1-2. Aha do na mambahen naposo ni Jahowa marlas ni roha? (Jakobus 1:​22-25)

 LOMO do roha ni Jahowa dohot Jesus asa marlas ni roha hita. Panurat Psalmen 119:2 paboahon, “Marlas ni roha ma akka halak na mamparrohahon sipaingotna, na mangalului Ibana sian nasa roha ni nasida.” Didok Jesus do muse, “Halak na manangihon hata ni Debata jala na mangulahon hata i do na marlas ni roha!”—Luk. 11:28.

² Akka halak na marlas ni roha do naposo ni Jahowa. Boasa tadokkon songon i? Godang do alasanna. Alai sada alasan na penting, i ma ala tajaha hata ni Debata ganup ari, jala sai berupaya do hita mangulahon na taparsiajari.—Jaha Jakobus 1:​22-25.

3. Aha do manfaatna molo taulahon aha na tajaha sian Hata ni Debata?

³ Adong piga-piga manfaat na boi tadapot molo ‘taulahon hata ni Debata’. Contohna, tikki taulahon na taparsiajari sian Hata ni Debata, gabe las do roha ni Jahowa tabahen, jala hita pe gabe marlas ni roha do. (Pjm. 12:13) Molo taihutton poda sian hata ni Debata, gabe denggan ma hubungatta tu keluarga dohot akka dongan di huria. Pasti nungnga dihilala hamu manfaatna. Asing ni i, gabe terhindar ma hita sian akka masalah na boi terjadi ala dang mangihutton hata ni Jahowa. Sarupa do pakkilalaatta songon Raja Daud. Dung dipaboa ibana di endena taringot patik, aturan, dohot keputusan ni Jahowa tikki mangadili, didok ibana do, “Molo diulahon nasida i, dapotna ma upa na balga.”—Ps. 19:​7-11.

4. Boasa dang sai mura lao mangulahon aha na taparsiajari sian Hata ni Debata?

 ⁴ Dang sai mura manjaha Bibel jala mangulahon aha na taparsiajari. Alana sibuk do hita. Alai, ikkon tabahen do jadwal lao manjaha jala marsiajar Bibel asa taboto aha na dipangido Jahowa sian hita. Jadi tabahas ma piga-piga saran na mangurupi hita lao manjaha Bibel ganup ari. Tabahas ma muse akka aha na boi mangurupi hita mamikkirhon na tajaha, jala songon dia hita mangulahon i di ngolutta.

LULUI MA TIKKI NA COCOK LAO MANJAHA BIBEL

5. Akka tanggung jawab aha do na mambahen hita sibuk?

⁵ Sibuk do naposo ni Jahowa. Godang do tikki na tapakke lao mangulahon akka tanggung jawab na penting. Misalna, godangan sian hita ikkon karejo do asa boi paradehon kebutuhanta dohot kebutuhan ni keluargatta. (1 Tim. 5:8) Godang do muse na ikkon mangurus keluargana na marsahit manang na matua. Jala, porlu do tikki di hita lao manjaga kesehatan. Asing ni akka tanggung jawab i, ikkon taulahon do akka tugas di huria. Alai tanggung jawab na utama, i ma marbarita na uli. Ala ikkon taulahon do sudena i, boha ma carana mangalului tikki asa boi manjaha Bibel ganup ari, mangarimangi isina, jala mangulahon i?

6. Boha do carana mamastihon nungnga tajaha be Bibel ganup ari? (Ida gambar.)

⁶ Sada sian ulaon “na urrikkot” na ikkon diulahon halak Kristen, i ma manjaha Bibel. Jadi ikkon tapastihon do nungnga taulahon be i ganup ari. (Plp. 1:10) Di ayat na parjolo di bukku Psalmen, dipaboa do carana asa boi hita marlas ni roha. Didok, “Patik ni Jahowa do na dihalomohon rohana. Dijaha jala dirimangi ibana do patik i arian nang borngin.” (Ps. 1:​1, 2) Takkas ma, ikkon talului do tikki asa boi manjaha Bibel. Andigan do tikki na cocok lao manjaha Bibel? Pasti dang sai sarupa akka ulaonta. Alai ikkon talului do tikki asa boi manjaha Bibel ganup ari, alana i do na uppetting. Sahalak donganta na margoar si  Viktor mandok, “Lomo do rohakku manjaha Bibel tikki manogot. Nang pe dang biasa au tibu dungo, alai huhilala i ma tikki na pas di au lao manjaha Bibel. Alana tikki manogot, otik dope gangguan. Gabe ummura ma au fokus.” Boi do ra diulahon hamu songon na diulahon donganta i. Alani i sukkun ma dirimuna, ‘Andigan do tikki na cocok di au lao manjaha Bibel?’

RIMANGI MA AHA NA DIJAHA HAMU

7-8. Aha do na boi mambahen hita gabe dang boi mandapot manfaat sian aha na tajaha? Bahen ma tudosan.

⁷ Mungkin nungnga diatur hamu tikkimuna lao manjaha Bibel. Alai adong dope na porlu diulahon hamu. Hea do hamu manjaha Bibel alai dukkon i pittor lupa hamu tu na dijahamuna i? Pasti sude do hita hea songon i. Mungkin, nungnga diatur hamu tikkimuna lao manjaha piga-piga bindu di Bibel ganup ari. Massai denggan do songon i. Alai tikki manjaha Bibel, ikkon tabahen do tujuan na jelas jala ikkon berupaya do hita mangulahon i. (1 Kor. 9:26) Alana holan permulaan dope na manjaha Bibel i. Jadi dang sae holan manjaha. Adong dope na ikkon taulahon asa boi mandapot manfaat sian i.

⁸ Pikkirhon ma on: Porlu do aek di suan-suanan asa boi denggan tubu. Misalna sian udan. Alai molo toppu doras udan nang pe satokkin, pasti dang denggan tano i menyerap aek jala boi do gabe sega suan-suanan i. Molo ro pe muse udan, dang adong be guna ni i. Alai molo dang pola doras udan, boi ma denggan tano i menyerap aek, jala gabe denggan ma partubu ni suan-suanan i. Songon i ma hita. Unang ma pahatophu hita tikki manjaha Bibel. Alana molo songon i tabahen, dang adong be tikki lao mangarimangi na tajaha. Gabe maol ma hita mangingot aha na tajaha jala mangulahon na taparsiajari i.—Jak. 1:24.

9. Aha do na ikkon taulahon molo nungnga terbiasa hita pahatophu manjaha Bibel?

⁹ Terbiasa do hamu pahatophu manjaha Bibel? Molo ido, aha do na ikkon diulahon hamu? Nanget-nanget ma jaha. Berupaya ma hamu mangarimangi aha na dijahamuna. Sasittongna dang maol mangulahon i. Alana  mungkin nungnga dilehon hamu lobi tikkimuna lao marsiajar asa boi mangarimangi aha na dijahamuna i. Asing ni i, mungkin holan otik do ayat na dijaha hamu, dukkon i dilehon hamu ma tikki lao mangarimangi i. Songon i ma na diulahon donganta si Viktor na dipaboa nakkin. Didok ibana, “Tikki manjaha Bibel, saotik do ayat na hujaha. Olo do holan sada bindu. Jala ala tikki manogot do au manjaha, gabe boi ma hurimangi ayat na hujaha i di sadari i.” Jadi manang aha pe cara na tabahen, taingot ma massai penting do nanget-nanget tikki manjaha Bibel, asa adong tikki di hita lao mangarimangi ayat na tajaha i.—Ps. 119:97; ida kotak “ Sukkun-Sukkun na Boi Dipikkirhon”.

10. Paboa ma contoh songon dia carana lao mangulahon na diparsiajari hamu. (1 Tessalonik 5:​17, 18)

¹⁰ Tikki dijaha hamu sada ayat di Bibel, pikkirhon ma boha carana lao mangulahon i. Misalna, sukkun ma dirimuna, ‘Songon dia do carakku mangulahon ayat on saonari manang di tikki na naeng ro?’ Bayakkon ma hamu manjaha 1 Tessalonik 5:​17, 18. (Jaha.) Dung dijaha hamu dua ayat i, so ma jo hamu satokkin. Rimangi ma sadia jotjot do hamu martangiang jala songon dia do isi ni tangiangmuna. Pikkirhon ma muse akka pasu-pasu na dilehon Jahowa. Ra diingot hamu ma adong tolu pasu-pasu na dilehon Jahowa, jala naeng mandok mauliate ma hamu tu Jahowa alani akka pasu-pasu i. Aha ma parsiajaranna? Bahkan holan piga-piga menit pe hamu mangarimangi ayat na dijaha, nungnga boi be hamu mangattusi jala mangulahon Hata ni Debata i. Attong, rimangi ma aha manfaatna molo torus dibahen hamu songon i ganup ari tikki manjaha ayat na asing di Bibel. Ujungna, gabe halak Kristen na lam denggan ma hamu. Alai, aha do na ikkon diulahon hamu molo godang na porlu disesuaihon sian dirimuna?

BAHEN MA TUJUAN NA MASUK AKKAL

11. Aha do sipata na boi mambahen metmet rohatta? Bahen ma contoh.

¹¹ Tikki dijaha hamu Bibel, mungkin boi gabe metmet rohamuna ala disadari hamu massai godang do hape na porlu disesuaihon sian pangalahomuna. Pikkirhon ma on: Di ari Senin, hamu manjaha Bibel taringot unang paimbar-imbarhon halak. (Jak. 2:​1-8) Gabe disadari hamu ma na porlu do disesuaihon hamu caramuna tikki berurusan dohot na asing. Massai denggan do i! Dung i, di ari Selasa, dijaha hamu ma piga-piga ayat na patuduhon massai penting do manat tikki makkatai. (Jak. 3:​1-12) Disadari hamu ma na olo do sipata hamu mandokkon hata na so tabo begeon jala dang patoguhon. Jadi berupaya ma hamu asa boi patoguhon na asing tikki makkatai. Di ari Rabu, dijaha hamu ma sipasingot asa unang  ‘marale-ale tu portibi on’. (Jak. 4:​4-12) Disadari hamu ma na ikkon manat do hamu tikki mamillit hiburan. Jala di ari Kamis, ra gabe metmet do rohamuna ala massai godang do hape perubahan na ikkon dibahen hamu.

12. Tikki tajaha Bibel jala tasadari adong na porlu tasesuaihon sian diritta, boasa dang porlu metmet rohatta? (Ida surat na di toru.)

¹² Molo porlu do hamu mambahen piga-piga penyesuaian sian dirimuna, unang ma metmet rohamuna. Sebenarna, on patuduhon na serep do rohamuna jala denggan motifmuna. Molo serep rohatta tikki manjaha Bibel, pasti talului do cara asa lam denggan pangalahotta. a Ingot ma, porlu do tikki di hita asa boi torus mamakke “pangalaho na imbaru”. (Kol. 3:10) Aha do na boi mangurupi hamu asa toktong mangulahon Hata ni Debata?

13. Songon dia do carana mambahen tujuan na masuk akkal? (Ida gambar.)

¹³ Unang ma pittor naeng diulahon hamu sude na diparsiajari hamu, alai bahen ma tujuan na masuk akkal. (Poda 11:2) Coba ma jo on: Bahen ma daftar akka aha na porlu disesuaihon. Dukkon i, pillit hamu ma sada manang dua na lao diupayahon. Baru pe upayahon hamu muse tujuan na asing. Jadi aha ma parjolo na ikkon diulahon hamu?

14. Tujuan na dia do na naeng diupayahon hamu parjolo?

¹⁴ Boi do diupayahon hamu sada tujuan na mura diulahon. Manang disadari hamu do adong na porlu disesuaihon sian dirimuna. Tikki nungnga diputusson hamu na dia na lao diupayahon, bahen ma riset sian publikasitta. Boi do dipakke hamu Indeks Publikasi Menara Pengawal manang Tudu-Tudu na Dipakke Saksi Jahowa Lao Marsiajar. Tangiakkon ma tujuanmuna  i. Pangido ma tu Jahowa asa dibahen hamu “rade jala margogo mangulahon i”. (Plp. 2:13) Dukkon i, ulahon ma aha na diparsiajari hamu i. Tikki disadari hamu boi do hape dibahen hamu perubahan na denggan, pasti gabe lam semangat jala ummura ma dihilala hamu lao mambahen perubahan na asing.

LOAS MA HATA NI DEBATA “MANGURUPI HAMU”

15. Aha do beda ni naposo ni Jahowa dohot akka halak na asing na manjaha Bibel? (1 Tessalonik 2:13)

¹⁵ Adong do akka halak na mandok nungnga piga-piga hali nasida sae manjaha Bibel. Alai, porsea do nasida tu aha na diajarhon di Bibel? Berupaya do nasida mangulahon na diajarhon Bibel di ngolu ni nasida? Daong. Godangan sian nasida dang mangihutton poda sian Bibel. Alai berbeda do molo naposo ni Jahowa! Songon halak Kristen di abad na parjolo, tajalo do Bibel i “songon na manjalo hata ni Debata”. Asing ni i, berupaya do hita asa toktong mangulahon poda sian Bibel di ngolutta.—Jaha 1 Tessalonik 2:13.

16. Aha do na boi mangurupi hita asa toktong mangulahon Hata ni Debata?

¹⁶ Dang sai mura lao manjaha dohot mangulahon Hata ni Debata. Mungkin maol do mangalului tikki na cocok lao manjaha Bibel. Manang terbiasa hita pahatophu manjaha Bibel jala dang mangarimangi aha na tajaha i. Asing ni i, olo do metmet rohatta ala tasadari godang do hape na ikkon tasesuaihon sian diritta. Manang aha pe tantanganna, pasti boi do hita mengatasi i. Molo diurupi Jahowa, pasti boi do hita marhasil mangulahon i. Jadi tajalo ma bantuan ni Jahowa jala unang ma gabe halak na makkalupahon hata i, alai taulahon ma hata i. Molo terbiasa hita manjaha Hata ni Debata jala mangulahon i di ngolutta, marlas ni roha ma hita.—Jak. 1:25.