1, 2. Dungkon manaek Jesus tu surgo, aha do na ro tu pingkiran ni angka apostel?

JONGJONG ma angka apostel di Dolok Jetun huhut mangida Jesus manaek tu surgo. (Ul. 1:9, 10) Hirahira dua taon ma Jesus mangajari, patoguhon, jala manguluhon angka apostelna. Alai saonari, ditadingkon Jesus do nasida. Aha ma na laho ulahonon ni nasida?

² Andorang so manaek tu surgo, didok Jesus tu siseanna, ”Gabe sitindangingku ma hamu di Jerusalem dohot di sandok Judea dohot di Samaria, sahat ro di ujung ni tano on.” (Ul. 1:8) Songon dia nasida mangulahon i? Marjanji do Jesus mangalehon tondi parbadia laho mangurupi nasida. (Ul. 1:5) Alai, ise do na manguluhon ulaon marbarita di liat portibi on? Diboto angka apostel, halak Israel najolo diuluhon angka baoa. Boi do ro tu pingkiran ni nasida, na laho dipillit Jahowa ma sada pamimpin na baru tu nasida.

3. (a) Dung manaek Jesus tu surgo, aha do na diulahon angka apostel? (b) Sungkunsungkun aha do na laho taalusi di artikel on?

 ³ Dung di surgo Jesus, disulingkiti angka sisean ma Surat na Badia, mangido pangurupion sian Debata, jala dipillit ma si Matias manggantihon si Judas Iskariot. (Ul. 1:15-26) Boasa on ringkot di nasida dohot di Jahowa? Diboto angka sisean do boasa ingkon 12 godang ni apostel. * Dipillit jala diajari Jesus do angka apostel asa boi manguluhon naposo ni Debata. Songon dia do Jahowa dohot Jesus mangurupi nasida mangulahon i? Songon dia do on dos tu tingkinta saonari? Songon dia do hita mangingot ”angka na manguluhon” hita, tarlumobi ”naposo haposan jala na marroha”?—Heb. 13:7; Mat. 24:45.

4. Aha do tanggung jawab na ringkot na diulahon apostel dohot sintua di Jerusalem?

⁴ Di ari Pentakoste taon 33 M, angka apostel ma na manguluhon huria Kristen. Bibel mandok, ”Hehe ma si Petrus rap dohot na sampulusada i” jala diajarhon ma hasintongan tu natorop i. (Ul. 2:14, 15) Godang sian natorop i gabe halak Kristen. Dung i, ”marsihohot do nasida di poda ni angka apostel marparsaoran”. (Ul. 2:42) Angka apostel do na martanggung jawab mangatur parhepengon di huria. (Ul. 4:34, 35) Diajari nasida do naposo ni Debata jala ditangiangkon, didok, ”Alai anggo hami, tangiang dohot ulaon jamita i ma tong huhapadothon hami.” (Ul. 6:4) Ditugashon nasida do angka na marpengalaman asa marbarita di inganan na baru. (Ul. 8:14, 15) Di pudian ni ari, angka sintua na asing na miniahan dohot angka apostel rap manguluhon huria. Nasida ma na gabe punguan na mangaradoti organisasi di tingki i, na mangalehon tudutudu tu sude huria.—Ul. 15:2.

5, 6. (a) Songon dia do na mangaradoti organisasi mandapot gogo marhite tondi parbadia? (Ida gombar di mula ni parsiajaran.) (b) Songon dia do surusuruan mangurupi na mangaradoti organisasi? (c) Songon dia do na mangaradoti organisasi ditogutogu Hata ni Debata?

⁵ Diboto halak Kristen di abad na parjolo, Jahowa na manogunogu punguan na mangaradoti organisasi marhite Jesus. Aha na paposhon rohanasida? Parjolo, dilehon tondi parbadia do gogo tu punguan na mangaradoti organisasi. (Joh. 16:13) Sude halak Kristen na miniahan manjalo tondi parbadia. Alai tarlumobi, tondi parbadia mangalehon gogo tu angka apostel dohot tu sintua di Jerusalem na manguluhon angka huria. Umpamana  taon 49 M, tondi parbadia mangurupi nasida mambahen keputusan taringot tu sunat. Diihuthon angka huria do tudutudu i. ”Gabe lam togu ma haporseaon ni angka huria i, jala lam ganda toropnasida ganup ari.” (Ul. 16:4, 5) Marhite surat taringot tu sunat i, taboto ma na mangaradoti organisasi diurupi tondi parbadia, jala dipatuduhon nasida do holong dohot haporseaon.—Ul. 15:11, 25-29; Gal. 5:22, 23.

⁶ Na paduahon, na mangaradoti organisasi diurupi surusuruan. Umpamana, disuru sada surusuruan do si Kornelius manjumpangi si Petrus. Dung dipasahat si Petrus barita na uli tu si Kornelius dohot keluargana, dijalo si Kornelius do tondi parbadia nang pe nasida ndang marsunat. Si Kornelius do halak na so marsunat na parjolo gabe Kristen. Tingki diboto apostel dohot sintua taringot on, diantusi nasida ma na dihalomohon Debata do on, jala jangkononna do nasida di huria. (Ul. 11:13-18) Sian on, boi ma taida surusuruan pe dohot do mangurupi ulaon marbarita, na diuluhon na mangaradoti organisasi. (Ul. 5:19, 20) Na patoluhon, na mangaradoti organisasi ditogutogu Hata ni Debata. Dipangke nasida do Bibel manogunogu jala manontuhon taringot tu pangantusion ni halak Kristen.—Ul. 1:20-22; 15:15-20.

7. Boasa boi tadok Jesus do na manguluhon halak Kristen di abad na parjolo?

⁷ Nang pe punguan na mangaradoti organisasi manguluhon huria, diantusi nasida do holan Jesus na gabe Pamimpin ni nasida. Boasa tadok songon i? Apostel Paulus mandok, Jesus do mamillit ”deba gabe apostel”. Didok muse, Jesus i ”Ulu” manang Pamimpin ni huria. (Eps. 4:11, 15) Angka sisean ni Jesus ndang olo mambahen goar ni angka apostel gabe goar ni punguan ni nasida, alai ”targoar . . . halak Kristen” do nasida. (Ul. 11:26) Diboto si Paulus do ringkot ni mangihuthon hasintongan sian Surat na Badia na diajarhon angka apostel dohot angka sintua. Nang pe songon i, didok apostel Paulus do, ”Naeng ma botoonmuna di rohangku: Kristus i do ulu ni ganup baoa.” Ayat on pe marlangku do tu punguan na mangaradoti organisasi. Didok si Paulus muse, ”Debata do ulu ni Kristus i.” (1 Kor. 11:2, 3) Tangkas ma, Jesus Kristus do na dipillit Jahowa laho manguluhon huria.

8, 9. Aha do tanggung jawab na ringkot na diulahon Donganta si Russell?

⁸ Di mula ni taon 1870, lomo roha ni si Charles Taze Russell dohot pigapiga donganna manomba Debata hombar tu prinsip ni Bibel, jala mangurupi na asing mangulahon na sarupa. Asa boi mangurupi halak na marbahasa na asing, dibahen nasida ma badan hukum Zion’s Watch Tower Tract Society di taon 1884, jala si Russell na manguluhon di tingki i. * Disulingkiti ma Bibel jala ndang mabiar ibana paboahon na sala do ajaran ni gareja, songon ajaran debata sitolu sada dohot tondi  na so boi mate. Diparsiajari ibana do molo haroro ni Jesus na paduahalihon ndang boi diida, jala ”paima gok angka tingki ni parbegu” di taon 1914. (Luk. 21:24) Dipangke si Russell do tingkina, gogona, dohot hepengna laho mangajari na asing taringot tu hasintongan on. Tangkas ma, dipangke Jahowa dohot Jesus do si Russell manguluhon ulaon na ringkot on.

⁹ Ndang olo si Russell pasangaphon dirina sandiri. Taon 1896, dipaboa do molo ibana dohot angka baoa na martanggung jawab, ndang olo dipasangap. Nasida pe ndang olo mambahen goar ni punguan i mamangke goar ni nasida. Di pudian ni ari, didok ibana ma, ”Ndang ulaon ni jolma on.”

10. (a) Nandigan do Jesus mamillit ”naposo haposan jala na marroha”? (b) Patorang ma boasa tadok molo Punguan na Mangaradoti Organisasi marimbar sian Lembaga MenaraPengawal.

¹⁰ Tolu taon dung marujung ngolu si Russell, dipillit Jesus ma ”naposo haposan jala na marroha” taon 1919. Aha do ulaon ni nasida? Mangalehon naposo ni Debata ”mangan di tingkina”. (Mat. 24:45) Tingki i, pigapiga baoa na miniahan di kantor pusat Brooklyn, New York, mangalehon sipanganon partondion tu sude na mangihuthon Jesus. Dungkon taon 1940, hata ”punguan na mangaradoti organisasi” disurathon di publikasinta. Tingki i, angka baoa sian Lembaga Alkitab dan Risalah Menara Pengawal boi gabe punguan na mangaradoti organisasi. Alai taon 1971, dipatorang ma muse, imbar do na Mangaradoti Organisasi tu Lembaga Menara Pengawal, na holan martanggung jawab di bagian hukum. Mulai sian i, angka baoa na miniahan na so dohot tu Lembaga, boi gabe anggota ni Punguan na Mangaradoti Organisasi. Saonari, angka donganta baoa sian ’birubiru na asing’ ma na mangurupi pigapiga badan hukum na tapangke. Ujungna, Punguan na Mangaradoti Organisasi boi mangalehon gumodang tingki paradehon sipanganon partondion. (Joh. 10:16; Ul. 6:4) Menara Pengawal 15 Juli 2013 paboahon, ”naposo haposan jala na marroha”, i ma pigapiga donganta baoa na miniahan na gabe Punguan na Mangaradoti Organisasi.

11. Songon dia do Punguan na Mangaradoti Organisasi mambahen keputusan?

¹¹ Sahali saminggu, marrapot do Punguan on laho mambahen keputusan na ringkot. On mangurupi nasida asa solhot jala marsada. (Poda 20:18) Ndang adong sian nasida na tumimbul sian na asing. Alani i, margantiganti do nasida manguluhon tingki marrapot. (1 Ptr. 5:1) Songon i do tong dibahen di onom panitia sian Punguan na Mangaradoti Organisasi. Ndang didok  rohanasida, umsangap nasida sian na asing. Ganup sian nasida didok do naposo, jala dohot manjalo sipanganon partondion sian naposo haposan jala mangihuthon i.

12. Sungkunsungkun aha do na laho taulas?

¹² Ndang langsung mangkatai Jahowa tu Punguan na Mangaradoti Organisasi tingki laho mangalehon tudutudu, jala nasida pe jolma na mardosa do. Alani i, boi do nasida sala tingki patorangkon pangantusion sian Bibel dohot manguluhon organisasi. Umpamana di Indeks Publikasi Menara Pengawal, adong topik taringot tu ”Pengertian yang Diperjelas”, na marisi angka pangantusion na baru sian Bibel mulai taon 1870. Ndang didok Jesus, ndang boi sala naposo haposan tingki paradehon sipanganon partondion. Alani i, aha ma alusta tu sungkunsungkun ni  Jesus, ’Ise do naposo haposan jala na marroha?’ (Mat. 24:45) Aha do na patuduhon molo naposo haposan, i ma Punguan na Mangaradoti Organisasi? Taulas ma tolu alana, na mangurupi punguan na mangaradoti organisasi di tingki ni angka apostel.

13. Songon dia do tondi parbadia mangurupi Punguan na Mangaradoti Organisasi?

¹³ Diurupi tondi parbadia do Punguan na Mangaradoti Organisasi. Tondi parbadia mangurupi Punguan na Mangaradoti Organisasi mangantusi hasintongan sian Bibel na so diantusi dope. Umpamana, taida ma muse daftar ”Pengertian yang Diperjelas”. Molo ndang diurupi Debata, ndang adong na boi mangantusi jala patorangkon ”hasimoon ni Debata”! (Jaha 1 Korint 2:10.) Satolop do na Mangaradoti Organisasi tu hata ni si Paulus, ”Jala i do huhatahon hami, ndada di bagasan hata habisuhon ni jolma na targuruhon, tung na pinodahon ni Tondi do.” (1 Kor. 2:13) Dung marratus taon masa haholomon dohot ajaran na so sintong, boasa pangantusion sian Bibel boi didapot muse mulai taon 1919? Alana, diurupi Debata do nasida marhite tondi parbadia!

14. Hombar tu Pangungkapon 14:6, 7, songon dia do surusuruan mangurupi Punguan na Mangaradoti Organisasi dohot naposo ni Debata saonari?

¹⁴ Diurupi surusuruan do Punguan na Mangaradoti Organisasi. Balga do tanggung jawab ni na Mangaradoti Organisasi manguluhon lobi sian ualu juta penyiar di ulaon marbarita. Boasa boi denggan jala marhasil ulaon i? Ala, diurupi surusuruan nasida. (Jaha Pangungkapon 14:6, 7.) Jotjot do surusuruan manogunogu penyiar asa pajumpang tu halak na baru martangiang mangido pangurupion ni Debata! * Nang pe godang ambatambat, tongtong do adong ulaon marbarita sahat tu saonari, ala diurupi surusuruan.

15. Songon dia do Punguan na Mangaradoti Organisasi marimbar sian angka pamimpin di gareja? Bahen ma tudosan.

¹⁵ Ditogutogu Hata ni Debata do Punguan na Mangaradoti Organisasi. (Jaha Johannes 17:17.) Rimangi ma na masa taon 1973. Menara Pengawal 1 Juni mangulas sungkunsungkun taringot ”boi do manang na ndang halak na marisap tardidi”. Didok disi ndang boi! Dienet majalah i do muse pigapiga ayat jala dipatorang, halak na marisap ingkon dipabali sian huria. (1 Kor. 5:7; 2 Kor. 7:1) Didok muse, aturan on ndang sian jolma, alai ”sian Debata, na paboahon taringot diriNa marhite HataNa, i ma Bibel.” Ndang adong agama na olo mangulahon sude na didok Hata ni Debata, ala dirimpu nasida maol do i diulahon. Sada buku taringot tu agama di Amerika Serikat mandok, ”Jotjot do pamimpin ni gareja mangganti ajaran ni nasida asa hombar tu na dihalomohon ruasna dohot godangan halak.” Alai, Punguan na Mangaradoti Organisasi ndang songon i. Lomo do rohanasida ditogutogu marhite Hata ni Debata, jala on patuduhon Jahowa do sasintongna na manguluhon naposoNa saonari.

16. Aha do sada cara laho mangingot Punguan na Mangaradoti Organisasi?

¹⁶ Jaha Heber 13:7. Bibel mandok, ”Ingot hamu ma angka na manguluhon hamu.” Sada cara laho mangulahon on, i ma manangiangkon Punguan na Mangaradoti Organisasi. (Eps. 6:18) Godang do tanggung jawab ni nasida, umpamana paradehon sipanganon partondion, manguluhon ulaon parbaritaon di liat portibi on, jala mangurus taringot tu sumbangan na laho dipangke organisasi. Alani i, ringkot do manangiangkon nasida!

17, 18. (a) Songon dia do hita mangihuthon tudutudu sian Punguan na Mangaradoti Organisasi? (b) Songon dia do ulaonta marbarita mangurupi Punguan na Mangaradoti Organisasi dohot Jesus?

¹⁷ Hita pe boi mangingot Punguan na Mangaradoti Organisasi marhite mangihuthon tudutudu ni nasida. Na dilehon marhite publikasi, parpunguan, dohot kebaktian. Nasida do na mamillit pengawas wilayah, jala pengawas wilayah do na mamillit sintua. Molo diihuthon do tudutudu ni nasida, on patuduhon na diingot pengawas wilayah dohot sintua do nasida. Tapatudu ma pangargaion tu Jesus na gabe Pamimpinta, marhite mangoloi angka baoa na manguluhon hita.—Heb. 13:17.

¹⁸ Cara na asing laho mangingot Punguan na Mangaradoti Organisasi, i ma marhiras ni roha di ulaon marbarita. Heber 13:7 manjujui halak Kristen asa maniru haporseaon ni angka na manguluhon nasida. Punguan na Mangaradoti Organisasi patuduhon haporseaon na togu marhite ringgas marbarita. Taurupi do nasida mangulahon ulaon na ringkot on? Molo taurupi, las ma rohanta tingki didok Jesus tu hita, ”Nasa na binahenmuna tu sada sian anggingku angka na metmet on, na tu Ahu do i dibahen hamu!”—Mat. 25:34-40.

19. Boasa marsitutu hamu mangihuthon Jesus na gabe Pamimpinta?

¹⁹ Tingki tu surgo, ndang dilupahon Jesus siseanna. (Mat. 28:20) Tingki di tano on, diboto do molo ibana diurupi tondi parbadia, surusuruan, dohot Hata ni Debata laho manguluhon siseanna. Saonari pe, dilehon Jesus do pangurupion na sarupa tu naposo haposan. Punguan na Mangaradoti Organisasi mangihuthon ”Birubiru i”, i  ma Jesus, ”manang tudia pe i laho”. (Pgk. 14:4) Molo taihuthon tudutudu sian na Mangaradoti Organisasi, hita pe nunga mangihuthon Jesus gabe Pamimpinta. Satongkin nai, toguonna ma hita tu hangoluan salelengna. (Pgk. 7:14-17) Ndang adong pamimpin na asing na boi mambahen janji sisongon i!