PARSIAJARAN 39
ENDE 125 “Marlas ni Roha ma Parasi Roha”
Pasti Umlas do Roha Molo Mangalehon
“Umlas do roha ni halak na mangalehon sian na manjalo.”—UL. 20:35.
NA LAO DIBAHAS
Taparsiajari ma akka cara asa toktong hita marlas ni roha tikki mangalehon.
1-2. Aha do manfaat na tadapot ala ditoppa Jahowa hita boi marlas ni roha tikki mangalehon?
UMLAS las do rohatta tikki mangalehon sian na manjalo. Jala sian mulana, nungnga songon i Jahowa manoppa hita. (Ul. 20:35) Alai dang na berarti gabe dang las rohatta tikki adong na mangalehon hadiah tu hita. Alana pasti las do rohatta molo mandapot hadiah. Nang pe songon i, umlas do rohatta molo hita na mangalehon tu na asing. Jala adong do manfaatna ala ditoppa Jahowa hita songon i. Aha ma i?
2 Ala ditoppa Jahowa hita songon i, boi ma hita sandiri na mambahen tamba las ni rohatta ala mangalehon. Jadi boi do tamba las ni rohatta molo talului cara lao mangalehon tu na asing. Pasti massai las do rohatta ala songon i do Jahowa manoppa hita.—Ps. 139:14.
3. Boasa Jahowa i didok “Debata na marlas ni roha”?
3 Didok di Bibel, “Umlas do roha ni halak na mangalehon.” I do alana mura taattusi boasa didok Jahowa i “Debata na marlas ni roha”. (1 Tim. 1:11) Alana Ibana do na parjolo sahali mangalehon tu na asing, jala dang adong na hea mangalehon lobi sian na dilehon Ibana. Songon na didokkon Apostel Paulus, “Alani Ibana do hita gabe adong, marhosa, jala mangolu.” (Ul. 17:28) Takkas ma, sian Jahowa do “sude silehon-lehon na denggan jala na sun denggan”.—Jak. 1:17.
4. Aha do na boi mangurupi hita asa lam tamba las ni rohatta?
4 Pasti lomo do rohatta asa lam marlas ni roha tikki mangalehon. Boha do caratta mangulahon i? Tatiru ma haburjuon ni Jahowa. (Eps. 5:1) Di artikel on, tabahas ma sitiruon na dibahen Jahowa tikki mangalehon. Taparsiajari ma muse aha do na ikkon taulahon molo tahilala hira na so diargai na talehon i. Akka parsiajaran on boi mangurupi hita asa toktong marlas ni roha, jala boi mambahen lam tamba las ni rohatta ala mangalehon.
TIRU MA JAHOWA NA BURJU MANGALEHON
5. Akka aha do na dilehon Jahowa tu hita?
5 Akka aha do na dilehon Jahowa tu hita? Taida ma piga-piga contoh. Dilehon Jahowa do sude na tahaporluhon. Memang, godangan sian hita dang halak na mora. Alai dipastihon Jahowa do asa tadapot sude na tahaporluhon, songon sipanganon, pakkean, dohot tempat tinggal. (Ps. 4:8; Mat. 6:31-33; 1 Tim. 6:6-8) Sasittongna, dang kewajiban ni Jahowa mangalehon sudena i tu hita. Attong, boasa ma dilehon Jahowa kebutuhanta?
6. Aha do parsiajaran na tadapot sian Mateus 6:25, 26?
6 Dilehon Jahowa do sude na tahaporluhon ala massai holong do rohana tu hita. Parrohahon ma na didok Jesus di Mateus 6:25, 26. (Jaha.) Dipakke Jesus do contoh sian akka toppaan, misalna pidong. Didok Jesus do dang hea pidong ‘manabur boni, manang mamanen, manang papunguhon hasil panen tu gudang’. Dung i didok ibana, “Alai, dilehon Amamuna na di banua ginjang i do sipanganon tu nasida.” Disukkun Jesus ma akka siseanna, “Ummarga do hamu kan sian akka pidong i?” Aha ma parsiajaranna? Di adopan ni Jahowa, dao do ummarga akka naposona na setia sian akka binatang. Haru akka binatang pe diparrohahon Jahowa, tarlumobi ma hita. Pasti dilehon Ibana do sude na tahaporluhon. Dos songon bapak na mangalehon kebutuhan ni keluargana, pasti lehonon ni Jahowa do sude na tahaporluhon.—Ps. 145:16; Mat. 6:32.
7. Boha do caratta maniru Jahowa tikki mangalehon? (Ida gambar.)
7 Songon Jahowa, ala holong rohatta tu na asing, pasti talehon do na dihaporluhon nasida. Misalna, adong do diboto hamu donganta na makkaporluhon sipanganon manang pakkean? Boi do dipakke Jahowa hamu lao mangurupi nasida. Diboto halak do molo naposo ni Jahowa i hatop mangurupi na asing tikki masa bencana. Misalna, saleleng pandemi COVID-19, rade do akka donganta mangalehon bantuan songon sipanganon, pakkean, dohot kebutuhan na asing tu akka dongan na makkaporluhon. Godang do muse na mangalehon sumbangan tu pekerjaan seluas dunia. Akka sumbangan i boi mangurupi akka donganta di liat portibi on na gabe korban bencana. Pasti diihutton nasida do poda di Heber 13:16 na mandok, “Unang ma lupa hamu mangulahon akka na denggan jala urupi hamu ma na asing sian nasa tolapmuna. Ai lomo do roha ni Debata tu akka pelean sisongon i.”
Sude do hita boi maniru Jahowa na burju mangalehon (Ida paragraf 7)
8. Aha do manfaat na tahilala ala dilehon Jahowa gogo tu hita? (Pilippi 2:13)
8 Dilehon Jahowa do gogo tu hita. Dang terbatas gogo ni Jahowa, jala las do rohana mangalehon i tu akka naposona na setia. (Jaha Pilippi 2:13.) Ra hea do hamu martangiang asa margogo lao manolak godaan manang asa toktong setia mangadopi situasi na borat. Asing ni i, olo do ra hamu martangiang asa margogo lao mangulahon ulaonmuna di bagasan sadari i. Tikki dihilala hamu nungnga dialusi Jahowa tangiangmuna i, pasti setuju do hamu tu Apostel Paulus na mandok, “Margogo do au di sude na masa, ala dilehon Debata do huaso tu au.”—Plp. 4:13.
9. Songon dia do hita boi mamakke gogotta lao mangurupi na asing? (Ida gambar.)
9 Memang dang sarupa hita songon Jahowa. Terbatas do gogotta jala dang boi tabagihon gogotta i tu na asing. Alai boi do tatiru Jahowa molo tapakke gogotta lao mangurupi na asing. Misalna, boi do taurupi akka donganta na marsahit manang na matua. Boi do hita mangurupi paiasson jabu ni nasida manang berbelanja tu nasida. Molo cocok situasitta, boi do hita mangurupi paiasson dohot merawat Bale Harajaon. Molo tapakke gogotta lao mangulahon akka na denggan, parohon manfaat do i tu akka donganta.
Tapakke ma gogotta lao mangurupi halak na asing (Ida paragraf 9)
10. Songon dia do hita boi patoguhon na asing marhite aha na tahatahon?
10 Ingot ma muse, boi do hita patoguhon na asing marhite aha na tahatahon. Adong do diingot hamu akka dongan na porlu dipatogu? Molo adong, paboa ma na parduli do hamu tu ibana. Boi do hamu ro tu jabuna, manelepon ibana, manang mangirim kartu ucapan, email, dohot pesan tu ibana. Unang pola khawatir hamu mamikkiri aha na lao sidokkononmuna. Hata na sederhana pe alai molo sian ias ni roha, boi do i mambahen ibana toktong setia jala dang marmetmet ni roha be.—Poda 12:25; Eps. 4:29.
11. Tikki tapangido bisuk sian Jahowa, songon dia do tanggapanna?
11 Dilehon Jahowa do bisuk tu hita. Didok si Jakobus do, “Molo adong sian hamu na hurang bisuk, toktong ma i dipangido tu Debata. Lehononna do i tu ibana jala dang pailaonna ibana. Ai burju do Debata mangalehon tu sude halak.” (Jak. 1:5) Songon na didok di ayat i, dang disippan Jahowa bisukna holan tu dirina sandiri. Las do rohana mangalehon i tu hita. Parrohahon ma muse tikki dilehon Jahowa bisukna tu hita, dang pailaonna hita. Artina, dang lomo roha ni Jahowa gabe maila hita ala torus tapangido bantuanna. Gariada lomo do rohana asa toktong tapangido bisuk sian Ibana.—Poda 2:1-6.
12. Di kesempatan na songon dia do hita boi mambagihon aha na taboto?
12 Attong, songon dia do caratta maniru Jahowa? (Ps. 32:8) Godang do kesempatan di hita lao mambagihon aha na taboto. Misalna, jotjot do hita mangalatik akka penyiar na baru di ulaon marbarita. Asing ni i, sabar do akka sintua mangurupi akka parhobas dohot akka donganta bawa naung tardidi lao mandalatton akka tugas di huria. Jala akka donganta na berpengalaman di bidang pembangunan dohot pemeliharaan rade do mangalatik na asing lao mangurus akka bangunan na dipakke organisasi ni Jahowa.
13. Boha do caratta maniru Jahowa tikki mangalatik na asing?
13 Tiru ma Jahowa tikki mangalatik na asing. Ingot ma, las do roha ni Jahowa mangalehon bisukna tu hita. Suang songon i ma hita, las ma rohatta mambagihon akka naung taparsiajari dohot pengalaman na tadapot tu akka dongan na talatik. Unang ma hita menahan diri mangalatik nasida ala mabiar gabe nasida annon na manggattihon hita mangulahon tugas i. Jala unang ma hita marpikkir, ‘Marhua ma pola hulatik ibana. Ai au pe dang hea dilatik najolo.’ Dang boi adong cara marpikkir sisongon i di naposo ni Jahowa. Gariada las ma rohatta mangalatik na asing, jala tapaboa ma sude naung taboto tu nasida songon na mangalehon ngolutta sandiri. (1 Tes. 2:8) Lomo do rohatta asa nasida pe annon “boi denggan mangajari na asing”. (2 Tim. 2:1, 2) Molo las rohatta mambagihon akka naung taparsiajari, gabe lam marbisuk jala lam marlas ni roha ma hita dohot akka na asing.
MOLO TAHILALA DANG DIARGAI NA TALEHON I
14. Tikki taulahon na denggan tu akka halak, boha do biasana tanggapan ni nasida?
14 Tikki talehon manang tabahen na denggan tu na asing, tarlumobi tu akka donganta, biasana mandok mauliate do nasida tu hita. Mungkin dilehon nasida do kartu ucapan manang mandok mauliate tu hita marhite cara na asing. (Kol. 3:15) Tikki mandok mauliate nasida, gabe las ma rohatta ala taboto nungnga tabahen na denggan tu nasida.
15. Aha do na porlu taingot molo hira na so diargai na talehon i?
15 Sipata, nang pe nungnga talehon tikki, gogo, dohot na adong di hita, olo do ra piga-piga halak hira na so mangargai akka na tabahen i lao mangurupi nasida. Hape nungnga godang habis tikki, gogo, dohot hepengta tusi. Molo masa i, songon dia do asa unang mago las ni rohatta manang gabe kecewa hita? Taingot ma ayat tema ni parsiajaran on, i ma Ulaon ni Apostel 20:35. Las ni rohatta dang bergantung tu tanggapan ni akka halak. Jadi, boi do toktong marlas ni roha hita nang pe hira na so diargai nasida aha na talehon i. Aha do na boi mangurupi hita asa toktong marlas ni roha? Tabahas ma piga-piga cara.
16. Aha do na boi mambahen hita toktong marlas ni roha tikki mangalehon?
16 Tikki hita mangalehon tu na asing, ingot ma na maniru Jahowa do hita disi. Dilehon Jahowa do na denggan tu akka jolma, dang soal diargai nasida do i manang na daong. (Mat. 5:43-48) Marjanji do Jahowa molo tatiru Ibana, burju hita mangalehon, jala dang taharappon imbalan manang aha pe, gabe ‘balga ma upa jalootta’. (Luk. 6:35) Unang ma kecewa molo dang mandok mauliate nasida tu hamu. Ingot ma, torus do dilehon Jahowa pasu-pasu tu hamu molo diurupi hamu na asing, jala ‘marlas ni roha tikki mangalehon’.—Poda 19:17; 2 Kor. 9:7.
17. Aha do na porlu taingot asa boi toktong marlas ni roha tikki mangalehon? (Lukas 14:12-14)
17 Cara na asing lao maniru Jahowa tikki mangalehon, i ma mangulahon na didok Jesus di Lukas 14:12-14. (Jaha.) Dang sala molo burju hita jala mangalehon tu sasahalak na boi mambalos haburjuonta i. Alai coba ma pikkirhon: ‘Saleleng on, molo hita mangalehon tu na asing, berharap do hita asa dibahen muse na sarupa tu hita?’ Molo songon i do na tahilala, coba ma ulahon na didok Jesus i. Burju ma hita mangalehon tu sasahalak, nang pe taboto dang boi ibana mangalehon na sarupa tu hita. Hasilna, gabe marlas ni roha ma hita ala nungnga tatiru Jahowa. Molo dang taharappon imbalan sian halak na asing, gabe toktong ma hita marlas ni roha tikki mangalehon, nang pe dang mandok mauliate nasida tu hita.
18. Aha do na so boi taulahon, jala boasa?
18 Unang ma marpikkiran negatif tu halak na asing. (1 Kor. 13:7) Molo hira na so diargai do na talehon i, sukkun ma diritta: ‘Na memang tutu do ibana dang mangargai na hulehon manang alani na lupa do ibana mandok mauliate?’ Mungkin adong do alasan na asing boasa dang mandok mauliate nasida tu hita. Adong do piga-piga halak na sebenarna mangargai na talehon i, alai maol mandokkon i tu hita. Maila do ra nasida mandapot bantuan, tarlumobi molo najolo nasida do na biasana mangalehon bantuan. Alai molo holong do rohatta tu akka dongan, dang marpikkiran negatif hita tu nasida jala toktong marlas ni roha tikki mangalehon.—Eps. 4:2.
19-20. Aha do muse alasanna asa toktong marlas ni roha hita tikki mangalehon? (Ida gambar.)
19 Sabar ma hamu. Hea do didok Raja Salomo, “Sappatton ma rotim tu aek, jala dapotmu do i muse piga-piga ari nai.” (Pjm. 11:1) Songon na didok di ayat on, olo do sasahalak mandok mauliate tu hita “piga-piga ari” dung taurupi nasida. On ma na masa tu sahalak donganta borua.
20 Marpulu taon naung salpu, istri ni pengawas wilayah mambahen surat na patoguhon roha tu sahalak donganta borua na baru tardidi. Di suratna dipaboa do na massai penting asa toktong setia tu Jahowa. Hira-hira ualu taon dukkon i, dibalos donganta borua i ma surat i. Didok ibana, “Mungkin dang disadari ho ate. Nga diurupi ho au toktong setia saleleng piga-piga taon on.” Didok ibana do muse, “Massai hona do suratmi tu rohakku, jala dang hea lupa au tu ayat na sinuratmi.” a Dung dipaboa donganta i akka tantangan na diadopi ibana, didok ibana ma, “Sipata naeng menyerah do au di sude situasi ni ngolukkon, jala dang olo be gabe Saksi. Alai ayat na sinuratmi mambahen margogo au muse jala mangurupi au asa unang menyerah.” Didok ibana muse, “Sasittongna, isi ni suratmi dohot ayat na pinaboami do na paling mambahen au margogo saleleng na ualu taon on.” Pasti marlas ni roha situtu do istri ni pengawas wilayah i dung “piga-piga ari” ibana manjalo balos ni suratna i. Hita pe boi do songon i tikki nungnga tabahen na denggan tu sasahalak. Olo do ra nasida mandok mauliate tu hita dung piga-piga tikki.
Olo do ra adong na mandok mauliate tu hita piga-piga tikki dung talehon bantuan tu nasida (Ida paragraf 20) b
21. Boasa lomo rohatta toktong maniru Jahowa na burju mangalehon?
21 Songon naung tabahas, ditoppa Jahowa do hita asa marlas ni roha tikki mangalehon. Memang, las do rohatta tikki manjalo hadiah sian na asing. Alai umlas do rohatta tikki hita na mangalehon. Las do rohatta tikki taurupi dongan sahaporseaotta. Jala las do rohatta tikki mandok mauliate nasida. Alai, dang soal nasida mandok mauliate tu hita manang na daong, las do rohatta ala nungnga taulahon be na denggan. Unang ma lupa hamu, manang sadia godang pe na dilehon hamu tu na asing, “boi do lehonon ni Jahowa tu [hamu] lobi sian i”. (2 Kron. 25:9) Bayakkon ma, Jahowa sandiri do na mambalos haburjuonta i. Jala tikki nungnga dipasu-pasu Jahowa hita, i ma pasu-pasu na terbaik. Jadi bertekad ma hita asa toktong maniru Jahowa na burju mangalehon.
ENDE 17 ‘Olo do Au Mangurupi’
a Ayat na dilehon tu donganta borua i, i ma 2 Johannes 8 na mandok, “Manat ma hamu, unang ma mago bahen hamu hasil naung diulahon hami, asa boi dapotmuna sude pasu-pasu naung diparade Debata tu hamu.”
b HATORANGAN NI GAMBAR: Peragaan: Dilehon istri ni pengawas wilayah ma ayat na patoguhon roha tu sahalak donganta borua. Martaon-taon dukkon i, dikirim donganta borua i ma balos ni surat na patuduhon hamauliateon tu istri ni pengawas wilayah i.
