1-2. (a) Tikki didia do si Paulus mambahen surat tu halak Kristen di Epesus? (b) Aha do na lao tabahas di artikel on?

 TIKKI dipenjara Apostel Paulus di Rom, lomo do rohana patoguhon akka dongan sahaporseaon. Ala dang boi ibana mangunjungi nasida, dibahen ibana ma surat tu halak Kristen di Epesus hira-hira taon 60 manang 61 M.—Eps. 1:1; 4:1.

² Hira-hira sappulu taon sebelumna, dikunjungi si Paulus do Kota Epesus lao marbarita na uli dohot mangajari. (Ul. 19:​1, 8-10; 20:​20, 21) Holong do rohana tu akka dongan na disi, jala lomo do rohana mangurupi nasida asa toktong setia tu Jahowa. Alai boasa taringot haholomon dohot na tiur na ditaringoti ibana di suratna i? Jala parsiajaran aha do na boi tadapot sian surat ni si Paulus on? Tabahas ma i di artikel on.

SIAN NA HOLOM TU NA TIUR

3. Aha do na didok si Paulus di suratna tu halak Epesus?

³ Didok si Paulus do tu halak Kristen na di Epesus, “Di haholomon do hamu najolo, alai nungnga di bagasan na tiur i hamu saonari.” (Eps. 5:8) Dipakke si Paulus do hata “haholomon”  dohot “tiur” lao manggombarhon na massai balga do perubahan na masa tu nasida. Tabahas ma jo boasa didok si Paulus ‘di haholomon do halak Epesus i najolo’.

4. Sian dia taboto na di haholomon halak Epesus?

⁴ Agama na so sittong. Andorang so gabe halak Kristen, manomba akka debata na so sittong do halak Epesus jala mangulahon spiritisme. Di Kota Epesus adong do dibahen joro ni debata Artemis. Didok akka halak di tikki i, on ma sada bangunan na paling megah na hea dipajongjong. Tusi ma akka halak lao manomba patung. Gabe dapot ni akka tukkang perak do godang hepeng sian mambahen jala manggadis patung. (Ul. 19:​23-27) Asing ni i, lomo do roha ni akka halak di Epesus mamakke ilmu gaib.—Ul. 19:19.

5. Sian dia do muse taboto na di haholomon halak Epesus?

⁵ Seks na so patut. Lomo do roha ni halak Epesus mangulahon seks na so patut, jala dang maila nasida mangulahon i. Taringot seks do na jotjot dihatai di pentas drama dohot di perayaan agama ni nasida. (Eps. 5:3) Bibel mandok, “Dang adong aturan di ngolu ni nasida.” Di bahasa Junani lapatanna “tikki diulahon nasida na sala, dang terganggu be panggora ni roha ni nasida”. (Eps. 4:​17-19) Songon i do halak Kristen di Epesus andorang so marsiajar nasida taringot standar ni Jahowa. Jala dang parduli nasida tu pakkilalaan ni Jahowa tikki diulahon nasida na sala. Alani i ma didok si Paulus “di haholomon do pikkiran ni nasida jala pulik do nasida sian hangoluan na nilehon ni Debata”.

6. Boasa didok si Paulus ‘di bagasan na tiur halak Epesus i saonari’?

⁶ Alai adong do sian halak Epesus na maninggalhon haholomon. Didok si Paulus, ‘Nungnga di bagasan na tiur i nasida saonari ala nungnga marsada dohot Tuan i.’ (Eps. 5:8) Diulahon nasida do Hata ni Debata, jala gabe songon lampu do i na manogu-nogu nasida. (Ps. 119:105) Dang diulahon nasida be seks na so patut dohot akka ulaon  na diajarhon agama na so sittong. Ditiru nasida do Jahowa, marsitutu do nasida manomba jala mambahen las rohana.—Eps. 5:1.

7. Boasa sarupa hita songon halak Kristen di Epesus?

⁷ Sarupa do hita songon halak Kristen di Epesus. Andorang so mamboto hasittongan, hira di haholomon do hita. Hea do hita mangarayahon perayaan ni agama na so sittong manang mangulahon seks na so patut. Alai dung taparsiajari standar ni Jahowa taringot na sittong dohot na sala, tabahen do perubahan di ngolutta. Mulai ma hita mangulahon paretta ni Jahowa, jala godang do manfaat na tahilala di ngolutta. (Jes. 48:17) Alai nang pe nungnga kaluar hita sian haholomon, dang sai mura toktong ‘marpangalaho songon akka anak ni na tiur i’. Attong songon dia ma carana asa marhasil hita mangulahon i?

MANDAO MA SIAN HAHOLOMON

8. Songon na disurat di Epesus 5:​3-5, aha do na so boi be diulahon halak Kristen di Epesus?

⁸ Jaha Epesus 5:​3-5. Asa toktong di na tiur, dang boi be halak Kristen di Epesus mangulahon akka ulaon na dihasogohon Jahowa. Dang holan seks na so patut na dimaksud disi, alai dohot do akka hata na rorang. Didok si Paulus dang boi be diulahon nasida akka ulaon i molo naeng ‘parsidohot nasida tu Harajaon ni Kristus dohot Debata’.

9. Boasa dang boi tatiru “akka pangalaho ni halak na di haholomon”?

⁹ Unang ma tatiru “akka pangalaho ni halak na di haholomon”. (Eps. 5:11) Alana lam jotjot hita mangida, mambege, manang makkata-hatai taringot seks na so patut, gabe lam mura ma hita targoda lao mangulahon dosa. (1 Mus. 3:6; Jak. 1:​14, 15) Di sada negara, godang do Saksi na mamakke media sosial lao berkomunikasi dohot halak na asing. Mulana taringot Jahowa dohot Bibel do na dihatai nasida. Alai lam leleng, gabe holan taringot seks do na dihatai. Di pudian ni ari godang sian akka donganta on mandok, pakkataion sisongon i ujungna mambahen nasida gabe mangulahon seks na so patut.

10. Songon dia do cara ni Sibolis mangoto-otoi hita? (Epesus 5:6)

¹⁰ Berupaya do akka halak di portibi on lao mangoto-otoi hita. Lomo do roha ni nasida asa porsea hita dang sala mangulahon seks na so patut. (2 Ptr. 2:19) Sasittongna nungnga leleng dipakke Sibolis cara on lao mangaliluhon akka halak. Tujuanna, asa dang boi nasida mambedahon dia na sittong dohot na sala. (Jes. 5:20; 2 Kor. 4:4) Alani i ma godang do film, acara TV, dohot situs web na patuduhon akka ulaon na maralo tu standar ni Jahowa. Lomo do roha ni Sibolis asa marpikkir hita molo gaya hidup dohot akka ulaon seks na so patut dang ulaon na sala. Alai ulaon na menarik do jala dang berbahaya.—Jaha Epesus 5:6.

11. Aha do na boi taparsiajari sian pengalaman ni si Anita dohot nasehat di Epesus 5:7? (Ida gambar.)

¹¹ Lomo do roha ni Sibolis asa mardongan hita dohot akka halak na so mangihutton standar ni Jahowa. Dipasingot si Paulus do halak Kristen di Epesus, “Unang ma dongani nasida,” i ma akka halak na mangulahon na sala di jolo ni Debata. (Eps. 5:​7, surat na di toru.) Alai taingot ma umbalga do godaan na taadopi sian halak Epesus. Alana saonari boi do hita mardongan dohot halak di media sosial. Taida ma pengalaman ni si Anita a na  tinggal di Asia. Disadari ibana do bahaya ni media sosial. Didok ibana, “Lam leleng gabe muba ma cara marpikkirhu. Ujungna gabe dang terganggu be panggora ni rohakku mardongan dohot halak na so mangargai prinsip ni Bibel. Jala gabe didok rohakku ma, dang sala mamillit gaya hidup na dihasogohon Jahowa.” Alai diurupi akka sintua do si Anita asa manguba cara marpikkirna. Didok si Anita muse, “Saonari taringot Jahowa dohot Hatana do na sai hupikkirhon, dang be akka na huida di media sosial.”

12. Aha do na porlu taulahon asa toktong mangihutton standar ni Jahowa?

¹² Ikkon marsitutu do hita asa unang songon halak di portibi on na mandok dang sala mangulahon seks na so patut. Alana taboto sala do i. (Eps. 4:​19, 20) Tasukkun ma tu diritta, ‘Terlalu akrab do au tu dongan sakarejo, dongan sasikkola, manang halak na asing na so mangargai standar ni Jahowa? Barani do au mangihutton standar ni Jahowa nang pe gabe didok akka halak pakakuhu au?’ Asing ni i songon na disurat di 2 Timoteus 2:​20-22, ikkon manat do hita tikki mamillit dongan di huria. Alana adong do piga-piga halak na so boi mangurupi hita asa toktong setia manomba Jahowa.

MARPANGALAHO “SONGON AKKA ANAK NI NA TIUR”

13. Aha do lapatanna ‘marpangalaho songon akka anak ni na tiur’? (Epesus 5:​7-9)

¹³ Dijujui si Paulus do halak Epesus asa ‘marpangalaho songon akka anak ni na tiur’. (Jaha Epesus 5:​7-9.) Lapatanna ikkon tarida do na halak Kristen hita ganup tikki. Sada cara mangulahon i, taratur ma hita manjaha dohot mamparsiajari Bibel dohot akka publikasitta. Na uppetting manat ma taparsiajari ajaran dohot teladan ni Jesus, i ma “panondang ni portibi on”.—Joh. 8:12; Poda 6:23.

14. Songon dia do tondi parbadia ni Debata mangurupi hita?

¹⁴ Porlu do diurupi tondi parbadia ni Debata hita asa ‘marpangalaho songon akka anak ni na tiur’. Alana dang mura asa toktong badia di portibi ni Sibolis on. (1 Tes. 4:​3-5, 7, 8)  Boi do tondi parbadia mangurupi hita asa unang mangihutton cara marpikkir na so sadalan tu cara marpikkir ni Jahowa. Jala diurupi do hita asa boi mangulahon ‘akka na denggan dohot na hombar tu lomo ni roha ni Debata’.—Eps. 5:9.

15. Boha do carana asa boi tadapot tondi parbadia? (Epesus 5:​19, 20)

¹⁵ Martangiang ma hita mangido tondi parbadia. Didok Jesus, ‘lehonon ni Jahowa do tondi parbadia tu halak na mangido tu Ibana!’ (Luk. 11:13) Boi do tong tadapot tondi parbadia tikki rap marpungu hita dohot akka dongan lao mamuji Jahowa. (Jaha Epesus 5:​19, 20.) Molo adong tondi parbadia di hita, gabe boi ma tabahen las roha ni Debata di ngolutta.

16. Boha do carana asa boi tabahen keputusan na denggan? (Epesus 5:​10, 17)

¹⁶ Tikki naeng mambahen keputusan na penting hita, talului ma “lomo ni roha ni Jahowa” jala tapatudu ma na sadalan tindakanta tu lomo ni roha ni Jahowa i. (Jaha Epesus 5:​10, 17.) Molo talului prinsip ni Bibel na cocok tu situasitta, na berupaya mangattusi cara marpikkir ni Jahowa do hita disi. Jala molo taihutton prinsip ni Bibel, boi ma tabahen keputusan na denggan.

17. Boha do carana asa boi denggan tapakke tikkitta? (Epesus 5:​15, 16) (Ida gambar.)

¹⁷ Dilehon si Paulus do muse nasehat tu halak Epesus asa denggan mamakke tikki. (Jaha Epesus 5:​15, 16.) Lomo do roha ni musutta Sibolis asa sibuk hita mangulahon akka ulaon di portibi on. Akibatna gabe dang adong be tikkitta lao manomba Jahowa. (1 Joh. 5:19) Boi do gabe habis tikki ni sasahalak alani hepeng, pendidikan, dohot karejo. Molo i na diulahon ibana, patuduhon na diihutton ibana do cara marpikkir ni akka halak di portibi on. Hape boi do dipakke ibana tikkina i lao mangulahon na gumodang tu Jahowa. Memang dang sala mangalului  hepeng, manang mamillit pendidikan dohot karejo na denggan. Alai unang ma tabahen i gabe na uppetting di ngolutta. Asa boi hita marpangalaho “songon akka anak ni na tiur”, ikkon ‘denggan do tapakke tikkitta’. Lapatanna, taulahon ma aha na paling penting.

18. Aha do na diulahon si Donald asa boi denggan mamakke tikkina?

¹⁸ Lului ma cara asa boi mangulahon na gumodang tu Jahowa. On ma na diulahon si Donald na tinggal di Afrika Selatan. Didok ibana, “Hupikkiri ma taringot keadaanku, jala hutangiakkon ma i tu Jahowa asa diurupi au mangulahon na gumodang tu Ibana. Martangiang ma au asa boi dapottu karejo na so mangabbati au mangalehon lam godang tikki lao marbarita. Alani bantuan ni Jahowa, dapottu ma karejo na cocok. Dung i, mulai ma au dohot istrikku melayani sepenuh waktu.”

19. Songon dia do hita asa toktong marpangalaho “songon akka anak ni na tiur”?

¹⁹ Marhite suratna, diurupi si Paulus do halak Epesus asa toktong setia tu Jahowa. Ala sian Jahowa do nasehat i, marguna do i tu hita. Gabe marbisuk ma hita mamillit hiburan dohot dongan. Gabe taronjar ma rohatta taratur marsiajar Bibel, asa boi hasittongan na songon lampu i manogu-nogu hita. Gabe taboto ma muse na massai penting do tondi parbadia, alana boi do i mangurupi hita patuduhon akka sifat na denggan. Jala diurupi do hita mambahen keputusan na denggan, na sadalan tu cara marpikkir ni Jahowa. Molo taulahon i sude, boi ma hita dao sian “haholomon” jala toktong di bagasan “na tiur” i!