Hira-hira sataon ma akka donganta na di Betel mambangun stasiun radio WBBR di Staten Island, New York City. Na parjolo, ditaba nasida ma akka hau di inganan i. Dung i, dibangun nasida ma jabu na balga lao gabe inganan ni akka parkarejo na disi, dohot sada bangunan na asing lao gabe stasiun radio i. Dung sae proyek pembangunan i, mulai ma akka donganta na disi mamasang akka peralatan asa boi nasida mambahen siaran radio. Alai adong do piga-piga tantangan.

Maol hian do mamasang antena utama tu stasiun radio i. Alana ganjang ni antena i 91 meter, jala porlu dipasang di antara dua hau na timbona 61 meter. Memang, gagal do percobaan na parjolo lao mamasang antena i. Alai ala diandalhon akka donganta i do Jahowa, ujungna marhasil ma nasida. Adong ma sahalak donganta na dohot tu proyek i, goarna si Calvin Prosser. Didok ibana, “Autsugari ma marhasil hami tikki percobaan na parjolo i, pasti gabe dirinami do na dibangga-banggahon hami.” Diakkui akka donganta i ma, alani bantuan ni Jahowa do gabe marhasil nasida mamasang akka peralatan i. Alai dung sae i, adong dope tantangan na asing.

Di tikki i, hal na baru dope siaran radio, jala dang mura lao mandapot akka peralatan na dihaporluhon. Alai didapot akka donganta ma alat pemancar na dayana 500 watt, na dibahen sasahalak di daerah i. Jala akka donganta i dang manuhor mikrofon lao mambahen siaran radio, holan mamakke telepon biasa do. Di sada borngin tikki bulan Februari, dibahen nasida ma uji coba siaran radio i. Alai ikkon adong do program acara na lao disiarhon. Jadi diendehon nasida ma ende Harajaon. Sada sian  akka donganta i, goarna si Ernest Lowe. Dipaboa ibana ma adong cerita na lucu taringot na masa di tikki i. Didok ibana, tikki marende nasida, ditelepon donganta si Rutherford ma nasida. Dibege si Rutherford do hape ende i sian radio di Brooklyn, na daona hira-hira 25 kilometer sian stasiun radio i.

Didok si Rutherford, “Paso hamu ma i. Na ributan hamu!” Memang gabe maila do akka donganta i, jala pittor dipaso nasida do siaran radiona. Alai gabe diboto nasida ma berfungsi do hape sude peralatan i. Jala gabe rade ma nasida lao mambahen siaran resmi na parjolo.

Di tanggal 24 Februari 1924 ma siaran resmi WBBR na parjolo. Di tikki i didok si Rutherford do molo “stasiun radio on dipakke lao mendukung Harajaon ni Messias”. Jala “stasiun radio on dipakke lao mangurupi sude halak asa mangattusi isi ni Bibel, jala asa mangattusi molo hita nungnga mangolu di tikki na massai penting saonari”.

Lancar do siaran resmi na parjolo i. Saleleng 33 taon, stasiun radio WBBR ma na dipakke organisasi lao pasahatton barita na uli tu akka halak.

Di bulan Juli 1924, dibahen Akka Parsiajar Bibel ma kebaktian di Columbus, Ohio. Ro ma Akka Parsiajar Bibel sian marragam inganan di liat portibi on. Jala dibege nasida ma akka jamita na dipasahat di bahasa Arab, Hungaria, Inggris, Italia, Jerman, Junani, Lituania, Polandia, Prancis, Rusia, Skandinavia, dohot Ukraina. Sebagian sian acara i disiarhon do marhite radio. Jala dipangido akka donganta do tu perusahaan koran setempat asa dibahen nasida artikel taringot acara kebaktian i.

Di ari Kamis, tanggal 24 Juli, adong lobi sian 5.000 donganta na marbarita di kota lokasi ni kebaktian i. Adong do hampir 30.000 bukku na dibagihon nasida, jala adong do marribu halak na olo marsiajar Bibel. Didok do di The Watch Tower, on ma “bagian na paling mambahen las roha saleleng kebaktian i”.

Di ari Jumat, tanggal 25 Juli, tikki marjamita si Rutherford, barani do ibana manjahahon surat na isina mangalo akka pamimpin agama. Didok ibana, akka pamimpin politik, agama, dohot perdagangan sasittongna “mangabbati akka halak mamboto hasittongan taringot Harajaon ni Debata”. Hape marhite Harajaon i do Debata mangalehon pasu-pasu tu akka jolma. Didok ibana do muse, sala do akka pamimpin i ala mendukung Liga Bangsa-Bangsa jala marpikkir marhite Liga Bangsa-Bangsa i do Debata mamaretta portibi on. Pasti ikkon barani do Akka Parsiajar Bibel i paboahon barita on tu akka halak.

 Dung sae kebaktian i, didok The Watch Tower do, “Kebaktian di Columbus on patoguhon roha ni akka donganta. Gabe lam barani do nasida jala semangat marbarita na uli, nang pe mangadopi paraloan.” Si Leo Claus, na ro tu kebaktian i, mandok, “Dung sae kebaktian i, gabe semangat ma hami lao paboahon barita on di daerahnami.”

Di bulan Oktober, dibagihon Akka Parsiajar Bibel ma marjuta risalah. Risalah i marisi hatorangan na dijahahon si Rutherford di kebaktian na di Columbus i. Di sada kota na gelleng di Oklahoma, Amerika Serikat, adong ma donganta bawa na margoar si Frank Johnson. Nga sae be dibagihon ibana akka risalah i di daerah dinasna, hira-hira 20 menit andorang so dialap akka dongan na asing ibana. Alai dang aman ibana paimahon akka dongan i di tempat umum. Alana adong do akka bawa na muruk tu ibana ala marbarita di daerah i, jala gabe dilului nasida ma ibana. Jadi martabuni ma si Johnson di gareja na jonok sian i. Ala diida ibana dang adong halak di gareja i, dibahen ibana ma akka risalah i di Bibel ni pandita dohot di tiap kursi. Dung i, pittor hatop ma ibana kaluar sian gareja i. Alai ala adong dope tikki, dibahen ibana ma muse songon i di dua gareja na asing.

Pittor hatop ma si Johnson mulak tu inganan naung ditottuhon asa pajuppang dohot akka donganna. Martabuni ma ibana di balik ni pom bensin, jala manat do ibana asa unang ditakkup akka bawa na muruk i ibana. Lewat do nian mobil ni akka bawa i sian i, alai dang diida nasida si Johnson. Dang sadia leleng dung lao akka bawa i, ro ma akka dongan ni si Johnson naung sae marbarita di daerah i. Diboan nasida ma si Johnson jala lao ma nasida.

Sada sian akka donganta i mandok, “Tikki lao hami sian daerah i, dilewati hami ma tolu gareja i. Di tiap gareja, adong do hira-hira 50 halak na jongjong di jolo ni gareja i. Adong do piga-piga na lagi manjaha risalah i, jala na deba nai patuduhon risalah i tu pandita ni gareja i. Tuani ma, nga lao hami sian i. Gabe dang hona masalah hami. Mandok mauliate do hami tu Jahowa ala diurupi do hami pasahatton barita na uli i, jala dang diloas Ibana hami hona takkup.”

Di akka negara na asing, barani do tong Akka Parsiajar Bibel marbarita na uli. Misalna, di Prancis bagian utara, donganta si Józef Krett marbarita na uli tu akka pekerja tambang na ro sian Polandia. Nungnga dijadwalhon be ibana lao pasahatton jamita na marjudul “Satokkin nai Lao Dipahehe ma Akka Naung Mate”. Jadi di tikki i, dibagihon akka dongan ma undangan tu akka halak asa ro manangihon jamita i. Alai muruk ma sahalak pandita di daerah i, jala dipasingot ibana ma asa unang ro anggota garejana tusi. Hape dang songon i na terjadi. Adong ma lobi sian 5.000 halak na ro manangihon jamita ni si Krett, termasuk ma pandita i. Di tikki i, dipangido donganta si Krett do asa dibela pandita i haporseaonna. Alai dang olo pandita i. Dung sae marjamita, dilehon si Krett ma akka publikasi na adong di ibana tu akka na ro. Alana diida ibana lomo hian do akka na ro i mamboto taringot Hata ni Debata.—Amos 8:11.

Di Afrika, donganta si Claude Brown pasahatton barita na uli di Pantai Emas, na saonari digoari Ghana. Godang do halak na manangihon hasittongan ala dipasahat si Brown piga-piga jamita, jala dibagihon ibana akka publikasi tu nasida. Disi adong ma sahalak bawa na margoar si John Blankson, na sikkola di bagian farmasi. Ro do ibana lao manangihon jamita ni si Brown. Tikki ditangihon ibana jamita i, pittor disadari ibana ma nungnga dapotna be hasittongan. Didok si John, “Las hian do rohakku ala mamboto hasittongan i, jala hupaboa do taringot i tu akka halak di sikkolakku.”

 Ujungna, diboto si John ma molo ajaran Tritunggal dang sian Bibel. Sada tikki ro ma si John tu Gareja Anglikan, jala disukkun ibana ma pandapot ni pandita na disi taringot ajaran Tritunggal. Gabe muruk ma pandita i. Disonggaki ibana ma si John jala didok, “Dang halak Kristen ho. Anak ni Sibolis do ho. Lao ho sian on!”

Dung mulak si John tu jabu, dibahen ibana ma surat tu pandita i jala dipangido ma tu pandita i asa patorakkon taringot ajaran Tritunggal di jolo ni godang halak. Dibalos pandita i ma surat ni si John. Dipangido pandita i ma asa ro si John tu kantor ni kepala sekolahna. Dung i disukkun kepala sekolah i ma si John, na memang tutu do ibana mambahen surat tu pandita i manang na daong.

Didok si John ma, “Ido Pak. Au do na mambahen surat i.”

Jadi dipangido kepala sekolah i ma asa dibahen si John surat tu pandita i lao mandok minta maaf. Jadi dibahen si John ma surat na isina songon on,

“Amang pandita, dipangido kepala sekolah do au asa minta maaf tu ho. Rade do au lao minta maaf tu ho. Alai ikkon jolo diakkui ho do, molo ho nungnga mangajarhon ajaran na sala.”

Gabe tarsonggot ma kepala sekolah i jala didok ma tu si John, “Memang songon on do isi ni suratmon?”

“Olo Pak, i do na naeng hupaboa tu pandita i.”

“Dipakaluar nama ho sian sikkola on. Dang boi ho tetap di sikkola on molo dialo ho akka pamimpin agama na didukung pamaretta.”

“Alai Pak, . . . molo marsiajar hita di kalas jala adong na so diattusi hami, sala do hami manukkun tu Bapak?”

“Dang sala hamu.”

“Ba, songon i ma na masa Pak. Pandita i do kan na mangajarhon Bibel. Jala adong sukkun-sukkunku tu ibana. Molo ibana do na so boi mangalusi sukkun-sukkunki, boasa gabe au na minta maaf tu ibana?”

Ujungna dang jadi si John dipakaluar sian sikkola i, jala dang porlu ibana minta maaf.

Taringot ulaon ni Akka Parsiajar Bibel saleleng taon 1924, didok The Watch Tower do, “Songon si Daud, pos do rohatta mandok, ‘Lehononmu do gogo tu au lao marporang.’ (Psalmen 18:39) Taon na massai patoguhon roha do taon on. Alana boi do taida diurupi Jahowa do hita mangulahon lomo ni rohana. . . . Marlas ni roha do akka naposona na setia . . . pasahatton barita na uli.”

Di ujung ni taon i, dibahen akka dongan do rencana lao mambahen stasiun radio na asing. Dibangun do stasiun radio na baru i di Chicago, Amerika Serikat. Jala digoari ma i WORD, na lapatanna Hata. Alana marhite stasiun radio i do nasida pasahatton Hata ni Debata. Di stasiun radio na baru on, dibahen akka dongan do pemancar na dayana 5.000 watt. Gabe boi ma akka halak mambege barita uli tu inganan na undao sian na sebelumna, bahkan sahat tu Kanada.

Di taon 1925, diurupi Jahowa do Akka Parsiajar Bibel asa lam mangattusi hatorangan di Pangungkapon bindu 12. Alani pangattusion na baru on, adong do piga-piga halak na so olo be manomba Jahowa. Nang pe songon i, godang do na marlas ni roha ala boi nasida lam mangattusi akka peristiwa na masa di surgo, jala aha do pengaruh ni i tu naposo ni Debata di tano on.