do akka dongan lao patoguhon hita. Songon i ma na dihilala sahalak donganta borua di Asia tikki marsak ibana. Di-PHK do ibana jala marsahit na parah. Dung i mangulahon dosa na balga do suamina jala dang gabe sintua be. Didok ibana, “Dang huattusi boasa terjadi on tu au. Mungkin adong do na sala na hubahen, gabe dang holong be roha ni Jahowa tu au.” Alani i, martangiang ma ibana tu Jahowa asa dipapos rohana na holong do roha ni Jahowa tu ibana. Didok ibana muse, “Makkatai ma akka sintua tu au, jala dipapos nasida ma rohakku na holong do roha ni Jahowa tu au.” Dung i, martangiang do muse donganta on tu Jahowa asa pos muse rohana. Didok ibana, “Laos di ari i, dapottu ma surat sian akka dongan di huria. Tikki hujaha surat ni nasida i, boi ma huhilala na ditangihon Jahowa do au.” Takkas ma, dipatudu Jahowa do holong ni rohana marhite akka dongan na patoguhon hita.—Ps. 10:17.

14. Na muruk do Jahowa tu hita molo adong dongan na menasehati hita?

¹⁴ Dipatudu Jahowa do muse holongna tu hita tikki adong donganta na menasehati hita. Misalna di abad na parjolo dipakke Jahowa do Apostel Paulus lao mambahen 14 surat tu  akka dongan sahaporseaonna. Di suratna i, adong do sipasingot na tegas, alai dang kasar carana pasingotton. Boasa ditogu-togu Jahowa si Paulus manuratton akka sipasingot i? Alana Bapak na burju do Jahowa, jadi pasti dipissang Ibana do “anak hasianna”. (Poda 3:​11, 12) Jadi molo adong donganta na mangalehon nasehat sian Bibel tu hita, dang berarti na muruk Jahowa tu hita. Gariada i ma bukti na dihaholongi Jahowa hita. (Heb. 12:6) Aha do muse bukti na asing na dihaholongi Jahowa hita?

BUKTI NA ASING NA DIHAHOLONGI JAHOWA HITA

15. Tu ise do dilehon Jahowa tondi parbadiana, jala aha do pengaruh ni i tu hamu?

¹⁵ Dilehon Jahowa do tondi parbadiana tu halak na dihaholongi Ibana. (Mat. 12:18) Sukkun ma tu dirimuna, ‘Nungnga hupatudu parbue ni tondi parbadia di ngolukku ganup ari?’ Dung marsiajar Bibel, gabe lam sabar do hamu tu halak asing? Pos ma rohamuna pasti las do roha ni Jahowa mangida hamu molo marsitutu hamu patuduhon parbue ni tondi parbadia.—Ida kotak “ Parbue ni Tondi Parbadia, i ma . . . ”

16. Tu ise do dilehon Jahowa tugas lao pasahatton barita na uli, jala boha do pakkilalaanmuna mamboto i? (1 Tessalonik 2:4)

¹⁶ Dilehon Jahowa do tugas tu halak na dihaholongi Ibana lao pasahatton barita na uli. (Jaha 1 Tessalonik 2:4.) Taida ma pengalaman ni donganta borua na margoar si Jocelyn na mandapot manfaat ala marbarita na uli. Hea ma sada tikki, marsak hian ibana. Didok, “Huhilala hira na so marguna do au jala dang tolap mangulahon manang aha. Alai huingot ma perintis do au, jala nga hubahen hian jadwal marbarita sadari i. Alani i martangiang ma au, jala tetap do au marbarita.” Tikki na marbarita i si Jocelyn, pajuppang ma ibana dohot sahalak borua na olo marsiajar Bibel, goarna si Mary. Piga-piga bulan dung marsiajar Bibel si Mary, didok ibana sasittongna na baru martangiang do ibana tikki na ro i si Jocelyn tu jabuna. Dung dibege si Jocelyn cerita ni si Mary i, aha do pengaruhna tu ibana? Didok ibana, “Hira na didok Jahowa do tu au, ‘Holong do rohakku tu ho.’” Memang dang sude halak olo manjalo barita na uli na tapasahat. Alai pos ma rohatta pasti las do roha ni Jahowa mangida hita molo tabahen sian nasa gogotta lao marbarita.

17. Aha do na boi taparsiajari sian pengalaman ni si Vicky? (Psalmen 5:12)

 ¹⁷ Dilehon Jahowa do tobusan lao manesa dosa ni akka halak na dihaholongi Ibana. (1 Tim. 2:​5, 6) Alai boha do molo ragu dope hita tu holong ni Jahowa? Nang pe porsea hita tu tobusan ni Jesus jala nungnga tardidi, taingot ma boi do sala pakkilalaatta. Jadi unang ma pos rohatta tu pakkilalaatta sandiri, alai pos ma rohatta tu Jahowa. Molo di Jahowa, manang ise na porsea tu tobusan ni Anakna, dianggap Ibana do nasida halak na tigor marroha jala marjanji do Ibana lao mangalehon pasu-pasu tu nasida. (Jaha Psalmen 5:12; Rom 3:26) Dihilala donganta si Vicky do manfaatna mangarimangi tobusan. Didok ibana, “Sasittongna nungnga godang cara dibahen Jahowa lao patuduhon na holong rohana tu au. Alai sai hudok ma tu Jahowa, ‘Dang mungkin holong roham tu jolma songon au. Dang sanggup tobusan ni Anakmi manesa dosakku.’” Alai dung bagas dirimangi ibana taringot tobusan, ujungna pos ma rohana na dihaholongi Jahowa do ibana. Jadi molo tarimangi taringot tobusan, boi do pos rohatta na dihaholongi Jahowa hita jala las rohana mangida hita.

18. Boasa porlu bertekad hita asa toktong makkaholongi Jahowa?

¹⁸ Nang pe nungnga taulahon akka saran na dipaboa di artikel on, olo do ra dang pos dope rohatta na dihaholongi Jahowa hita. Molo masa sisongon i, ingot ma dihaholongi Jahowa do “halak na toktong makkaholongi Ibana”. (Jak. 1:12) Jadi sai toktong ma pajonok dirimuna tu Jahowa, jala lului ma akka bukti na patuduhon na holong do rohana tu hamu. Ingot ma, “dang dao [Jahowa] sian ganup hita on”.—Ul. 17:27.