1. Paboa ma akka bantuan na dilehon Jesus tu hita.

 SIAN sude jolma na hea mangolu di tano on, holan Jesus do na unjotjot mangalehon bantuan tu donganna jolma. Tikki di tano on Jesus, jotjot do ibana mambahen mukjizat lao mangurupi na asing. (Luk. 9:​12-17) Jala bantuan na umbalga na hea dilehon Jesus, i ma mangalehon ngoluna lao manobus hita. (Joh. 15:13) Dung dipahehe Jesus, torus do ibana mangurupi hita. Songon naung dijanjihon ibana, dipangido ibana do tu Jahowa asa mangalehon tondi parbadia lao mangajari dohot mangapuli rohatta. (Joh. 14:​16, 17; 16:13) Jala marhite akka parpunguan di huria, torus do dilehon Jesus sude na tahaporluhon asa boi hita mambahen sisean di liat portibi on.—Mat. 28:​18-20.

2. Ise do ‘akka bawa na gabe silehon-lehon’ sian Jesus na dipaboa di Epesus 4:​7, 8?

² Adong do muse silehon-lehon sian Jesus. Didok Apostel Paulus, dung nakkok Jesus tu surgo, adong do ‘akka bawa na gabe silehon-lehon’ sian ibana. (Jaha Epesus 4:​7, 8.) Didok si Paulus, dilehon Jesus do akka bawa i asa boi nasida mangulahon akka tugas na penting di huria. (Eps. 1:​22, 23; 4:​11-13) Saonari, ‘akka bawa’ i termasuk do akka parhobas di huria, akka sintua, dohot akka pengawas wilayah. a Memang, dang sempurna nasida. Olo do sipata nasida mambahen kesalahan. (Jak. 3:2) Alai dipakke Jesus Kristus do nasida lao mangurupi hita. Jadi silehon-lehon na massai arga do nasida di hita.

3. Songon dia do hita boi mangurupi ‘akka bawa na gabe silehon-lehon’ sian Jesus? Paboa ma ilustrasina.

³ Dipillit Jesus do ‘akka bawa’ i lao patoguhon akka dongan di huria. (Eps. 4:12) Alai sude do hita boi mendukung nasida mangulahon akka tugas ni nasida. Pikkirhon ma ilustrasi on: Adong do  piga-piga sian hita na terlibat langsung tu pembangunan Bale Harajaon. Alai adong do muse na mangurupi marhite cara na asing. Misalna paradehon sipanganon, kendaraan, dohot kebutuhan na asing tu akka dongan na karejo di pembangunan i. Sarupa songon i ma, sude do hita boi mendukung akka parhobas, sintua, dohot pengawas wilayah marhite aha na tahatahon dohot na taulahon. Di artikel on, lao tabahas ma manfaat aha do na tadapot sian kerja keras ni nasida. Jala songon dia hita boi patuduhon tu nasida dohot tu Jesus, na massai taargai do kerja keras ni nasida.

RADE DO AKKA PARHOBAS DI HURIA “MANGURUPI” HITA

4. Songon dia do akka parhobas di abad na parjolo “mangurupi” huria?

⁴ Di abad na parjolo, adong do piga-piga bawa na dilantik gabe parhobas di huria. (1 Tim. 3:8) Nasida do ra akka bawa “na boi mangurupi” na didok si Paulus di suratna. (1 Kor. 12:28) Godang do tugas na diulahon akka parhobas asa boi akka sintua fokus lao mangajari dohot mamparmahani huria. Misalna, nasida do ra na mangurupi lao manalin Surat na Badia manang manuhor akka peralatan lao manalin i.

5. Saonari, aha do piga-piga tugas na diulahon akka parhobas di huria?

⁵ Pikkirhon ma piga-piga tugas na penting na diulahon akka parhobas di huriamuna. (1 Ptr. 4:10) Adong do na mangurus keuangan, mangurus daerah dinas ni huria, manang na memesan publikasi. Adong do muse na mangurus peralatan audio dohot video, na gabe tata tertib, jala na mangurupi pemeliharaan Bale Harajaon. Sude tugas i porlu do diulahon nasida asa boi denggan mardalan ulaon marbarita, jala asa boi hita menikmati parpunguan. (1 Kor. 14:40) Asing ni i, adong do parhobas na mandapot tugas lao pasahatton jamita di Parpunguan Hangoluan dohot Pangkobasion, manang pasahatton khotbah umum. Adong do muse na ditugasson lao mangurupi pengawas kelompok. Jala sipata, akka parhobas na memenuhi syarat boi do mandongani akka sintua di kunjungan penggembalaan.

6. Boasa ikkon taargai kerja keras ni akka parhobas di huria?

⁶ Aha do na didok piga-piga donganta taringot kerja keras ni akka parhobas di huria? Donganta si Berti b na tinggal di Bolivia mandok, “Mandok mauliate do au tu akka parhobas di huria. Alani kerja keras ni nasida, gabe boi ma au menikmati parpunguan. Gabe boi ma au marende, mangalehon komentar, manangihon jamita, jala boi marsiajar sian akka video dohot gambar na ditampilhon. Asing ni i, dipastihon nasida do asa aman sude na ro tu parpunguan. Jala diurupi nasida do akka dongan na so boi marpungu secara fisik asa toktong mangihutton parpunguan marhite konferensi video. Dung sae marpungu, dohot do nasida paiasson Bale Harajaon. Dietong nasida do sumbangan, jala dibagihon nasida do publikasi na dihaporluhon hami. Las hian do rohakku ala adong akka parhobas di huria!” Taida ma muse na didok si Leslie, sahalak istri ni sintua na tinggal di Kolombia. Didok ibana, “Las situtu do rohakku ala adong akka parhobas di huria. Gabe boi do suamikku mangulahon akka tugas na asing. Molo dang adong akka parhobas i, pasti gabe lam sibuk do suamikki. Jadi mauliate godang ma di semangat dohot pengorbanan na diulahon nasida lao mangurupi huria.” Pasti hamu pe mandok mauliate do tu kerja keras ni akka parhobas di huriamuna.—1 Tim. 3:13.

7. Boha do caratta patuduhon na taargai kerja keras ni akka parhobas di huria? (Ida gambar.)

⁷ Pasti taargai do kerja keras ni akka parhobas di huria. Alai cukkup do holan mangargai di bagasan roha? Dijujui Bibel do hita asa ‘tadok mauliate’ alani kerja keras ni nasida. (Kol. 3:15) Si Kristoper, sahalak sintua di Finlandia, paboahon songon dia ibana patuduhon pangargaion tu akka parhobas di huriana. Didok ibana, “Hukirim do surat na marisi ayat na patoguhon  roha. Takkas do hupaboa aha na massai huargai sian nasida, jala songon dia nasida patoguhon rohakku.” Si Pascal dohot si Jael, na tinggal di Kaledonia Baru, jotjot do manangiakkon akka parhobas di huria ni nasida. Didok si Pascal, “Baru-baru on, jotjot do hami manangiakkon akka parhobas di hurianami. Mandok mauliate do hami tu Jahowa ala adong akka parhobas di huria. Jala dipangido hami do asa didongani jala diurupi Jahowa nasida mangulahon tugas ni nasida.” Pos ma rohatta pasti ditangihon Jahowa do akka tangiang sisongon i, jala balga do manfaat ni i tu huria.—2 Kor. 1:11.

‘DANG MARNALOJA’ AKKA SINTUA MANGURUS HURIA

8. Boasa didok si Paulus ‘dang marnaloja’ akka donganna sintua mangurus huria? (1 Tessalonik 5:​12, 13)

⁸ Dang marnaloja akka sintua di abad na parjolo mangurus huria. (Jaha 1 Tessalonik 5:​12, 13; 1 Tim. 5:17) Nasida do na “manguluhon” huria. Artina, diuluhon nasida do akka parpunguan, jala dibahen nasida do akka keputusan tu huria. Nasida do na “paingotton” huria. Artina, dilehon nasida do akka sipaingot na mangurupi akka dongan asa toktong marhaporseaon na togu tu Jahowa. (1 Tes. 2:​11, 12; 2 Tim. 4:2) Alai dang holan i na diulahon akka sintua i. Marsitutu do nasida manjaga parale-aleon ni nasida toktong togu tu Jahowa, jala paradehon kebutuhan ni keluarga ni nasida.—1 Tim. 3:​2, 4; Tit. 1:​6-9.

9. Aha do akka tugas na diulahon sintua di tikkitta saonari?

⁹ Saonari pe, massai godang do tugas na diulahon akka sintua. Parbarita na uli do nasida. (2 Tim. 4:5) Semangat do nasida jala gabe teladan di ulaon marbarita. Diatur nasida do asa denggan mardalan ulaon marbarita di daerah dinas ni huria. Jala dilatik nasida do hita asa lam denggan tikki marbarita dohot mambahen sisean. Asing ni i, gabe hakim do nasida di huria, na berupaya patuduhon asi ni roha jala dang mambeda-bedahon akka dongan. Molo adong sasahalak di huria na mangulahon dosa na balga, berupaya do akka sintua mangurupi ibana asa boi denggan muse hubunganna tu Jahowa. Jala marsitutu do akka sintua manjaga huria asa toktong badia. (1 Kor. 5:​12, 13; Gal. 6:1) Alai na uppetting sian sudena i, gabe parmahan do akka sintua i di huria. (1 Ptr. 5:​1-3) Denggan do nasida paradehon jala pasahatton akka jamita na berdasarhon Bibel. Marsitutu do nasida mananda sude dongan di huria, jala dibahen nasida do kunjungan penggembalaan. Adong do muse na dohot tu proyek pembangunan dohot pemeliharaan Bale Harajaon, mangatur parpunguan regional, gabe Panitia Penghubung Rumah Sakit, gabe Kelompok Pengunjung Pasien, dohot mangulahon akka tugas na asing di organisasi. Takkas ma, ‘dang marnaloja’ akka sintua lao mangurus huria.

10. Boasa massai taargai kerja keras ni akka sintua?

¹⁰ Nungnga dipaboa Jahowa hian, na lao adong ma akka parmahan na lao manjaga manang mangurus hita. Hasilna, “dang na lao mabiar be [hita] manang tarsonggot”. (Jer. 23:4) On ma na dihilala si Johanna, sahalak donganta borua di Finlandia, tikki marsahit na posi omakna. Didok ibana, “Sasittongna, maol do au paboahon perasaanku tu halak na asing. Alai adong ma sahalak sintua na sabar manangihon au, rap martangiang dohot au, jala paposson rohakku na massai holong do roha ni Jahowa tu au. Memang dang apala takkas hutanda ibana, jala dang huingot sude na didokkon ibana. Alai huingot dope tikki i, gabe tenang ma perasaanku jala dang marsak be au. Pos do rohakku na disuru Jahowa do ibana asa ro di tikki na pas.” Aha do naung diulahon akka sintua di huriamuna lao mangurupi hamu?

11. Boha do carana patuduhon na taargai kerja keras ni akka sintua? (Ida gambar.)

¹¹ Lomo do roha ni Jahowa asa tapatudu na massai taargai do akka sintua “alani ulaon ni nasida”. (1 Tes. 5:​12, 13) Si Rita, na tinggal di Finlandia mandok, “Rade do akka sintua mangurupi hita. Alai on dang berarti unggodang tikki dohot gogo ni nasida dibandingkon hita, manang dang  adong masalah na diadopi nasida. Jadi olo do hudokkon tu nasida, ‘Mauliate ma da di kerja kerasmi. Sintua na burju do ho bah.’” Sahalak donganta borua na margoar si Sara, na tinggal di Türkiye c, mandok, “Porlu do akka sintua dipatogu asa toktong semangat mangulahon tugas ni nasida. Jadi boi do tabahen kartu ucapan, taajak nasida rap mangan manang rap marbarita dohot hita.” Adong do rencanamuna naeng mandok mauliate tu sahalak sintua di huriamuna? Molo adong, paboa ma tu ibana na massai diargai hamu do kerja kerasna i.—1 Kor. 16:18.

AKKA PENGAWAS WILAYAH PATOGUHON AKKA HURIA

12. Ise do muse na dilehon Jesus lao patoguhon akka huria? (1 Tessalonik 2:​7, 8)

¹² Adong do muse ‘akka bawa na gabe silehon-lehon’ sian Jesus, i ma akka pengawas wilayah. Di abad na parjolo, dipakke Jesus do akka sintua na di Jerusalem lao manugasson si Paulus, si Barnabas, dohot akka bawa na asing gabe pengawas wilayah. (Ul. 11:22) Aha do tujuanna? Dos songon tugas ni akka parhobas dohot akka sintua, akka pengawas wilayah pe martanggung jawab do lao patoguhon akka dongan di huria. (Ul. 15:​40, 41) Godang do pengorbanan na dibahen akka bawa on asa boi mangulahon tugasna. Bahkan, olo do sipata sappe martaru hosa nasida lao mangajari jala patoguhon akka dongan di huria.—Jaha 1 Tessalonik 2:​7, 8.

13. Aha do piga-piga tugas na diulahon akka pengawas wilayah?

¹³ Sai marpinda-pinda do akka pengawas wilayah sian sada inganan tu inganan na asing. Adong do piga-piga sian nasida na ikkon marjom-jom di pardalanan asa boi mengunjungi akka huria. Ganup minggu, dipasahat akka pengawas wilayah do piga-piga jamita, jala dohot do nasida di kunjungan penggembalaan. Nasida do na manguluhon rapat perintis, rapat dohot akka sintua, dohot  parpunguan lao marbarita. Nasida do na mangorganisasi parpunguan wilayah dohot parpunguan regional jala na mampersiappon akka jamita. Gabe instruktur do nasida di sikkola perintis, jala mambahen pertemuan khusus dohot akka perintis di wilayah ni nasida. Asing ni i, adong do sipata tugas na massai penting sian kantor cabang na ikkon hatop dipasae nasida.

14. Boasa ikkon taargai kerja keras ni akka pengawas wilayah?

¹⁴ Aha do manfaat na didapot akka huria sian kerja keras ni akka pengawas wilayah? Sahalak donganta bawa di Türkiye mandok, “Tiap kunjungan pengawas wilayah, gabe lam bertekad do au mangalehon godang tikki lao mangurupi akka dongan di hurianami. Godang do pengawas wilayah na hutanda. Alai dang adong nanggo sada pe sian nasida na mambahen au marpikkir molo nasida sibuk manang maol diajak makkatai.” Si Johanna na dipaboa nakkin, diingot ibana do pengalamanna tikki rap marbarita dohot pengawas wilayah. Tikki i, dang adong nanggo sahalak pe na boi dijuppangi nasida di jabu. Alai didok si Johanna do, “Nang pe songon i, sai huingot do tikki na mardinas i hami. Hupaboa do tu pengawas wilayah i nga pinda be dua kakakku, jala masihol hian do au tu nasida. Dung i dipatogu ibana ma rohakku. Didok ibana, mungkin saonari dang boi hita rap dohot keluarga manang ale-aletta ala melayani Jahowa. Alai holan satokkin do i. Annon di tano na imbaru, boi ma hita rap dohot nasida sahat tu saleleng ni lelengna.” Pasti godang do sian hita na hea makkilala pengalaman na patoguhon roha dohot akka pengawas wilayah.—Ul. 20:37–21:1.

15. (a) Boha do caratta lao patuduhon na massai taargai kerja keras ni akka pengawas wilayah? (3 Johannes 5-8) (Ida gambar.) (b) Boasa ikkon taargai istri ni akka donganta bawa na bekerja keras di huria, jala boha do carana mangulahon i? (Ida kotak “ Ingot ma Istri ni Nasida”.)

¹⁵ Dijujui Apostel Johannes do si Gayus asa patuduhon haburjuon tu akka pengawas wilayah na ro lao mangurupi huria. Dipangido si Johannes  do asa ‘diurupi ibana nasida sesuai tu lomo ni roha ni Debata’. (Jaha 3 Johannes 5-8.) Boha do caratta lao mangulahon i saonari? Sada carana, i ma manogihon pengawas wilayah rap mangan dohot hita. Asing ni i, dohot ma hita di ulaon marbarita saleleng kunjungan ni nasida. Si Leslie, na dipaboa nakkin, mangulahon cara na asing lao patuduhon pangargaionna tu akka pengawas wilayah. Didok ibana, “Martangiang do au asa dilehon Jahowa kebutuhan ni nasida. Asing ni i, au dohot suamikku mambahen surat lao paboahon na massai godang do manfaat na dapotnami sian kunjungan ni nasida.” Taingot ma, jolma na biasa do akka pengawas wilayah i, dang manusia super. Alana sipata, olo do ra marsahit nasida, marsak, manang marmetmet ni roha. Jadi molo tadok hata na patoguhon, manang talehon hadiah na sederhana, bisa jadi i do alus ni akka tangiang ni nasida.—Poda 12:25.

TAHAPORLUHON DO ‘AKKA BAWA NA GABE SILEHON-LEHON’ I

16. Sesuai tu Poda 3:​27, sukkun-sukkun aha do na boi dirimangi akka donganta bawa?

¹⁶ Di liat portibi on, dihaporluhon dope godang donganta bawa asa boi gabe ‘silehon-lehon’ sian Jesus. Molo hamu sahalak bawa naung tardidi, ‘olo do hamu mangurupi’? (Jaha Poda 3:27.) Olo do hamu berupaya asa memenuhi syarat gabe parhobas di huria? Molo nungnga gabe parhobas di huria, olo do hamu berupaya asa memenuhi syarat gabe sahalak sintua? d Olo do hamu mambahen penyesuaian di ngolumuna asa boi dohot tu Sikkola tu Parbarita Harajaon? Di sikkola on, lao dilatik ma hamu asa lam denggan mangulahon akka tugas na dilehon Jesus di organisasi. Alai molo dihilala hamu dang tolap dope hamu mambahen tujuan sisongon i, martangiang ma tu Jahowa. Pangido ma tondi parbadiana lao mangurupi hamu asa denggan mangulahon tugas manang aha pe na dilehon tu hamu.—Luk. 11:13; Ul. 20:28.

17. Boasa dilehon Jesus akka bawa na gabe ‘silehon-lehon’ di huria?

¹⁷ Boasa dilehon Jesus akka bawa na gabe ‘silehon-lehon’ di huria? On gabe bukti na tutu do hita ditogu-togu Jesus saleleng ari parpudi on. (Mat. 28:20) Pasti mandok mauliate do hita ala massai burju do Jesus Rajatta, jala holong do rohana tu hita. Diboto ibana do aha na tahaporluhon, jala dilehon ibana do akka donganta bawa na terampil lao mangurupi hita. Alani i, lului ma kesempatan lao patuduhon na massai diargai hamu do kerja keras ni nasida. Jala unang ma lupa hamu mandok mauliate tu Jahowa, ala sian Ibana do “sude silehon-lehon na denggan jala na sun denggan”.—Jak. 1:17.