MASSAI lomo do roha ni halak Israel tu musik. Di Bibel, jotjot do dipaboa taringot akka halak na mamakke alat musik dohot na marende. Asing ni i, godang do bukku di Bibel na marisi akka ende. Misalna bukku Psalmen, Ende ni si Salomo, dohot Andung-Andung. Bukku Music in Biblical Life mandok, “Takkas do dipaboa di Bibel molo halak Israel jotjot mamakke musik di parngoluon ni nasida ganup ari.”

Musik di parngoluon ganup ari. Halak Israel marende jala mamakke alat musik lao patuduhon perasaan ni nasida. (Jes. 30:29) Biasana adong do akka borua na marende, mamakke rebana, jala manortori lao patuduhon las ni roha tikki dilantik sahalak raja, tikki monang bangso i di parporangan, manang tikki mambahen perayaan tu Jahowa. (Pangh. 11:34; 1 Sam. 18:​6, 7; 1 Raj. 1:​39, 40) Halak Israel pe tong do marende lao patuduhon lungun ni roha ni nasida tikki adong na marujung ngolu. (2 Kron. 35:25) Jadi takkas ma, lomo hian do roha ni halak Israel tu musik, songon na didok di Cyclopedia na dibahen si McClintock dohot si Strong.

Musik di istana ni raja. Massai lomo do roha ni akka raja di Israel mambege musik. Misalna, hea do si Daud disuru Raja Saul tu istanana asa marharpa di jolona. (1 Sam. 16:​18, 23) Dukkon i tikki gabe raja si Daud, dibahen ibana do akka alat musik. Dibahen ibana do akka ende na tabo begeon, jala dipillit ibana do akka halak na lao gabe parmusik dohot parende di bagas joro. (2 Kron. 7:6; Am. 6:5) Di istana ni Raja Salomo pe, adong do akka bawa dohot borua na gabe parende.—Pjm. 2:8.

Musik na dipakke tikki manomba Jahowa. Najolo, dipillit do 4.000 bawa lao marmusik di bagas joro di Jerusalem. (1 Kron. 23:5) Nasida mamakke simbal, alat musik na martali, harpa, dohot tarompet. (2 Kron. 5:12) Alai dang holan akka bawa i na mamakke musik tikki manomba Jahowa. Godang do halak Israel na marende tikki di pardalanan tu Jerusalem lao mambahen perayaan. Digoari do ende ni nasida i “Ende ni Halak na Nakkok tu Kota”. (Ps. 120-134) Jala menurut cerita ni halak Jahudi, diendehon halak Israel do piga-piga Psalmen a tikki mangarayahon Paska.

Sahat tu saonari, massai penting dope musik di naposo ni Jahowa. (Jak. 5:13) Jotjot do hita marende lao mamuji Jahowa. (Eps. 5:19) Gabe lam solhot ma hita dohot akka dongan tikki rap marende hita dohot nasida lao mamuji Jahowa. (Kol. 3:16) Jala tikki tapakke alat musik, marende, manang mambege musik taringot Jahowa, gabe dipatogu do rohatta jala boi mangadopi akka sitaononta. (Ul. 16:25) Takkas ma, musik ma sada cara na massai denggan lao patuduhon haporseaotta tu Jahowa dohot holongta tu Ibana.