1. Aha do pasu-pasu na tadapot ala gabe bagian ni organisasi ni Jahowa?

 SADA pasu-pasu do di hita boi gabe bagian sian organisasi ni Jahowa saleleng ari parpudi on. Lam tu susana do annon parngoluotta, alai nungnga dilehon Jahowa akka dongan na boi mangurupi hita. (Ps. 133:1) Diurupi Jahowa do keluargatta asa boi marlas ni roha. (Eps. 5:33–6:1) Jala dilehon Ibana do tong bisuk asa boi hita makkilala dame ni roha.

2. Aha do na porlu taulahon, jala boasa?

² Nang pe songon i, ikkon marsitutu do hita asa toktong setia manomba Jahowa. Alana olo do haccit rohatta alani hata manang pambahenan ni akka donganta. Olo do muse metmet rohatta tikki tabahen hasalaan, tarlumobi molo mulak-ulak tabahen hasalaan i. Di artikel on lao tabahas ma songon dia carana toktong setia manomba Jahowa nang pe (1) haccit rohatta dibahen dongan sahaporseaon, (2) kecewa hita dibahen pasanganta, jala (3) nang pe metmet rohatta alani hasalaatta sandiri. Lao tabahas ma muse tolu contoh sian Bibel na toktong setia tu Jahowa nang pe mangadopi situasi na sarupa.

TIKKI HACCIT ROHAMUNA DIBAHEN DONGAN SAHAPORSEAON

3. Tantangan aha do na taadopi?

³ Tantanganna. Adong do sifat dohot kebiasaan ni akka dongan na mambahen jut rohatta. Asing ni i, olo do kecewa hita  alani hata manang pambahenan ni akka dongan. Akka sintua pe olo do ra mambahen hasalaan. Sude on boi do mambahen ragu piga-piga donganta tu organisasi ni Jahowa. Akibatna gabe mandao ma nasida sian akka dongan. Bahkan gabe dang olo be nasida marpungu. Hape sasittongna ikkon torus do nasida “marsada” dohot akka dongan. (Sep. 3:9) Alai denggan do keputusan sisongon i? Tabahas ma jo sada contoh sian Bibel na hea mangadopi situasi na sarupa.

4. Tantangan aha do na diadopi Apostel Paulus?

⁴ Contoh sian Bibel. Diboto Apostel Paulus do dang sempurna akka donganna. Contohna adong do piga-piga dongan di Jerusalem na so porsea nungnga gabe sisean ni Jesus si Paulus. (Ul. 9:26) Dung i, adong do na paroa-roahon ibana. (2 Kor. 10:10) Asing ni i, diida si Paulus do sahalak sintua mambahen keputusan na sala na boi mambahen tartuktuk akka dongan na asing. (Gal. 2:​11, 12) Jala hea do haccit roha ni si Paulus dibahen dongan kompakna, i ma si Markus. (Ul. 15:​37, 38) Nang pe haccit roha ni si Paulus dibahen akka donganna, dang gabe mandao ibana sian nasida. Diargai ibana do akka donganna i jala torus setia manomba Jahowa. Boasa boi songon i si Paulus?

5. Boasa dang mandao si Paulus sian akka donganna? (Kolosse 3:​13, 14) (Ida gambar.)

⁵ Holong do roha ni Paulus tu akka donganna. Akka na denggan sian nasida do na sai diingot si Paulus. Jala holong do na mangurupi si Paulus boi mangulahon nasehat na disurat ibana di Kolosse 3:​13, 14. (Jaha.) Parrohahon ma songon dia sikap ni si Paulus tu si Markus. Nang pe nungnga ditinggalhon si Markus ibana tikki pardalanan utusan injilna na parjolo, dang sai jut rohana. Di pudian ni ari tikki dibahen si Paulus surat tu huria Kolosse, dipuji do si Markus. Didok ibana do si Markus dongan na setia jala na patoguhon rohana. (Kol. 4:​10, 11) Tikki dipenjara si Paulus di Rom, dipangido do asa ro si Markus mangurupi ibana. (2 Tim. 4:11) Takkas ma, dimaappon si Paulus do akka donganna i jala dang mandao ibana sian nasida. Aha do na boi tatiru sian si Paulus?

6-7. Nang pe dang sempurna akka donganta, aha do na ikkon taingot asa boi tapatudu holong tu nasida? (1 Johannes 4:7)

⁶ Parsiajaranna. Lomo do roha ni Jahowa asa unang menyerah hita makkaholongi akka donganta. (Jaha 1 Johannes 4:7.) Molo adong donganta na so patuduhon sifat Kristen jala mambahen haccit rohatta, unang ma tadok na sengaja do ibana mangulahon i. Pos  ma rohatta na berjuang do ibana mangulahon na sittong. (Poda 12:18) Taingot ma, toktong do holong roha ni Jahowa nang pe dang sempurna hita. Nang pe sala hita, dang sai muruk Jahowa jala dang ditadikkon Ibana hita. (Ps. 103:9) Alani i, tatiru ma Jahowa memaappon hasalaan ni akka donganta.—Eps. 4:32–5:1.

⁷ Taingot ma muse, ala nungnga lam jonok ari ni Jahowa, ikkon lam kompak ma hita dohot akka donganta. Haduan, lam jotjot do masa penganiayaan tu naposo ni Jahowa. Bahkan hita sandiri olo do ra dipenjara alani haporseaotta. Di situasi sisongon i, massai porlu do hita diurupi akka dongan. (Poda 17:17) Taida ma pengalaman si Josep, a sahalak sintua di Spanyol. Dipenjara do ibana dohot piga-piga donganta bawa ala dang dohot tu dinas militer. Didok ibana, “Ala rap hami dipenjara, gabe diida hami ma hahurangan ni akka dongan na mambahen jut rohanami. Alai diboto hami do, holan akka dongan sahaporseaon do na boi diandalhon hami. Alani i ikkon saling memaappon do hami. Gabe boi hami toktong marsada jala saling menjaga, alana godang do tahanan di sakalilingnami na so Saksi Jahowa. Hea ma sada tikki tarlukka tanganku jala dang boi huulahon manang aha. Alai adong do sada donganta na olo manucci pakkeanku jala mangurupi au. Tikki susa au jala porlu diurupi, boi do huhilala holong ni akka dongan.” Sian on taboto ma, sian saonari ikkon tapasae do parsoalanta dohot akka dongan.

TIKKI KECEWA HAMU DIBAHEN PASANGANMUNA

8. Tantangan aha do na diadopi halak naung menikah?

⁸ Tantanganna. Sude na menikah pasti mangadopi masalah di perkawinan. Bibel pe mandok, “Godang do hasusaan na lao masa tu halak na marhasohotan.” (1 Kor. 7:28) Boasa songon i? Alana dang sempurna suami dohot istri. Dang sarupa sifat, akka na dihalomohon, dohot na so dihalomohon nasida. Olo do muse dang sarupa latar belakang dohot budaya ni nasida. Jala adong do ra kebiasaan na baru diboto pasanganna dung menikah nasida. Sudena on boi do gabe masalah di perkawinan. Bisa jadi nasida na dua do na sala, alai gabe disalahon nasida do pasanganna jala dang olo rap mangalului solusina. Bahkan olo do tarpikkir nasida naeng padao-dao manang marsirang. Alai denggan do keputusan sisongon i? b Tabahas ma contoh sian Bibel na toktong setia tu Jahowa nang pe massai borat masalah di perkawinanna.

9. Tantangan aha do na diadopi si Abigail?

⁹ Contoh sian Bibel. Menikah do si Abigail dohot si Nabal. Bibel mandok, halak na jahat jala kasar do si Nabal on. (1 Sam. 25:3) Pasti borat do di si Abigail rap dohot si Nabal. Adong do kesempatan di si Abigail maninggalhon suamina. Sada tikki, naeng dipamate si Daud do si Nabal ala jahat si Nabal tu ibana dohot akka tentarana. (1 Sam. 25:​9-13) Di tikki i, boi do lari si Abigail jala dipasombu ibana si Daud mangulahon rencanana i. Alai dang diulahon si Abigail i. Gariada dipapos ibana do si Daud asa unang dipamate si Nabal. (1 Sam. 25:​23-27) Boasa boi diulahon ibana songon i?

10. Boasa toktong dipartahatton si Abigail perkawinanna?

¹⁰ Holong do roha ni si Abigail tu Jahowa, jala diargai ibana do pengaturan taringot  perkawinan. Diboto si Abigail do aha na didok Jahowa tu si Adam tikki dilehon si Hawa gabe istrina. (1 Mus. 2:24) Diboto si Abigail do na massai badia perkawinan di jolo ni Debata. Lomo do rohana mambahen las roha ni Debata. Alani i marsitutu do ibana mampartahatton perkawinanna, termasuk ma i menyelamatton suamina. Pittor bertindak do ibana asa unang dipamate si Daud suamina. Jala minta maaf do ibana tu si Daud, nang pe dang ibana na sala. Holong do roha ni Jahowa tu si Abigail ala barani ibana jala dang egois. Aha do na boi ditiru suami dohot istri sian si Abigail?

11. (a) Aha do na dipangido Jahowa sian suami dohot istri? (Epesus 5:33) (b) Aha do na diparsiajari hamu sian si Karen? (Ida gambar.)

¹¹ Parsiajaranna. Lomo do roha ni Jahowa asa toktong rap suami dohot istri, nang pe jotjot nasida kecewa dibahen pasanganna. Las do roha ni Jahowa molo olo suami dohot istri mangatasi masalah di perkawinan ni nasida, jala patuduhon respek dohot holong tu pasanganna. (Jaha Epesus 5:33.) Taida ma pengalaman ni si Karen. Onom taon dung menikah, marsiajar Bibel ma ibana jala tardidi. Didok si Karen, “Dang lomo roha ni suamikku tu keputusankon. Muruk do ibana ala hulehon tikkikku manomba Jahowa. Gabe kasar do ibana tu au jala didok ibana naeng ditinggalhon ma au.” Alai dang menyerah si Karen mampartahatton perkawinanna. Saleleng 50 taon, marsitutu do ibana patuduhon holong dohot respek tu suamina. Didok ibana muse, “Lam leleng lam huattusi ma songon dia pakkilalaan ni suamikku, jala marsiajar do au asa lambok makkatai tu ibana. Ala huboto na massai badia do perkawinan di jolo ni Debata, marsitutu do au lao mampartahatton perkawinanku. Ala massai holong rohakku tu Jahowa, dang olo au maninggalhon suamikku.” c Molo adong masalah di perkawinanmuna, pos ma rohamuna pasti dipatogu Jahowa do hamu jala urupanna do hamu asa unang menyerah.

TIKKI METMET ROHAMUNA ALANI HASALAANMUNA

12. Tantangan aha do na taadopi molo hea taulahon dosa na balga?

¹² Tantanganna. Olo do metmet rohatta molo hea taulahon dosa na balga. Bibel mandok, gabe ‘marsak jala manolsoli’ do hita dung mangulahon dosa. (Ps. 51:17) On ma na dihilala si Roni. Saleleng martaon-taon marsitutu do ibana asa boi gabe parhobas. Alai dung gabe parhobas, diulahon ibana ma  dosa na balga. Disadari ma nungnga dibahen ibana haccit roha ni Jahowa. Didok ibana, “Terganggu do panggora ni rohakku. Marsak situtu do au jala sappe tangis ma au martangiang tu Jahowa. Alai didok rohakku dang olo be Jahowa mambege tangiakki ala nungnga hubahen haccit rohana.” Molo hea hita mangulahon dosa na balga, olo do metmet rohatta jala didok rohatta nungnga ditinggalhon Jahowa be hita. (Ps. 38:4) Songon i do na dihilala hamu? Molo ido, parrohahon ma contoh sian Bibel na toktong setia manomba Jahowa nang pe hea mangulahon dosa na balga.

13. Aha do piga-piga hasalaan na hea diulahon si Petrus, jala aha do dosa na balga na ujungna diulahon ibana?

¹³ Contoh sian Bibel. Di borngin andorang so mate Jesus, diulahon si Petrus do piga-piga hasalaan jala ujungna diulahon ibana do dosa na balga. Na parjolo, ginjang do roha ni si Petrus. Didok ibana, toktong do ibana setia tu Jesus nang pe sude apostel maninggalhon Jesus. (Mrk. 14:​27-29) Na paduahon, tikki di Taman Getsemane, mulak-ulak do ibana tarpodom. (Mrk. 14:​32, 37-41) Na patoluhon, tikki ro godang halak na marsinjata manakkup Jesus, ditinggalhon si Petrus do Jesus. (Mrk.14:50) Ujungna diulahon si Petrus do dosa na balga. Disoadahon ibana do Jesus sappe tolu hali. Bahkan sappe marsumpa do ibana mandok dang ditanda Jesus. (Mrk. 14:​66-71) Songon dia do perasaan ni si Petrus dukkon i? Massai lungun do rohana, sai tumatangis jala manolsoli. (Mrk. 14:72) Bayakkon ma songon dia pakkilalaan ni si Petrus tikki dipamate Jesus. Pasti hancur hian do perasaanna jala merasa dang mararga!

14. Boasa boi toktong setia si Petrus manomba Jahowa? (Ida gambar sampul.)

¹⁴ Boasa boi toktong setia si Petrus manomba Jahowa? Toktong do jonok si Petrus tu akka apostel na asing. Ala dang mandao ibana sian akka donganna, gabe boi ma dipatogu nasida ibana. (Luk. 24:33) Asing ni i dung hehe Jesus, dipatuduhon do dirina tu si Petrus. (Luk. 24:34; 1 Kor. 15:5) Dang hasalaan ni si Petrus na sai diingot-ingot Jesus. Gariada dipatogu jala dipaboa Jesus do na lao dapot ni si Petrus tugas na balga. (Joh. 21:​15-17) Diboto si Petrus do nungnga diulahon ibana dosa na balga, alai dang sai metmet rohana. Alana pos do roha ni si Petrus toktong do dihaholongi Jesus ibana. Jala sai dipatogu akka donganna do ibana. Aha do na boi tatiru sian si Petrus?

15. Aha do na boi taparsiajari sian Psalmen 86:5 dohot Rom 8:​38, 39? (Ida gambar.)

¹⁵ Parsiajaranna. Lomo do roha ni Jahowa asa pos rohatta tu holongna, jala rade do  Ibana manesa dosatta. (Jaha Psalmen 86:5; Rom 8:​38, 39.) Olo do sai manolsoli hita ala hea taulahon dosa na balga. Wajar do i, alai unang ma didok rohatta dang dihaholongi Jahowa be hita manang dang olo Jahowa manesa dosatta. Gariada ikkon hatop do hita mangido bantuan. Si Roni na dipaboa nakkin mandok, “Ala holan mangandalhon dirikku sandiri, gabe menyerah ma au tu godaan jala gabe huulahon ma dosa na balga.” Disadari si Roni ma ikkon dipangido ibana do bantuan ni akka sintua. Didok ibana muse, “Tikki makkatai au dohot akka sintua, diurupi nasida do au asa pos rohakku tu holong ni Jahowa. Jala boi do huhilala na holong do roha ni nasida tu au. Gabe pos ma rohakku dang ditinggalhon Jahowa au.” Pos ma rohatta na massai holong do roha ni Jahowa tu hita. Jala olo do Ibana manesa dosatta molo bertobat hita, tapangido bantuan ni akka sintua, jala marsitutu dang mangulangi hasalaatta i. (1 Joh. 1:​8, 9) Molo pos rohatta tu holong ni Jahowa, pasti toktong do hita manomba Ibana nang pe hea tabahen na sala.

16. Boasa bertekad hamu asa toktong setia manomba Jahowa?

¹⁶ Diargai Jahowa do upayatta lao manomba Ibana di ari parpudi on. Boi do hamu toktong setia manomba Jahowa nang pe kecewa hamu tu dirimuna manang tu halak na asing. Patudu ma holong tu akka dongan jala rade ma hamu memaappon nasida. Patudu ma holong tu Jahowa jala argai ma pengaturan perkawinan na dibahen Ibana. Marsitutu ma mangatasi masalah di perkawinanmuna. Jala molo diulahon hamu dosa na balga, pangido ma bantuan ni Jahowa jala toktong ma manomba Ibana. Pos ma rohamuna sai dihaholongi Jahowa do hamu jala rade do Ibana manesa dosamuna. Pos ma rohatta lehonon ni Jahowa do godang pasu-pasu molo ‘dang marnaloja hita mangulahon akka na denggan’.—Gal. 6:9.