Tikki naeng marsiajar hita, olo do sukkun-sukkun rohatta, ‘Aha do na lao huparsiajari?’ Taingot ma, tikki marsiajar pasti adong do akka na baru na naeng diajarhon Jahowa tu hita. Attong songon dia ma carana mamboto aha na naeng diajarhon Jahowa tu hita?

Martangiang ma mangido bisuk. Pangido ma tu Jahowa asa diurupi hamu mangattusi aha na lao diajarhon Ibana tu hamu saonari. (Jak. 1:5) Unang ma puas holan mamboto ajaran naung diboto hamu saleleng on.—Poda 3:​5, 6.

Loas ma Bibel mempengaruhi cara marpikkirmuna. “Mangolu do hata ni Debata i.” (Heb. 4:12) Tikki tajaha Bibel, boi ma tadapot akka na baru, jala boi do i mangurupi hita asa mambahen keputusan na denggan di sude situasi ni ngolutta. Alai, boi pe songon i molo taakkui godang dope na so taboto jala porlu do hita diajari Debata.

Argai ma sude na dilehon Jahowa lao mangajari hita. Sude na diparade Jahowa lao mangajari hita dipatudos do songon “sipanganon na massai tabo”. (Jes. 25:6) Olo do ra adong piga-piga “sipanganon” manang topik na so pola dihalomohon rohamuna. Alai molo toktong diparsiajari hamu akka topik sisongon i, on patuduhon na diloas hamu do Jahowa mangurupi hamu gabe halak Kristen na lam denggan. Jadi unang ma abaihon i. Hasilna, gabe lam dinikmati hamu ma na marsiajar Bibel i.