Dang adong alasanta mandok songon i. Ala dang dohot akka sisean na 70 halak i di Borngin Parningotan, dang na berarti ditolak Jesus nasida manang nasida maninggalhon Jesus. Alana holan naeng rap dohot akka apostelna do Jesus di tikki i.

Akka apostel na 12 halak i dohot akka sisean na 70 halak i, sude do nasida sisean ni Jesus. Alai sian akka siseanna i, dipillit Jesus do 12 bawa na digoari ibana akka apostel. (Luk. 6:​12-16) Di Galilea do Jesus tikki disuru ibana ‘apostel na 12 i mamaritahon Harajaon ni Debata dohot pamaluppon na marsahit’. (Luk. 9:​1-6) Dung i tikki di Judea, ‘disuru Jesus ma 70 sisean na asing lao marbarita na uli jala disuru ma nasida dua halak sapardalanan’. (Luk. 9:51; 10:1) Jadi takkas ma taboto, godang do sisean ni Jesus di marragam daerah na paboahon taringot ibana.

Tikki i, akka halak Jahudi na gabe sisean ni Jesus mangulahon Paska dope ganup taon, mungkin rap dohot keluarga ni nasida. (2 Mus. 12:​6-11, 17-20) Dang leleng sebelum mate Jesus, lao ma ibana dohot akka apostelna tu Jerusalem. Alai dang dipangido ibana asa sude siseanna na sian Judea, Galilea, dohot Perea ro mangarayahon Paska rap dohot ibana. Jadi takkas ma, holan naeng rap dohot akka apostelna do Jesus di tikki i. Didok ibana do tu nasida, “Nungnga sai hupaima-ima andigan au rap mangan Paska dohot hamu andorang so marsitaonon au.”—Luk. 22:15.

Boasa Jesus holan naeng rap dohot akka apostelna di tikki i? Alana, nungnga jonok be tikkina lao mate nama Jesus gabe songon “Anak ni Biru-Biru ni Debata na manesa dosa ni portibi on”. (Joh. 1:29) Lao mate ma Jesus di Jerusalem. Mulai sian najolo, disi do akka halak mangalehon pelean tu Debata. Biru-biru Paska paingotton halak Israel, Jahowa do na paluahon nasida sian Mesir. Alai marhite pelean tobusan ni Jesus, umbalga do manfaat na didapot akka jolma. Gabe boi ma nasida dipalua sian dosa dohot hamatean. (1 Kor. 5:​7, 8) Ala adong tobusan ni Jesus, akka apostel na 12 halak i boi gabe fondasi ni huria Kristen. (Eps. 2:​20-22) Jala molo tajaha di bukku Pangungkapon, adong do 12 batu fondasi ni kota na badia, i ma Jerusalem na imbaru. Jala ‘di ganup batu i tarsurat do sada sian goar ni 12 apostel ni Anak ni Biru-Biru i’. (Pgk. 21:​10-14) Jadi taboto ma, dilehon do tugas na massai penting tu akka apostel i lao pasautton lomo ni roha ni Jahowa. Gabe taattusi ma, boasa Jesus holan naeng rap dohot nasida tikki mangulahon Paska na parpudi, dohot tikki mangulahon Borngin Parningotan i.

Memang, sisean ni Jesus na 70 halak i dohot akka siseanna na asing dang dohot di Borngin Parningotan i. Alai, adong do manfaat na didapot nasida sian Borngin Parningotan ni Tuan na dibahen Jesus. Di pudian ni ari, gabe halak Kristen na miniahan ma nasida na dohot di parjanjian taringot tu Harajaon, songon na dipaboa Jesus tu akka apostelna di borngin i.—Luk. 22:​29, 30.