1-2. (a) Tikki dikirim si Paulus surat tu halak Kristen di Judea, songon dia do situasi di tikki i? (b) Boasa tepat waktu surat i tu nasida?

 DUKKON mate Jesus di taon 33 M, halak Kristen di Jerusalem dohot di Judea mangadopi godang hasusaan. Dang sadia leleng dung adong huria Kristen, godang do penganiayaan na diadopi nasida. (Ul. 8:1) Hira-hira 20 taon dukkon i, susa do nasida alani haraparon dohot hapogoson. (Ul. 11:​27-30) Hira-hira taon 61 M, dang pola parah be situasina jala boi ma dame dihilala nasida. Alai holan satokkin do i, alana adong do hasusaan na umbalga na lao masa. Di tikki i, ditogu-togu Jahowa ma Apostel Paulus lao mangirimhon surat tu nasida. Akka poda na di surat i mambahen nasida rade mangadopi hasusaan na lao masa satokkin nai.

² Tepat waktu do surat na dikirim si Paulus i tu halak Heber, alana dang sai torus dame situasina di tikki i. Dilehon si Paulus ma akka poda na boi mangurupi nasida martahan lao mangadopi hasusaan na satokkin nai terjadi. Nungnga lam jonok be tikkina, na lao dihancurhon nama Jerusalem songon naung didok Jesus. (Luk. 21:20) Memang dang diboto si Paulus dohot halak Kristen di Judea andigan masa i. Nang pe songon i, boi do dipakke nasida tikki na adong lao mempersiappon diri asa boi martahan dohot patoguhon haporseaon ni nasida.—Heb. 10:25; 12:​1, 2.

3. Boasa halak Kristen saonari porlu mamparrohahon surat tu halak Heber?

 ³ Satokkin nai, upparah do hasusaan na lao taadopi sian na diadopi halak Kristen di Judea. (Mat. 24:21; Pgk. 16:​14, 16) Jadi tabahas ma piga-piga poda na dilehon Jahowa na mangurupi halak Kristen di tikki i. Jala boi do tong poda i mangurupi hita.

“MARSITUTU MA ASA TORAS”

4. Tantangan aha do na diadopi halak Jahudi na gabe halak Kristen? (Ida gambar.)

⁴ Godang do tantangan na diadopi halak Jahudi dung gabe halak Kristen. Najolo, halak Jahudi do bangso na dipillit Jahowa. Saleleng martaon-taon, Jerusalem do inganan na istimewa. Alana sian i do mamaretta akka raja na mewakili Jahowa. Jala akka halak na naeng beribadat tu Jahowa ikkon lao do tu bagas joro na di Jerusalem. Sude halak Jahudi mangihutton Patik ni si Musa dohot akka aturan na dibahen pamimpin agama ni nasida. Adong do akka aturan taringot sipanganon, sunat, dohot songon dia carana berurusan tu akka halak na so Jahudi. Alai dung mate Jesus, gabe muba do cara lao beribadat tu Jahowa. Dang dijalo Jahowa be akka pelean na dipelehon di bagas joro. Pasti dang mura i di halak Jahudi naung gabe halak Kristen lao mangihutton perubahan on. Alana nungnga terbiasa nasida mangihutton Patik ni si Musa. (Heb. 10:​1, 4, 10) Buktina, Apostel Petrus na togu haporseaonna pe maol do mangihutton perubahan i. (Ul. 10:​9-14; Gal. 2:​11-14) Jala alani akka perubahan on, gabe dianiaya akka pamimpin agama Jahudi ma halak Kristen di tikki i.

5. Akka ise do na menentang halak Kristen di tikki i?

⁵ Adong dua kelompok na menentang halak Kristen di Judea. Na parjolo, i ma pamimpin agama Jahudi. Sogo do roha ni nasida tu halak Kristen i, ala ditinggalhon halak Kristen i do agama Jahudi. Na paduahon, i ma akka dongan na di huria. Adong do piga-piga sian nasida na mandok ikkon torus do halak Kristen mangihutton Patik ni si Musa. Bisa jadi didok nasida pe songon i asa unang dianiaya do nasida. (Gal. 6:12) Attong, aha do na boi  mangurupi halak Kristen asa toktong setia tu Jahowa?

6. Aha do na didok si Paulus tu halak Kristen di tikki i? (Heber 5:14–6:1)

⁶ Di suratna tu halak Heber, dijujui si Paulus do halak Kristen di tikki i asa bagas mamparsiajari Hata ni Debata. (Jaha Heber 5:14–6:1.) Dikutip si Paulus do ayat sian Akka Bukku Heber, jala dipatorang ibana do boasa dao undenggan ibadat ni halak Kristen sian ibadat ni halak Jahudi. a Dijujui si Paulus do muse nasida asa bagas mamparsiajari hasittongan. Tujuanna, asa boi diboto nasida na dia do ajaran na sala jala boi ma pittor ditolak nasida i.

7. Aha do tantangan na taadopi saonari?

⁷ Saonari godang do halak na paboahon informasi na maralo tu paretta ni Jahowa. Piga-piga halak mandok, sala do Saksi Jahowa ala mangihutton poda sian Bibel taringot seks. Takkas ma, lam maralo do cara marpikkir ni akka halak di portibi on tu cara marpikkir ni Jahowa. (Poda 17:15) Alani i, massai penting do asa taboto na dia do cara marpikkir na sala jala pittor tatolak ma i. Unang ma taloas akka musu ni Jahowa mambahen gale haporseaotta jala mambahen hita maninggalhon Ibana.—Heb. 13:9.

8. Aha do na ikkon taulahon asa toktong togu haporseaotta?

⁸ Dijujui si Paulus do halak Heber asa torus patoguhon haporseaon ni nasida tu Jahowa. Hita pe ikkon songon i do. Lapatanna, ikkon bagas do taparsiajari Bibel asa lam tatanda Jahowa jala lam taattusi cara marpikkirna. Ikkon torus do on taulahon nang pe nungnga tardidi hita. Dang soal nungnga sadia leleng hita gabe Saksi Jahowa, ikkon tajaha jala taparsiajari do Bibel ganup ari. (Ps. 1:2) Molo taparsiajari Bibel ganup ari, gabe lam togu ma haporseaotta. Haporseaon i do sifat na ikkon dipatudu halak Kristen di tikki i, songon na ditaringoti si Paulus di suratna.—Heb. 11:​1, 6.

‘SETIA MA HITA ASA BOI TOKTONG MANGOLU’

9. Boasa ikkon togu haporseaon ni halak Kristen di tikki i?

⁹ Ikkon togu do haporseaon ni halak Kristen di tikki i asa boi selamat tikki masa hasusaan di Judea. (Heb. 10:​37-39) Nungnga dipasingot Jesus akka siseanna, ikkon lari do nasida sian Jerusalem tu akka dolok molo diida nasida ro akka tentara mengepung Jerusalem. Sipasingot ni Jesus i marlakku do tu sude halak Kristen di tikki i, dang soal nasida tinggal di kota Jerusalem manang di Judea. (Luk. 21:​20-24) Tabayakkon ma di tikki i, molo ro akka tentara lao menyerang, biasana masuk do akka halak tu bagasan kota alana tembok ni kota i do na boi melindungi nasida. Hape Jesus mamarettahon halak Kristen di tikki i asa lari sian Jerusalem tu akka dolok. Ra dihilala nasida dang masuk akkal paretta ni Jesus i. Jadi ikkon togu do haporseaon ni nasida asa boi mangihutton paretta i.

10. Molo togu haporseaon ni halak Kristen di tikki i, aha do na ikkon diulahon nasida? (Heber 13:17)

¹⁰ Asing ni i, ikkon porsea do halak Kristen di tikki i tu akka halak na dipillit Jesus lao manguluhon di huria. Ra di tikki i, akka halak na manguluhon di huria mangalehon petunjuk na jelas taringot andigan nasida ikkon lari jala songon dia mangulahon i. (Jaha Heber 13:17.) Didok si Paulus tu halak Kristen di tikki i, ikkon dioloi jala ikkon unduk do nasida tu akka halak na manguluhon di huria. Maksudna, nasida ikkon unduk tu akka sintua dang  alani kewajiban, alai ala porsea do nasida tu akka sintua i. Jadi takkas ma, ikkon porsea do halak Kristen di tikki i tu akka sintua jala mangihutton petunjuk sian nasida sebelum ro hasusaan i. Alana molo dioloi nasida do akka sintua tikki dame dope situasina, pasti ummura do annon nasida mangoloi akka sintua i tikki masa hasusaan.

11. Boasa ikkon togu haporseaon ni halak Kristen saonari?

¹¹ Saonari pe, ikkon tapatudu do haporseaon songon halak Kristen di tikki i. Alana godang do halak saonari na so porsea tu barita taringot na lao dihancurhon portibi na dirajai Sibolis on. Bahkan direhei nasida do hita ala porsea tu barita i. (2 Ptr. 3:​3, 4) Asing ni i, godang dope na so taboto taringot aha na masa tikki hasusaan bolon i annon, nang pe nungnga adong piga-piga hatorangan taringot i dipaboa di Bibel. Jadi ikkon pos situtu do rohatta, pasti ro do annon panutup ni jaman on sesuai tu tikki naung ditottuhon Jahowa. Jala pos ma rohatta, na lao jagaon ni Jahowa do hita tikki masa i.—Hab. 2:3.

12. Aha do na mangurupi hita asa boi selamat tikki masa hasusaan bolon i?

¹² Asing ni i, ikkon tapapos do rohatta tu akka halak na dipakke Jahowa saonari lao manogu-nogu hita, i ma “naposo haposan jala na marbisuk”. (Mat. 24:45) Tikki dimulai annon hasusaan bolon i, ra dilehon do tu hita petunjuk na jelas asa toktong hita aman, songon petunjuk na dijalo halak Kristen najolo tikki ro akka tentara ni Rom mengepung Jerusalem. Jadi mulai sian saonari, lam tapapos ma rohatta tu akka dongan na manguluhon di organisasi ni Jahowa. Alana, molo dang porsea jala dang taoloi petunjuk ni nasida mulai sian saonari, pasti maol do annon hita mangoloi petunjuk ni nasida tikki masa hasusaan bolon i.

13. Boasa massai penting poda na disurat di Heber 13:5?

¹³ Sambil paimahon tanda andigan nasida boi lari sian Jerusalem, ikkon dijaga halak Kristen di tikki i do ngolu ni nasida asa tetap sederhana jala dang holan ‘mamikkiri hepeng’. (Jaha Heber 13:5.) Memang piga-piga sian nasida hea do makkilala hasusaan na borat alani haraparon dohot hapogoson. (Heb. 10:​32-34) Nang pe marhasil jala martahan nasida mangadopi akka hasusaan alani barita na uli, adong do piga-piga na mulai berupaya mangalului godang hepeng. Didok roha ni nasida, molo godang hepeng ni nasida, boi do i melindungi nasida sian bahaya. Alai taboto do sadia godang pe hepeng ni nasida, dang boi hepeng i mambahen nasida selamat tikki dihancurhon Jerusalem. (Jak. 5:3) Jadi manang ise pe halak Kristen di tikki i na manganggap hepeng dohot arta na uppetting di ngoluna, pasti maol do nasida lari sian Jerusalem jala maninggalhon jabu dohot arta ni nasida.

14. Molo togu haporseaotta, boha do pandanganta taringot hepeng dohot arta?

¹⁴ Molo togu haporseaotta jala pos rohatta na lao dihancurhon Jahowa nama portibi na jahat on, pasti dang berupaya be hita lao mangalului godang hepeng manang manganggap hepeng dohot arta gabe na uppetting di ngolutta. Taboto do tikki masa hasusaan bolon i dang marguna be hepeng. Didok di Bibel, ‘Dibolokkon akka halak ma perak ni nasida tu akka dalan.’ Boasa? Ala diboto nasida do “dang boi nasida malua dibahen perak manang mas ni nasida di ari rimas ni Jahowa i”. (Hes. 7:19) Jadi daripada habis tikkitta lao mangalului godang hepeng saonari, tabahen ma sederhana ngolutta. Na penting terpenuhi kebutuhanta dohot kebutuhan ni keluargatta, jala boi hita toktong melayani Jahowa. Unang  ma hita marutang molo dang porlu. Asing ni i, unang ma habis tikkitta lao mangurus arta na adong di hita. Ikkon manat do tong hita asa unang tabahen hepeng manang arta gabe na uppetting di ngolutta. (Mat. 6:​19, 24) Ala nungnga lam jonok ujung ni portibi on, ikkon tapillit do dia na lao taandalhon, Jahowa do manang arta dohot hepengta.

“IKKON SABAR DO HAMU JALA TOGU”

15. Boasa halak Kristen na di Jerusalem ikkon toktong setia?

¹⁵ Akka halak Kristen di Judea porlu do toktong setia manomba Jahowa alana nungnga lam jonok be hasusaan i. (Heb. 10:36) Godang do akka halak Jahudi na gabe halak Kristen tikki dame dope situasina. Alai dang hea dope diadopi nasida akka penganiayaan songon na diadopi halak Kristen di tikki naung salpu. Jadi dipaingot si Paulus ma nasida asa mempersiappon diri lao mangadopi akka penganiayaan jala asa toktong setia sahat tu na mate, songon na diulahon Jesus. (Heb. 12:4) Alai adong do akka halak Jahudi na gabe muruk jala kasar ala godang sian nasida na gabe halak Kristen. Misalna piga-piga taon sebelum dikirim si Paulus suratna i, adong do akka halak na menyerang ibana tikki marbarita di Jerusalem. Bahkan adong do lobi sian 40 halak Jahudi ‘marsumpa na so jadi mangan manang minum saleleng so dibunu nasida si Paulus’. (Ul. 22:22; 23:​12-14) Nang pe dihasogohon jala dianiaya, toktong do halak Kristen di tikki i marpungu, marbarita, jala patoguhon haporseaon ni nasida.

16. Songon dia do surat tu halak Kristen di Jerusalem mangurupi hita asa mangida manfaatna molo toktong setia? (Heber 12:7)

¹⁶ Aha do na boi mangurupi halak Kristen di Jerusalem asa boi toktong setia mangadopi sitaonon? Lomo do roha ni si Paulus asa diattusi nasida manfaatna molo toktong setia. Dipaboa ibana, memang dipaloas Jahowa do tantangan i masa tu nasida. Alai sasittongna  boi do i mangalatik nasida. (Jaha Heber 12:7.) Pelatihan i mambahen nasida berupaya padenggatton pangalaho, jala patuduhon akka sifat na denggan na mambahen las roha ni Jahowa. Molo diingot nasida akka manfaat on, gabe ummura ma nasida toktong setia.—Heb. 12:11.

17. Boasa cocok si Paulus na mangalehon poda taringot mangadopi penganiayaan?

¹⁷ Dijujui si Paulus do halak Kristen di Jerusalem asa barani jala dang menyerah tikki mangadopi sitaonon. Memang cocok do Apostel Paulus na mangalehon poda on. Boasa? Alana hea do ibana menganiaya halak Kristen jala diboto ibana do akka penganiayaan na lao diadopi nasida. Dung gabe halak Kristen si Paulus, godang do tong penganiayaan na diadopi ibana, jala diboto ibana do carana asa toktong setia mangadopi i. (2 Kor. 11:​23-25) Jadi diboto si Paulus do aha na dihaporluhon asa boi toktong setia. Dipaingot ibana do muse nasida, tikki mangadopi sitaonon porlu do nasida mengandalhon Jahowa, dang mengandalhon diri sandiri. I do alana barani si Paulus mandok songon on, “Jahowa do na mangurupi au, dang mabiar au.”—Heb. 13:6.

18. Aha do na boi terjadi tu hita di ari na naeng ro, jala songon dia do caratta mempersiappon diri?

¹⁸ Adong do piga-piga donganta na mangadopi penganiayaan saonari. Boi ma tapatudu holongta tu nasida marhite manangiakkon nasida, jala boi do talehon na dihaporluhon nasida. (Heb. 10:33) Alai takkas do didok di Bibel, “Dibahen do na haccit tu sude halak na naeng manomba Debata dohot tu sude na gabe sisean ni Kristus Jesus.” (2 Tim. 3:12) Alani i, hita sude ikkon paradehon diritta lao mangadopi hasusaan na naeng ro. Mulai sian saonari ikkon lam porsea do hita tu Jahowa, jala pos ma rohatta na urupanna do hita mangadopi sitaonon manang aha pe na lao masa. Pasti dilehon Jahowa do haluaon tu sude na setia tu Ibana.—2 Tes. 1:​7, 8.

19. Aha do na boi taulahon lao mempersiappon diritta mangadopi hasusaan bolon? (Ida gambar.)

¹⁹ Marhite surat ni si Paulus, gabe boi ma halak Kristen di abad na parjolo mempersiappon diri lao mangadopi hasusaan na lao masa. Dijujui si Paulus do nasida asa bagas mamparsiajari jala mangattusi Hata ni Debata. Molo diulahon i, boi ma nasida manolak akka ajaran na manegai haporseaon. Dijujui si Paulus do muse asa lam dipatogu haporseaon ni nasida. Tujuanna, asa hatop nasida mangihutton tudu-tudu sian Jesus dohot akka dongan na manguluhon di huria. Diurupi ibana do tong halak Kristen asa toktong setia mangadopi hasusaan. Alana boi do i gabe kesempatan di nasida asa dilatik Jahowa. Jadi hita pe, taihutton ma akka poda sian surat ni si Paulus i. Hasilna, boi ma hita toktong setia sahat tu ujungna.—Heb. 3:14.