1. Songon dia do pakkilalaan ni Jahowa tikki mangida akka naposona?

 DIPARROHAHON Jahowa do sude na diulahon akka naposona di tano on. Diboto Ibana do tikki marlas ni roha hita, jala diboto Ibana do tikki lungun rohatta. (Ps. 37:18) Asing ni i, tikki diida Jahowa tabahen na terbaik lao melayani Ibana nang pe borat sitaononta, bangga situtu do Ibana mangida hita. Jala rade do Ibana mangurupi dohot mangapuli rohatta.

2. Aha do na diulahon Jahowa tu akka halak na marsitaonon na borat, jala aha do na ikkon taulahon asa mandapot manfaat sian bantuanna i?

² Di Psalmen 147:3 didokkon, “Diubati [Jahowa] do lukka ni naposona.” Ayat on paboahon, lambok do cara ni Jahowa pamaluppon lukka ni akka halak na marsitaonon na borat. Alai, aha do na ikkon taulahon asa boi mandapot manfaat sian bantuan ni Jahowa i? Taparrohahon ma ilustrasi on. Biasana dokter na marpengalaman boi do mangurupi pasien na lukka parah. Alai asa boi malum, ikkon diihutton pasien i do saran sian dokter i. Suang songon i ma, ikkon taihutton do nasehat sian Jahowa asa boi malum rohatta. Di artikel on, tabahas ma aha do nasehat na dilehon Jahowa tu akka halak na marsitaonon na borat. Jala tabahas ma muse songon dia do caratta mangulahon akka nasehat i.

DIPAPOS JAHOWA DO ROHATTA NA MASSAI ARGA HITA

3. Boasa adong akka halak na merasa dang mararga?

³ Saonari, godang do halak di portibi on na so patuduhon holong jala mambahen na so adil tu halak na asing. Akibatna, gabe godang ma halak na merasa dang mararga. On ma na dihilala sahalak donganta borua na margoar si Helen. a Didok ibana, “Dang  dihaholongi natua-tuakku au. Kasar do bapak tu au. Jala ganup ari sai didok ibana do dang mararga au.” Olo do ra songon i na dihilala hamu. Bisa jadi adong na mambahen na so adil tu hamu, jotjot hamu dimuruki, manang dibahen nasida hamu merasa dang mararga. Molo songon i perasaanmuna, olo do ra hamu gabe merasa dang adong na benar-benar parduli tu hamu.

4. Songon na disurat di Psalmen 34:​18, songon dia do perasaan ni Jahowa tu halak na hancur rohana, jala aha do janjina tu nasida?

⁴ Alai nang pe dibahen na so adil tu hamu, pos ma rohamuna na dihaholongi Jahowa do hamu jala massai arga do hamu di Ibana. Bibel mandok, “Jonok do Jahowa tu halak na mandele.” (Jaha Psalmen 34:18.) Jadi molo ‘hancur rohamuna’, ingot ma diida Jahowa do akka na denggan sian dirimuna jala ditarik Jahowa do hamu asa jonok tu Ibana. (Joh. 6:44) Sai rade do Jahowa mangurupi hamu, alana massai arga do hamu di Ibana.

5. Sian cara ni Jesus berurusan tu akka halak na merasa dang mararga, aha do na boi taparsiajari?

⁵ Boi do taattusi perasaan ni Jahowa molo taparrohahon sitiruon na dibahen Jesus. Tikki di tano on Jesus, massai burju do ibana tu akka halak na merasa dang mararga. (Mat. 9:​9-12) Misalna, tikki adong sahalak borua na marsahit na posi manjama abit luar ni Jesus jala berharap asa boi malum, diapuli Jesus do rohana jala dipuji do ibana alani haporseaonna i. (Mrk. 5:​25-34) Sempurna do cara ni Jesus maniru sifat ni Bapakna. Burju do Jesus tu borua i, jadi pos ma rohamuna Jahowa pe songon i do tong tu hamu. (Joh. 14:9) Diida Ibana do akka sifatmuna na denggan, termasuk ma i haporseaon dohot holongmuna tu Ibana.

6. Aha do na boi diulahon hamu molo hea hamu merasa dang mararga?

⁶ Aha do na boi diulahon hamu molo hea hamu merasa dang mararga? Jaha ma akka ayat ni Bibel na paposson rohamuna na massai arga  do hamu di Jahowa. Dung i, rimangi ma akka ayat i. b (Ps. 94:19) Unang ma bandingkon dirimuna tu na asing, jala unang ma berfokus tu aha na so boi diulahon hamu. Alana dang hea dipangido Jahowa hamu mangulahon lobi sian na tolapmuna. (Ps. 103:​13, 14) Molo hea hamu mengalami kekerasan manang pelecehan, unang ma salahon dirimuna. Dang salamuna i! Jala ingot ma, hukumon ni Jahowa do akka halak na mambahen na jahat tu donganna. Alai urupanna do akka halak na gabe korban. (1 Ptr. 3:12) Si Sandra, na hea mengalami kekerasan tikki dakdanak, mandok, “Sai hupangido do tu Jahowa asa boi au mangida akka sifat na denggan na diida Ibana sian dirikku.”

7. Songon dia pengalamanta boi marguna tikki hita marbarita?

⁷ Ingot ma, boi do hamu dipakke Jahowa lao mangurupi na asing. Dilehon Jahowa do tu hamu kesempatan na luar biasa gabe dongan sakarejona di ulaon marbarita. (1 Kor. 3:9) Ala hea hamu mangadopi sitaonon, olo do ra gabe ummura hamu mangattusi perasaan ni halak na asing na marsitaonon. Gabe godang ma na boi diulahon hamu lao mangurupi nasida. Songon si Helen na dipaboa nakkin, dijalo ibana do bantuan sian Jahowa dohot akka dongan, jala saonari boi ma ibana mangurupi na asing. Didok ibana, “Hea do au merasa dang mararga. Alai diurupi Jahowa do au. Boi do huhilala holongna jala dipakke Ibana do au lao mangurupi na asing.” Saonari las do roha ni si Helen boi gabe perintis biasa.

POS MA ROHATTA OLO DO JAHOWA MENGAMPUNI HITA

8. Aha do janji ni Jahowa na disurat di Jesaya 1:18?

⁸ Adong do piga-piga naposo ni Jahowa na toktong dope merasa bersalah ala mangingot dosa na diulahon nasida di tikki naung salpu, sebelum manang dukkon tardidi. Alai ingot ma, massai holong do roha ni Jahowa tu hita. Diparade Ibana do tobusan lao manesa akka dosatta. Pos ma rohatta, massai lomo do roha ni Jahowa asa tajalo bantuanna i. Marjanji do Jahowa molo nungnga ‘tapasae akka parsoalatta’ c dohot Ibana, dang diingot Ibana be dosatta i. (Jaha Jesaya 1:18.) Bapak na parholong do Jahowa i. Pasti las situtu do rohatta ala dang diingot Jahowa be akka dosatta di tikki naung salpu. Jala dang dilupahon Ibana akka na denggan naung taulahon.—Ps. 103:​9, 12; Heb. 6:10.

9. Boasa dang porlu be taingot-ingot dosa na taulahon di tikki naung salpu?

⁹ Molo toktong dope hamu merasa bersalah alani kesalahanmuna di tikki naung salpu, berfokus ma hamu tu aha na boi diulahon hamu saonari dohot tu ari na naeng ro. Marsiajar ma sian Apostel Paulus. Hea do ibana menganiaya halak Kristen jala mambahen na haccit tu nasida. Menyesal do ibana alani tindakanna i. Alai pos do rohana nungnga diampuni Jahowa be ibana. (1 Tim. 1:​12-15) Pikkirhon ma on: Dang diingot-ingot si Paulus be akka keberhasilanna tikki gabe halak Parise. Suang songon i ma, dang diingot-ingot ibana be dosana di tikki naung salpu. (Plp. 3:​4-8, 13-15) Gariada, semangat do si Paulus melayani Jahowa, jala berfokus do ibana tu ari na naeng ro. Songon si Paulus, dang boi be diuba hamu aha naung terjadi. Alai adong do na boi diulahon hamu saonari, i ma pasangappon Jahowa jala berfokus tu janjina taringot ari na naeng ro.

10. Aha do na porlu taulahon molo kesalahanta di tikki naung salpu mambahen haccit roha ni na asing?

¹⁰ Marsak dope ra rohamuna, alana kesalahanmuna di tikki naung salpu mambahen haccit roha ni na asing. Attong, aha do na porlu diulahon hamu? Minta maaf ma hamu tu nasida sian  ias ni rohamuna, jala berupaya ma lao padenggatton situasina. (2 Kor. 7:11) Tangiakkon ma asa diurupi Jahowa nasida. Boi do diurupi Jahowa hamu dohot nasida asa toktong manomba Ibana jala makkilala dame ni roha muse.

11. Aha do na boi taparsiajari sian Panurirang Jona? (Ida sampul.)

¹¹ Marsiajar ma sian kesalahanmuna di tikki naung salpu. Jala rade ma hamu mangulahon tugas manang aha pe na dilehon Jahowa. Parrohahon ma contoh ni Panurirang Jona. Disuru Jahowa do ibana tu Ninive. Hape, lari do si Jona tu tempat na asing. Dipissang Jahowa do si Jona jala marsiajar do ibana sian kesalahanna i. (Jona 1:​1-4, 15-17; 2:​7-10) Nang pe songon i, tetap do dilehon Jahowa kesempatan tu si Jona gabe panurirang. Disuru do muse ibana lao tu Ninive, jala sahali on pittor dioloi ibana do i. Memang disolsoli si Jona do kesalahanna i. Alai dang dipasombu ibana perasaanna i mangabbati ibana manjalo tugas sian Jahowa.—Jona 3:​1-3.

DIAPULI JAHOWA DO ROHATTA MARHITE TONDI PARBADIA

12. Songon dia do Jahowa mangapuli rohatta tikki masa situasi na mambahen hancur rohatta manang trauma? (Pilippi 4:​6, 7)

¹² Marhite tondi parbadia, diapuli Jahowa do rohatta tikki masa situasi na mambahen hancur rohatta manang trauma. Taparrohahon ma pengalaman ni si Ronal dohot si Karmen. Bunuh diri do anak ni nasida. Didok nasida, “Nga hea diadopi hami akka sitaonon na borat sebelumna. Alai on ma na ubborat. Sering do hami dang boi modom di bornginna i, jadi martangiang ma hami tu Jahowa. Gabe boi ma dihilala hami hadameon songon na disurat di Pilippi 4:​6, 7.” (Jaha.) Molo hancur rohamuna manang trauma alani sitaononmuna, paboa ma i tu Jahowa. Manang sadihari pe jala sadia ganjang pe tangiangmuna, boi do dipaboa hamu perasaanmuna i tu Jahowa. (Ps. 86:3; 88:1) Sai pangido ma tondi parbadia ni Jahowa. Pos ma rohamuna, dang na lao diabaihon Jahowa pangidoanmuna i.—Luk. 11:​9-13.

13. Songon dia do tondi parbadia mangurupi hita asa toktong manomba Jahowa? (Epesus 3:16)

¹³ Hea do dihilala hamu sitaonon na borat jala tinggal otik nai nama gogomuna? Molo hea, boi do tondi parbadia mambahen hamu margogo asa toktong manomba Jahowa. (Jaha Epesus 3:16.) Parrohahon ma pengalaman ni donganta borua na margoar si Flora. Rap do ibana dohot suamina gabe misionaris. Alai suamina mangulahon seks na so patut jala marsirang ma nasida. Didok ibana, “Lungun do rohakku ala dihianati ibana au, jala holan i ma torus na hupikkiri. Hupangido ma tondi parbadia ni Jahowa asa boi au martahan. Diapuli Jahowa ma rohakku. Nang pe huhilala hira na so sanggup au mangadopi situasi on, alai dibahen Jahowa do au gabe margogo muse jala boi martahan.” Boi do dihilala si Flora nungnga diurupi Jahowa ibana asa lam mangandalhon Jahowa di ngoluna. Pos rohana na diurupi Jahowa do ibana mangadopi sitaononna i. Didok si Flora muse, “Sarupa do perasaanku songon panurat psalmen na mandok, ‘Huihutton do parettam sian nasa rohakku. Ai diurupi Ho do au asa lam pos rohakku.’”—Ps. 119:​32, surat na di toru.

14. Aha do muse na porlu taulahon asa diurupi tondi parbadia ni Jahowa hita?

¹⁴ Dukkon dipangido hamu tondi parbadia ni Jahowa, aha do muse na porlu diulahon hamu? Ulahon ma sude ulaon na mangurupi hamu mandapot lam godang tondi parbadia. Termasuk ma on ro tu parpunguan dohot marbarita na uli. Jaha ma Bibel ganup ari, alana on boi mangurupi hamu mamikkirhon aha do na dihalomohon Jahowa. (Plp. 4:​8, 9) Tikki dijaha hamu Bibel, jaha ma taringot akka halak na mangadopi sitaonon. Dung i, rimangi ma songon dia Jahowa mangurupi nasida asa martahan. Si Sandra na dipaboa nakkin, godang do sitaonon na  diadopi ibana. Didok ibana, “Massai hona do cerita taringot si Josep tu rohakku. Godang do sitaonon dohot ketidakadilan na diadopi ibana. Alai dang dipasombu ibana sudena i mambahen gale hubunganna tu Jahowa.”—1 Mus. 39:​21-23.

DIAPULI JAHOWA DO ROHATTA MARHITE AKKA DONGAN

15. Ise do na boi mangapuli rohatta, jala songon dia do nasida mangulahon i? (Ida gambar.)

¹⁵ Sada cara ni Jahowa patuduhon holongna tu hita, i ma marhite akka dongan di huria. Tikki borat sitaononta, boi do nasida ‘patoguhon rohatta’. (Kol. 4:11) Songon dia carana? Misalna dilehon nasida do tikki lao mandongani hita manang manangihon hita. Asing ni i, olo do ra dilehon nasida ayat ni Bibel na patoguhon rohatta manang rap martangiang dohot hita. d (Rom 15:4) Sipata akka donganta di huria boi do mangalehon sipaingot tu hita taringot cara marpikkir ni Jahowa. Tujuanna, asa toktong hita tenang tikki mangadopi sitaonon. Rade do tong akka donganta mangalehon bantuan marhite cara na asing. Misalna mangalehon sipanganon na mambahen hita marlas ni roha.

16. Aha do na ikkon taulahon asa boi mandapot bantuan sian akka dongan?

¹⁶ Alai sipata ikkon hita sandiri do na mangido bantuan. Sasittongna, massai holong do roha ni akka dongan tu hita jala rade do nasida mangurupi. (Poda 17:17) Alai ra dang diboto nasida songon dia perasaanta jala bantuan aha do na  tahaporluhon. (Poda 14:10) Jadi tikki marsak hamu, makkatai ma tu akka dongan na togu haporseaonna. Paboa ma tu nasida songon dia perasaanmuna, jala bantuan aha do na dihaporluhon hamu. Manang, boi do hamu makkatai tu sada manang dua sintua na dihilala hamu nyaman diajak makkatai. Adong do muse piga-piga donganta borua na gabe tarapul rohana tikki makkatai tu donganta borua na togu haporseaonna di huria.

17. Aha do tantangan na boi mambahen hita mandao sian akka dongan, jala songon dia do caratta mengatasi i?

¹⁷ Lului ma tikki lao bergaul dohot akka dongan di huria. Sipata alani arsak ni rohamuna, gabe dang olo hamu makkatai jala bergaul dohot na asing. Mungkin dihilala hamu dang diattusi nasida perasaanmuna, manang didok nasida do ra hata na mambahen haccit rohamuna. (Jak. 3:2) Alai, unang ma alani pikkiran sisongon i gabe mandao hamu sian akka dongan di huria. Alana, boi do Jahowa patoguhon rohamuna marhite nasida. Taida ma pengalaman ni si Gavin, sahalak sintua na mengalami depresi. Didok ibana, “Jotjot do au dang olo makkatai manang bergaul dohot akka dongan di huria.” Alai berupaya do si Gavin mangalului tikki lao bergaul dohot akka dongan, jala gabe las do rohana dung diulahon ibana songon i. Sahalak donganta borua na margoar si Amanda mandok, “Alani akka sitaonon na hea huadopi, gabe maol do au porsea tu akka halak. Alai berupaya do au maniru Jahowa na makkaholongi jala porsea tu akka dongan di huria. Alana molo hubahen songon i, gabe las ma roha ni Jahowa, jala au pe gabe marlas ni roha do.”

AKKA JANJI NI JAHOWA BOI MANGAPULI ROHATTA

18. Aha do na tapaima-ima di ari na naeng ro, jala aha do na boi taulahon saonari?

¹⁸ Satokkin nai, disalpuhon Jahowa ma akka na haccit dohot sude na mambahen hita marsak. (Pgk. 21:​3, 4) Di tikki i, akka na haccit na hea tahilala ‘dang na lao tarsunggul be di bagasan roha’. (Jes. 65:17) Alai saonari pe, diubati Jahowa do lukkatta. Nungnga diparade Jahowa godang bantuan lao mangapuli rohatta dohot mangurupi hita. Jadi, jalo hamu ma pangurupionna i. Unang ma ragu hamu tu hata on, “Diparrohahon [Jahowa] do hamu.”—1 Ptr. 5:7.